ವಾಷಿಂಗ್ಟನ್: ಅನೈತಿಕ ಸಂಬಂಧ ಮತ್ತು ಚೀನಾದ ಬೇಹುಗಾರಿಕೆಯ ಗಂಭೀರ ಆರೋಪಗಳ ಸುಳಿಯಲ್ಲಿ ಸಿಲುಕಿ ಜೆನ್ಸನ್ ಹುವಾಂಗ್ ರಾಜೀನಾಮೆ ನೀಡಿದ ಬೆನ್ನಲ್ಲೇ, ಚಿಪ್ ತಯಾರಿಕಾ ಸಂಸ್ಥೆ ಎನ್ವಿಡಿಯಾ (Nvidia) ತನ್ನ ನೂತನ ಸಿಇಒ ಹುಡುಕಾಟವನ್ನು ತೀವ್ರಗೊಳಿಸಿದೆ. ಕಂಪನಿಯನ್ನು ಕೃತಕ ಬುದ್ಧಿಮತ್ತೆ (AI) ಸಾಮ್ರಾಜ್ಯವನ್ನಾಗಿ ಕಟ್ಟಿದ ಹುವಾಂಗ್ ಅವರ ಸ್ಥಾನ ತುಂಬಲು ಸಂಸ್ಥೆಯ ಆಂತರಿಕ ಹಾಗೂ ಹೊರಗಿನ 11 ಪ್ರಮುಖ ದಿಗ್ಗಜರ ಹೆಸರುಗಳು ಕೇಳಿಬರುತ್ತಿವೆ. ವಿಶೇಷವೆಂದರೆ, ಈ ಪಟ್ಟಿಯಲ್ಲಿ ಮೂವರು ಭಾರತೀಯ ಮೂಲದ ಟೆಕ್ ದಿಗ್ಗಜರೂ ಸ್ಥಾನ ಪಡೆದಿದ್ದಾರೆ. ತಂತ್ರಜ್ಞಾನದ ಆಳವಾದ ಜ್ಞಾನ, ದೂರದೃಷ್ಟಿ ಮತ್ತು ಭೌಗೋಳಿಕ ರಾಜಕೀಯ ಒತ್ತಡಗಳನ್ನು ನಿಭಾಯಿಸುವ ಸಾಮರ್ಥ್ಯವಿರುವ ನಾಯಕನಿಗಾಗಿ ಹೂಡಿಕೆದಾರರು ಎದುರು ನೋಡುತ್ತಿದ್ದಾರೆ.
ರೇಸ್‌ನಲ್ಲಿರುವ ಮೂವರು ಭಾರತೀಯ ಮೂಲದ ದಿಗ್ಗಜರು
ಎನ್ವಿಡಿಯಾ ಸಿಇಒ ಹುದ್ದೆಯ ಸಂಭಾವ್ಯರ ಪಟ್ಟಿಯಲ್ಲಿ ಮೈಕ್ರಾನ್ (Micron) ಕಂಪನಿಯ ಮುಖ್ಯಸ್ಥ ಸಂಜಯ್ ಮೆಹ್ರೋತ್ರಾ ಮುಂಚೂಣಿಯಲ್ಲಿದ್ದಾರೆ. 4 ದಶಕಗಳ ಅನುಭವ ಹೊಂದಿರುವ ಮೆಹ್ರೋತ್ರಾ, ಸ್ಯಾನ್‌ಡಿಸ್ಕ್ (SanDisk) ಸಹ-ಸಂಸ್ಥಾಪಕರಾಗಿಯೂ ಕೆಲಸ ಮಾಡಿದ್ದರು. ಮೈಕ್ರಾನ್ ಸಂಸ್ಥೆಯನ್ನು ಎಐ ಸರ್ವರ್‌ಗಳಿಗೆ ಬೇಕಾದ ಮೆಮೊರಿ ಚಿಪ್‌ಗಳ ಪ್ರಮುಖ ಪೂರೈಕೆದಾರರನ್ನಾಗಿ ಬದಲಾಯಿಸಿ, ಕಂಪನಿಯ ಮೌಲ್ಯವನ್ನು ಸುಮಾರು 1 ಲಕ್ಷಕೋಟಿ ಡಾಲರ್‌ಗೆ ಏರಿಸಿದ ಕೀರ್ತಿ ಇವರಿಗಿದೆ. ಇವರಷ್ಟೇ ಅಲ್ಲದೆ ಪಾಲೋ ಆಲ್ಟೊ ನೆಟ್‌ವರ್ಕ್ಸ್ (Palo Alto Networks) ಸಿಇಒ ನಿಕೇಶ್ ಅರೋರಾ ಹೆಸರನ್ನೂ ಹೂಡಿಕೆದಾರರು ಪ್ರಸ್ತಾಪಿಸಿದ್ದಾರೆ.
