ಕೊಲೊಂಬೊ : ಶ್ರೀಲಂಕಾ ವಿರುದ್ಧ ಗಾಲೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ತಂಡದ ವಿಕೆಟ್ ಕೀಪರ್-ಬ್ಯಾಟರ್ ರಿಷಭ್ ಪಂತ್ ಅವರು ಮತ್ತೊಮ್ಮೆ ತಮ್ಮ ಬೇಜವಾಬ್ದಾರಿಯುತ ಆಟದಿಂದ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ಉತ್ತಮ ಆರಂಭ ಪಡೆದಿದ್ದರೂ ಕೇವಲ 39 ರನ್ಗಳಿಗೆ ಅನಗತ್ಯ ಹೊಡೆತಕ್ಕೆ ಯತ್ನಿಸಿ ವಿಕೆಟ್ ಒಪ್ಪಿಸಿರುವುದು ಕ್ರಿಕೆಟ್ ಪ್ರೇಮಿಗಳಲ್ಲಿ ತೀವ್ರ ನಿರಾಸೆ ಮೂಡಿಸಿದೆ. ರೆಡ್-ಬಾಲ್ ಕ್ರಿಕೆಟ್ನಲ್ಲಿ ಪದೇ ಪದೇ ಇಂತಹ ತಪ್ಪುಗಳನ್ನು ಪುನರಾವರ್ತಿಸುತ್ತಿರುವ ಪಂತ್ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಟೀಕೆಗಳು ವ್ಯಕ್ತವಾಗುತ್ತಿವೆ.
ಮಳೆಯ ಕಾರಣದಿಂದಾಗಿ ಬಹಳ ಹೊತ್ತು ಸ್ಥಗಿತಗೊಂಡಿದ್ದ ಪಂದ್ಯ ಪುನರಾರಂಭವಾದಾಗ, 27 ರನ್ಗಳ ಅಜೇಯ ಮೊತ್ತದೊಂದಿಗೆ ಬ್ಯಾಟಿಂಗ್ ಮುಂದುವರಿಸಿದ ಪಂತ್ ಅವರಿಂದ ಜವಾಬ್ದಾರಿಯುತ ಆಟವನ್ನು ನಿರೀಕ್ಷಿಸಲಾಗಿತ್ತು. ಹೊಸ ಚೆಂಡನ್ನು ಎದುರಿಸಿ ತಂಡಕ್ಕೆ ಭದ್ರ ಬುನಾದಿ ಹಾಕಿಕೊಡುವ ಜವಾಬ್ದಾರಿ ಅವರ ಮೇಲಿತ್ತು. ಆದರೆ ಕ್ರೀಸಿನಲ್ಲಿ ಅವರು ತೀರಾ ಅಸ್ಥಿರವಾಗಿ ಕಾಣುತ್ತಿದ್ದರು.
ವಿಶೇಷವಾಗಿ ಶ್ರೀಲಂಕಾದ ಆಫ್-ಸ್ಪಿನ್ನರ್ ಕೇಶರ ನುವಾಂತ ಅವರ ಎಸೆತಗಳನ್ನು ಎದುರಿಸುವಾಗ ಪಂತ್ ಪರದಾಡಿದರು. ಶ್ರೀಲಂಕಾ ಬೌಲರ್ಗಳು ಚೆಂಡನ್ನು ಫ್ಲೈಟ್ ಮಾಡಿ ಪಂತ್ ಅವರನ್ನು ಪ್ರಚೋದಿಸುವ ತಂತ್ರಗಾರಿಕೆ ಮಾಡಿದರು. ಈ ಬಲೆಗೆ ಸುಲಭವಾಗಿ ಬಿದ್ದ ಪಂತ್, ಎಂದಿನಂತೆ ಕ್ರೀಸ್ನಿಂದ ಮುನ್ನುಗ್ಗಿ ಬಲವಾದ ಹೊಡೆತಕ್ಕೆ ಮುಂದಾದರು. ಆದರೆ ಟೈಮಿಂಗ್ ಕೊರತೆಯಿಂದಾಗಿ ಚೆಂಡು ನೇರವಾಗಿ ಮಿಡ್-ಆಫ್ನಲ್ಲಿದ್ದ ಸೋನಾಲ್ ದಿನುಷಾ ಅವರ ಕೈ ಸೇರಿತು.
