ವಾಷಿಂಗ್ಟನ್: ಕೃತಕ ಬುದ್ಧಿಮತ್ತೆ (AI) ಚಿಪ್ ತಯಾರಕ ದೈತ್ಯ ‘ಎನ್ವಿಡಿಯಾ’ದ (Nvidia) ಸಹ-ಸಂಸ್ಥಾಪಕ ಮತ್ತು ಸಿಇಒ ಜೆನ್ಸನ್ ಹುವಾಂಗ್ (63) ಅವರ ವೈಯಕ್ತಿಕ ಜೀವನದ ವಿವಾದಗಳು ಇದೀಗ ಅವರ ವೃತ್ತಿಜೀವನಕ್ಕೆ ಕುತ್ತು ತಂದಿವೆ. ಚೀನಾದ ಶಂಕಿತ ಗೂಢಚಾರಿಣಿ, ಉದ್ಯಮಿ ಆಲಿಸ್ ಹುವಾಂಗ್ ಅವರೊಂದಿಗಿನ ಅಕ್ರಮ ಸಂಬಂಧದ ವಿವಾದ ದೊಡ್ಡದಾದ ಬೆನ್ನಲ್ಲೇ ಇದೀಗ ಎನ್ವಿಡಿಯಾದ ಹೆಲ್ತ್‌ಕೇರ್ ವಿಭಾಗದ ಉಪಾಧ್ಯಕ್ಷೆ ಕಿಂಬರ್ಲಿ ಪೊವೆಲ್ (48) ಅವರೊಂದಿಗೂ ಜೆನ್ಸನ್ ಹುವಾಂಗ್ ಅನೈತಿಕ ಸಂಬಂಧ ಹೊಂದಿದ್ದಾರೆ ಎಂಬ ಸ್ಫೋಟಕ ವರದಿಯನ್ನು ‘ನ್ಯೂಯಾರ್ಕ್ ಟೈಮ್ಸ್’ ಪ್ರಕಟಿಸಿದೆ.
ಹೋಟೆಲ್‌ನಲ್ಲಿ ಸಿಕ್ಕಿಬಿದ್ದ ಜೋಡಿ
ಕಳೆದ ಮಾರ್ಚ್ ತಿಂಗಳಲ್ಲಿ ಕ್ಯಾಲಿಫೋರ್ನಿಯಾದ ಸ್ಯಾನ್ ಜೋಸ್‌ನಲ್ಲಿ ನಡೆದ ಕಂಪನಿಯ ವಾರ್ಷಿಕ ಡೆವಲಪರ್ ಸಮ್ಮೇಳನದ ಸಂದರ್ಭದಲ್ಲಿ, ಹೋಟೆಲ್ ಒಂದರಲ್ಲಿ ಜೆನ್ಸನ್ ಹುವಾಂಗ್ ಮತ್ತು ಕಿಂಬರ್ಲಿ ಪೊವೆಲ್ ಆತ್ಮೀಯವಾಗಿರುವುದನ್ನು ಎನ್ವಿಡಿಯಾದ ಐವರು ಉದ್ಯೋಗಿಗಳು ನೋಡಿದ್ದಾರೆ ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ. ಈ ದೃಶ್ಯವನ್ನು ಅಲ್ಲಿದ್ದ ವ್ಯಕ್ತಿಯೊಬ್ಬರು ವಿಡಿಯೋ ಮಾಡಿಕೊಂಡಿದ್ದರು. ಇದನ್ನು ಗಮನಿಸಿದ ಹುವಾಂಗ್ ಅವರ ಭದ್ರತಾ ಸಿಬ್ಬಂದಿ ತಕ್ಷಣವೇ ಆ ವ್ಯಕ್ತಿಯನ್ನು ಪಕ್ಕಕ್ಕೆ ಕರೆದೊಯ್ದು, ಈ ವಿಷಯವನ್ನು ಬಹಿರಂಗಪಡಿಸದಂತೆ ‘ಗೌಪ್ಯತಾ ಒಪ್ಪಂದ’ಕ್ಕೆ (Non-Disclosure Agreement) ಸಹಿ ಹಾಕುವಂತೆ ಆಫರ್ ನೀಡಿದ್ದರು ಎಂದು ಮೂಲಗಳು ತಿಳಿಸಿವೆ. ಸದ್ಯ ಈ ವಿವಾದದ ಕುರಿತು ಪ್ರತಿಕ್ರಿಯಿಸಲು ಹುವಾಂಗ್, ಪೊವೆಲ್ ಮತ್ತು ಎನ್ವಿಡಿಯಾ ನಿರಾಕರಿಸಿವೆ.
