ಅಶ್ಲೀಲ ಪೋಸ್ಟ್ ವಿವಾದ: ಟಿವಿಕೆ ಮಹಿಳೆಯರಿಗಷ್ಟೇ ಘನತೆ ಇರುವುದಾ? ಚೆನ್ನೈ ಮೇಯರ್ ಪ್ರಿಯಾ ಪ್ರಶ್ನೆ

ಚೆನ್ನೈ: ತಮ್ಮನ್ನು ಗುರಿಯಾಗಿಸಿಕೊಂಡು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾದ ಅಶ್ಲೀಲ ಹಾಗೂ ನಿಂದನಾತ್ಮಕ ಪೋಸ್ಟ್ ಒಂದರ ವಿರುದ್ಧ ಚೆನ್ನೈ ಮೇಯರ್ ಆರ್. ಪ್ರಿಯಾ ಅವರು ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ. ಜೊತೆಗೆ ತಮಿಳಗ ವೆಟ್ರಿ ಕಳಗಂ (TVK) ಪಕ್ಷದ ಮುಖ್ಯಸ್ಥ, ರಾಜ್ಯದ ಸಿಎಂ ಸಿ.ಜೋಸೆಫ್ ವಿಜಯ್ ಅವರನ್ನು ನೇರವಾಗಿ ಪ್ರಶ್ನಿಸಿರುವ ಮೇಯರ್ ಪ್ರಿಯಾ, ಟಿವಿಎಕೆ ಪಕ್ಷದ ಕಾರ್ಯಕರ್ತರು ಮಹಿಳೆಯರ ಗೌರವದ ಬಗ್ಗೆ ತಳೆದಿರುವ ನಿಲುವನ್ನು ತೀವ್ರವಾಗಿ ಟೀಕಿಸಿದ್ದಾರೆ. ಈ ಕುರಿತು ಚೆನ್ನೈ ಪೊಲೀಸ್ ಕಮಿಷನರ್ ಹಾಗೂ ತಮಿಳುನಾಡು ಸೈಬರ್ ಕ್ರೈಮ್ ವಿಭಾಗಕ್ಕೆ ಅವರು ಅಧಿಕೃತ ದೂರು ನೀಡಿದ್ದು, ಪ್ರಕರಣಕ್ಕೆ ಕಾರಣರಾದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.

‘ಟಿವಿಕೆ ಮಹಿಳೆಯರಿಗೆ ಮಾತ್ರವೇ ಗೌರವವೇ?’

ತಮ್ಮ ದೂರಿನಲ್ಲಿ ಸೈಬರ್ ಕಿರುಕುಳವನ್ನು ತೀವ್ರವಾಗಿ ಖಂಡಿಸಿರುವ ಮೇಯರ್ ಪ್ರಿಯಾ, ಸಾರ್ವಜನಿಕ ಜೀವನದಲ್ಲಿದ್ದೇನೆ ಎಂಬ ಒಂದೇ ಕಾರಣಕ್ಕೆ ನನ್ನನ್ನು ಈ ರೀತಿ ಅಶ್ಲೀಲವಾಗಿ ನಿಂದಿಸುವುದು ಮತ್ತು ತೇಜೋವಧೆ ಮಾಡುವುದು ಎಷ್ಟರ ಮಟ್ಟಿಗೆ ಸರಿ ಎಂದು ಪ್ರಶ್ನಿಸಿದ್ದಾರೆ. ರಾಜಕೀಯ ಸಿದ್ಧಾಂತ ಅಥವಾ ನೀತಿಗಳ ಆಧಾರದ ಮೇಲೆ ಸಾರ್ವಜನಿಕವಾಗಿ ಚರ್ಚೆ ನಡೆಸುವುದನ್ನು ಬಿಟ್ಟು, ಮಹಿಳೆಯನ್ನು ಅಶ್ಲೀಲವಾಗಿ ಚಿತ್ರಿಸುವುದು ರಾಜಕೀಯ ಧರ್ಮವೇ ಎಂದು ಅವರು ವಿಜಯ್ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. “ಟಿವಿಕೆ ಪಕ್ಷಕ್ಕೆ ಸೇರಿದ ಮಹಿಳೆಯರಿಗೆ ಮಾತ್ರ ಸಮಾಜದಲ್ಲಿ ಗೌರವವಿದೆಯೇ? ಅಥವಾ ಇತರ ಮಹಿಳೆಯರು ಯಾವುದೇ ಗೌರವಕ್ಕೆ ಅರ್ಹರಲ್ಲ ಎಂಬುದು ನಿಮ್ಮ ಪಕ್ಷದ ಅಧಿಕೃತ ನಿಲುವೇ?” ಎಂದು ಪ್ರಿಯಾ ಅವರು ಜಾಲತಾಣದಲ್ಲಿ ಬರೆದುಕೊಂಡಿದ್ದು, ‘ಟಿವಿಕೆ ವರ್ಚುವಲ್ ವಾರಿಯರ್ಸ್’ ಎಂಬ ಹೆಸರಿನಲ್ಲಿ ಆನ್‌ಲೈನ್‌ನಲ್ಲಿ ನಿಂದನೆ ಮಾಡುವವರ ವಿರುದ್ಧ ಕ್ರಮ ಕೈಗೊಳ್ಳದಿರುವುದನ್ನು ಪ್ರಶ್ನಿಸಿದ್ದಾರೆ.