ಟೆನಿಸ್ ತಾರೆ ನಿಕ್ ಕಿರ್ಗಿಯೋಸ್ಗೆ ಹೋಲಿಕೆ
ರಿಷಭ್ ಪಂತ್ ಅವರ ಈ ಕಳಪೆ ನಿರ್ಗಮನ ಅಭಿಮಾನಿಗಳ ಆಕ್ರೋಶವನ್ನು ಭುಗಿಲೇಳುವಂತೆ ಮಾಡಿದೆ. ಅವರ ಈ ವರ್ತನೆಯನ್ನು ಆಸ್ಟ್ರೇಲಿಯಾದ ಟೆನಿಸ್ ಆಟಗಾರ ನಿಕ್ ಕಿರ್ಗಿಯೋಸ್ ಅವರಿಗೆ ಹೋಲಿಸಲಾಗುತ್ತಿದೆ. ಕಿರ್ಗಿಯೋಸ್ ಅವರು ಅಪಾರ ಪ್ರತಿಭಾವಂತ ಮತ್ತು ಆಕರ್ಷಕ ಆಟಗಾರನಾಗಿದ್ದರೂ, ತಮ್ಮ ವೃತ್ತಿಜೀವನದಲ್ಲಿ ಒಂದೇ ಒಂದು ಗ್ರ್ಯಾಂಡ್ಸ್ಲಾಮ್ ಗೆಲ್ಲಲು ವಿಫಲರಾಗಿದ್ದಾರೆ. ಪಂತ್ ಕೂಡ ಅದೇ ಹಾದಿಯಲ್ಲಿ ಸಾಗುತ್ತಿದ್ದಾರೆ ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ. ಸ್ಪಿನ್ನರ್ಗಳಿಗೆ ಪಂತ್ ಅವರ ದೌರ್ಬಲ್ಯಗಳು ಸ್ಪಷ್ಟವಾಗಿ ತಿಳಿದಿವೆ. ಅವರು ಯಾವಾಗ ಕ್ರೀಸ್ ಬಿಟ್ಟು ಹೊರಬರುತ್ತಾರೆ ಎಂಬುದನ್ನು ಅರಿತು, ಅದಕ್ಕೆ ತಕ್ಕಂತೆ ಬೌಲಿಂಗ್ ಮಾಡಿ ಸುಲಭವಾಗಿ ವಿಕೆಟ್ ಪಡೆಯುತ್ತಿದ್ದಾರೆ ಎಂದು ಅಭಿಮಾನಿಯೊಬ್ಬರು ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ.
