ಯೋಧರಿಗೆ ಇನ್‌ಸ್ಟಾಗ್ರಾಂ ಬಳಕೆಗೆ ಹಸಿರು ನಿಶಾನೆ : ಕೇವಲ ವೀಕ್ಷಣೆಗಷ್ಟೇ, ಪೋಸ್ಟ್ ಮಾಡುವಂತಿಲ್ಲ!

ನವದೆಹಲಿ: ಭಾರತೀಯ ಸೇನೆಯು ತನ್ನ ಯೋಧರು ಹಾಗೂ ಅಧಿಕಾರಿಗಳಿಗೆ ಸಾಮಾಜಿಕ ಜಾಲತಾಣಗಳ ಬಳಕೆಗೆ ಹೇರಿದ್ದಂಥ ಕಠಿಣ ನಿಲುವನ್ನು ಸ್ವಲ್ಪ ಮಟ್ಟಿಗೆ ಸಡಿಲಿಕೆ ಮಾಡಿದೆ. ಸೇನೆಯು ತನ್ನ ನೀತಿಯಲ್ಲಿ ಮಹತ್ವದ ಬದಲಾವಣೆಯನ್ನು ತಂದಿದ್ದು, ಸೇನಾ ಅಧಿಕಾರಿಗಳು ಮತ್ತು ಯೋಧರು ‘ಇನ್‌ಸ್ಟಾಗ್ರಾಂ‘ ಖಾತೆಯನ್ನು ಬಳಸಲು ಅನುಮತಿ ನೀಡಲಾಗಿದೆ. ಆದರೆ, ಈ ಅನುಮತಿಯು ಕೇವಲ ಕಂಟೆಂಟ್‌ಗಳನ್ನು ವೀಕ್ಷಿಸಲು (Viewing) ಮತ್ತು ಕಣ್ಗಾವಲಿಗಷ್ಟೇ ಸೀಮಿತವಾಗಿದ್ದು, ಕಠಿಣ ಷರತ್ತುಗಳನ್ನು ವಿಧಿಸಲಾಗಿದೆ.

ಮೂಲಗಳ ಪ್ರಕಾರ, ಸೇನಾ ಸಿಬ್ಬಂದಿ ಇನ್‌ಸ್ಟಾಗ್ರಾಂನಲ್ಲಿ ರೀಲ್ಸ್ ಅಥವಾ ಪೋಸ್ಟ್‌ಗಳನ್ನು ನೋಡಬಹುದು. ಆದರೆ, ಯಾವುದೇ ಕಾರಣಕ್ಕೂ ಫೋಟೋ/ವಿಡಿಯೋ ಪೋಸ್ಟ್ ಮಾಡುವಂತಿಲ್ಲ, ಲೈಕ್ (Like) ಒತ್ತುವಂತಿಲ್ಲ ಅಥವಾ ಕಾಮೆಂಟ್ ಮಾಡುವಂತಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.

ಷರತ್ತುಗಳೇನು ಮತ್ತು ಉದ್ದೇಶವೇನು?

ಸೈನಿಕರು ಪ್ರಚಲಿತ ವಿದ್ಯಮಾನಗಳ ಬಗ್ಗೆ ಅರಿವು ಹೊಂದಿರಲಿ ಮತ್ತು ಮಾಹಿತಿ ಸಂಗ್ರಹಣೆಗೆ ಅನುಕೂಲವಾಗಲಿ ಎಂಬ ಉದ್ದೇಶದಿಂದ ಈ ವಿನಾಯಿತಿ ನೀಡಲಾಗಿದೆ. ಅಲ್ಲದೆ, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ನಕಲಿ ಸುದ್ದಿಗಳು (Fake News) ಅಥವಾ ತಪ್ಪುದಾರಿಗೆಳೆಯುವ ಪೋಸ್ಟ್‌ಗಳು ಕಂಡುಬಂದರೆ, ಅದನ್ನು ಮೇಲಧಿಕಾರಿಗಳ ಗಮನಕ್ಕೆ ತರಲು ಸೈನಿಕರಿಗೆ ಸೂಚಿಸಲಾಗಿದೆ.

