ಬೆಂಗಳೂರು: ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಅಹ್ಮದ್ ಶೆಹ್ಝಾದ್, ಪಾಕಿಸ್ತಾನ ತಂಡದ ಮಾಜಿ ನಾಯಕ ಬಾಬರ್ ಆಝಮ್ ಅವರ ಇತ್ತೀಚಿನ ಕಳಪೆ ಪ್ರದರ್ಶನಕ್ಕೆ ಪ್ರಮುಖ ಕಾರಣವನ್ನು ಬಹಿರಂಗಪಡಿಸಿದ್ದಾರೆ. ಬಾಬರ್ ಆಝಮ್ ಅವರನ್ನು ಭಾರತದ ದಿಗ್ಗಜ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಅವರಿಗೆ ಹೋಲಿಕೆ ಮಾಡಿದ್ದೇ ಈ ವೈಫಲ್ಯಕ್ಕೆ ಕಾರಣ ಎಂದು ಶೆಹ್ಝಾದ್ ಅಭಿಪ್ರಾಯಪಟ್ಟಿದ್ದಾರೆ.
ಬಾಬರ್ ಆಝಮ್ ಪ್ರಸ್ತುತ ಮೂರು ಸ್ವರೂಪದ ಕ್ರಿಕೆಟ್ನಲ್ಲೂ ಬ್ಯಾಟಿಂಗ್ ವೈಫಲ್ಯವನ್ನು ಅನುಭವಿಸುತ್ತಿದ್ದಾರೆ. ಇತ್ತೀಚೆಗೆ ವೆಸ್ಟ್ ಇಂಡೀಸ್ ವಿರುದ್ಧದ ಟಿ20 ಸರಣಿಯ ಎರಡನೇ ಮತ್ತು ಮೂರನೇ ಪಂದ್ಯಗಳಲ್ಲಿ ಅವರು ಕ್ರಮವಾಗಿ 0 ಮತ್ತು 9 ರನ್ ಗಳಿಸಿ ನಿರಾಸೆ ಮೂಡಿಸಿದ್ದರು. ಈ ಪ್ರದರ್ಶನಗಳ ನಂತರ ಅವರು ಟಿ20 ತಂಡದಲ್ಲಿ ತಮ್ಮ ಸ್ಥಾನ ಕಳೆದುಕೊಂಡಿದ್ದಾರೆ.
ವಿರಾಟ್ ಕೊಹ್ಲಿಯೊಂದಿಗೆ ಹೋಲಿಕೆ ತಪ್ಪು
ಜಿಸೂಪರ್ ಜೊತೆಗಿನ ಸಂದರ್ಶನದಲ್ಲಿ ಅಹ್ಮದ್ ಶೆಹ್ಝಾದ್ ಈ ಕುರಿತು ಮಾತನಾಡಿದ್ದಾರೆ. “ಎಲ್ಲವೂ ಸರಿಯಿದ್ದಾಗ, ನೀವು ಆಟಗಾರರನ್ನು ಹೋಲಿಕೆ ಮಾಡುತ್ತೀರಿ. ಈಗ ಅವರ ಪ್ರದರ್ಶನಗಳು ಬರುತ್ತಿಲ್ಲ, ‘ಆಟಗಾರರನ್ನು ಹೋಲಿಸಬೇಡಿ’ ಎಂದು ಹೇಳುತ್ತಿದ್ದೀರಿ. ಏಕೆ? ವಿರಾಟ್ ಕೊಹ್ಲಿಯ ಹೋಲಿಕೆಯನ್ನು ಜಗತ್ತಿನಲ್ಲಿ ಯಾರೊಂದಿಗೂ ಮಾಡಲು ಸಾಧ್ಯವಿಲ್ಲ. ಅವರು ಈ ಪೀಳಿಗೆಯ ದಂತಕಥೆ, ಒಂದು ಮಾದರಿ. ನೀವು ಅವರನ್ನು ಎಂ.ಎಸ್. ಧೋನಿಯೊಂದಿಗೆ ಸಹ ಹೋಲಿಸಲು ಸಾಧ್ಯವಿಲ್ಲ. ಧೋನಿ ಒಬ್ಬ ಮಹಾನ್ ನಾಯಕನಾಗಿರಬಹುದು, ಆದರೆ ಬ್ಯಾಟ್ಸ್ಮನ್, ಕ್ರಿಕೆಟಿಗ ಮತ್ತು ಕ್ರೀಡಾಪಟುವಾಗಿ ಕೊಹ್ಲಿ ಒಬ್ಬಂಟಿಯಾಗಿ ನಿಲ್ಲುತ್ತಾರೆ” ಎಂದು ಶೆಹ್ಝಾದ್ ಹೇಳಿದ್ದಾರೆ.
ಯಾರನ್ನೂ ಯಾರೊಂದಿಗೂ ಹೋಲಿಸಬಾರದು, ಏಕೆಂದರೆ ಅದು ಅನ್ಯಾಯ. ಈ ರೀತಿ ಹೋಲಿಸುವುದರಿಂದ ಆಟಗಾರನ ಮೇಲೆ ಹೆಚ್ಚುವರಿ ಒತ್ತಡ ಬೀಳುತ್ತದೆ. ಇದನ್ನೇ ನಾವು ಈಗ ಬಾಬರ್ ಅಝಮ್ ಅವರಲ್ಲಿ ನೋಡುತ್ತಿದ್ದೇವೆ ಎಂದು ಶೆಹ್ಝಾದ್ ಅಭಿಪ್ರಾಯಪಟ್ಟಿದ್ದಾರೆ.
ಬಾಬರ್ ಅವರ ಇತ್ತೀಚಿನ ಪ್ರದರ್ಶನ
ಬಾಬರ್ ಆಝಮ್ ಅವರು ಕೊನೆಯ ಬಾರಿಗೆ 2023ರ ಏಷ್ಯಾ ಕಪ್ನಲ್ಲಿ ನೇಪಾಳ ವಿರುದ್ಧ ಶತಕ ಸಿಡಿಸಿದ್ದರು. ಆ ಪಂದ್ಯದಲ್ಲಿ ಅವರು 131 ಎಸೆತಗಳಲ್ಲಿ 151 ರನ್ ಗಳಿಸಿದ್ದರು. ಅದಾದ ನಂತರ, ಕಳೆದ 72 ಇನ್ನಿಂಗ್ಸ್ಗಳಿಂದ ಅವರು ಯಾವುದೇ ಸ್ವರೂಪದಲ್ಲಿ ಶತಕ ದಾಖಲಿಸಿಲ್ಲ. ಈ ಅವಧಿಯಲ್ಲಿ ಅವರು 18 ಅರ್ಧಶತಕಗಳೊಂದಿಗೆ 31.45ರ ಸರಾಸರಿಯಲ್ಲಿ 2139 ರನ್ ಗಳಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್ನಲ್ಲಿ ಅವರ ಕೊನೆಯ ಶತಕ 2022ರ ಡಿಸೆಂಬರ್ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಬಂದಿತ್ತು. ಆ ನಂತರ, ಅವರು 25 ಇನ್ನಿಂಗ್ಸ್ಗಳಲ್ಲಿ ಕೇವಲ 23.60ರ ಸರಾಸರಿಯಲ್ಲಿ 590 ರನ್ ಗಳಿಸಿದ್ದಾರೆ.
