ಗಾಜಿಯಾಬಾದ್: ಖ್ಯಾತ ಮೋಟೋ ವ್ಲಾಗರ್ ಮತ್ತು ಬಿಗ್ ಬಾಸ್ ಮಾಜಿ ಸ್ಪರ್ಧಿ ಅನುರಾಗ್ ಡೋಬಾಲ್ (UK07 ರೈಡರ್), ಇನ್ಸ್ಟಾಗ್ರಾಮ್ ಲೈವ್ನಲ್ಲೇ ಆತ್ಮಹತ್ಯೆಗೆ ಯತ್ನಿಸಿದ ಆಘಾತಕಾರಿ ಘಟನೆ ಶನಿವಾರ ನಡೆದಿದೆ. ದೆಹಲಿ-ಮೀರತ್ ಎಕ್ಸ್ಪ್ರೆಸ್ವೇನಲ್ಲಿ ಸುಮಾರು 150 ಕಿ.ಮೀ ವೇಗದಲ್ಲಿ ಕಾರು ಚಲಾಯಿಸಿದ ಅವರು, ಉದ್ದೇಶಪೂರ್ವಕವಾಗಿ ರಸ್ತೆ ವಿಭಜಕಕ್ಕೆ (ಡಿವೈಡರ್) ಗುದ್ದಿದ್ದಾರೆ. ಸದ್ಯ ಅವರನ್ನು ಮೀರತ್ನ ಸುಭಾರ್ತಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಅವರ ಆರೋಗ್ಯ ಸ್ಥಿತಿ ಗಂಭೀರವಾಗಿದೆ.
“ನನಗೆ ನಿನ್ನ ಪ್ರೀತಿ ಬೇಕಿತ್ತು ಅಮ್ಮ”: ಕಣ್ಣೀರಿಟ್ಟ ಅನುರಾಗ್
ಅಪಘಾತಕ್ಕೂ ಮುನ್ನ ಇನ್ಸ್ಟಾಗ್ರಾಮ್ ಲೈವ್ನಲ್ಲಿ ಮಾತನಾಡುತ್ತಿದ್ದ ಅನುರಾಗ್, ಕಣ್ಣೀರು ಸುರಿಸುತ್ತಾ ತಮ್ಮ ತಾಯಿಯನ್ನು ಉದ್ದೇಶಿಸಿ, “ಮುಂದಿನ ಜನ್ಮದಲ್ಲಿ ಬಂದಾಗಲಾದರೂ ನನಗೆ ಪ್ರೀತಿ ಕೊಡು ಅಮ್ಮ, ನನಗೆ ಪ್ರೀತಿಯ ತುಂಬಾ ಅವಶ್ಯಕತೆಯಿತ್ತು,” ಎಂದು ಅಳುತ್ತಾ ಹೇಳಿದ್ದಾರೆ. ನನಗೆ ಯಾರ ಬೆಂಬಲವೂ ಇಲ್ಲ ಮತ್ತು ಜೀವನದಲ್ಲಿ ತುಂಬಾ ಏಕಾಂಗಿಯಾಗಿದ್ದೇನೆ ಎಂದು ನೋವು ತೋಡಿಕೊಳ್ಳುತ್ತಾ, “ಇದು ನನ್ನ ಕೊನೆಯ ಡ್ರೈವ್” ಎನ್ನುತ್ತಾ ಕಾರಿನ ವೇಗವನ್ನು ಹೆಚ್ಚಿಸಿ ಅಪಘಾತ ಮಾಡಿಕೊಂಡಿದ್ದಾರೆ. ಇದರ ನೇರಪ್ರಸಾರವನ್ನು ಸುಮಾರು 82,000 ಜನರು ವೀಕ್ಷಿಸುತ್ತಿದ್ದರು.
ಕುಟುಂಬ ಕಲಹವೇ ಕಾರಣ?
