ಬೆಂಗಳೂರು: ಭಾರತದಲ್ಲಿ ದಿನೇದಿನೆ ವಾಹನಗಳ ಸಂಖ್ಯೆ ಹೆಚ್ಚಾಗುವ ಜತೆಗೆ ವಾಹನಗಳ ಅಪಘಾತ ಪ್ರಕರಣಗಳೂ ಜಾಸ್ತಿಯಾಗುತ್ತಿವೆ. ಅದರಲ್ಲೂ, ಕಾರು ಅಪಘಾತಗಳು ಸಾಮಾನ್ಯ ಎಂಬಂತಾಗಿದೆ. ಭಾರತದಲ್ಲಿ 2024ರಲ್ಲಿ ವಾಹನಗಳ ಅಪಘಾತದಲ್ಲಿ 1.8 ಲಕ್ಷ ಮಂದಿ ಮೃತಪಟ್ಟಿದ್ದಾರೆ ಎಂಬುದು ಆತಂಕಪಡುವ ಸಂಗತಿಯಾಗಿದೆ. ಇದೇ ರೀತಿ ಲಕ್ಷಾಂತರ ಜನ ಅಪಘಾತಗಳಲ್ಲಿ ಗಾಯಗೊಂಡಿದ್ದಾರೆ. ಇನ್ನು, ಕಾರು ಅಪಘಾತವಾದ ತಕ್ಷಣ ಏನು ಮಾಡಬೇಕು? ವಿಮೆ ಹೇಗೆ ಕ್ಲೆಮ್ ಮಾಡಬೇಕು ಎಂಬುದರ ಮಾಹಿತಿ ಇಲ್ಲಿದೆ.
ಸುರಕ್ಷತೆಗೆ ಆದ್ಯತೆ ಕೊಡಿ
ಕಾರು ಅಪಘಾತ ಉಂಟಾದ ಕೂಡಲೇ ಕಾರಿನಲ್ಲಿದ್ದವರ ಸುರಕ್ಷತೆ ಕಡೆಗೆ ಮೊದಲು ಗಮನಹರಿಸಬೇಕು. ಗಾಯಗೊಂಡಿದ್ದರೆ ಮೊದಲು ಚಿಕಿತ್ಸೆ ಪಡೆಯುವಂತಾಗಬೇಕು. ಇದಾದ ಬಳಿಕ ಮೊದಲು ಇನ್ಷೂರೆನ್ಸ್ ಕಂಪನಿಗೆ ಅಪಘಾತದ ಮಾಹಿತಿ ತಿಳಿಸಬೇಕು. ಅಪಘಾತವಾಗಿ 24 ಗಂಟೆಯೊಳಗೆ ಮಾಹಿತಿ ನೀಡಬೇಕು. ಇದರಿಂದ ಕ್ಷಿಪ್ರವಾಗಿ ಕ್ಲೇಮ್ ಸಿಗುತ್ತದೆ. ಇಲ್ಲದಿದ್ದರೆ ರಿಜೆಕ್ಟ್ ಆಗುವ ಸಾಧ್ಯತೆ ಇರುತ್ತದೆ.
ಎಫ್ಐಆರ್ ದಾಖಲಿಸಿ
ಅಪಘಾತ ಸಂಭಿವಿಸಿದಾಗ, ಅದರಲ್ಲೂ ಥರ್ಡ್ ಪಾರ್ಟಿ ಡ್ಯಾಮೇಜ್ ಅಂದರೆ ಕಾರ್ ಅಪಘಾತದಲ್ಲಿ ಬೇರೆಯ ವ್ಯಕ್ತಿಗಳಿಗೆ ಗಾಯವಾದರೆ ಅಥವಾ ಸಾವಾದರೆ, ಸಮೀಪದ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ಮೂಲಕ ಪ್ರಕರಣ ದಾಖಲಿಸಬೇಕು. ಹಲವು ಅಪಘಾತ ಪ್ರಕರಣಗಳಲ್ಲಿ ವಿಮಾ ಕಂಪನಿಗಳು ಪೊಲೀಸ್ ಎಫ್ಐಆರ್ ಪ್ರತಿ ಕೇಳುತ್ತವೆ. ನೀವು ಕ್ಲೇಮ್ ಸಲ್ಲಿಸುವಾಗ ಅಗತ್ಯ ದಾಖಲೆಗಳಾದ ಎಫ್ಐಆರ್, ಡ್ರೈವಿಂಗ್ ಲೈಸೆನ್ಸ್, ಪಾಲಿಸಿಯ ಕಾಪಿ, ಆರ್ ಸಿ ಪ್ರತಿ ನೀಡಬೇಕು.
ಯಾವ ವಿಮೆ ಸೂಕ್ತ?
ಹೆಚ್ಚಿನ ಮಂದಿ ದುಡ್ಡು ಉಳಿಸಲು ಥರ್ಡ್ ಪಾರ್ಟಿ ಇನ್ಶೂರೆನ್ಸ್ ಮಾತ್ರ ಖರೀದಿಸುತ್ತಾರೆ. ಆದರೆ, ಕಾಂಪ್ರಹೆನ್ಸಿವ್ ಇನ್ಶೂರೆನ್ಸ್ ಖರೀದಿಸುವುದು ಸೂಕ್ತ. ಕಾಂಪ್ರಹೆನ್ಸಿವ್ ಪಾಲಿಸಿಯಲ್ಲಿ ನಿಮಗೂ ಹಾಗೂ ಥರ್ಡ್ ಪಾರ್ಟಿ ಇಬ್ಬರಿಗೂ ಇನ್ಷೂರೆನ್ಸ್ ಕವರೇಜ್ ಇರುತ್ತದೆ. ನಿಮ್ಮ ವಾಹನಕ್ಕೆ ಹಾನಿಯಾದರೆ ನಿರ್ದಿಷ್ಟ ಮೊತ್ತದ ಪರಿಹಾರ ಸಿಗುತ್ತದೆ. ಪಾಲಿಸಿ ಪಡೆಯುವಾಗ ಅದರಲ್ಲಿ ಯಾವೆಲ್ಲಾ ಅಂಶಗಳನ್ನು ಪರಿಗಣಿಸಲಾಗಿದೆ ಎಂಬುದನ್ನು ವಿವರಿಸಲಾಗಿರುತ್ತದೆ. ನೀವು ಎಷ್ಟು ಹಣಕ್ಕೆ ಕ್ಲೇಮ್ ಮಾಡಬಹುದು ಎಂಬುದು ನಿಮಗೆ ತಿಳಿಯುತ್ತದೆ. ಹಾಗಾಗಿ, ಕಾಂಪ್ರಹೆನ್ಸಿವ್ ಇನ್ಶೂರೆನ್ಸ್ ಸೂಕ್ತ.
