ಅಹಮದಾಬಾದ್: ಇಲ್ಲಿನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಬಹುನಿರೀಕ್ಷಿತ ಟಿ20 ವಿಶ್ವಕಪ್ 2026ರ ಫೈನಲ್ ಪಂದ್ಯದ ಸಂಭ್ರಮದ ನಡುವೆಯೇ, ಟೂರ್ನಿಯಿಂದ ಹೊರಬಿದ್ದಿದ್ದ ಇತರ ದೇಶಗಳ ತಂಡಗಳಿಗೆ ಎದುರಾಗಿದ್ದ ಬಹುದೊಡ್ಡ ಸಂಕಷ್ಟವೊಂದು ಕೊನೆಗೂ ದೂರವಾಗಿದೆ. ಇರಾನ್, ಇಸ್ರೇಲ್ ಹಾಗೂ ಅಮೆರಿಕ ನಡುವಿನ ಯುದ್ಧದ ಭೀತಿ ಮತ್ತು ಭೌಗೋಳಿಕ ಉದ್ವಿಗ್ನತೆಯಿಂದಾಗಿ ಜಾಗತಿಕ ವಿಮಾನಯಾನ ಸೇವೆಗಳು ಅಸ್ತವ್ಯಸ್ತಗೊಂಡಿದ್ದವು. ಪರಿಣಾಮವಾಗಿ, ಟೂರ್ನಿಯಲ್ಲಿ ತಮ್ಮ ಅಭಿಯಾನ ಮುಗಿಸಿದ್ದ ಹಲವು ತಂಡಗಳು ತವರಿಗೆ ಮರಳಲಾಗದೆ ದಿನಗಳ ಕಾಲ ಭಾರತದಲ್ಲೇ ಅತಂತ್ರವಾಗಿ ಉಳಿಯುವಂತಾಗಿತ್ತು. ಇದೀಗ ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಈ ಸಮಸ್ಯೆಗೆ ಅಧಿಕೃತವಾಗಿ ಪರಿಹಾರ ಕಲ್ಪಿಸಿದೆ.
ಪಶ್ಚಿಮ ಏಷ್ಯಾದಲ್ಲಿ ಉಂಟಾಗಿರುವ ಯುದ್ಧದ ವಾತಾವರಣವು ಜಾಗತಿಕ ವಿಮಾನಯಾನದ ಮೇಲೆ ತೀವ್ರ ಪರಿಣಾಮ ಬೀರಿದೆ. ವಾಣಿಜ್ಯ ವಿಮಾನಗಳ ಹಾರಾಟ ರದ್ದಾಗಿರುವ ಕಾರಣ, ಟಿ20 ವಿಶ್ವಕಪ್ನಿಂದ ಹೊರಬಿದ್ದಿದ್ದ ದಕ್ಷಿಣ ಆಫ್ರಿಕಾ, ವೆಸ್ಟ್ ಇಂಡೀಸ್ ಹಾಗೂ ಇಂಗ್ಲೆಂಡ್ ತಂಡದ ಆಟಗಾರರು ಮತ್ತು ಸಹಾಯಕ ಸಿಬ್ಬಂದಿ ಭಾರತದಲ್ಲೇ ಉಳಿದುಕೊಳ್ಳಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿತ್ತು. ಸೆಮಿಫೈನಲ್ ಪಂದ್ಯದಲ್ಲಿ ಭಾರತದ ವಿರುದ್ಧ ಸೋತು ಟೂರ್ನಿಯಿಂದ ನಿರ್ಗಮಿಸಿದ್ದ ಇಂಗ್ಲೆಂಡ್ ತಂಡ ಮುಂಬೈನಲ್ಲಿಯೇ ಉಳಿದುಕೊಂಡಿದ್ದರೆ, ಸೆಮಿಫೈನಲ್ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಮುಗ್ಗರಿಸಿದ್ದ ದಕ್ಷಿಣ ಆಫ್ರಿಕಾ ಹಾಗೂ ಸೂಪರ್-8 ಹಂತದಲ್ಲಿ ಹೊರಬಿದ್ದಿದ್ದ ವೆಸ್ಟ್ ಇಂಡೀಸ್ ತಂಡಗಳು ಕೋಲ್ಕತ್ತಾದಲ್ಲಿ ವಿಮಾನಕ್ಕಾಗಿ ಕಾಯುತ್ತಾ ಕಾಲ ಕಳೆಯುತ್ತಿದ್ದವು. ಜಿಂಬಾಬ್ವೆ ತಂಡದ ಆಟಗಾರರು ಸಹ ಇದೇ ರೀತಿಯ ಪ್ರಯಾಣದ ವಿಳಂಬವನ್ನು ಎದುರಿಸಿದ್ದರು.