‘ಹನಿ ಟ್ರ್ಯಾಪ್’ ಭೀತಿ ಮತ್ತು ಹಿಂದಿನ ನಿಷೇಧ

ಭದ್ರತಾ ಕಾರಣಗಳಿಂದಾಗಿ ಫೇಸ್‌ಬುಕ್, ಎಕ್ಸ್ (ಟ್ವಿಟರ್) ಮತ್ತು ಇನ್ಸ್ಟಾಗ್ರಾಮ್ ಬಳಕೆಯ ಮೇಲೆ ಸೇನೆ ಈ ಹಿಂದೆ ಕಠಿಣ ನಿರ್ಬಂಧ ಹೇರಿತ್ತು. 2020ರಲ್ಲಿ ಫೇಸ್‌ಬುಕ್ ಮತ್ತು ಇನ್ಸ್ಟಾಗ್ರಾಮ್ ಸೇರಿದಂತೆ 89 ಆ್ಯಪ್‌ಗಳನ್ನು ಮೊಬೈಲ್‌ನಿಂದ ಡಿಲೀಟ್ ಮಾಡುವಂತೆ ಸೈನಿಕರಿಗೆ ಸೂಚಿಸಲಾಗಿತ್ತು. ಶತ್ರು ರಾಷ್ಟ್ರಗಳ ಗುಪ್ತಚರ ಏಜೆನ್ಸಿಗಳು ನಕಲಿ ಖಾತೆಗಳ ಮೂಲಕ ಸೈನಿಕರನ್ನು ‘ಹನಿ ಟ್ರ್ಯಾಪ್’ ಬಲೆಗೆ ಬೀಳಿಸಿ, ಸೇನೆಯ ರಹಸ್ಯ ಮಾಹಿತಿಗಳನ್ನು ಕದಿಯುವ ಪ್ರಕರಣಗಳು ಹೆಚ್ಚಾದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿತ್ತು.

ಸೇನಾ ಮುಖ್ಯಸ್ಥರು ಹೇಳಿದ್ದೇನು?

ಇತ್ತೀಚೆಗೆ ನಡೆದ ‘ಚಾಣಕ್ಯ ಡಿಫೆನ್ಸ್ ಡೈಲಾಗ್’ನಲ್ಲಿ ಸೇನಾ ಮುಖ್ಯಸ್ಥ ಜನರಲ್ ಉಪೇಂದ್ರ ದ್ವಿವೇದಿ ಅವರು ಸ್ಮಾರ್ಟ್‌ಫೋನ್ ಮತ್ತು ಸಾಮಾಜಿಕ ಜಾಲತಾಣಗಳ ಬಗ್ಗೆ ಪ್ರಸ್ತಾಪಿಸಿದ್ದರು. “ಇಂದಿನ ಯುವಪೀಳಿಗೆಗೆ ಸ್ಮಾರ್ಟ್‌ಫೋನ್ ಇಲ್ಲದೆ ಬದುಕುವುದು ಕಷ್ಟ. ಸೈನಿಕರು ಕುಟುಂಬದಿಂದ ದೂರವಿರುತ್ತಾರೆ, ಮಗುವಿನ ಮೊದಲ ನಗುವನ್ನು ನೋಡಲು ಅಥವಾ ಪೋಷಕರ ಕ್ಷೇಮ ವಿಚಾರಿಸಲು ಫೋನ್ ಅತ್ಯಗತ್ಯ. ಆದರೆ, ಸಾಮಾಜಿಕ ಜಾಲತಾಣದಲ್ಲಿ ತಕ್ಷಣಕ್ಕೆ ಪ್ರತಿಕ್ರಿಯಿಸುವುದು ಬೇಡ. ಬೇಕಿದ್ದರೆ ನಿವೃತ್ತಿಯ ನಂತರ ಉತ್ತರಿಸಲಿ. ಕೇವಲ ವೀಕ್ಷಣೆ ಮಾಡುವುದರಲ್ಲಿ ತಪ್ಪಿಲ್ಲ,” ಎಂದು ಅವರು ಅಭಿಪ್ರಾಯಪಟ್ಟಿದ್ದರು. ಸದ್ಯದ ಮಟ್ಟಿಗೆ, ಯೋಧರು ಇನ್ಸ್ಟಾಗ್ರಾಮ್ ಅನ್ನು ಮಾಹಿತಿ ಪಡೆಯಲು ಬಳಸಬಹುದೇ ವಿನಹ, ತಮ್ಮ ವೈಯಕ್ತಿಕ ಅಥವಾ ಸೇನಾ ಚಟುವಟಿಕೆಗಳನ್ನು ಜಗತ್ತಿಗೆ ತೋರಿಸುವಂತಿಲ್ಲ.
ಇದನ್ನೂ ಓದಿ : ಬಿಹಾರದ ವಿಶ್ವದಾಖಲೆಯ ಆಟದ ಬಗ್ಗೆ ಅಶ್ವಿನ್ ಅಚ್ಚರಿಯ ಹೇಳಿಕೆ | ಇದು ‘ಆದರ್ಶ ಸ್ಪರ್ಧೆ’ ಅಲ್ಲ ಎಂದ ಸ್ಪಿನ್ನರ್