ಬೆಂಗಳೂರು : ಸಂಬಳದ ಉದ್ಯೋಗ ತೊರೆದು ಉದ್ಯಮಕ್ಕೆ ಕೈಹಾಕಿದವರು, ಕೆಲಸ ಕಳೆದುಕೊಂಡವರು ವರ್ಷಗಟ್ಟಲೇ ಪಿಎಫ್ ಖಾತೆಯಲ್ಲಿ ಬಾಕಿ ಹಣವನ್ನು ಬಿಟ್ಟಿರುತ್ತಾರೆ. ಹೀಗೆ, ವರ್ಷಗಟ್ಟಲೇ ಪಿಎಫ್ ಖಾತೆಯಲ್ಲಿ ಹಣವನ್ನು ಹಾಗೆಯೇ ಬಿಟ್ಟರೆ ಇಪಿಎಫ್ಒ ಅದನ್ನು ನಿಷ್ಕ್ರಿಯ ಖಾತೆ ಎಂದು ಘೋಷಿಸುತ್ತದೆ. ಆದರೆ, ಈಗ ಖಾತೆ ನಿಷ್ಕ್ರಿಯಗೊಂಡರೂ, ಆ ಖಾತೆಯಲ್ಲಿರುವ ಹಣವನ್ನು ಸದಸ್ಯರಿಗೆ ನೀಡಲು ಇಪಿಎಫ್ಒ ಮುಂದಾಗಿದೆ. ಅಷ್ಟೇ ಅಲ್ಲ, ಇದಕ್ಕಾಗಿ ಹೊಸ ಪೋರ್ಟಲ್ ಆರಂಭಿಸಲು ಮುಂದಾಗಿದೆ.
ಹೌದು, ನಿಮ್ಮ ಹಳೆಯ ಮತ್ತು ನಿಷ್ಕ್ರಿಯಗೊಂಡ ಪಿಎಫ್ ಖಾತೆಗಳನ್ನು ಪತ್ತೆಹಚ್ಚಲು ಮತ್ತು ಆ ಹಣವನ್ನು ಮರಳಿ ಪಡೆಯಲು ನೆರವಾಗುವಂತೆ ಕೇಂದ್ರ ಕಾರ್ಮಿಕ ಸಚಿವಾಲಯವು ‘ಇ-ಪ್ರಾಪ್ತಿ’ (E-Praapti) ಎಂಬ ಹೊಸ ಪೋರ್ಟಲ್ ಅನ್ನು ಶೀಘ್ರದಲ್ಲೇ ಪ್ರಾರಂಭಿಸುತ್ತಿದೆ. ಕಾರ್ಮಿಕ ಮತ್ತು ಉದ್ಯೋಗ ಸಚಿವ ಮನ್ಸುಖ್ ಮಾಂಡವೀಯ ಅವರು ಈ ನಿರ್ಧಾರ ಪ್ರಕಟಿಸಿದ್ದಾರೆ.
‘ಇ-ಪ್ರಾಪ್ತಿ’ ಪೋರ್ಟಲ್ ಎಂದರೇನು?
ಇದರ ಪೂರ್ಣ ಹೆಸರು “EPF Aadhaar-Based Access Portal for Tracking Inoperative Accounts”. ಅಂದರೆ, ಆಧಾರ್ ಕಾರ್ಡ್ ಆಧಾರದ ಮೇಲೆ ನಿಮ್ಮ ಹಳೆಯ ಅಥವಾ ಯುಎನ್ (UAN) ಸಂಖ್ಯೆ ಇಲ್ಲದ ಪಿಎಫ್ ಖಾತೆಗಳನ್ನು ಪತ್ತೆಹಚ್ಚುವ ವ್ಯವಸ್ಥೆಯಾಗಿದೆ. ನೀವು 2014 ಕ್ಕಿಂತ ಮೊದಲು ಕೆಲಸ ಮಾಡುತ್ತಿದ್ದು, ಅಂದು ಯುಎನ್ ಚಾಲ್ತಿಯಲ್ಲಿಲ್ಲದಿದ್ದರೆ, ಅಂತಹ ಹಳೆಯ ಖಾತೆಗಳನ್ನು ಹುಡುಕಲು ಇದು ಸಹಕಾರಿಯಾಗಲಿದೆ.
ನಿಮ್ಮ ಬಳಿ ಯಾವುದೇ ದಾಖಲೆಗಳಿಲ್ಲದಿದ್ದರೂ ನಿಮ್ಮ ಆಧಾರ್ ಮೂಲಕ ಲಾಗಿನ್ ಆಗಿ ಖಾತೆಯನ್ನು ದೃಢೀಕರಿಸಬಹುದು. ನಿಮ್ಮ ಹಳೆಯ ಕಂಪನಿ ಅಥವಾ ಉದ್ಯೋಗದಾತರ ಅನುಮತಿ ಇಲ್ಲದೆಯೇ ನೀವು ಹಳೆಯ ಖಾತೆಯನ್ನು ಸಕ್ರಿಯಗೊಳಿಸಬಹುದು (Activate) ಅಥವಾ ಈಗಿನ ಯುಎನ್ ಸಂಖ್ಯೆಗೆ ಲಿಂಕ್ ಮಾಡಬಹುದು. ನಿಷ್ಕ್ರಿಯ ಖಾತೆಯಲ್ಲಿ ಬಾಕಿ ಉಳಿದಿರುವ ಹಣವನ್ನು ನಿಮ್ಮ ಪ್ರಸ್ತುತ ಸಕ್ರಿಯ ಖಾತೆಗೆ ಸುಲಭವಾಗಿ ವರ್ಗಾಯಿಸಬಹುದು. ಇದು ಕಾಗದ ರಹಿತ ಪ್ರಕ್ರಿಯೆಯಾಗಿದ್ದು, ಇಪಿಎಫ್ಒ ಕಚೇರಿಗೆ ಅಲೆಯುವ ಕೆಲಸವನ್ನು ತಪ್ಪಿಸುತ್ತದೆ.
ಇದನ್ನೂ ಓದಿ : ತುಮಕೂರಲ್ಲಿ ಲಾರಿ-ಕಾರಿನ ಮಧ್ಯೆ ಭೀಕರ ಅಪಘಾತ ; ಒಂದೇ ಕುಟುಂಬದ ನಾಲ್ವರು ಸಾವು!
