ಕೇಂದ್ರ ಚುನಾವಣಾ ಆಯೋಗದ ಭಿನ್ನಮತ ಸ್ಫೋಟ: ಉಪ ಚುನಾವಣಾ ಆಯುಕ್ತರ ವಿರುದ್ಧ ಸಂಪುಟ ಕಾರ್ಯದರ್ಶಿಗೆ ಇಬ್ಬರು ಇಸಿಗಳ ದೂರು!

ನವದೆಹಲಿ: ಕೇಂದ್ರ ಚುನಾವಣಾ ಆಯೋಗದ (ECI) ಒಳಗೆ ಆಂತರಿಕ ಕಚ್ಚಾಟವಿರುವುದು ಮತ್ತೊಮ್ಮೆ ಬಹಿರಂಗವಾಗಿದ್ದು, ಹಿರಿಯ ಅಧಿಕಾರಿಯೊಬ್ಬರ ನಡೆಗೆ ಆಕ್ಷೇಪ ವ್ಯಕ್ತಪಡಿಸಿ ಇಬ್ಬರು ಚುನಾವಣಾ ಆಯುಕ್ತರು ನೇರವಾಗಿ ದೇಶದ ಸಂಪುಟ ಕಾರ್ಯದರ್ಶಿಗೆ ದೂರು ನೀಡಿರುವ ವಿಚಾರ ಇದೀಗ ಬೆಳಕಿಗೆ ಬಂದಿದೆ. ಉಪ ಚುನಾವಣಾ ಆಯುಕ್ತ ಮನೀಶ್ ಗಾರ್ಗ್ ಅವರ ಕಾರ್ಯವೈಖರಿ ಮತ್ತು ಕರ್ತವ್ಯ ಹಂಚಿಕೆ ವಿಚಾರದಲ್ಲಿ ನಿಯಮ ಉಲ್ಲಂಘಿಸಲಾಗಿದೆ ಎಂದು ಆರೋಪಿಸಿ ಚುನಾವಣಾ ಆಯುಕ್ತರಾದ ಡಾ. ಸುಖ್ಬೀರ್ ಸಿಂಗ್ ಸಂಧು ಹಾಗೂ ಡಾ. ವಿವೇಕ್ ಜೋಶಿ ಅವರು ಇದೇ ಜುಲೈ 29 ರಂದು ಸಂಪುಟ ಕಾರ್ಯದರ್ಶಿ ಟಿ.ವಿ. ಸೋಮನಾಥನ್ ಅವರಿಗೆ ಪ್ರತ್ಯೇಕ ಪತ್ರಗಳನ್ನು ಬರೆದಿದ್ದಾರೆ. ಮಾಹಿತಿ ಹಕ್ಕು ಕಾಯ್ದೆ (RTI) ಅಡಿಯಲ್ಲಿ ಲಭ್ಯವಾದ ಅಧಿಕೃತ ದಾಖಲೆಗಳಿಂದ ಈ ಆಡಳಿತಾತ್ಮಕ ಸಂಘರ್ಷ ಬೆಳಕಿಗೆ ಬಂದಿದೆ.

