ನವದೆಹಲಿ: ಏಷ್ಯಾ ಖಂಡದಲ್ಲೇ ಅತ್ಯಂತ ಪ್ರಭಾವಿ ದೇಶಗಳ ಪಟ್ಟಿಯಲ್ಲಿ ಭಾರತ ಮೂರನೇ ಸ್ಥಾನಕ್ಕೆ ಏರಿಕೆ ಕಂಡಿದೆ.
ಆಸ್ಟ್ರೇಲಿಯಾ ಲೋವಿ ಇನ್ಸ್ ಟಿಟ್ಯೂಟ್ (Lowy Institute) ಎಂಬ ಚಿಂತನ ವೇದಿಕೆ (ಥಿಂಕ್ ಟ್ಯಾಂಕ್) ಪ್ರಕಟಿಸಿದ ಪಟ್ಟಿಯಲ್ಲಿ ಭಾರತವು ಜಪಾನ್ ನ್ನು ಹಿಂದಿಕ್ಕಿದೆ. ಅಮೆರಿಕವೇ ಅತ್ಯಂತ ಶಕ್ತಿಶಾಲಿಯಾಗಿದೆ. ಅಮೆರಿಕದ ಸಮೀಪದಲ್ಲೇ ಚೀನಾ ಇದೆ. ಅಮೆರಿಕ ಮತ್ತು ಚೀನಾ ಮೊದಲಿನ ಸಾಲಿನಲ್ಲಿವೆ. ಈ ಪೈಕಿ ಅಮೆರಿಕಕ್ಕೆ 81.7 ಅಂಕಗಳನ್ನು ನೀಡಲಾಗಿದೆ. ಚೀನಾಗೆ 72.7 ಅಂಕಗಳು ಸಿಕ್ಕಿವೆ. ಒಟ್ಟು 27 ರಾಷ್ಟ್ರಗಳು ಏಷ್ಯಾ ಪವರ್ ಇಂಡೆಕ್ಸ್ ನಲ್ಲಿವೆ. ಇದರಲ್ಲಿ ಸೂಪರ್ ಪವರ್, ಮೇಜರ್ ಪವರ್ ಮಿಡಲ್ ಪವರ್ ಮತ್ತು ಮೈನರ್ ಪವರ್ ಎಂದು ನಾಲ್ಕು ಮಟ್ಟಗಳಾಗಿ ವರ್ಗೀಕರಿಸಿ ಘೋಷಿಸಲಾಗಿದೆ.
ಅಮೆರಿಕ ಮತ್ತು ಚೀನಾ ಸೂಪರ್ ಪವರ್ ಎನಿಸಿವೆ. ಮೇಜರ್ ಪವರ್ ದೇಶಗಳು ಯಾವುವೂ ಇಲ್ಲ. 16 ದೇಶಗಳು ಮಿಡಲ್ ಪವರ್ ಪಟ್ಟಿಯಲ್ಲಿವೆ. ಈ ಪಟ್ಟಿಯಲ್ಲಿ ಭಾರತ ಮುಂಚೂಣಿಯಲ್ಲಿದೆ. ಭಾರತವು 39.1 ಅಂಕ ಪಡೆದಿದೆ. ಜಪಾನ್, ಆಸ್ಟ್ರೇಲಿಯಾ, ರಷ್ಯಾ ಮತ್ತು ಸೌತ್ ಕೊರಿಯಾ ದೇಶಗಳೂ 30ಕ್ಕಿಂತ ಹೆಚ್ಚು ಅಂಕಗಳನ್ನು ಪಡೆದಿವೆ.
ಹಿಂದೆ ವಿಶ್ವದ ಸೂಪರ್ ಪವರ್ ದೇಶವಾಗಿದ್ದ ರಷ್ಯಾ ಏಷ್ಯಾದಲ್ಲಿ ಹೊಂದಿರುವ ಪ್ರಭಾವದಲ್ಲಿ 6ನೇ ಸ್ಥಾನವಾಗಿದೆ.
ಪಾಕಿಸ್ತಾನ, ಉತ್ತರ ಕೊರಿಯಾ, ಬ್ರೂನೇ ಮೊದಲಾದ ದೇಶಗಳೂ ಕೂಡ ಮಧ್ಯಮ ಶಕ್ತಿ ಅಥವಾ ಮಿಡಲ್ ಪವರ್ ದೇಶಗಳಾಗಿವೆ. ಅಲ್ಪ ಶಕ್ತ ದೇಶಗಳಲ್ಲಿ ಶ್ರೀಲಂಕಾ, ಬಾಂಗ್ಲಾದೇಶ, ನೇಪಾಳ, ಮಯನ್ಮಾರ್ ಇವೆ.
ಭವಿಷ್ಯದ ಸಂಪನ್ಮೂಲಗಳು, ಡಿಫೆನ್ಸ್ ನೆಟ್ವರ್ಕ್, ಸಾಂಸ್ಕೃತಿ ಪ್ರಭಾವ, ಆರ್ಥಿಕ ಸಾಮರ್ಥ್ಯ, ಮಿಲಿಟರಿ ಸಾಮರ್ಥ್ಯ, ಪ್ರತಿರೋಧ ಶಕ್ತಿಯಲ್ಲಿ ಅಮೆರಿಕವೇ ಮುಂಚೂಣಿಯಲ್ಲಿದೆ. ಏಷ್ಯಾದಲ್ಲಿ ಆರ್ಥಿಕ ಸಂಬಂಧ ಹೆಣೆಯುವುದು ಮತ್ತು ರಾಜತಾಂತ್ರಿಕ ಪ್ರಭಾವ ಬೀರುವ ವಿಚಾರದಲ್ಲಿ ಚೀನಾ ಮುಂದಿದೆ. ಭಾರತವು ಭವಿಷ್ಯದ ಸಂಪನ್ಮೂಲಗಳ ಶೇಖರಣೆಯಲ್ಲಿ ಉತ್ತಮ ಪ್ರಗತಿ ಸಾಧಿಸಿದೆ.
