ಲೀಡ್ಸ್: ಭಾರತ ಮತ್ತು ಇಂಗ್ಲೆಂಡ್ ನಡುವೆ ಮುಂಬರುವ ಐದು ಪಂದ್ಯಗಳ ಟೆಸ್ಟ್ ಸರಣಿಗೆ ಕಾವು ಏರುತ್ತಿದ್ದಂತೆ, ಭಾರತ ತಂಡದ ಬ್ಯಾಟಿಂಗ್ ಕ್ರಮಾಂಕದ ಸುತ್ತ ನಡೆಯುತ್ತಿದ್ದ ಊಹಾಪೋಹಗಳಿಗೆ ಉಪನಾಯಕ ರಿಷಭ್ ಪಂತ್ ತೆರೆ ಎಳೆದಿದ್ದಾರೆ. ಜೂನ್ 20ರಂದು ಲೀಡ್ಸ್ನಲ್ಲಿ ಆರಂಭವಾಗುವ ಮೊದಲ ಟೆಸ್ಟ್ ಪಂದ್ಯಕ್ಕೂ ಮುನ್ನ, ಭಾರತದ ಬ್ಯಾಟಿಂಗ್ ಶಕ್ತಿಯ ಕೇಂದ್ರಬಿಂದುವಾಗಿದ್ದ ವಿರಾಟ್ ಕೊಹ್ಲಿ ನಿವೃತ್ತಿಯ ನಂತರ 4ನೇ ಕ್ರಮಾಂಕದಲ್ಲಿ ಶುಭಮನ್ ಗಿಲ್ ಆಡಲಿದ್ದಾರೆ ಎಂದು ಪಂತ್ ಖಚಿತಪಡಿಸಿದ್ದಾರೆ. ಅಲ್ಲದೆ, ತಾನು 5ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವುದಾಗಿ ಪಂತ್ ಸ್ಪಷ್ಟಪಡಿಸಿದ್ದಾರೆ.
ವಿರಾಟ್ ಕೊಹ್ಲಿಯಂತಹ ದಿಗ್ಗಜ ಆಟಗಾರ ನಿವೃತ್ತರಾದ ಬಳಿಕ, ಅವರ ನಾಲ್ಕನೇ ಕ್ರಮಾಂಕಕ್ಕೆ ಯಾರು ಸರಿಹೊಂದುತ್ತಾರೆ ಎಂಬುದು ಭಾರತೀಯ ಕ್ರಿಕೆಟ್ನಲ್ಲಿ ದೊಡ್ಡ ಚರ್ಚೆಯಾಗಿತ್ತು. ಯುವ ಪ್ರತಿಭೆ ಶುಭಮನ್ ಗಿಲ್ ವಿವಿಧ ಕ್ರಮಾಂಕಗಳಲ್ಲಿ ಆಡಿದ್ದರೂ, ಇದೀಗ ಅವರಿಗೆ ತಂಡದ ಪ್ರಮುಖ ಬ್ಯಾಟಿಂಗ್ ಸ್ಥಾನವಾದ ನಾಲ್ಕನೇ ಕ್ರಮಾಂಕವನ್ನು ಒಪ್ಪಿಸಲಾಗಿದೆ. ಇದು ಗಿಲ್ ಮೇಲಿನ ತಂಡದ ನಂಬಿಕೆ ಮತ್ತು ಭವಿಷ್ಯದ ಯೋಜನೆಗಳನ್ನು ಎತ್ತಿ ತೋರಿಸುತ್ತದೆ.
“ಮೂರನೇ ಕ್ರಮಾಂಕದಲ್ಲಿ ಯಾರು ಬ್ಯಾಟ್ ಮಾಡುತ್ತಾರೆ ಎಂಬುದರ ಕುರಿತು ಇನ್ನೂ ಚರ್ಚೆ ನಡೆಯುತ್ತಿದೆ ಎಂದು ನಾನು ಭಾವಿಸುತ್ತೇನೆ. ಆದರೆ ನಾಲ್ಕು ಮತ್ತು ಐದನೇ ಸ್ಥಾನದಲ್ಲಿ ಯಾರು ಆಡಬೇಕೆಂದು ಖಂಡಿತವಾಗಿಯೂ ನಿರ್ಧರಿಸಲಾಗಿದೆ. ಶುಭಮನ್ ಗಿಲ್ ನಾಲ್ಕನೇ ಸ್ಥಾನದಲ್ಲಿ ಬ್ಯಾಟ್ ಮಾಡಲಿದ್ದಾರೆ ಮತ್ತು ನಾನು ಐದನೇ ಸ್ಥಾನದಲ್ಲಿ ಆಡುತ್ತೇನೆ. ಉಳಿದ ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆ ತಂಡದ ಮ್ಯಾನೇಜ್ಮೆಂಟ್ ನಿರ್ಧರಿಸುತ್ತದೆ,” ಎಂದು ರಿಷಭ್ ಪಂತ್ ಬುಧವಾರ ಮಾಧ್ಯಮಗಳಿಗೆ ತಿಳಿಸಿದರು.
ಪಂತ್-ಗಿಲ್ ಬಾಂಧವ್ಯ: ಮೈದಾನದೊಳಗೂ ಮೈದಾನದ ಹೊರಗೂ!
