ಬೆಂಗಳೂರು:ವಿಧಾನ ಪರಿಷತ್ ಚುನಾವಣೆಯಲ್ಲಿ ಎನ್‌ಡಿಎ ಗೆಲುವಿನ ಬೆನ್ನಲ್ಲೇ ರಾಜ್ಯ ಕಾಂಗ್ರೆಸ್ ಸರ್ಕಾರದ ವಿರುದ್ಧ ಜೆಡಿಎಸ್ ಶಾಸಕಾಂಗ ಪಕ್ಷದ ನಾಯಕ ಸಿ.ಬಿ. ಸುರೇಶ್ ಬಾಬು ವಿಧಾನಸೌಧದಲ್ಲಿ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ರಾಜ್ಯ ಸರ್ಕಾರದ ಕಾರ್ಯವೈಖರಿ ಜನಾಭಿಪ್ರಾಯದಿಂದಲೇ ಗೊತ್ತಾಗಿದ್ದು, ರಾಜ್ಯದ ಬುದ್ಧಿವಂತರು ಸರ್ಕಾರದ ವಿರುದ್ಧ ಇರುವುದು ಸಾಬೀತಾಗಿದೆ ಹಾಗೂ ಎಲ್ಲಾ ಹಂತದಲ್ಲೂ ಸರ್ಕಾರ ಎಡವಿದೆ ಎಂದು ಗುಡುಗಿದ್ದಾರೆ.
ಹಿರಿಯೂರು ಉಪಚುನಾವಣೆಯಲ್ಲಿ ಬಿಜೆಪಿ-ಜೆಡಿಎಸ್ ಒಟ್ಟಿಗೆ ಹೋಗುವ ತೀರ್ಮಾನವಾಗಿದ್ದು, ವರಿಷ್ಠರು ಚರ್ಚಿಸಿ ಒಮ್ಮತದ ಎನ್‌ಡಿಎ ಅಭ್ಯರ್ಥಿಯನ್ನು ಕಣಕ್ಕಿಳಿಸಲಿದ್ದಾರೆ ಎಂದ ಅವರು, 2028ಕ್ಕೆ ಬಿಜೆಪಿ-ಜೆಡಿಎಸ್ ಸಮ್ಮಿಶ್ರ ಸರ್ಕಾರ ಎಂಬ ಯಡಿಯೂರಪ್ಪ ಅವರ ಹೇಳಿಕೆ ಎಲ್ಲರಿಗೂ ಗೊತ್ತಿರುವ ವಿಚಾರ ಎಂದು ಸ್ಪಷ್ಟಪಡಿಸಿದ್ದಾರೆ.
ಇನ್ನು ಕೆಪಿಎಸ್ಸಿ ಹಗರಣದಲ್ಲಿ ಹೈಕೋರ್ಟ್ ಛೀಮಾರಿ ಹಾಕಿದರೂ ಸರ್ಕಾರ ಎಚ್ಚೆತ್ತುಕೊಳ್ಳುತ್ತಿಲ್ಲ, ಕೇವಲ ಡಿಫೆಂಡ್ ಮಾಡಿಕೊಳ್ಳುವುದೇ ತನ್ನ ಕೆಲಸ ಎಂಬಂತೆ ವರ್ತಿಸುತ್ತಿದೆ ಎಂದು ಕಿಡಿಕಾರಿದ್ದಾರೆ. ರೈತರಿಗೆ ಕೊಡಲು ಹಣ ಇಲ್ಲ ಎಂದು ಕಬ್ಬು ಬೆಳೆಗಾರರ ಸಭೆಯಲ್ಲಿ ಹೇಳುವ ಸಿಎಂ, ಭಾರತ್ ಜೋಡೋ ಸಂಘಕ್ಕೆ ಕೊಡಲು ನಿರ್ಧರಿಸಿರುವ ಹಣ ಕಾಂಗ್ರೆಸ್ ಪಕ್ಷದ್ದಾ ಎಂದು ನೇರ ಸವಾಲ್ ಹಾಕಿದ್ದಾರೆ. ಗ್ರಾಮ ಪಂಚಾಯತ್‌ನಲ್ಲಿ ಪೈಪ್ ಖರೀದಿಗೂ ಹಣವಿಲ್ಲದ ಸರ್ಕಾರ ಮೊದಲು ನಿಭಾಯಿಸುವುದನ್ನು ಕಲಿಯಬೇಕು, ಬರಗಾಲ ಇರುವುದರಿಂದ ಯಾವುದೇ ದರ ಏರಿಸಬಾರದು ಮತ್ತು ಬಲವಂತದ ಸಾಲ ವಸೂಲಿ ಮಾಡಬಾರದು ಎಂದು ಆಗ್ರಹಿಸಿದ್ದಾರೆ. ಶ್ರೀಮಂತರಿಂದ ಹಣ ಪಡೆದು ಅಭಿವೃದ್ಧಿ ಮಾಡದ ಸರ್ಕಾರ, ಲೋಪಗಳಿಂದಲೇ ಆದಾಯ ಸೃಷ್ಟಿಸಲು ಹೊರಟು ಬಡವನ ಜೇಬಿಗೆ ಕತ್ತರಿ ಹಾಕುತ್ತಿದೆ ಎಂದು ಸಿ.ಬಿ. ಸುರೇಶ್ ಬಾಬು ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
