ಬೆಂಗಳೂರು: ಭಾರತೀಯ ರೈಲ್ವೆಯು ತನ್ನ ಪ್ರಯಾಣಿಕರ ಭದ್ರತೆ ಹಾಗೂ ಅನುಕೂಲಕ್ಕಾಗಿ ಮಹತ್ವದ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ. ಅಕ್ಟೋಬರ್ 27 ರಿಂದ ಜಾರಿಗೆ ಬರುವಂತೆ, ರೈಲ್ವೆ ನಿಲ್ದಾಣಗಳ ರಿಸರ್ವೇಶನ್ ಕೌಂಟರ್ ಗಳಲ್ಲಿ ಕಾಯ್ದಿರಿಸುವ ಟಿಕೆಟ್ ಪಡೆದವರಿಗೂ ಪ್ರಯಾಣ ವಿಮೆ ಕವರೇಜ್ ಸೌಲಭ್ಯವನ್ನು ವಿಸ್ತರಿಸಲು ನಿರ್ಧರಿಸಲಾಗಿದೆ. ಸುಪ್ರೀಂ ಕೋರ್ಟ್ ನೀಡಿದ ಕಟ್ಟುನಿಟ್ಟಿನ ನಿರ್ದೇಶನದ ಮೇರೆಗೆ ಭಾರತೀಯ ರೈಲ್ವೆ ಈ ಕ್ರಮ ಕೈಗೊಂಡಿದೆ.
ಹಿನ್ನೆಲೆ ಮತ್ತು ಸುಪ್ರೀಂ ಕೋರ್ಟ್ ನಿರ್ದೇಶನ
ಇಲ್ಲಿಯವರೆಗೆ ಐಆರ್ ಸಿಟಿಸಿ ವೆಬ್‌ಸೈಟ್ ಅಥವಾ ಆ್ಯಪ್ ಮೂಲಕ ಆನ್ ಲೈನ್ ನಲ್ಲಿ ಟಿಕೆಟ್ ಕಾಯ್ದಿರಿಸುವ ಪ್ರಯಾಣಿಕರಿಗೆ ಮಾತ್ರ ಪ್ರಯಾಣ ವಿಮೆಯ ಆಯ್ಕೆ ಲಭ್ಯವಿತ್ತು. ಆದರೆ ನೇರವಾಗಿ ಕೌಂಟರ್ ಗೆ ತೆರಳಿ ಟಿಕೆಟ್ ಖರೀದಿಸುವ ಲಕ್ಷಾಂತರ ಪ್ರಯಾಣಿಕರು ಈ ಸೌಲಭ್ಯದಿಂದ ವಂಚಿತರಾಗುತ್ತಿದ್ದರು.
ಈ ತಾರತಮ್ಯವನ್ನು ಎತ್ತಿಹಿಡಿದ ಸುಪ್ರೀಂ ಕೋರ್ಟ್, ಆನ್ ಲೈನ್ ಮತ್ತು ಆಫ್ ಲೈನ್ ಪ್ರಯಾಣಿಕರ ನಡುವೆ ಯಾವುದೇ ವ್ಯತ್ಯಾಸ ಇರಬಾರದು ಎಂದು ಸ್ಪಷ್ಟಪಡಿಸಿದೆ. ಅಕ್ಟೋಬರ್ 27 ರೊಳಗಾಗಿ ಕೌಂಟರ್ ಟಿಕೆಟ್‌ಗಳಿಗೂ ವಿಮೆ ನೀಡುವ ವ್ಯವಸ್ಥೆಯನ್ನು ಜಾರಿಗೆ ತರಬೇಕು ಎಂದು ರೈಲ್ವೆ ಮಂಡಳಿಗೆ ಕಡ್ಡಾಯ ಆದೇಶ ನೀಡಿದೆ. ಅದರಂತೆ ರೈಲ್ವೆ ಇಲಾಖೆಯು ಹೊಸ ಸೌಲಭ್ಯ ನೀಡುತ್ತಿದೆ.
ವಿಮಾ ಮೊತ್ತ ಮತ್ತು ಅರ್ಹತೆಗಳು
ಸದ್ಯ ಆನ್ ಲೈನ್ ಟಿಕೆಟ್ ಬುಕಿಂಗ್ ನಲ್ಲಿ ಲಭ್ಯವಿರುವ ವಿಮಾ ಯೋಜನೆಯಡಿಯಲ್ಲಿ ಲಭಿಸುವ ಸೌಲಭ್ಯಗಳೇ ಕೌಂಟರ್ ಟಿಕೆಟ್ ಗಳಿಗೂ ಅನ್ವಯವಾಗುವ ನಿರೀಕ್ಷೆಯಿದೆ.
ಅಪಘಾತದಲ್ಲಿ ಸಾವು ಅಥವಾ ಶಾಶ್ವತ ಅಂಗವಿಕಲತೆ: ಗರಿಷ್ಠ 10 ಲಕ್ಷ ರೂ.ವರೆಗೆ ಪರಿಹಾರ.
ಭಾಗಶಃ ಅಂಗವಿಕಲತೆ: ಗರಿಷ್ಠ 7.5 ಲಕ್ಷ ರೂ.ವರೆಗೆ ಪರಿಹಾರ.
ಆಸ್ಪತ್ರೆ ವೆಚ್ಚಗಳು: ಗಾಯಗೊಂಡ ಪ್ರಯಾಣಿಕರ ಚಿಕಿತ್ಸೆಗಾಗಿ ಗರಿಷ್ಠ 2 ಲಕ್ಷ ರೂ.ವರೆಗೆ ಸಹಾಯಧನ.
ಆನ್ ಲೈನ್ ಬುಕಿಂಗ್ ನಲ್ಲಿ ಈ ವಿಮೆಗೆ ಕೇವಲ 45 ಪೈಸೆ ಪ್ರೀಮಿಯಂ ಶುಲ್ಕ ವಿಧಿಸಲಾಗುತ್ತದೆ. ಕೌಂಟರ್ ಟಿಕೆಟ್‌ಗಳಿಗೆ ಪ್ರೀಮಿಯಂ ಮೊತ್ತ ಎಷ್ಟು ಇರಲಿದೆ ಹಾಗೂ ಕ್ಲೇಮ್ ಪ್ರಕ್ರಿಯೆ ಮತ್ತು ದಾಖಲಾತಿಗಳ ವಿವರಗಳನ್ನು ರೈಲ್ವೆ ಇಲಾಖೆ ಶೀಘ್ರದಲ್ಲೇ ಅಧಿಕೃತವಾಗಿ ಪ್ರಕಟಿಸಲಿದೆ. ಈ ಹೊಸ ನಿಯಮದಿಂದಾಗಿ ಪ್ರತಿದಿನ ರೈಲುಗಳಲ್ಲಿ ಪ್ರಯಾಣಿಸುವ ಲಕ್ಷಾಂತರ ಆಫ್ ಲೈನ್ ಪ್ರಯಾಣಿಕರಿಗೆ ಮತ್ತು ಅವರ ಕುಟುಂಬಗಳಿಗೆ ಆರ್ಥಿಕ ಹಾಗೂ ಭದ್ರತಾ ಸೌಲಭ್ಯ ದೊರೆಯಲಿದೆ.