ಶುಭಮನ್ ಗಿಲ್ ಜೊತೆಗಿನ ತಮ್ಮ ಸಂಬಂಧದ ಬಗ್ಗೆ ರಿಷಭ್ ಪಂತ್ ಆತ್ಮೀಯವಾಗಿ ಮಾತನಾಡಿದ್ದಾರೆ. “ಶುಭಮನ್ ಮತ್ತು ನಾನು ಮೈದಾನದ ಹೊರಗೆ ಉತ್ತಮ ಸಂಬಂಧವನ್ನು ಹೊಂದಿದ್ದೇವೆ. ನೀವು ಮೈದಾನದ ಹೊರಗೆ ಉತ್ತಮ ಸ್ನೇಹಿತರಾಗಿದ್ದರೆ, ಈ ಬಾಂಧವ್ಯವು ಅಂತಿಮವಾಗಿ ಮೈದಾನದಲ್ಲಿಯೂ ಉತ್ತಮವಾಗಿ ಇರುತ್ತದೆ. ನಾನು ಯಾವಾಗಲೂ ಇದರಲ್ಲಿ ನಂಬಿಕೆ ಇಟ್ಟಿದ್ದೇನೆ,” ಎಂದು ಪಂತ್ ಹೇಳಿದರು. ಇವರಿಬ್ಬರ ನಡುವಿನ ಉತ್ತಮ ಒಡನಾಟ ಬ್ಯಾಟಿಂಗ್ನಲ್ಲಿ ಪೂರಕವಾಗಿ ಕಾರ್ಯನಿರ್ವಹಿಸಲು ಸಹಾಯಕವಾಗಲಿದೆ.
ಆಂಡರ್ಸನ್-ಬ್ರಾಡ್ ಅನುಪಸ್ಥಿತಿ
ಇಂಗ್ಲೆಂಡ್ ತಂಡದಲ್ಲಿ ಅನುಭವಿ ವೇಗಿಗಳಾದ ಜೇಮ್ಸ್ ಆಂಡರ್ಸನ್ ಮತ್ತು ಸ್ಟುವರ್ಟ್ ಬ್ರಾಡ್ ಇಬ್ಬರೂ ಇಲ್ಲದಿರುವುದು ಭಾರತಕ್ಕೆ ಒಂದೆಡೆ ಸಮಾಧಾನ ತಂದಿದೆ ಎಂದು ಪಂತ್ ಒಪ್ಪಿಕೊಂಡರು. ಆಂಡರ್ಸನ್ ಮತ್ತು ಬ್ರಾಡ್ ದಶಕಗಳಿಂದ ಇಂಗ್ಲೆಂಡ್ನ ವೇಗದ ಬೌಲಿಂಗ್ ಆಕ್ರಮಣದ ಆಧಾರ ಸ್ತಂಭವಾಗಿದ್ದರು.
“ಖಂಡಿತವಾಗಿಯೂ ಇಬ್ಬರೂ (ಆಂಡರ್ಸನ್ ಮತ್ತು ಬ್ರಾಡ್) ತಂಡದಲ್ಲಿ ಇಲ್ಲದಿರುವುದು ತುಂಬಾ ಸಂತೋಷವನ್ನು ನೀಡುತ್ತದೆ. ಅವರು ಹಲವು ವರ್ಷಗಳಿಂದ ಇಂಗ್ಲೆಂಡ್ ಪರ ಆಡುತ್ತಿದ್ದಾರೆ ಮತ್ತು ನಾನು ಕೇವಲ ಎರಡು ಪ್ರವಾಸಗಳಿಗೆ (ಇಂಗ್ಲೆಂಡ್ ವಿರುದ್ಧ) ಬಂದಿದ್ದೇನೆ. ಅವರ ಅನುಪಸ್ಥಿತಿ ನಮಗೆ ಸ್ವಲ್ಪ ಅನುಕೂಲವಾಗಲಿದೆ” ಎಂದು ಪಂತ್ ಹೇಳಿದರು.
ಆದರೆ, ಇಂಗ್ಲೆಂಡ್ನ ಪ್ರಸ್ತುತ ಬೌಲಿಂಗ್ ದಾಳಿಯನ್ನು ಹಗುರವಾಗಿ ಪರಿಗಣಿಸಬಾರದು ಎಂದು ಪಂತ್ ಎಚ್ಚರಿಸಿದ್ದಾರೆ. “ಇಂಗ್ಲೆಂಡ್ನ ಬೌಲಿಂಗ್ ದಾಳಿಯು ಸಾಕಷ್ಟು ಸಾಮರ್ಥ್ಯವನ್ನು ಹೊಂದಿದೆ.
ನಮ್ಮ ತಂಡವು ಕೂಡ ಯುವಕರಾಗಿರುವುದರಿಂದ ನಾವು ಯಾರನ್ನೂ ಹಗುರವಾಗಿ ಪರಿಗಣಿಸಲು ಬಯಸುವುದಿಲ್ಲ. ಅವರು ಇನ್ನೂ ತಮ್ಮನ್ನು ತಾವು ಅಭಿವೃದ್ಧಿಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ಅದೇ ಸಮಯದಲ್ಲಿ ನಾವು ನಮ್ಮ ಕ್ರಿಕೆಟ್ ಆಡಬೇಕು ಮತ್ತು ಅಗತ್ಯವಿರುವಲ್ಲಿ ಬೌಲರ್ಗಳು ಹಾಗೂ ಎದುರಾಳಿ ತಂಡವನ್ನು ಗೌರವಿಸಬೇಕು,” ಎಂದು ಉಪನಾಯಕ ಒತ್ತಿ ಹೇಳಿದರು.
