ನವದೆಹಲಿ : ದುಬೈನಿಂದ ಇಸ್ರೇಲ್‌ನ ಟೆಲ್ ಅವಿವ್‌ಗೆ ತೆರಳುತ್ತಿದ್ದ ‘ಫ್ಲೈದುಬೈ’ ವಿಮಾನದಲ್ಲಿ ನಡೆದ ಭೀಕರ ಘಟನೆಗೆ ಸಂಬಂಧಿಸಿದ ವಿವರಗಳನ್ನು ಇದೀಗ ಚೇತರಿಸಿಕೊಳ್ಳುತ್ತಿರುವ ಭಾರತದ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಬಿಚ್ಚಿಟ್ಟಿದ್ದಾರೆ. ವಿಮಾನ ಅಪಹರಿಸಿ ಅಥವಾ ಪತನಗೊಳಿಸಿ ಉಗ್ರ ಕೃತ್ಯ ಎಸಗಲು ಯತ್ನಿಸಿದ ಸಹ-ಪೈಲಟ್‌ನ ಮಾರಣಾಂತಿಕ ದಾಳಿಯ ನಡುವೆಯೂ, ತೀವ್ರವಾಗಿ ಗಾಯಗೊಂಡಿದ್ದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ತೋರಿಸಿದ ಸಾಹಸದಿಂದಾಗಿ 174 ಪ್ರಯಾಣಿಕರು ಪ್ರಾಣಾಪಾಯದಿಂದ ಪಾರಾಗಿದ್ದು, ಪ್ರಸ್ತುತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಕ್ಯಾಪ್ಟನ್ ಸ್ಮಿತ್, ಆ ಕ್ಷಣದಲ್ಲಿ ನಡೆದ ಭೀಕರ ಘಟನೆಯನ್ನು ಹಂಚಿಕೊಂಡಿದ್ದಾರೆ.
ನೆತ್ತಿಗೆ ಬಿದ್ದ ಭಾರಿ ಏಟು
ಫ್ಲೈದುಬೈ ಎಫ್‌ಝೆಡ್ 1073 (FZ1073) ವಿಮಾನವು ಬೋಯಿಂಗ್ 737-8 ಶ್ರೇಣಿಯದ್ದು. ಎಂದಿನಂತೆ ವಿಮಾನ ಪ್ರಯಾಣ ಆರಂಭಿಸಿತ್ತು. ವಿಮಾನವು ಸುಮಾರು 34,000 ಅಡಿ ಎತ್ತರದಲ್ಲಿ ಹಾರಾಟ ನಡೆಸುತ್ತಿದ್ದಾಗ, ಸಹ-ಪೈಲಟ್ ನಮಾಜ್ ಮಾಡಲು ಬಯಸಿದ್ದ. “ಸ್ಥಳೀಯ ಪೈಲಟ್‌ಗಳು ಹಾರಾಟದ ಮಧ್ಯೆ ಪ್ರಾರ್ಥನೆ ಮಾಡುವುದು ಸಾಮಾನ್ಯ. ಹೀಗಾಗಿ ಅವರಿಗೆ ಗೌರವ ನೀಡಿ ನಾನು ಮುಂಭಾಗವನ್ನು ನೋಡುತ್ತಾ ಕುಳಿತಿದ್ದೆ. ಆದರೆ ಸುಮಾರು 4-5 ನಿಮಿಷಗಳ ನಂತರ ದಿಢೀರನೆ ನನ್ನ ತಲೆಯ ಹಿಂಭಾಗಕ್ಕೆ ಭಾರಿ ಪೆಟ್ಟು ಬಿತ್ತು” ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗೆ ಮಾತನಾಡುವಾಗ ಸ್ಮಿತ್ ನೆನಪಿಸಿಕೊಂಡಿದ್ದಾರೆ.ಆರಂಭದಲ್ಲಿ ವಿಮಾನಕ್ಕೆ ಏನೋ ತಾಂತ್ರಿಕ ಅನಾಹುತ ಸಂಭವಿಸಿದೆ ಎಂದೇ ಸ್ಮಿತ್ ಭಾವಿಸಿದ್ದರು. ಆದರೆ, ಸಾಲು ಸಾಲು ಏಟುಗಳು ಬೀಳತೊಡಗಿದಾಗ, ಕಾಕ್‌ಪಿಟ್ ಒಳಗಿದ್ದ ಸಹ-ಪೈಲಟ್ ತನ್ನ ಮೇಲೆಯೇ ದಾಳಿ ಮಾಡುತ್ತಿದ್ದಾನೆ ಎಂಬುದು ಅವರಿಗೆ ಅರಿವಾಯಿತು. ಕೊಡಲಿಯಿಂದ (Crash Axe) ಬಿದ್ದ ಬಲವಾದ ಪೆಟ್ಟುಗಳಿಂದಾಗಿ ನನ್ನ ಕಣ್ಣುಗಳು ಮಂಜಾದವು.