ಸಾಫ್ಟ್‌ಬ್ಯಾಂಕ್ ಮತ್ತು ಗೂಗಲ್‌ನಲ್ಲಿ ಉನ್ನತ ಹುದ್ದೆಗಳನ್ನು ನಿಭಾಯಿಸಿರುವ ಅರೋರಾ, ಎಐ ಆಧಾರಿತ ಸೈಬರ್ ಭದ್ರತಾ ಕ್ಷೇತ್ರದಲ್ಲಿ ದೊಡ್ಡ ಹೆಸರು ಮಾಡಿದ್ದಾರೆ. ಇನ್ನು ಗೂಗಲ್ ಕ್ಲೌಡ್ ಸಿಇಒ ಥಾಮಸ್ ಕುರಿಯನ್ ಕೂಡ ರೇಸ್‌ನಲ್ಲಿದ್ದು, ಎಂಟರ್‌ಪ್ರೈಸ್ ಸಾಫ್ಟ್‌ವೇರ್ ಮತ್ತು ಕ್ಲೌಡ್ ಮೂಲಸೌಕರ್ಯದಲ್ಲಿ ಅವರಿಗಿರುವ ಅನುಭವ ಎನ್ವಿಡಿಯಾ ವ್ಯವಹಾರಕ್ಕೆ ಪೂರಕವಾಗಿದೆ. ಆದರೆ, ಅರೋರಾ ಮತ್ತು ಕುರಿಯನ್ ಅವರಿಗೆ ನೇರವಾಗಿ ಚಿಪ್ ವಿನ್ಯಾಸದ ಅನುಭವ ಇಲ್ಲದಿರುವುದು ಒಂದು ಸವಾಲಾಗಿದೆ.
ಟ್ರಂಪ್ ಒಲವು ಗಳಿಸಿರುವ ಟಿಮ್ ಕುಕ್, ಪ್ರತಿಸ್ಪರ್ಧಿ ಲಿಸಾ ಸು
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮೊದಲ ಆಯ್ಕೆಯಾಗಿ ಆ್ಯಪಲ್ ಮಾಜಿ ಸಿಇಒ ಟಿಮ್ ಕುಕ್ ಹೆಸರು ಕೇಳಿಬರುತ್ತಿದೆ. ಸ್ಟೀವ್ ಜಾಬ್ಸ್ ನಿಧನದ ನಂತರ ಆ್ಯಪಲ್ ಸಂಸ್ಥೆಯನ್ನು 350 ಬಿಲಿಯನ್ ಡಾಲರ್‌ನಿಂದ 4.5 ಟ್ರಿಲಿಯನ್ ಡಾಲರ್ ಮೌಲ್ಯಕ್ಕೆ ಕೊಂಡೊಯ್ದ ಅನುಭವ ಕುಕ್ ಅವರಿಗಿದೆ. ದಿಗ್ಗಜರೊಬ್ಬರ ಉತ್ತರಾಧಿಕಾರಿಯಾಗಿ ಕಂಪನಿಯನ್ನು ಯಶಸ್ವಿಯಾಗಿ ಮುನ್ನಡೆಸಿದ ದಾಖಲೆ ಹೊಂದಿರುವ ಕುಕ್, ಟ್ರಂಪ್ ಅವರೊಂದಿಗೂ ಆಪ್ತ ಸಂಬಂಧ ಹೊಂದಿದ್ದಾರೆ. ಮತ್ತೊಂದೆಡೆ, ಎನ್‌ವಿಡಿಯಾದ ಪ್ರಮುಖ ಪ್ರತಿಸ್ಪರ್ಧಿ ಎಎಂಡಿ (AMD) ಸಂಸ್ಥೆಯ ಸಿಇಒ ಲಿಸಾ ಸು ಹೆಸರು ಕೂಡ ಚರ್ಚೆಯಲ್ಲಿದೆ.
