ಮ್ಯಾಚ್ ಫಿಕ್ಸಿಂಗ್ ಕೇಸ್‌ : ಶ್ರೀಲಂಕಾದಲ್ಲಿ ಜಾಮೀನು ನಿರಾಕರಣೆ.. ಜೈಲಲ್ಲೇ ಉಳಿಯಲಿದ್ದಾರೆ ಕಲ್ರಾ!

ಮುಂಬೈ : ಶ್ರೀಲಂಕಾದಲ್ಲಿ ನಡೆಯುತ್ತಿರುವ ಲಂಕಾ ಪ್ರೀಮಿಯರ್ ಲೀಗ್ (ಎಲ್‌ಪಿಎಲ್) ಮೆಗಾ ಕ್ರಿಕೆಟ್ ಟೂರ್ನಿಯಲ್ಲಿ ಮ್ಯಾಚ್ ಫಿಕ್ಸಿಂಗ್ ಆರೋಪ ಹೊತ್ತು ಬಂಧನಕ್ಕೊಳಗಾಗಿದ್ದ ಭಾರತದ ಮಾಜಿ ಕ್ರಿಕೆಟಿಗ, ಜಾಫ್ನಾ ಕಿಂಗ್ಸ್ ಫ್ರಾಂಚೈಸಿಯ ಸಹ-ಮಾಲೀಕ ಮಂಜೋತ್ ಕಲ್ರಾ ಮತ್ತು ಯುವರಾಜ್ ಪುಷ್ಪಾಗೆ ಶ್ರೀಲಂಕಾ ನ್ಯಾಯಾಲಯ ಜಾಮೀನು ನಿರಾಕರಿಸಿದೆ. ಕ್ರೀಡಾ ಭ್ರಷ್ಟಾಚಾರ ವಿರೋಧಿ ತನಿಖಾಧಿಕಾರಿಗಳ ವಿಚಾರಣೆ ಮುಂದುವರಿದಿರುವ ಹಿನ್ನೆಲೆಯಲ್ಲಿ ಆರೋಪಿಗಳು ಇನ್ನೂ ಹೆಚ್ಚಿನ ದಿನಗಳ ಕಾಲ ನ್ಯಾಯಾಂಗ ಬಂಧನದಲ್ಲಿಯೇ ಇರಬೇಕಾಗಿದೆ.

ಅನಾರೋಗ್ಯದ ನೆಪ ಒಡ್ಡಿದರೂ ಸಿಗದ ರಿಲೀಫ್

ಇದೇ ಜುಲೈ 17ರಂದು ಬಂಧನಕ್ಕೊಳಗಾಗಿದ್ದ ಕಲ್ರಾ ಮತ್ತು ಯುವರಾಜ್ ಪುಷ್ಪಾಗೆ ಜುಲೈ 31ರವರೆಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿತ್ತು. ಈ ನಡುವೆ ಶೀಘ್ರ ಜಾಮೀನು ಕೋರಿ ಕೊಲಂಬೊದ ಮುಖ್ಯ ಮ್ಯಾಜಿಸ್ಟ್ರೇಟ್ ಅಸಂಗ ಎಸ್. ಬೋದರಗಾಮ ಅವರ ಮುಂದೆ ಅರ್ಜಿ ಸಲ್ಲಿಸಲಾಗಿತ್ತು. ಆರೋಪಿಗಳ ಪರ ವಕೀಲರಾದ ಕೆ.ಡಬ್ಲ್ಯು.ಎಸ್. ಫೆರ್ನಾಂಡೋ ಅವರು, ತಮ್ಮ ಕಕ್ಷಿದಾರರು ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದು, ಅವರಿಗೆ ತುರ್ತು ಜಾಮೀನು ಮಂಜೂರು ಮಾಡಬೇಕು ಎಂದು ಮನವಿ ಮಾಡಿದ್ದರು. ಆದರೆ, ಇದನ್ನು ತೀವ್ರವಾಗಿ ವಿರೋಧಿಸಿದ ಪ್ರಾಸಿಕ್ಯೂಷನ್, ಸುಳ್ಳು ನೆಪ ಒಡ್ಡಿ ಜಾಮೀನು ಪಡೆಯಲು ಯತ್ನಿಸುತ್ತಿದ್ದಾರೆಂದು ವಾದಿಸಿತು.