ಗೌತಮ್ ಗಂಭೀರ್ ತಂತ್ರಗಾರಿಕೆ ವಿರುದ್ಧವೂ ಅಸಮಾಧಾನ
ಇದೇ ವೇಳೆ, ಕೆಲ ಅಭಿಮಾನಿಗಳು ಭಾರತ ತಂಡದ ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರ ಮೇಲೂ ಗೂಬೆ ಕೂರಿಸಿದ್ದಾರೆ. ಇತ್ತೀಚೆಗೆ ನಡೆದ ಬಾರ್ಡರ್-ಗವಾಸ್ಕರ್ ಟ್ರೋಫಿ ಸರಣಿಯಲ್ಲಿನ ಸತತ ವೈಫಲ್ಯಗಳ ನಂತರ, ಗಂಭೀರ್ ಅವರು ಪಂತ್ ಅವರ ನೈಸರ್ಗಿಕ ಆಟದ ಶೈಲಿಯನ್ನು ಬದಲಾಯಿಸಲು ಪ್ರಯತ್ನಿಸುತ್ತಿದ್ದಾರೆ ಎಂಬ ಆರೋಪಗಳಿವೆ. ಆಟದ ವೇಗವನ್ನು ನಿಯಂತ್ರಿಸುವಂತೆ ಗಂಭೀರ್ ನೀಡಿದ ಸಲಹೆಗಳೇ ಪಂತ್ ಅವರ ಮಾನಸಿಕ ನೆಮ್ಮದಿಯನ್ನು ಕದಡಿದೆ ಎಂದು ಕೆಲವರು ವಾದಿಸಿದ್ದಾರೆ. ಗೌತಮ್ ಗಂಭೀರ್ ಅವರ ಈ ತಂತ್ರಗಾರಿಕೆಗಳು ರಿಷಭ್ ಪಂತ್ ಅವರ ಟೆಸ್ಟ್ ಕ್ರಿಕೆಟ್ ಭವಿಷ್ಯವನ್ನು ಹಾಳುಮಾಡುತ್ತಿವೆ ಮತ್ತು ಪಂತ್ ಅವರ ಕುಸಿತದಲ್ಲಿ ಗಂಭೀರ್ ಅವರ ಪಾತ್ರ ದೊಡ್ಡದಿದೆ ಎಂದು ನೆಟ್ಟಿಗರು ಆರೋಪಿಸಿದ್ದಾರೆ.
ದೇವದತ್ ಪಡಿಕ್ಕಲ್ ಶತಕ: ಬೃಹತ್ ಮೊತ್ತದತ್ತ ಭಾರತ
ಒಂದೆಡೆ ರಿಷಭ್ ಪಂತ್ ಬೇಗನೆ ವಿಕೆಟ್ ಒಪ್ಪಿಸಿ ನಿರಾಸೆ ಮೂಡಿಸಿದರೂ, ಭಾರತ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ ಬೃಹತ್ ಮೊತ್ತ ಕಲೆಹಾಕುವಲ್ಲಿ ಯಶಸ್ವಿಯಾಯಿತು. ಯುವ ಬ್ಯಾಟರ್ ದೇವದತ್ ಪಡಿಕ್ಕಲ್ ಅವರ ಅದ್ಭುತ ಶತಕದ ನೆರವಿನಿಂದ ಭಾರತ 104ನೇ ಓವರ್ನಲ್ಲಿ 400 ರನ್ಗಳ ಗಡಿಯನ್ನು ದಾಟಿತು. ಅತ್ಯಂತ ಜವಾಬ್ದಾರಿಯುತ ಆಟ ಪ್ರದರ್ಶಿಸಿದ ಪಡಿಕ್ಕಲ್, 230 ಎಸೆತಗಳನ್ನು ಎದುರಿಸಿ 167 ರನ್ ಸಿಡಿಸುವ ಮೂಲಕ ತಂಡಕ್ಕೆ ಆಸರೆಯಾದರು. ಪಂತ್ ವೈಫಲ್ಯದ ನಡುವೆಯೂ ಭಾರತ ಬಲಿಷ್ಠ ಸ್ಥಿತಿಯನ್ನು ತಲುಪಲು ಪಡಿಕ್ಕಲ್ ಅವರ ಈ ಸುಂದರ ಇನ್ನಿಂಗ್ಸ್ ಪ್ರಮುಖ ಕಾರಣವಾಯಿತು.
ಇದನ್ನೂ ಓದಿ : ಇಂದಿನಿಂದ ರಂಗೇರಲಿದೆ ಮಳೆಗಾಲದ ಅಧಿವೇಶನ ; ನಾಗೇಂದ್ರ ರಾಜೀನಾಮೆಗೆ ಆಗ್ರಹಿಸಿ ವಿಪಕ್ಷಗಳ ಸಮರ!