ಈ ಘಟನೆಗೂ ಎರಡು ದಿನಗಳ ಮೊದಲು ಅನುರಾಗ್ “ದಿ ಲಾಸ್ಟ್ ಮೆಸೇಜ್” ಎಂಬ ಶೀರ್ಷಿಕೆಯಡಿ ವಿಡಿಯೋವೊಂದನ್ನು ಹಂಚಿಕೊಂಡಿದ್ದರು. ಅದರಲ್ಲಿ ಅವರು ತಮ್ಮ ಕುಟುಂಬದ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದರು. ಬೇರೆ ಜಾತಿಯ ಹುಡುಗಿಯನ್ನು ಮದುವೆಯಾದ ಕಾರಣಕ್ಕೆ ಪೋಷಕರು ನನಗೆ ಮಾನಸಿಕ ಕಿರುಕುಳ ನೀಡುತ್ತಿದ್ದಾರೆ ಎಂದು ಅವರು ಆರೋಪಿಸಿದ್ದರು. “ನನ್ನ ಜೀವನ ಕಳೆದ ಕೆಲವು ತಿಂಗಳುಗಳಿಂದ ಸಂಪೂರ್ಣವಾಗಿ ಬದಲಾಗಿದೆ. ಮನೆಯವರು ನಮ್ಮನ್ನು ಸ್ವೀಕರಿಸುತ್ತಿಲ್ಲ, ಎಲ್ಲರ ಮುಂದೆ ಕಾಲು ಹಿಡಿದು ಕ್ಷಮೆ ಕೇಳುವಂತೆ ಒತ್ತಾಯಿಸಿದರು,” ಎಂದು ಅವರು ವಿಡಿಯೋದಲ್ಲಿ ಅಳಲು ತೋಡಿಕೊಂಡಿದ್ದರು.
ವೈವಾಹಿಕ ಜೀವನದಲ್ಲೂ ಬಿರುಕು
ಕುಟುಂಬದ ನಿರಂತರ ಕಿರುಕುಳದಿಂದಾಗಿ ಅವರ ಪತ್ನಿ ರಿತಿಕಾ ಕೂಡ ಅವರನ್ನು ತೊರೆದು ಹೋಗಿದ್ದಾರೆ ಎಂದು ಅನುರಾಗ್ ತಿಳಿಸಿದ್ದರು. ಮೇ ತಿಂಗಳಲ್ಲಿ ಮದುವೆಯಾಗಿದ್ದ ಈ ದಂಪತಿಗಳ ನಡುವೆ ಕುಟುಂಬದ ಹಸ್ತಕ್ಷೇಪದಿಂದಾಗಿ ಬಿರುಕು ಮೂಡಿತ್ತು ಎನ್ನಲಾಗಿದೆ. “ನನ್ನ ಸಾವಿಗೆ ನನ್ನ ಕುಟುಂಬವೇ ಕಾರಣ” ಎಂದು ಅವರು ಈ ಹಿಂದಿನ ವಿಡಿಯೋದಲ್ಲಿ ಹೇಳಿದ್ದರು.
ಆಸ್ಪತ್ರೆಯಲ್ಲಿ ಸಾವು-ಬದುಕಿನ ಹೋರಾಟ
ಅಪಘಾತದ ತೀವ್ರತೆಗೆ ಅವರ ಟೊಯೋಟಾ ಫಾರ್ಚೂನರ್ ಕಾರು ಸಂಪೂರ್ಣವಾಗಿ ಜಖಂಗೊಂಡಿದೆ. ಸ್ಥಳೀಯರ ಮಾಹಿತಿ ಮೇರೆಗೆ ಧಾವಿಸಿದ ಪೊಲೀಸರು ಅವರನ್ನು ಆಸ್ಪತ್ರೆಗೆ ಸೇರಿಸಿದ್ದಾರೆ. ವೈದ್ಯರ ಪ್ರಕಾರ ಅನುರಾಗ್ ಅವರ ಸ್ಥಿತಿ ಈಗಲೂ ಚಿಂತಾಜನಕವಾಗಿದ್ದು, ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಲಕ್ಷಾಂತರ ಅಭಿಮಾನಿಗಳನ್ನು ಹೊಂದಿರುವ ಈ ಯೂಟ್ಯೂಬರ್ನ ಈ ನಿರ್ಧಾರ ಇಡೀ ಸಾಮಾಜಿಕ ಜಾಲತಾಣ ಲೋಕವನ್ನು ದಿಗ್ಭ್ರಮೆಗೊಳಿಸಿದೆ.
ಇದನ್ನೂ ಓದಿ : ಹಿಟ್ ಅಂಡ್ ರನ್ ಮಾಡಿ ಎಸ್ಕೇಪ್ ಆಗಲು ಯತ್ನ | ಬೈಕ್ಗೆ ಡಿಕ್ಕಿ ಹೊಡೆದು ಎಳೆದೊಯ್ಯೊ ರಭಸಕ್ಕೆ ಕಾರಿಗೆ ಬೆಂಕಿ
