‘ನಾಟಿ ಬಾಯ್’ ರಾಕೆಟ್ ಹೆಗಲಿಗೆ ಇಸ್ರೋ ಭವಿಷ್ಯ : ಇಂದು ತಡರಾತ್ರಿ ಅರ್ಥ್‌ ಇಮೇಜಿಂಗ್ ಉಪಗ್ರಹ ಉಡಾವಣೆ

ಶ್ರೀಹರಿಕೋಟ : ಇತ್ತೀಚಿನ ಸರಣಿ ಹಿನ್ನಡೆಗಳಿಂದ ತತ್ತರಿಸಿರುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಇಂದು ಮಹತ್ವದ ಮೈಲಿಗಲ್ಲು ಸಾಧಿಸಲು ಹೊರಟಿದೆ. ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದ ಎರಡನೇ ಉಡಾವಣಾ ಪಥದಿಂದ ಜಿಎಸ್‌ಎಲ್‌ವಿ-ಎಫ್17 (GSLV-F17) ರಾಕೆಟ್ ಮೂಲಕ ‘ಇಒಎಸ್-05’ (EOS-05) ಉಪಗ್ರಹವನ್ನು ಬಾಹ್ಯಾಕಾಶಕ್ಕೆ ಉಡಾವಣೆ ಮಾಡಲಾಗುತ್ತಿದೆ. ಭೂಮಿಯಿಂದ ಸುಮಾರು 36,000 ಕಿಲೋಮೀಟರ್ ಎತ್ತರದ ಜಿಯೋಸಿಂಕ್ರೋನಸ್ ಕಕ್ಷೆಗೆ ಭಾರತದ ಮೊದಲ ಸುಧಾರಿತ ಇಮೇಜಿಂಗ್ ಉಪಗ್ರಹವನ್ನು ತಲುಪಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಇಸ್ರೋ ಪಾಲಿಗೆ ಇದು ಪ್ರತಿಷ್ಠೆ:

ಕಳೆದ ಕೆಲವು ತಿಂಗಳುಗಳು ಇಸ್ರೋ ಪಾಲಿಗೆ ಅತ್ಯಂತ ಕಠಿಣವಾಗಿದ್ದವು. ಸಂಸ್ಥೆಯ ಅತ್ಯಂತ ನಂಬಿಗಸ್ಥ ರಾಕೆಟ್ ಎಂದೇ ಹೆಸರುವಾಸಿಯಾಗಿದ್ದ ಪಿಎಸ್‌ಎಲ್‌ವಿ (PSLV) ಸತತ ಹಿನ್ನಡೆಗಳನ್ನು ಅನುಭವಿಸಿದ ಕಾರಣ ಅದರ ಕಾರ್ಯಾಚರಣೆಯನ್ನು ತಾತ್ಕಾಲಿಕವಾಗಿ ತಡೆಹಿಡಿಯಲಾಗಿದೆ. ಇಂತಹ ಸಂದರ್ಭದಲ್ಲಿ ನಡೆಯುತ್ತಿರುವ ಜಿಎಸ್‌ಎಲ್‌ವಿ ಉಡಾವಣೆ ಇಸ್ರೋಗೆ ತನ್ನ ಹಳೆಯ ಹೆಮ್ಮೆಯನ್ನು ಮರಳಿ ಪಡೆಯುವ ಮತ್ತು ಬಾಹ್ಯಾಕಾಶ ರಂಗದಲ್ಲಿ ತನ್ನ ತಾಂತ್ರಿಕ ಶ್ರೇಷ್ಠತೆಯನ್ನು ಜಗತ್ತಿಗೆ ಮತ್ತೊಮ್ಮೆ ಸಾಬೀತುಪಡಿಸುವ ಸುವರ್ಣ ಅವಕಾಶವಾಗಿದೆ. ಪಿಎಸ್‌ಎಲ್‌ವಿ ಮತ್ತು ಜಿಎಸ್‌ಎಲ್‌ವಿ ಸಂಪೂರ್ಣವಾಗಿ ಭಿನ್ನವಾದ ಎಂಜಿನ್ ವ್ಯವಸ್ಥೆಯನ್ನು ಹೊಂದಿರುವುದರಿಂದ, ಹಳೆಯ ತಾಂತ್ರಿಕ ದೋಷಗಳು ಈ ಉಡಾವಣೆಯ ಮೇಲೆ ಪ್ರಭಾವ ಬೀರಲಾರವು ಎಂದು ವಿಜ್ಞಾನಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

‘ನಾಟಿ ಬಾಯ್’ ಸವಾಲು:

