ಕೃತಕ ಬುದ್ಧಿಮತ್ತೆಯ ಹಸಿವಿಗೆ ಕಂಪ್ಯೂಟರ್, ಸ್ಮಾರ್ಟ್‌ಫೋನ್ ಬೆಲೆ ಏರಿಕೆ ಫಿಕ್ಸ್!

ನವದೆಹಲಿ: ನೀವು ಹೊಸ ಲ್ಯಾಪ್‌ಟಾಪ್ ಅಥವಾ ಹೈ-ಎಂಡ್ ಸ್ಮಾರ್ಟ್‌ಫೋನ್ ಖರೀದಿಸುವ ಯೋಜನೆಯಲ್ಲಿದ್ದೀರಾ? ಹಾಗಿದ್ದರೆ ನಿಮ್ಮ ಜೇಬಿಗೆ ಕತ್ತರಿ ಬೀಳುವ ಸಮಯ ಹತ್ತಿರವಾಗಿದೆ. ವಿಶ್ವದಾದ್ಯಂತ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಅಬ್ಬರ ಎಷ್ಟರಮಟ್ಟಿಗೆ ಹೆಚ್ಚಾಗಿದೆಯೆಂದರೆ, ಎಲೆಕ್ಟ್ರಾನಿಕ್ ಸಾಧನಗಳ ಜೀವನಾಡಿಯಂತಿರುವ ‘ರಾಮ್’ (RAM – Random Access Memory) ಕೊರತೆ ಎದುರಾಗಿದ್ದು, ಬೆಲೆ ಗಗನಕ್ಕೇರುವ ಲಕ್ಷಣಗಳು ದಟ್ಟವಾಗಿವೆ.
ಓಪನ್ ಎಐನ ಸ್ಯಾಮ್ ಆಲ್ಟ್‌ಮನ್ ಆಗಲಿ ಅಥವಾ ಎಕ್ಸ್ ಎಐನ ಎಲಾನ್ ಮಸ್ಕ್ ಆಗಲಿ, ಎಲ್ಲರಿಗೂ ಈಗ ಬೇಕಿರುವುದು ಒಂದೇ – ಅದುವೇ ‘ಕಂಪ್ಯೂಟ್ ಪವರ್’ (ಸಂಸ್ಕರಣಾ ಸಾಮರ್ಥ್ಯ). ತಮ್ಮ ಬೃಹತ್ ಎಐ ಮಾಡೆಲ್‌ಗಳನ್ನು ನಿರ್ವಹಿಸಲು ಈ ಟೆಕ್ ದೈತ್ಯರಿಗೆ ಅಗಾಧ ಪ್ರಮಾಣದ ಪ್ರೊಸೆಸಿಂಗ್ ಪವರ್ ಮತ್ತು ಮೆಮೊರಿ ಬೇಕಾಗಿದೆ. ಇದರ ನೇರ ಪರಿಣಾಮ ಸಾಮಾನ್ಯ ಗ್ರಾಹಕರ ಮೇಲಾಗುತ್ತಿದೆ.

ಮೈಕ್ರಾನ್ ನಿರ್ಧಾರ: ಒಂದು ಆಘಾತಕಾರಿ ಬೆಳವಣಿಗೆ

ಪರಿಸ್ಥಿತಿ ಎಷ್ಟು ಗಂಭೀರವಾಗಿದೆ ಎಂಬುದಕ್ಕೆ ಇಲ್ಲೊಂದು ತಾಜಾ ಉದಾಹರಣೆಯಿದೆ. ಮೆಮೊರಿ ಚಿಪ್ ತಯಾರಿಕೆಯಲ್ಲಿ ಜಗತ್ತಿನ ಪ್ರಮುಖ ಮೂರು ಕಂಪನಿಗಳಲ್ಲಿ ಒಂದಾದ ‘ಮೈಕ್ರಾನ್’ (Micron), ಇನ್ಮುಂದೆ ಗ್ರಾಹಕರಿಗೆ ನೇರವಾಗಿ RAM ಮಾರಾಟ ಮಾಡುವುದಿಲ್ಲ ಎಂದು ಕಳೆದ ವಾರ ಘೋಷಿಸಿದೆ. ಬದಲಿಗೆ, ಅದು ಕೇವಲ ಕಂಪನಿಗಳಿಗೆ ಮಾತ್ರ ಮಾರಾಟ ಮಾಡಲಿದೆ. “ಡೇಟಾ ಸೆಂಟರ್‌ಗಳಲ್ಲಿ ಎಐ ಆಧಾರಿತ ಬೆಳವಣಿಗೆಯಿಂದಾಗಿ ಮೆಮೊರಿ ಮತ್ತು ಸ್ಟೋರೇಜ್‌ಗೆ ಬೇಡಿಕೆ ಹೆಚ್ಚಿದೆ,” ಎಂದು ಮೈಕ್ರಾನ್ ಬಿಸಿನೆಸ್ ಚೀಫ್ ಸುಮಿತ್ ಸದಾನ ಸ್ಪಷ್ಟಪಡಿಸಿದ್ದಾರೆ. ಸ್ಯಾಮ್‌ಸಂಗ್ ಮತ್ತು ಎಸ್‌ಕೆ ಹೈನಿಕಸ್ ಕೂಡ ಇದೇ ಹಾದಿಯಲ್ಲಿವೆ.