ತೈವಾನ್ ಮೂಲದವರಾದ ಲಿಸಾ ಸು, ಹುವಾಂಗ್ ಅವರ ದೂರದ ಸಂಬಂಧಿಯೂ ಹೌದು. ಅಮೆರಿಕದ ನಿರ್ಬಂಧಗಳ ನಡುವೆಯೂ ಚೀನಾ ಮಾರುಕಟ್ಟೆಯಲ್ಲಿ ಎಎಂಡಿ ಪಾಲನ್ನು ಉಳಿಸಿಕೊಳ್ಳುವಲ್ಲಿ ಅವರು ಯಶಸ್ವಿಯಾಗಿದ್ದಾರೆ. ಇವರಲ್ಲದೆ, ಆ್ಯಪಲ್‌ನ ಹಾರ್ಡ್‌ವೇರ್ ವಿಭಾಗದ ಮುಖ್ಯಸ್ಥ ಜಾನಿ ಸ್ರೌಜಿ, ಮಾರ್ವೆಲ್ ಟೆಕ್ನಾಲಜಿ ಸಿಇಒ ಮ್ಯಾಟ್ ಮರ್ಫಿ, ಆರ್ಮ್ (Arm) ಸಿಇಒ ರೆನೆ ಹಾಸ್ ಹಾಗೂ ಇಂಟೆಲ್ ಮಾಜಿ ಸಿಇಒ ಪ್ಯಾಟ್ ಗೆಲ್ಸಿಂಗರ್ ಕೂಡ ಸಂಭಾವ್ಯರ ಪಟ್ಟಿಯಲ್ಲಿದ್ದಾರೆ.
ಸಂಸ್ಥೆಯ ಒಳಗಿನಿಂದಲೇ ಸಾರಥಿ ಆಯ್ಕೆಯಾಗುತ್ತಾರೆಯೇ?
ಹೊರಗಿನ ದಿಗ್ಗಜರ ಜೊತೆಗೆ ಎನ್‌ವಿಡಿಯಾದ ಆಂತರಿಕ ನಾಯಕರೂ ರೇಸ್‌ನಲ್ಲಿದ್ದಾರೆ. ಸದ್ಯ ಹಂಗಾಮಿ ಸಿಇಒ ಆಗಿ ನೇಮಕಗೊಂಡಿರುವ ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ (CFO) ಕೊಲೆಟ್ ಕ್ರೆಸ್ ಅವರಿಗೆ ವಾಲ್ ಸ್ಟ್ರೀಟ್ ಹೂಡಿಕೆದಾರರೊಂದಿಗೆ ಉತ್ತಮ ಬಾಂಧವ್ಯವಿದೆ. ಬಿಕ್ಕಟ್ಟಿನ ಸಮಯದಲ್ಲಿ ಕಂಪನಿಯನ್ನು ಸ್ಥಿರವಾಗಿ ಮುನ್ನಡೆಸುವ ಸಾಮರ್ಥ್ಯ ಅವರಿಗಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಇವರೊಂದಿಗೆ, 2004ರಿಂದ ಎನ್‌ವಿಡಿಯಾದಲ್ಲಿರುವ ಹೈಪರ್‌ಸ್ಕೇಲ್ ಮತ್ತು ಹೈ-ಪರ್ಫಾರ್ಮೆನ್ಸ್ ಕಂಪ್ಯೂಟಿಂಗ್ ವಿಭಾಗದ ಉಪಾಧ್ಯಕ್ಷ ಇಯಾನ್ ಬಕ್ ಪ್ರಬಲ ಆಕಾಂಕ್ಷಿಯಾಗಿದ್ದಾರೆ.
ಎನ್‌ವಿಡಿಯಾವನ್ನು ಎಐ ಲೋಕದ ದೈತ್ಯನನ್ನಾಗಿ ಮಾಡಿದ ‘ಕೂಡಾ’ (CUDA) ಸಾಫ್ಟ್‌ವೇರ್ ಅಭಿವೃದ್ಧಿಯಲ್ಲಿ ಬಕ್ ಪ್ರಮುಖ ಪಾತ್ರ ವಹಿಸಿದ್ದರು. ಒಟ್ಟಿನಲ್ಲಿ, ಜಾಗತಿಕ ಟೆಕ್ ಲೋಕದ ಅತ್ಯಂತ ಪ್ರತಿಷ್ಠಿತ ಹಾಗೂ ಸವಾಲಿನ ಈ ಹುದ್ದೆಗೆ ಯಾರು ಆಯ್ಕೆಯಾಗಲಿದ್ದಾರೆ ಎಂಬುದು ತೀವ್ರ ಕುತೂಹಲ ಕೆರಳಿಸಿದೆ.