ಇಸ್ರೋ ವಲಯದಲ್ಲಿ ಜಿಎಸ್‌ಎಲ್‌ವಿ ರಾಕೆಟ್‌ಗೆ ‘ನಾಟಿ ಬಾಯ್’ (ತುಂಟ ಹುಡುಗ) ಎಂಬ ಹೆಸರಿದೆ. ಆರಂಭಿಕ ಹಂತದಲ್ಲಿ ಇದು ನೀಡಿದ ಅನಿರೀಕ್ಷಿತ ಫಲಿತಾಂಶಗಳು ಮತ್ತು ತಾಂತ್ರಿಕ ಸವಾಲುಗಳೇ ಈ ಹೆಸರಿಗೆ ಕಾರಣ. 1990ರ ದಶಕದಲ್ಲಿ ಅಮೆರಿಕದ ತೀವ್ರ ರಾಜಕೀಯ ಒತ್ತಡದಿಂದಾಗಿ ರಷ್ಯಾ ನಮಗೆ ಕ್ರಯೋಜೆನಿಕ್ ತಂತ್ರಜ್ಞಾನ ನೀಡಲು ನಿರಾಕರಿಸಿದಾಗ, ಭಾರತೀಯ ವಿಜ್ಞಾನಿಗಳು ಧೃತಿಗೆಡದೆ ಸ್ವದೇಶಿ ಕ್ರಯೋಜೆನಿಕ್ ಎಂಜಿನ್ ಅಭಿವೃದ್ಧಿಪಡಿಸುವ ಸಾಹಸಕ್ಕೆ ಕೈಹಾಕಿದರು. ಮೈನಸ್ 250 ಡಿಗ್ರಿ ಸೆಲ್ಸಿಯಸ್‌ಗಿಂತಲೂ ಕಡಿಮೆ ತಾಪಮಾನದಲ್ಲಿ ಕಾರ್ಯನಿರ್ವಹಿಸುವ ಈ ಸಂಕೀರ್ಣ ತಂತ್ರಜ್ಞಾನವನ್ನು ಸಿದ್ಧಪಡಿಸುವಲ್ಲಿ ಇಸ್ರೋ ಯಶಸ್ವಿಯಾಯಿತಾದರೂ, ಜಿಎಸ್‌ಎಲ್‌ವಿ ಪ್ರತಿಯೊಂದು ಉಡಾವಣೆಯೂ ಸದಾ ತೀವ್ರ ಕುತೂಹಲ ಮತ್ತು ಆತಂಕವನ್ನು ಕಾಯ್ದುಕೊಂಡೇ ಬಂದಿದೆ.

‘ಗಡಿಯಲ್ಲಿ ಕಣ್ಣಿಡಲಿದೆ ದೇಶದ ಮೊದಲ ‘ಆಕಾಶದ ಹದ್ದು’:

51.7 ಮೀಟರ್ ಎತ್ತರ ಮತ್ತು 430.5 ಟನ್ ತೂಕದ ಈ ಬೃಹತ್ ಜಿಎಸ್‌ಎಲ್‌ವಿ-ಎಫ್17 ರಾಕೆಟ್ ಯಶಸ್ವಿಯಾಗಿ ಉಪಗ್ರಹವನ್ನು ಕಕ್ಷೆಗೆ ತಲುಪಿಸಿದರೆ, ಅದು ಕೇವಲ ಒಂದು ಉಪಗ್ರಹದ ಉಡಾವಣೆಯಷ್ಟೇ ಆಗಿರುವುದಿಲ್ಲ, ಬದಲಿಗೆ ಇಸ್ರೋ ತನ್ನ ಸವಾಲುಗಳನ್ನು ಮೀರಿ ಮತ್ತೆ ಅಗ್ರಸ್ಥಾನಕ್ಕೇರುವ ಹೊಸ ಸಂಕೇತವಾಗಲಿದೆ. ಇನ್ನು, ಸುಮಾರು 2,367 ಕೆ.ಜಿ. ತೂಕವಿರುವ ಇಒಎಸ್-05 ಉಪಗ್ರಹವು ಭಾರತದ ಭದ್ರತೆ ಮತ್ತು ತಂತ್ರಜ್ಞಾನದ ದೃಷ್ಟಿಯಿಂದ ಅತ್ಯಂತ ಕ್ರಾಂತಿಕಾರಿಯಾಗಿದೆ. 2021ರಲ್ಲಿ ಇಂತಹುದೇ ಇಒಎಸ್-03 ಉಪಗ್ರಹ ಉಡಾವಣೆಯು ಜಿಎಸ್‌ಎಲ್‌ವಿ ರಾಕೆಟ್‌ನ ಕ್ರಯೋಜೆನಿಕ್ ಹಂತದ ವೈಫಲ್ಯದಿಂದಾಗಿ ವಿಫಲವಾಗಿತ್ತು. ಆದರೆ ಈಗ ಸಿದ್ಧಗೊಂಡಿರುವ ಇಒಎಸ್-05, ಭೂಸ್ಥಿರ ಕಕ್ಷೆಯಲ್ಲಿ ಕುಳಿತು ಭಾರತದ ಗಡಿ ಪ್ರದೇಶಗಳು, ಹವಾಮಾನ ವೈಪರೀತ್ಯ, ಚಂಡಮಾರುತ ಮತ್ತು ಪ್ರಾಕೃತಿಕ ವಿಕೋಪಗಳ ಮೇಲೆ ದಿನದ 24 ಗಂಟೆಯೂ ನಿರಂತರವಾಗಿ ಕಣ್ಣಿಡಲಿದೆ.

ಇದನ್ನೂ ಓದಿ : ‘ಫ್ಯಾಬ್‌ ಫೋರ್‌’ಗಿಂತ ಜಡೇಜಾನೇ ಬೆಸ್ಟ್‌ ಎಂದ ದಿಗ್ಗಜ ; ‘ಸಂಪೂರ್ಣ ಆಲ್‌ರೌಂಡರ್‌’ ಎಂದು ಹಾಡಿಹೊಗಳಿದ ಜೆಫ್ರಿ!