ಯಾರು ಈ ಕಿಂಬರ್ಲಿ ಪೊವೆಲ್?
ಎಲೆಕ್ಟ್ರಾನಿಕ್ಸ್ ಸ್ಟಾರ್ಟ್‌ಅಪ್ ಒಂದರಲ್ಲಿ ಎಂಜಿನಿಯರ್ ಆಗಿ ವೃತ್ತಿ ಆರಂಭಿಸಿದ್ದ ಕಿಂಬರ್ಲಿ ಪೊವೆಲ್, 2008ರಲ್ಲಿ ನಿರ್ದೇಶಕಿಯಾಗಿ ಎನ್ವಿಡಿಯಾ ಸೇರಿದರು. ಕಳೆದ 18 ವರ್ಷಗಳಿಂದ ಜೆನ್ಸನ್ ಹುವಾಂಗ್ ಅವರೊಂದಿಗೆ ಕೆಲಸ ಮಾಡುತ್ತಿರುವ ಇವರು, ವೈದ್ಯಕೀಯ ಕ್ಷೇತ್ರದಲ್ಲಿ ಎನ್ವಿಡಿಯಾ ಚಿಪ್‌ಗಳ ಬಳಕೆಯನ್ನು ಜನಪ್ರಿಯಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. 2016ರಲ್ಲಿ ಹಿರಿಯ ನಿರ್ದೇಶಕಿಯಾಗಿ ಮತ್ತು 2017ರ ಅಂತ್ಯಕ್ಕೆ ಹೆಲ್ತ್‌ಕೇರ್ ವಿಭಾಗದ ಉಪಾಧ್ಯಕ್ಷೆಯಾಗಿ ಬಡ್ತಿ ಪಡೆದರು. ‘ನ್ಯೂಯಾರ್ಕ್ ಪೋಸ್ಟ್’ ವರದಿಯ ಪ್ರಕಾರ, ಕಿಂಬರ್ಲಿ ಪೊವೆಲ್ ವಿವಾಹಿತರಾಗಿದ್ದು, ಇಬ್ಬರು ಮಕ್ಕಳನ್ನು ಹೊಂದಿದ್ದಾರೆ.
ಸಿಇಒ ಪದಚ್ಯುತಿಗೆ ಸಿದ್ಧತೆ
ಎನ್ವಿಡಿಯಾದ ನೀತಿ ಸಂಹಿತೆಯ ಪ್ರಕಾರ, ಕಂಪನಿಯೊಳಗಿನ ವೈಯಕ್ತಿಕ ಸಂಬಂಧಗಳು ಹಿತಾಸಕ್ತಿ ಸಂಘರ್ಷಕ್ಕೆ (Conflict of Interest) ಕಾರಣವಾಗುತ್ತವೆ ಮತ್ತು ಅಂತಹ ದುರ್ನಡತೆಯ ವರದಿಗಳ ವಿರುದ್ಧ ತಕ್ಷಣ ತನಿಖೆ ನಡೆಸಲಾಗುತ್ತದೆ. ವಿಶೇಷವೆಂದರೆ, ಈ ನೀತಿ ಸಂಹಿತೆಯ ಪುಸ್ತಕವು ಸ್ವತಃ ಜೆನ್ಸನ್ ಹುವಾಂಗ್ ಅವರ ಪತ್ರದೊಂದಿಗೇ ಆರಂಭವಾಗುತ್ತದೆ.