ಕೊನೆಯ ಉಸಿರಿರುವವರೆಗೆ ಹೋರಾಡಿದ ಭಾರತೀಯ ವೀರ
ದಾಳಿಯ ಬೆನ್ನಲ್ಲೇ ವಿಮಾನವು ಏಕಾಏಕಿ ಕೆಳಮುಖವಾಗಿ ಇಳಿಯಲು ಪ್ರಾರಂಭಿಸಿತು. 34,000 ಅಡಿ ಎತ್ತರದಲ್ಲಿದ್ದ ವಿಮಾನವು ಕ್ಷಣಮಾತ್ರದಲ್ಲಿ 17,000 ಅಡಿಗಿಂತಲೂ ಹೆಚ್ಚು ಕೆಳಗೆ ಕುಸಿಯಿತು. “ನನ್ನ ರಕ್ತ ಹೆಪ್ಪುಗಟ್ಟುವಂತಾಯಿತು. ವಿಮಾನ ಕೆಳಗೆ ಬೀಳುತ್ತಿದ್ದ ಸದ್ದು ಮತ್ತು ಪ್ರಯಾಣಿಕರ ಚೀರಾಟ ಕೇಳಿಸುತ್ತಿತ್ತು. ಕಾಕ್‌ಪಿಟ್ ಬಾಗಿಲು ತೆಗೆಯಲು ನಾನು ಯತ್ನಿಸಿದೆ, ಅಷ್ಟರಲ್ಲೇ ಅವನು ಅದನ್ನು ಮತ್ತೆ ಮುಚ್ಚಿದ. ನಾನು ಕಾಕ್‌ಪಿಟ್ ನೆಲದ ಮೇಲೆ ಬಿದ್ದಿದ್ದೆ” ಎಂದು ಸ್ಮಿತ್ ಹೇಳಿದ್ದಾರೆ.”ಆ ಕ್ಷಣದಲ್ಲಿ ನನಗೆ ಅನಿಸಿದ್ದು ಒಂದೇ—ಇದು ನನ್ನ ಕೊನೆಯ ಹೋರಾಟ. ನಾನು ಸುಮ್ಮನೆ ಕುಳಿತರೆ ಸಾಯುವುದು ಖಚಿತವಾಗಿತ್ತು. ನನ್ನಲ್ಲಿದ್ದ ಕೊನೆಯ ಶಕ್ತಿಯನ್ನೆಲ್ಲ ಕ್ರೋಢೀಕರಿಸಿ ಬಾಗಿಲನ್ನು ತಳ್ಳಿ ತೆರೆದೆ. ಅದೃಷ್ಟವಶಾತ್ ಬಾಗಿಲ ಬಳಿ ಪ್ರಯಾಣಿಕರು ಮತ್ತು ವಿಮಾನದ ಸಿಬ್ಬಂದಿ ಕಾಯುತ್ತಿದ್ದರು. ಅವರು ತಕ್ಷಣ ಒಳನುಗ್ಗಿ ಸಹ-ಪೈಲಟ್‌ನನ್ನು ವಶಕ್ಕೆ ಪಡೆದರು” ಎಂದು ಸ್ಮಿತ್ ರೋಮಾಂಚನಕಾರಿ ಕ್ಷಣವನ್ನು ಹಂಚಿಕೊಂಡಿದ್ದಾರೆ.