ಪೂರ್ವ ಮಾಹಿತಿ ಇಲ್ಲದೆ ಹುದ್ದೆಗಳ ಹಂಚಿಕೆ: ಆಯುಕ್ತರ ಆಕ್ರೋಶ

ಜುಲೈ 28 ರಂದು ಆಡಳಿತ ವಿಭಾಗದ ಉಪ ಚುನಾವಣಾ ಆಯುಕ್ತ ಭಾನು ಪ್ರಕಾಶ್ ಯೇತುರು ಅವರ ರಜೆ ಅವಧಿಯಲ್ಲಿ ಮನೀಶ್ ಗಾರ್ಗ್ ಅವರಿಗೆ ಆಡಳಿತ ವಿಭಾಗದ ಹೆಚ್ಚುವರಿ ಹೊಣೆಗಾರಿಕೆ ನೀಡಲಾಗಿತ್ತು. ಆದರೆ, ಲಿಂಕ್ ಅಧಿಕಾರಿಯಾಗಿ ಅಧಿಕಾರ ವಹಿಸಿಕೊಂಡ ಕೆಲವೇ ಗಂಟೆಗಳಲ್ಲಿ ಗಾರ್ಗ್ ಅವರು ಹಿರಿಯ ಉಪ ಚುನಾವಣಾ ಆಯುಕ್ತರು, ಉಪ ಚುನಾವಣಾ ಆಯುಕ್ತರು ಮತ್ತು ಮಹಾನಿರ್ದೇಶಕರು ಸೇರಿದಂತೆ ಉನ್ನತ ಮಟ್ಟದ ಅಧಿಕಾರಿಗಳ ಕಾರ್ಯ ಹಂಚಿಕೆಯನ್ನು ಪರಿಷ್ಕರಿಸಿ ಆದೇಶ ಹೊರಡಿಸಿದ್ದರು. ಈ ಪ್ರಮುಖ ನಿರ್ಧಾರವನ್ನು ಆಯೋಗದೊಂದಿಗಾಗಲಿ ಅಥವಾ ಸಂಬಂಧಪಟ್ಟ ಅಧಿಕಾರಿಗಳೊಂದಿಗಾಗಲಿ ಯಾವುದೇ ಪೂರ್ವ ಚರ್ಚೆ ನಡೆಸದೆ ಕೈಗೊಳ್ಳಲಾಗಿದೆ ಎಂದು ಚುನಾವಣಾ ಆಯುಕ್ತ ಸುಖ್ಬೀರ್ ಸಿಂಗ್ ಸಂಧು ತಮ್ಮ ಪತ್ರದಲ್ಲಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಈ ರೀತಿಯ ನಿರ್ಧಾರಗಳನ್ನು ಆಯೋಗದ ಅನುಮತಿಯಿಲ್ಲದೆ ಕೈಗೊಳ್ಳಬಾರದು ಎಂದು ಆಡಳಿತ ವಿಭಾಗಕ್ಕೆ ಪದೇ ಪದೇ ಮೌಖಿಕ ಹಾಗೂ ಲಿಖಿತ ಸೂಚನೆ ನೀಡಿದ್ದರೂ ಅದನ್ನು ಉಲ್ಲಂಘಿಸಲಾಗಿದೆ. ಇದು 2023 ರ ಮುಖ್ಯ ಚುನಾವಣಾ ಆಯುಕ್ತರು ಮತ್ತು ಇತರ ಚುನಾವಣಾ ಆಯುಕ್ತರ ಕಾಯ್ದೆಯ ಸೆಕ್ಷನ್ 18(1) ಮತ್ತು 18(2) ರ ನೇರ ಉಲ್ಲಂಘನೆಯಾಗಿದ್ದು, ಅಧಿಕಾರಿ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಸಂಧು ಆಗ್ರಹಿಸಿದ್ದಾರೆ.
ಕಡತ ವೀಕ್ಷಣೆಗೆ ನಿರಾಕರಣೆ: ಮತ್ತೊಬ್ಬ ಆಯುಕ್ತರ ಆರೋಪ

ಮತ್ತೊಬ್ಬ ಚುನಾವಣಾ ಆಯುಕ್ತ ವಿವೇಕ್ ಜೋಶಿ ಕೂಡ ಇದೇ ಮಾದರಿಯ ದೂರನ್ನು ಕ್ಯಾಬಿನೆಟ್ ಕಾರ್ಯದರ್ಶಿಗೆ ಸಲ್ಲಿಸಿದ್ದಾರೆ. ತಮ್ಮ ಗಮನಕ್ಕೆ ತರದೆ ಕಾರ್ಯ ಹಂಚಿಕೆ ಆದೇಶ ಹೊರಡಿಸಿದ್ದನ್ನು ಪ್ರಶ್ನಿಸಿದ ಜೋಶಿ, ಈ ಕುರಿತು ಆಡಳಿತ ವಿಭಾಗದಿಂದ ಸಂಬಂಧಪಟ್ಟ ಕಡತವನ್ನು ಪರಿಶೀಲನೆಗೆ ಕೇಳಿದಾಗ ತಮಗೆ ಅದನ್ನು ಒದಗಿಸಲು ನಿರಾಕರಿಸಲಾಯಿತು ಎಂಬ ಗಂಭೀರ ಆರೋಪವನ್ನು ಮಾಡಿದ್ದಾರೆ. ಆಯೋಗದ ಅನುಮೋದನೆಯಿಲ್ಲದೆ ಇಂತಹ ನಿರ್ಧಾರ ಕೈಗೊಂಡಿರುವುದು ಕಾನೂನುಬಾಹಿರ ಎಂದು ಅವರು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.
ಹಸ್ತಕ್ಷೇಪಕ್ಕೆ ನಿರಾಕರಣೆ

ಸಂವಿಧಾನಾತ್ಮಕ ಸಂಸ್ಥೆಯೊಂದರ ಆಂತರಿಕ ಸಂಘರ್ಷದ ಕುರಿತು ಆಯುಕ್ತರು ನೇರವಾಗಿ ಸಂಪುಟ ಕಾರ್ಯದರ್ಶಿಗೆ ದೂರು ನೀಡಿರುವುದು ಗಮನಾರ್ಹ ಬೆಳವಣಿಗೆಯಾಗಿದೆ. ಆದರೆ, ಈ ಕುರಿತು ಟಿಪ್ಪಣಿ ಬರೆದಿರುವ ಕ್ಯಾಬಿನೆಟ್ ಸಚಿವಾಲಯವು, ಇಬ್ಬರು ಆಯುಕ್ತರು ವೈಯಕ್ತಿಕ ಸಾಮರ್ಥ್ಯದಲ್ಲಿ ದೂರು ನೀಡಿದ್ದು, ಇದನ್ನು ಇಡೀ ‘ಆಯೋಗ’ದ ಅಧಿಕೃತ ದೂರು ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಈ ಹಂತದಲ್ಲಿ ಸರ್ಕಾರ ನೇರವಾಗಿ ಹಸ್ತಕ್ಷೇಪ ಮಾಡಿದರೆ ಅದು ಸ್ವಾಯತ್ತ ಸಂವಿಧಾನಾತ್ಮಕ ಸಂಸ್ಥೆಯ ಆಡಳಿತದಲ್ಲಿ ಹಸ್ತಕ್ಷೇಪ ಮಾಡಿದಂತಾಗುತ್ತದೆ ಎಂದೂ ಹೇಳಿದೆ.