ಈಗಾಗಲೇ ಚೀನಾದ ಕಂಪನಿಗಳಿಗೆ ಎನ್ವಿಡಿಯಾ ಚಿಪ್‌ಗಳನ್ನು ರವಾನಿಸಲು ಸಹಾಯ ಮಾಡಿದ ಆರೋಪ ಹೊತ್ತಿರುವ ಚೀನೀ ಉದ್ಯಮಿ ಆಲಿಸ್ ಹುವಾಂಗ್ ಅವರೊಂದಿಗಿನ ಸಂಬಂಧದಿಂದ ಜೆನ್ಸನ್ ತೀವ್ರ ಟೀಕೆಗೆ ಗುರಿಯಾಗಿದ್ದಾರೆ. ಇದೀಗ ಕಂಪನಿಯ ಹಿರಿಯ ಅಧಿಕಾರಿಯೊಂದಿಗಿನ ಸಂಬಂಧವೂ ಬಯಲಾಗಿರುವುದರಿಂದ, 63 ವರ್ಷದ ಬಿಲಿಯನೇರ್ ಜೆನ್ಸನ್ ಹುವಾಂಗ್ ಅವರನ್ನು ಸಿಇಒ ಸ್ಥಾನದಿಂದ ವಜಾಗೊಳಿಸಲು ಎನ್ವಿಡಿಯಾ ಆಡಳಿತ ಮಂಡಳಿ ಸಿದ್ಧತೆ ನಡೆಸಿದೆ ಎಂದು ‘ವಾಲ್ ಸ್ಟ್ರೀಟ್ ಜರ್ನಲ್’ ವರದಿ ಮಾಡಿದೆ.
ಷೇರು ಮಾರುಕಟ್ಟೆಯಲ್ಲಿ ತಲ್ಲಣ: 600 ಬಿಲಿಯನ್ ಡಾಲರ್ ನಷ್ಟ!
1993ರಲ್ಲಿ ತಾವೇ ಕಟ್ಟಿ ಬೆಳೆಸಿದ ಸುಮಾರು 4 ಟ್ರಿಲಿಯನ್ ಡಾಲರ್ ಮೌಲ್ಯದ ಕಂಪನಿಯಿಂದ ಹುವಾಂಗ್ ನಿರ್ಗಮಿಸುವ ಸುದ್ದಿ ಹೊರಬೀಳುತ್ತಿದ್ದಂತೆಯೇ ಷೇರು ಮಾರುಕಟ್ಟೆಯಲ್ಲಿ ಭಾರಿ ತಲ್ಲಣ ಸೃಷ್ಟಿಯಾಗಿದೆ. ಎನ್ವಿಡಿಯಾ ಷೇರುಗಳು ಶೇ. 8ರಷ್ಟು ಕುಸಿತ ಕಂಡಿದ್ದು, ಕಳೆದ ಒಂದು ವಾರದಲ್ಲಿ ಕಂಪನಿಯ ಮಾರುಕಟ್ಟೆ ಮೌಲ್ಯ ಬರೋಬ್ಬರಿ 600 ಬಿಲಿಯನ್ ಡಾಲರ್‌ನಷ್ಟು ಕರಗಿದೆ. ಕಂಪನಿಯಲ್ಲಿ ಸ್ಪಷ್ಟ ಉತ್ತರಾಧಿಕಾರ ಯೋಜನೆ ಇಲ್ಲದ ಕಾರಣ, ಮುಂದಿನ ಸಿಇಒ ಹುಡುಕಾಟಕ್ಕಾಗಿ ಆಡಳಿತ ಮಂಡಳಿಯು ಹೊರಗಿನ ಸಂಸ್ಥೆಯೊಂದರ ನೆರವು ಪಡೆಯುತ್ತಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ.
