ವಾಷಿಂಗ್ಟನ್ : ಅಮೆರಿಕದಲ್ಲಿ ಜನ್ಮದತ್ತ ಪೌರತ್ವ ನಿಯಮದ ಕುರಿತಾಗಿ ಚರ್ಚೆಗಳ ನಡುವೆಯೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, ಭಾರತ ಹಾಗೂ ಚೀನಾವನ್ನು “ನರಕದ ಕೂಪ” (Hell-holes) ಎಂದು ಹೀಗಳೆದಿರುವ ಅಮೆರಿಕದ ಖ್ಯಾತ ರೇಡಿಯೋ ನಿರೂಪಕ ಮೈಕೆಲ್ ಸ್ಯಾವೇಜ್ ಅವರ ವಿವಾದಾತ್ಮಕ ಪಾಡ್ಕಾಸ್ಟ್ ಮತ್ತು ಅದರ ಬರಹ ರೂಪವನ್ನು ತಮ್ಮ ‘ಟ್ರುತ್ ಸೋಶಿಯಲ್’ ಜಾಲತಾಣದಲ್ಲಿ ಮರುಹಂಚಿಕೆ ಮಾಡಿದ್ದಾರೆ. ಅಮೆರಿಕದ ಸಂವಿಧಾನವು ವಲಸಿಗರಿಗೆ ನೀಡುತ್ತಿರುವ ಹಕ್ಕುಗಳ ವಿರುದ್ಧ ಟ್ರಂಪ್ ಅವರು ತಮ್ಮ ಅಸಮಾಧಾನವನ್ನು ಹೊರಹಾಕಲು ಈ ಪೋಸ್ಟ್ ಅನ್ನು ಅಸ್ತ್ರವಾಗಿ ಬಳಸಿಕೊಂಡಿದ್ದಾರೆ.
ಅಮೆರಿಕದಲ್ಲಿ ಜನಿಸುವ ವಲಸಿಗರ ಮಕ್ಕಳಿಗೆ ಸ್ವಯಂಚಾಲಿತವಾಗಿ ಪೌರತ್ವ ನೀಡುವ ನಿಯಮವನ್ನು ತೀವ್ರವಾಗಿ ವಿರೋಧಿಸಿರುವ ಮೈಕೆಲ್ ಸ್ಯಾವೇಜ್, ನ್ಯಾಯಾಲಯಗಳ ತೀರ್ಪಿನ ಬದಲಿಗೆ ರಾಷ್ಟ್ರೀಯ ಜನಾಭಿಪ್ರಾಯ ಸಂಗ್ರಹಣೆ ನಡೆಯಬೇಕು ಎಂದು ಆಗ್ರಹಿಸಿದ್ದಾರೆ. ಭಾರತ ಮತ್ತು ಚೀನಾ ದೇಶದ ಜನರು ಅಮೆರಿಕದಲ್ಲಿ ತಮ್ಮ ಮಗುವಿಗೆ ಜನ್ಮ ನೀಡುವ ಉದ್ದೇಶದಿಂದಲೇ, 9 ತಿಂಗಳು ಗರ್ಭಿಣಿಯಾಗಿರುವಾಗಲೇ ಇಲ್ಲಿಗೆ ಬರುತ್ತಾರೆ. ಮಗು ಜನಿಸಿದ ತಕ್ಷಣ ಪೌರತ್ವ ಪಡೆಯುತ್ತಾರೆ. ಬಳಿಕ ಚೀನಾ, ಭಾರತ ಅಥವಾ ಭೂಮಿಯ ಮೇಲಿರುವ ಬೇರಾವುದೋ ನರಕಕೂಪದಿಂದ ತಮ್ಮ ಇಡೀ ಕುಟುಂಬವನ್ನೇ ಇಲ್ಲಿಗೆ ಕರೆತರುತ್ತಾರೆ ಎಂದು ಅವರು ತಮ್ಮ ಪಾಡ್ಕಾಸ್ಟ್ನಲ್ಲಿ ಕಿಡಿಕಾರಿದ್ದಾರೆ.
ಇದಲ್ಲದೆ, ಭಾರತೀಯ ಮತ್ತು ಚೀನೀ ವಲಸಿಗರನ್ನು “ಲ್ಯಾಪ್ಟಾಪ್ ಹೊಂದಿರುವ ಗ್ಯಾಂಗ್ಸ್ಟರ್ಗಳು” ಎಂದು ಕರೆದಿರುವ ಅವರು, ಈ ವಲಸಿಗರು ಅಮೆರಿಕನ್ನರನ್ನು ದ್ವಿತೀಯ ದರ್ಜೆಯ ಪ್ರಜೆಗಳಂತೆ ಕಾಣುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ. ಕ್ಯಾಲಿಫೋರ್ನಿಯಾದ ಉನ್ನತ ತಂತ್ರಜ್ಞಾನ ಕಂಪನಿಗಳ ಎಲ್ಲ ಪ್ರಮುಖ ಹುದ್ದೆಗಳನ್ನು ಭಾರತೀಯರು ಮತ್ತು ಚೀನಿಯರೇ ಆಕ್ರಮಿಸಿಕೊಂಡಿದ್ದು, ಅಲ್ಲಿ ಶ್ವೇತವರ್ಣೀಯರಿಗೆ ಉದ್ಯೋಗವೇ ಸಿಗದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಅವರು ದೂರಿದ್ದಾರೆ. ವಿಮಾನಯಾನ ಅಥವಾ ಇಂಟರ್ನೆಟ್ ಸೌಲಭ್ಯಗಳೇ ಇಲ್ಲದ ಕಾಲದಲ್ಲಿ ಬರೆದ ಸಂವಿಧಾನವನ್ನು ಬಳಸಿಕೊಂಡು, ‘ಬರ್ತ್ ಟೂರಿಸಂ’ (ಜನನ ಪ್ರವಾಸೋದ್ಯಮ) ಮೂಲಕ ಗರ್ಭಿಣಿಯರು ವಿಮಾನದಲ್ಲಿ ಬಂದು ಪೌರತ್ವ ಪಡೆಯುವುದನ್ನು ಸ್ಯಾವೇಜ್ ತೀವ್ರವಾಗಿ ಪ್ರಶ್ನಿಸಿದ್ದಾರೆ.