ಎಐ ಹಸಿವು ಮತ್ತು ಸಾಮಾನ್ಯರ ಪಾಡು

ನಾವು ಚಾಟ್‌ಜಿಪಿಟಿ ಅಥವಾ ಜೆಮಿನಿಯನ್ನು ಬ್ರೌಸರ್‌ನಲ್ಲಿ ಸುಲಭವಾಗಿ ಬಳಸುತ್ತೇವೆ. ಆದರೆ ಅದರ ಹಿಂದೆ ಕೆಲಸ ಮಾಡುವ ಎಐ ಇನ್ಫ್ರಾಸ್ಟ್ರಕ್ಚರ್ ಅಗಾಧವಾದದ್ದು. ಒಂದೊಂದು ಎಐ ಮಷಿನ್‌ಗೆ 4 ರಿಂದ 6 ಟೆರಾಬೈಟ್ (TB) ಮೆಮೊರಿ ಬೇಕಾಗುತ್ತದೆ! ನಿಮ್ಮ ಲ್ಯಾಪ್‌ಟಾಪ್‌ಗೆ 16GB ಸಾಕು, ಆದರೆ ಎಐಗೆ ಇದರ ಸಾವಿರ ಪಟ್ಟು ಬೇಕು. ಈ ಬೇಡಿಕೆಯನ್ನು ಪೂರೈಸಲು ಚಿಪ್ ತಯಾರಕರು ಎಐ ಕಂಪನಿಗಳತ್ತ ಮುಖ ಮಾಡಿದ್ದಾರೆ. ಏಕೆಂದರೆ ಈ ಕಂಪನಿಗಳು ಚಿಪ್‌ಗಳಿಗಾಗಿ ಚಿನ್ನದ ಬೆಲೆ ತೆರಲೂ ಸಿದ್ಧವಾಗಿವೆ.
ಬೆಲೆ ಏರಿಕೆ ಲೆಕ್ಕಾಚಾರ ಹೇಗಿದೆ?

• ಈಗಿನ ಸ್ಥಿತಿ: 2025ರ ಆರಂಭಕ್ಕೆ ಹೋಲಿಸಿದರೆ ಈ ವರ್ಷ ರಾಮ್ ಬೆಲೆಗಳು ಈಗಾಗಲೇ 3 ರಿಂದ 6 ಪಟ್ಟು ಹೆಚ್ಚಾಗಿವೆ.
• ಸ್ಮಾರ್ಟ್‌ಫೋನ್ ಎಫೆಕ್ಟ್: ಉದಾಹರಣೆಗೆ, ಗ್ಯಾಲಕ್ಸಿ S25 ಸರಣಿಯ ಫೋನ್‌ನಲ್ಲಿ ಬಳಸಲಾಗುತ್ತಿದ್ದ RAM ಬೆಲೆ 2025ರ ಆರಂಭದಲ್ಲಿ ಡಾಲರ್ 35 (ಅಂದಾಜು 2,900 ರೂಪಾಯಿ) ಇತ್ತು. ಈಗ ಅದೇ RAM ಬೆಲೆ ಡಾಲರ್​ 70 (ಅಂದಾಜು 5,900 ರೂಪಾಯಿ) ಕ್ಕೆ ತಲುಪಿದೆ.
• ನೆಹರು ಪ್ಲೇಸ್ ರಿಯಾಲಿಟಿ: ಕಂಪ್ಯೂಟರ್ ಮಾರುಕಟ್ಟೆಗಳಲ್ಲಿ (ಉದಾ: ದೆಹಲಿಯ ನೆಹರು ಪ್ಲೇಸ್) 16GB RAM ಕಿಟ್ ಬೆಲೆ ಈಗ 10,000 ರೂಪಾಯಿ ದಾಟಿದೆ.
  
  ಮುಂದೇನು?
  ಭಾರತದಲ್ಲಿ ಈಗಾಗಲೇ ಬಿಡುಗಡೆಯಾಗುತ್ತಿರುವ ಹೈ-ಎಂಡ್ ಫೋನ್‌ಗಳ ಬೆಲೆ 70,000 ರೂಪಾಯಿಗಿಂತ ಹೆಚ್ಚಾಗುತ್ತಿರುವುದನ್ನು ನಾವು ಗಮನಿಸಬಹುದು (ಹಿಂದೆ ಇವು 50,000-60,000 ರೂಪಾಯಿ ಶ್ರೇಣಿಯಲ್ಲಿದ್ದವು). 2026ರಲ್ಲಿ ಈ ಬಿಸಿ ಇನ್ನೂ ಜೋರಾಗಿ ತಟ್ಟಲಿದೆ. ಲ್ಯಾಪ್‌ಟಾಪ್ ಮತ್ತು ಫೋನ್ ಕಂಪನಿಗಳು ಅನಿವಾರ್ಯವಾಗಿ ಬೆಲೆ ಏರಿಸಬೇಕಾಗುತ್ತದೆ ಅಥವಾ ಕಡಿಮೆ RAM ಇರುವ ಸಾಧನಗಳನ್ನು ಬಿಡುಗಡೆ ಮಾಡಬೇಕಾಗುತ್ತದೆ.

ಇದನ್ನೂ ಓದಿ; ಪಾರ್ಶ್ವವಾಯು ಪೀಡಿತರಿಗೆ ಭಾರತದಲ್ಲೇ ಸಿಗಲಿದೆ ಮರುಜೀವ : ದೇಶೀಯ ‘ಸೂಪರ್‌ನೋವಾ’ ಸ್ಟೆಂಟ್ ಪ್ರಯೋಗ ಯಶಸ್ವಿ