ರಾಜಕೀಯ ವೈಷಮ್ಯ, ಹಳೆಯ ವಿವಾದಗಳು

ಇತ್ತೀಚೆಗೆ ನಡೆದ ಡಿಎಂಕೆ ಪಕ್ಷದ ಕಾರ್ಯಕ್ರಮವೊಂದರಲ್ಲಿ ಡಿಎಂಕೆ ಕೌನ್ಸಿಲರ್ ಸುಧಾ ದೀನದಯಾಲನ್ ಅವರು ವಿಜಯ್ ವಿರುದ್ಧ ಕೆಟ್ಟದಾಗಿ ಮಾತನಾಡಿದ್ದರು ಎನ್ನಲಾದ ಘಟನೆಯಲ್ಲಿ ಮೇಯರ್ ಪ್ರಿಯಾ ವೇದಿಕೆಯಲ್ಲಿದ್ದರು. ಆ ವೇಳೆ ಪ್ರಿಯಾ ಅವರು ನಕ್ಕಿದ್ದರೆಂದು ಆರೋಪಿಸಿ ಟಿವಿಕೆ ನಾಯಕರು ಅವರ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದರು. ಈ ಬೆಳವಣಿಗೆಯ ಬೆನ್ನಲ್ಲೇ ಮೇಯರ್ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ಅಶ್ಲೀಲ ಪೋಸ್ಟ್‌ಗಳು ಹರಿದಾಡಲು ಪ್ರಾರಂಭವಾಗಿವೆ. ಈ ಹಿಂದೆ ನಟಿ ತ್ರಿಷಾ ಕೃಷ್ಣನ್ ವಿರುದ್ಧ ಡಿಎಂಕೆ ನಾಯಕ ಉದಯನಿಧಿ ಸ್ಟಾಲಿನ್ ನೀಡಿರೆನ್ನಲಾದ ಹೇಳಿಕೆಯನ್ನು ಖಂಡಿಸಿದ್ದ ವಿಜಯ್, ಮಹಿಳೆಯರ ವಿರುದ್ಧದ ಅಶ್ಲೀಲ ಮಾತುಗಳು ಹಾಗೂ ವೈಯಕ್ತಿಕ ದಾಳಿಗಳನ್ನು ಒಪ್ಪಲು ಸಾಧ್ಯವಿಲ್ಲ ಎಂದು ಹೇಳಿಕೆ ನೀಡಿದ್ದರು. ಇದೀಗ ತಮ್ಮದೇ ಬೆಂಬಲಿಗರು ನಡೆಸಿದ್ದಾರೆ ಎನ್ನಲಾದ ಈ ಸೈಬರ್ ದಾಳಿಯ ಕುರಿತು ವಿಜಯ್ ಮೌನ ವಹಿಸಿರುವುದನ್ನು ಮೇಯರ್ ಪ್ರಿಯಾ ಪ್ರಶ್ನಿಸಿದ್ದಾರೆ.

ಇದನ್ನೂ ಓದಿ:ಆರ್ಥಿಕತೆ ಇನ್‌ಫ್ಲೂಯೆನ್ಸರ್ ವಿ. ಹರೀಶ್ ಆತ್ಮಹತ್ಯೆ: ಟೆಕ್ ಸಿಇಒ ಕಿರುಕುಳವೇ ಕಾರಣ ಎಂದು ತಂದೆ ಆರೋಪ