ಟ್ರಂಪ್ ಅವರು ಸಿಎನ್ಬಿಸಿ ವಾಹಿನಿಗೆ ನೀಡಿದ ಸಂದರ್ಶನವೊಂದರಲ್ಲಿ, ಅಮೆರಿಕವನ್ನು ಹೊರತುಪಡಿಸಿ ವಿಶ್ವದ ಬೇರೆ ಯಾವುದೇ ದೇಶದಲ್ಲಿ ಜನ್ಮದತ್ತ ಪೌರತ್ವ ನೀಡುವ ವ್ಯವಸ್ಥೆಯಿಲ್ಲ ಎಂದು ಸುಳ್ಳು ಹೇಳಿಕೆ ನೀಡಿದ್ದರು. ಈ ಹೇಳಿಕೆ ನೀಡಿದ ಮರುದಿನವೇ ಅವರು ಸ್ಯಾವೇಜ್ ಅವರ ಜನಾಂಗೀಯ ನಿಂದನೆಯ ಪೋಸ್ಟ್ ಅನ್ನು ಹಂಚಿಕೊಂಡಿದ್ದಾರೆ. ವಾಸ್ತವದಲ್ಲಿ, ಅಮೆರಿಕದ ನೆರೆಹೊರೆಯ ರಾಷ್ಟ್ರಗಳಾದ ಕೆನಡಾ ಮತ್ತು ಮೆಕ್ಸಿಕೋ ಹಾಗೂ ಬಹುಪಾಲು ದಕ್ಷಿಣ ಅಮೆರಿಕನ್ ರಾಷ್ಟ್ರಗಳು ಸೇರಿದಂತೆ ಸುಮಾರು ಮೂರು ಡಜನ್ಗೂ ಹೆಚ್ಚು ದೇಶಗಳಲ್ಲಿ ಈ ನಿಯಮ ಜಾರಿಯಲ್ಲಿದೆ.
ಪ್ರಸ್ತುತ, ಅಮೆರಿಕದ ಸುಪ್ರೀಂ ಕೋರ್ಟ್ ‘ಟ್ರಂಪ್ ವರ್ಸಸ್ ಬಾರ್ಬರಾ’ ಪ್ರಕರಣದ ವಿಚಾರಣೆ ನಡೆಸುತ್ತಿದೆ. ತಾತ್ಕಾಲಿಕ ವೀಸಾದಲ್ಲಿ ನೆಲೆಸಿರುವವರು ಅಥವಾ ಅಕ್ರಮ ವಲಸಿಗರ ಮಕ್ಕಳಿಗೆ ಅಮೆರಿಕದಲ್ಲಿ ಜನಿಸಿದರೂ ಪೌರತ್ವ ನಿರಾಕರಿಸುವ ಟ್ರಂಪ್ ಅವರ ಕಾರ್ಯಕಾರಿ ಆದೇಶವನ್ನು ಈ ಪ್ರಕರಣದಲ್ಲಿ ಪ್ರಶ್ನಿಸಲಾಗಿದೆ. ಈ ತೀರ್ಪಿನ ಕುರಿತು ಪ್ರತಿಕ್ರಿಯಿಸಿರುವ ಟ್ರಂಪ್, “ಒಂದು ವೇಳೆ ನ್ಯಾಯಾಲಯವು ಜನ್ಮದತ್ತ ಪೌರತ್ವದ ವಿಚಾರದಲ್ಲಿ ನಮ್ಮ ದೇಶದ ವಿರುದ್ಧ ತೀರ್ಪು ನೀಡಿದರೆ, ಅದು ಅಮೆರಿಕಕ್ಕೆ ಭಾರಿ ಆರ್ಥಿಕ ನಷ್ಟವನ್ನು ಉಂಟುಮಾಡುತ್ತದೆ. ಅದಕ್ಕಿಂತ ಮುಖ್ಯವಾಗಿ ಅಮೆರಿಕ ತನ್ನ ಘನತೆಯನ್ನು ಕಳೆದುಕೊಳ್ಳುತ್ತದೆ” ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ತಮಿಳುನಾಡು ಕಣದಲ್ಲಿ ರೋಚಕ ತ್ರಿಕೋನ ಸ್ಪರ್ಧೆ : ದಶಕಗಳ ಡಿಎಂಕೆ-ಎಐಎಡಿಎಂಕೆ ಪೈಪೋಟಿಗೆ ವಿಜಯ್ ಬ್ರೇಕ್!