ಸಂಕಷ್ಟಕ್ಕೆ ಸ್ಪಂದಿಸಿದ ಐಸಿಸಿ, ಚಾರ್ಟರ್ಡ್ ಫ್ಲೈಟ್ ವ್ಯವಸ್ಥೆ
ಆಟಗಾರರ ಪ್ರಯಾಣದ ಬಿಕ್ಕಟ್ಟನ್ನು ಗಂಭೀರವಾಗಿ ಪರಿಗಣಿಸಿದ ಐಸಿಸಿ, ಪರಿಸ್ಥಿತಿಯನ್ನು ನಿಭಾಯಿಸಲು ಮಹತ್ವದ ನಿರ್ಧಾರವನ್ನು ಕೈಗೊಂಡಿದೆ. ಸಂಕಷ್ಟದಲ್ಲಿ ಸಿಲುಕಿರುವ ತಂಡಗಳನ್ನು ಸುರಕ್ಷಿತವಾಗಿ ಅವರವರ ತಾಯ್ನಾಡಿಗೆ ಕಳುಹಿಸಲು ವಿಶೇಷ ಚಾರ್ಟರ್ಡ್ ವಿಮಾನಗಳ (Charter flights) ವ್ಯವಸ್ಥೆಯನ್ನು ಮಾಡಿದೆ. ಈ ಕ್ರಮವು ದಿನಗಳ ಕಾಲ ಪ್ರಯಾಣದ ಅನುಮತಿಗಾಗಿ ಕಾಯುತ್ತಿದ್ದ ಆಟಗಾರರು ಹಾಗೂ ಸಿಬ್ಬಂದಿಗೆ ಬಹುದೊಡ್ಡ ನೆಮ್ಮದಿ ತಂದಿದೆ. ವರದಿಗಳ ಪ್ರಕಾರ, ಇಂಗ್ಲೆಂಡ್ ತಂಡವು ಶನಿವಾರ (ಮಾರ್ಚ್ 7) ಸಂಜೆ ಮುಂಬೈನಿಂದ ನೇರವಾಗಿ ಲಂಡನ್ಗೆ ವಿಶೇಷ ವಿಮಾನದಲ್ಲಿ ಪ್ರಯಾಣ ಬೆಳೆಸಿದೆ. ಮತ್ತೊಂದೆಡೆ, ಕೋಲ್ಕತ್ತಾದಲ್ಲಿ ಸಿಲುಕಿದ್ದ ದಕ್ಷಿಣ ಆಫ್ರಿಕಾ ಮತ್ತು ವೆಸ್ಟ್ ಇಂಡೀಸ್ ತಂಡಗಳು ಜಂಟಿಯಾಗಿ ಒಂದೇ ವಿಶೇಷ ವಿಮಾನದಲ್ಲಿ ಜೋಹಾನ್ಸ್ಬರ್ಗ್ಗೆ ಪ್ರಯಾಣಿಸಲಿವೆ. ಅಲ್ಲಿಂದ ವೆಸ್ಟ್ ಇಂಡೀಸ್ ಆಟಗಾರರು ತಮ್ಮ ಮುಂದಿನ ಪ್ರಯಾಣವನ್ನು ಮುಂದುವರಿಸಲಿದ್ದಾರೆ.