ಆದಾಗ್ಯೂ, ಈ ದೂರುಗಳನ್ನು ದಾಖಲೆಯಲ್ಲಿಟ್ಟುಕೊಂಡು, ಭವಿಷ್ಯದಲ್ಲಿ ಆಡಳಿತ ಸೇವಾ ಅಧಿಕಾರಿಯಾಗಿರುವ ಮನೀಶ್ ಗಾರ್ಗ್ ಅವರ ಸೇವೆಗೆ ಸಂಬಂಧಿಸಿದ ನಿರ್ಧಾರಗಳ ಸಂದರ್ಭದಲ್ಲಿ ಇದನ್ನು ಪರಿಗಣಿಸಲು ಸಿಬ್ಬಂದಿ ಮತ್ತು ತರಬೇತಿ ಇಲಾಖೆಗೆ ಹಾಗೂ ಮುಖ್ಯ ಚುನಾವಣಾ ಆಯುಕ್ತರ ಕಚೇರಿಗೆ ಪತ್ರದ ಪ್ರತಿಗಳನ್ನು ರವಾನಿಸಲಾಗಿದೆ. ಆಗಸ್ಟ್ 5, 2026 ರಂದು ಕ್ಯಾಬಿನೆಟ್ ಕಾರ್ಯದರ್ಶಿ ಸೋಮನಾಥನ್ ಅವರು ಇಬ್ಬರೂ ಆಯುಕ್ತರ ಪತ್ರ ಸ್ವೀಕೃತಿಯನ್ನು ದೃಢಪಡಿಸಿ ಪ್ರತ್ಯೇಕವಾಗಿ ಉತ್ತರ ನೀಡಿದ್ದಾರೆ.

ಆರ್‌ಟಿಐ ಅರ್ಜಿ ಮೂಲಕ ಸತ್ಯ ಬಯಲಿಗೆ

ನಿವೃತ್ತ ಕಮಡೋರ್ ಲೋಕೇಶ್ ಕೆ. ಬಾತ್ರಾ ಎಂಬವರು ಸೆಪ್ಟೆಂಬರ್ 24ರಂದು ಸಲ್ಲಿಸಿದ್ದ ಮಾಹಿತಿ ಹಕ್ಕು ಅರ್ಜಿಗೆ ಸಚಿವಾಲಯವು 14 ಪುಟಗಳ ದಾಖಲೆಗಳನ್ನು ಹಸ್ತಾಂತರಿಸಿದಾಗ ಈ ಇಡೀ ಪ್ರಸಂಗ ಬೆಳಕಿಗೆ ಬಂದಿದೆ. ಚುನಾವಣಾ ಆಯೋಗದಲ್ಲಿ ಕರಡು ಮತದಾರರ ಪಟ್ಟಿ ಸೇರ್ಪಡೆ ಹಾಗೂ ತಿದ್ದುಪಡಿ ವಿಚಾರವಾಗಿ ಆಯುಕ್ತರ ನಡುವೆ ಹಲವು ಬಾರಿ ಭಿನ್ನಾಭಿಪ್ರಾಯಗಳು ಮೂಡಿದ್ದವು ಎಂಬ ವರದಿಗಳ ಬೆನ್ನಲ್ಲೇ, ಈಗ ಆಡಳಿತಾತ್ಮಕ ಹುದ್ದೆಗಳ ಹಂಚಿಕೆಯಲ್ಲೂ ತೀವ್ರ ಸಂಘರ್ಷ ಏರ್ಪಟ್ಟಿರುವುದು ಬಹಿರಂಗವಾಗಿದೆ. ಆದರೆ, ಈ ದೂರುಗಳ ಆಧಾರದ ಮೇಲೆ ಅಧಿಕಾರಿ ವಿರುದ್ಧ ಮುಂದಿನ ತನಿಖೆ ಅಥವಾ ಕ್ರಮ ಕೈಗೊಳ್ಳಲಾಗಿದೆಯೇ ಎಂಬ ಬಗ್ಗೆ ದಾಖಲೆಗಳಲ್ಲಿ ಸ್ಪಷ್ಟತೆಯಿಲ್ಲ.