ಸೌದಿ ಅರೇಬಿಯಾದಲ್ಲಿ ತುರ್ತು ಭೂಸ್ಪರ್ಶ: ನೆರವಾದ ಪ್ರಯಾಣಿಕರು
ಇಸ್ರೇಲಿ ಪ್ರಯಾಣಿಕರೊಬ್ಬರು ಹಾಗೂ ವಿಮಾನದ ಸಿಬ್ಬಂದಿ ತಕ್ಷಣವೇ ಕಾಕ್‌ಪಿಟ್‌‌ಗೆ ನುಗ್ಗಿ, ವಿಮಾನದ ನಿಯಂತ್ರಣ ವ್ಯವಸ್ಥೆಯನ್ನು ಧ್ವಂಸಗೊಳಿಸಲು ಯತ್ನಿಸುತ್ತಿದ್ದ ದಾಳಿಕೋರ ಸಹ-ಪೈಲಟ್‌ನನ್ನು ಹತ್ತಿಕ್ಕಿದರು. ತಕ್ಷಣವೇ ವಿಮಾನವನ್ನು ಸೌದಿ ಅರೇಬಿಯಾದ ತಬುಕ್‌ನಲ್ಲಿರುವ ಪ್ರಿನ್ಸ್ ಸುಲ್ತಾನ್ ಬಿನ್ ಅಬ್ದೆಲ್ ಅಜೀಸ್ ವಿಮಾನ ನಿಲ್ದಾಣಕ್ಕೆ ತುರ್ತಾಗಿ ಭೂಸ್ಪರ್ಶ ಮಾಡಿಸಲಾಯಿತು. ವಿಮಾನದಲ್ಲಿದ್ದ 27 ಮಕ್ಕಳು ಸೇರಿ ಒಟ್ಟು 174 ಪ್ರಯಾಣಿಕರು ಸುರಕ್ಷಿತವಾಗಿ ಪಾರಾಗಿದ್ದಾರೆ.ಮುಂಬೈನ ಘಾಟ್‌ಕೋಪರ್ ಮೂಲದವರಾದ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್, ಕಮರ್ಷಿಯಲ್ ಏವಿಯೇಷನ್‌ನಲ್ಲಿ 13 ವರ್ಷಗಳಿಗೂ ಹೆಚ್ಚು ಅನುಭವ ಹೊಂದಿದ್ದು, 9,500ಕ್ಕೂ ಹೆಚ್ಚು ಗಂಟೆಗಳ ಕಾಲ ವಿಮಾನ ಹಾರಿಸಿದ ಅನುಭವ ಹೊಂದಿದ್ದಾರೆ. ಇವರ ಶೌರ್ಯವನ್ನು ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಇಸ್ರೇಲ್ ಪ್ರಧಾನಿ ನೆತನ್ಯಾಹು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.
ದಾಳಿಕೋರ ಸಹ-ಪೈಲಟ್ ಉಗ್ರ ಸಿದ್ಧಾಂತ ಹೊಂದಿದ್ದನೇ?
ದಾಳಿ ನಡೆಸಿದ ಸಹ-ಪೈಲಟ್‌ನನ್ನು ಒಮಾನ್ ಪ್ರಜೆಯಾದ ಹಮಾಮ್ ಅಲ್-ಹಮ್ಮಾಮಿ ಎಂದು ಗುರುತಿಸಲಾಗಿದೆ. ಈತ ವಿಮಾನದಲ್ಲಿದ್ದ ಎಮರ್ಜೆನ್ಸಿ ಆಕ್ಸ್ (ಕೊಡಲಿ) ಬಳಸಿ ಸ್ಮಿತ್ ಮೇಲೆ ದಾಳಿ ಮಾಡಿದ್ದ. ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ತನಿಖಾ ಸಂಸ್ಥೆಗಳ ಪ್ರಕಾರ, ಇದು ಭಯೋತ್ಪಾದನಾ ಕೃತ್ಯ ಎಸಗುವ ಯತ್ನವಾಗಿತ್ತು.ದಾಳಿಕೋರ ಹಮಾಮ್ ಹಿಂದೆ ಒಮಾನ್‌ನಲ್ಲಿ ತೀವ್ರಗಾಮಿ/ಉಗ್ರ ಸಿದ್ಧಾಂತಗಳನ್ನು ಹೊಂದಿದ್ದ ಕಾರಣಕ್ಕಾಗಿ ಹಾರಾಟ ನಡೆಸದಂತೆ ನಿಷೇಧಕ್ಕೊಳಗಾಗಿದ್ದ ಎನ್ನಲಾಗಿದೆ. ಈತ ಬ್ರಿಟನ್‌ನ ವಿಶ್ವವಿದ್ಯಾಲಯವೊಂದರಲ್ಲಿ ದೂರಶಿಕ್ಷಣದ ಮೂಲಕ ಏವಿಯೇಷನ್ ಮ್ಯಾನೇಜ್‌ಮೆಂಟ್ ಮುಗಿಸಿದ್ದ. ಆದರೆ, ಇಂತಹ ತೀವ್ರಗಾಮಿ ಹಿನ್ನೆಲೆ ಹೊಂದಿದ್ದ ವ್ಯಕ್ತಿ ಫ್ಲೈದುಬೈ ಸಂಸ್ಥೆಗೆ ಹೇಗೆ ಸೇರ್ಪಡೆಯಾದ ಎಂಬ ಬಗ್ಗೆ ಯುಎಇ ಸರ್ಕಾರ ತೀವ್ರ ತನಿಖೆ ನಡೆಸುತ್ತಿದೆ.
ಇದನ್ನೂ ಓದಿ :ಗದಗ ಜಿಲ್ಲಾ ನ್ಯಾಯಾಲಯದಲ್ಲಿ 22 ಹುದ್ದೆಗಳ ನೇಮಕಾತಿ!
