ಚೆನ್ನೈ/ಅಬುಧಾಬಿ: ಡಿಸೆಂಬರ್ 16 ರಂದು ಅಬುಧಾಬಿಯಲ್ಲಿ ನಡೆಯಲಿರುವ ಐಪಿಎಲ್ 2026ರ ಅಧಿಕೃತ ಮಿನಿ ಹರಾಜಿಗೂ ಮುನ್ನ, ಹಿರಿಯ ಸ್ಪಿನ್ನರ್ ಆರ್. ಅಶ್ವಿನ್ ಆಯೋಜಿಸಿದ್ದ ‘ಮಾಕ್ ಹರಾಜು‘ (Mock Auction) ಕ್ರಿಕೆಟ್ ವಲಯದಲ್ಲಿ ತೀವ್ರ ಕುತೂಹಲ ಕೆರಳಿಸಿದೆ. ಈ ಅಣಕು ಪ್ರಕ್ರಿಯೆಯಲ್ಲಿ ಆಸ್ಟ್ರೇಲಿಯಾದ ಸ್ಟಾರ್ ಆಲ್ ರೌಂಡರ್ ಕ್ಯಾಮರೂನ್ ಗ್ರೀನ್ ಬರೋಬ್ಬರಿ 21 ಕೋಟಿ ರೂ.ಗಳಿಗೆ ಚೆನ್ನೈ ಸೂಪರ್ ಕಿಂಗ್ಸ್ ಪಾಲಾಗುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.
ಸಿಎಸ್ಕೆ ಮತ್ತು ಕೆಕೆಆರ್ ನಡುವೆ ಬಿಡ್ಡಿಂಗ್ ವಾರ್
ಅಶ್ವಿನ್ ಅವರ ಈ ಅಣಕು ಹರಾಜಿನಲ್ಲಿ ಗ್ರೀನ್ ಅವರಿಗಾಗಿ ಫ್ರಾಂಚೈಸಿಗಳ ನಡುವೆ ಭಾರೀ ಪೈಪೋಟಿ ನಡೆಯಿತು. ಆರಂಭದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು 10 ಕೋಟಿ ರೂ.ಗಳೊಂದಿಗೆ ಬಿಡ್ಡಿಂಗ್ ಆರಂಭಿಸಿದರೆ, ನಂತರ ಲಕ್ನೋ ಸೂಪರ್ ಜೈಂಟ್ಸ್ ಕೂಡ ಸ್ಪರ್ಧೆಗೆ ಇಳಿಯಿತು. ಆದರೆ, ಬಜೆಟ್ ಕೊರತೆಯ ಕಾರಣದಿಂದಾಗಿ 14.25 ಕೋಟಿ ರೂ.ವರೆಗೆ ಬಿಡ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ಹಿಂದೆ ಸರಿಯಿತು. ಅಂತಿಮ ಹಂತದಲ್ಲಿ ಕಣಕ್ಕಿಳಿದ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ ನಡುವೆ ಜಿದ್ದಾಜಿದ್ದಿನ ಪೈಪೋಟಿ ಏರ್ಪಟ್ಟಿತು. ಕೆಕೆಆರ್ ಬಳಿ 64.30 ಕೋಟಿ ರೂ.ಗಳ ಬೃಹತ್ ಮೊತ್ತದ ಪರ್ಸ್ ಇದ್ದರೂ, ಅಂತಿಮವಾಗಿ ಸಿಎಸ್ಕೆ 21 ಕೋಟಿ ರೂ. ಬಿಡ್ ಮಾಡುವ ಮೂಲಕ ಗ್ರೀನ್ ಅವರನ್ನು ತನ್ನದಾಗಿಸಿಕೊಂಡಿತು.
ರಸೆಲ್ ಸ್ಥಾನ ತುಂಬುವರೇ ಗ್ರೀನ್?
ಕೆಕೆಆರ್ ತಂಡವು ತನ್ನ ಪ್ರಮುಖ ಆಟಗಾರ ಆಂಡ್ರೆ ರಸೆಲ್ ಅವರನ್ನು ಬಿಡುಗಡೆ ಮಾಡಿರುವುದರಿಂದ, ಅವರ ಸ್ಥಾನ ತುಂಬಲು ಕ್ಯಾಮರೂನ್ ಗ್ರೀನ್ ಅವರಂತಹ ಬಲಿಷ್ಠ ಆಲ್ ರೌಂಡರ್ ಮೇಲೆ ಕಣ್ಣಿಟ್ಟಿದೆ. ಹಾರ್ದಿಕ್ ಪಾಂಡ್ಯ ಅವರಂತೆಯೇ ಅಪರೂಪದ ಕೌಶಲ್ಯ ಹೊಂದಿರುವ ಗ್ರೀನ್ ಅವರಿಗೆ ನೈಜ ಹರಾಜಿನಲ್ಲೂ ಭಾರೀ ಬೇಡಿಕೆ ಬರುವ ಸಾಧ್ಯತೆಯಿದೆ. ಅಶ್ವಿನ್ ಅವರ ಅಣಕು ಹರಾಜಿನಲ್ಲಿ ಕೆಕೆಆರ್ ಸೋಲೊಪ್ಪಿಕೊಂಡಿದ್ದರೂ,
ಅಬುಧಾಬಿಯಲ್ಲಿ ನಡೆಯುವ ನೈಜ ಹರಾಜಿನಲ್ಲಿ ತಮ್ಮ ದೊಡ್ಡ ಮೊತ್ತದ ಹಣವನ್ನು ಬಳಸಿ ಗ್ರೀನ್ ಅವರನ್ನು ಖರೀದಿಸುತ್ತದೆಯೇ ಅಥವಾ ಸಿಎಸ್ಕೆ ಮತ್ತೆ ಮೇಲುಗೈ ಸಾಧಿಸುತ್ತದೆಯೇ ಎಂಬುದು ಈಗಿನ ಕುತೂಹಲವಾಗಿದೆ.
ಹರಾಜಿನಲ್ಲಿ ಗ್ರೀನ್ ಇತಿಹಾಸ
ಕ್ಯಾಮರೂನ್ ಗ್ರೀನ್ ಈ ಹಿಂದೆಯೂ ಐಪಿಎಲ್ ಹರಾಜಿನಲ್ಲಿ ದೊಡ್ಡ ಮೊತ್ತ ಗಳಿಸಿದ ಇತಿಹಾಸ ಹೊಂದಿದ್ದಾರೆ. 2023ರಲ್ಲಿ ಮುಂಬೈ ಇಂಡಿಯನ್ಸ್ ಇವರಿಗಾಗಿ 17.50 ಕೋಟಿ ರೂ. ನೀಡಿತ್ತು. ನಂತರ 2024ರಲ್ಲಿ ಟ್ರೇಡ್ ಮೂಲಕ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಸೇರಿಕೊಂಡಾಗಲೂ ಅವರ ಮೌಲ್ಯ ಅದೇ 17.50 ಕೋಟಿ ರೂ. ಆಗಿತ್ತು ಎಂಬುದು ಗಮನಾರ್ಹ.
ಇದನ್ನೂ ಓದಿ: 2026ರ ಟಿ20 ವಿಶ್ವಕಪ್ : ಟೀಮ್ ಇಂಡಿಯಾದ ವಿಶ್ವಕಪ್ ಕನಸಿಗೆ ಕುತ್ತಾಗಬಲ್ಲ 6 ‘ತಪ್ಪು’ ನಿರ್ಧಾರಗಳು!