ಮುಂದುವರಿದ ತನಿಖೆ, ಜಾಮೀನು ಅರ್ಜಿ ವಜಾ

ಶ್ರೀಲಂಕಾ ಪೋಲಿಸರ ಕ್ರೀಡಾ ಅಪರಾಧಗಳ ತಡೆಗಟ್ಟುವ ವಿಶೇಷ ತನಿಖಾ ಘಟಕದ (SIU) ಅಧಿಕಾರಿಗಳು ಪ್ರಕರಣದ ಕುರಿತು ಇನ್ನೂ ತನಿಖೆ ನಡೆಸುತ್ತಿದ್ದಾರೆ. ಸಾಕ್ಷ್ಯಗಳು ನಾಶವಾಗುವ ಸಾಧ್ಯತೆಯಿರುವುದರಿಂದ ಈ ಹಂತದಲ್ಲಿ ಜಾಮೀನು ನೀಡುವುದು ಸೂಕ್ತವಲ್ಲ ಎಂದು ಸರ್ಕಾರಿ ವಕೀಲರು ನ್ಯಾಯಾಲಯಕ್ಕೆ ತಿಳಿಸಿದರು. ವಾದ-ಪ್ರತಿವಾದ ಆಲಿಸಿದ ಮ್ಯಾಜಿಸ್ಟ್ರೇಟ್ ಅಸಂಗ ಎಸ್. ಬೋದರಗಾಮ ಅವರು ಜಾಮೀನು ಅರ್ಜಿಯನ್ನು ವಜಾಗೊಳಿಸುವ ಮೂಲಕ, ಆರೋಪಿಗಳ ಕಸ್ಟಡಿ ಅವಧಿಯನ್ನು ಮುಂದುವರಿಸಲು ಆದೇಶ ನೀಡಿದ್ದಾರೆ.

ಐವರು ಆಟಗಾರರಿಂದ ಪ್ರಬಲ ದೂರು ಸಲ್ಲಿಕೆ!

ಈ ಭಾರೀ ಭ್ರಷ್ಟಾಚಾರದ ಪ್ರಕರಣದ ಕುರಿತು ಶ್ರೀಲಂಕಾದ ಅಂತರರಾಷ್ಟ್ರೀಯ ಆಟಗಾರರಾದ ಭಾನುಕ ರಾಜಪಕ್ಷ, ಅವಿಷ್ಕ ಫೆರ್ನಾಂಡೋ ಮತ್ತು ದುನಿತ್ ವೆಲ್ಲಾಲಗೆ ಅವರು ಅಧಿಕೃತ ದೂರು ದಾಖಲಿಸಿದ್ದರು. ಇದಲ್ಲದೇ, ನ್ಯಾಯಾಲಯದ ವಿಚಾರಣೆ ವೇಳೆ ಇನ್ನು ಇಬ್ಬರು ಸ್ಥಳೀಯ ಆಟಗಾರರು ಸಹ ಈ ದೂರುದಾರರ ಗುಂಪಿಗೆ ಸೇರ್ಪಡೆಗೊಂಡಿದ್ದಾರೆ ಎಂದು ನ್ಯಾಯಾಲಯಕ್ಕೆ ಮಾಹಿತಿ ನೀಡಲಾಗಿದೆ. ಆಟಗಾರರ ದಿಟ್ಟ ಹೆಜ್ಜೆಯಿಂದಾಗಿಯೇ ಈ ಮ್ಯಾಚ್ ಫಿಕ್ಸಿಂಗ್ ಜಾಲ ಬಯಲಿಗೆ ಬಂದಿದೆ.

ಐದು ಪ್ರಮುಖ ಫ್ರಾಂಚೈಸಿಗಳನ್ನು ಒಳಗೊಂಡಿರುವ ಹಾಗೂ 24 ಪಂದ್ಯಗಳ ಕೌತುಕ ಮೂಡಿಸಿರುವ ಲಂಕಾ ಪ್ರೀಮಿಯರ್ ಲೀಗ್ ಜುಲೈ 17 ರಿಂದ ಆರಂಭವಾಗಿದ್ದು, ಆಗಸ್ಟ್ 8ರವರೆಗೆ ನಡೆಯಲಿದೆ. ಟೂರ್ನಿಯ ನಡುವೆಯೇ ಸಹ-ಮಾಲೀಕನೊಬ್ಬ ಬಂಧನಕ್ಕೊಳಗಾಗಿರುವುದು ಶ್ರೀಲಂಕಾ ಕ್ರಿಕೆಟ್ ವಲಯದಲ್ಲಿ ಸಂಚಲನ ಮೂಡಿಸಿದೆ.

ಇದನ್ನೂ ಓದಿ : ತಿಂಗಳಿಗೆ 520 ರೂಪಾಯಿ ಉಳಿಸಿಯೂ ನೀವು ಲಕ್ಷಾಧೀಶ್ವರರಾಗಬಹುದಾ? ಏನಿದು SIP ಮ್ಯಾಜಿಕ್?