ನ್ಯೂಜಿಲೆಂಡ್ಗೆ ಪ್ರಯಾಣ ಬೆಳೆಸಲಿರುವ ಕೆಲವು ಆಫ್ರಿಕಾ ಆಟಗಾರರು
ದಕ್ಷಿಣ ಆಫ್ರಿಕಾ ತಂಡದ ಬಹುಪಾಲು ಆಟಗಾರರು ಈ ವಿಶೇಷ ವಿಮಾನದ ಮೂಲಕ ತವರಿಗೆ ಮರಳುತ್ತಿದ್ದರೆ, ತಂಡದ ಪ್ರಮುಖ ಆಟಗಾರರಾದ ಕೇಶವ್ ಮಹಾರಾಜ್, ಜೇಸನ್ ಸ್ಮಿತ್ ಮತ್ತು ಜಾರ್ಜ್ ಲಿಂಡೆ ಅವರು ವಿಭಿನ್ನ ಮಾರ್ಗವನ್ನು ಹಿಡಿಯಲಿದ್ದಾರೆ. ಮುಂಬರುವ ಸೀಮಿತ ಓವರ್ಗಳ ಸರಣಿಯಲ್ಲಿ ಪಾಲ್ಗೊಳ್ಳುವ ಸಲುವಾಗಿ ಈ ಮೂವರು ಆಟಗಾರರು ನೇರವಾಗಿ ನ್ಯೂಜಿಲೆಂಡ್ಗೆ ಪ್ರಯಾಣ ಬೆಳೆಸಲು ಸಜ್ಜಾಗಿದ್ದಾರೆ. ಇನ್ನು ಮಾರ್ಚ್ ಆರಂಭದಲ್ಲೇ ಟೂರ್ನಿಯಿಂದ ಹೊರಬಿದ್ದಿದ್ದ ಜಿಂಬಾಬ್ವೆ ತಂಡದ ಕೆಲವು ಸದಸ್ಯರು ವಿಮಾನಯಾನದ ಟಿಕೆಟ್ ಲಭ್ಯತೆಯ ಆಧಾರದ ಮೇಲೆ ಹಂತ ಹಂತವಾಗಿ ಭಾರತದಿಂದ ನಿರ್ಗಮಿಸುತ್ತಿದ್ದಾರೆ.
ಫೈನಲ್ ಪಂದ್ಯಕ್ಕೂ ಮುನ್ನ ಅದ್ದೂರಿ ಸಮಾರೋಪ ಸಮಾರಂಭ
ಒಂದೆಡೆ ಪ್ರಯಾಣದ ವಿಘ್ನಗಳು ನಿವಾರಣೆಯಾಗುತ್ತಿದ್ದರೆ, ಮತ್ತೊಂದೆಡೆ ಅಹಮದಾಬಾದ್ನಲ್ಲಿ ಕ್ರಿಕೆಟ್ ಹಬ್ಬದ ಕಳೆಗಟ್ಟಿದೆ. ಭಾನುವಾರ ಸಂಜೆ 5:30ಕ್ಕೆ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಟಿ20 ವಿಶ್ವಕಪ್ 2026ರ ಅದ್ದೂರಿ ಸಮಾರೋಪ ಸಮಾರಂಭ ಜರುಗಲಿದೆ. ಪಂದ್ಯ ವೀಕ್ಷಿಸಲು ಸೇರಲಿರುವ ಸುಮಾರು ಒಂದು ಲಕ್ಷಕ್ಕೂ ಅಧಿಕ ಅಭಿಮಾನಿಗಳನ್ನು ರಂಜಿಸಲು ಭರ್ಜರಿ ಮನರಂಜನಾ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಖ್ಯಾತ ಜಾಗತಿಕ ಪಾಪ್ ಗಾಯಕ ರಿಕಿ ಮಾರ್ಟಿನ್ ತಮ್ಮ ಗಾಯನದ ಮೂಲಕ ಪ್ರೇಕ್ಷಕರನ್ನು ರಂಜಿಸಲಿದ್ದಾರೆ. ಅವರೊಂದಿಗೆ, ಪಂಜಾಬಿ ಸಂಗೀತ ತಾರೆ ಸುಖ್ಬೀರ್ ಹಾಗೂ ‘ದಾಂಡಿಯಾ ಕ್ವೀನ್’ ಖ್ಯಾತಿಯ ಗುಜರಾತಿ ಜಾನಪದ ಗಾಯಕಿ ಫಾಲ್ಗುಣಿ ಪಾಠಕ್ ಅವರು ತಮ್ಮ ಸಾಂಪ್ರದಾಯಿಕ ಮತ್ತು ಹುರುಪಿನ ಹಾಡುಗಳ ಮೂಲಕ ಕ್ರೀಡಾಂಗಣದಲ್ಲಿ ಹಬ್ಬದ ವಾತಾವರಣ ಸೃಷ್ಟಿಸಲಿದ್ದಾರೆ.
ಇದನ್ನೂ ಓದಿ : ಟಿ20 ವಿಶ್ವಕಪ್ ಫೈನಲ್ : ಟೀಂ ಇಂಡಿಯಾ ಗೆಲುವಿನ ಕನಸಿಗೆ ವರುಣ್ ಚಕ್ರವರ್ತಿ ಕಂಟಕವಾಗಲಿದ್ದಾರೆಯೇ? ಕುಂಬ್ಳೆ ಎಚ್ಚರಿಕೆ
