ಅಮೆರಿಕದಲ್ಲಿ ಭಾರತೀಯ ಮೂಲದ ಬಾಲಕನಿಂದ ಅಮ್ಮ, ತಮ್ಮನ ಭೀಕರ ಹತ್ಯೆ!

ಬೋಸ್ಟನ್ : ಭಾರತೀಯ ಮೂಲದ 17 ವರ್ಷದ ಬಾಲಕನೊಬ್ಬ ತನ್ನ ತಾಯಿ ಮತ್ತು ಕಿರಿಯ ಸಹೋದರನನ್ನು ಅತ್ಯಂತ ಕ್ರೂರವಾಗಿ ಹತ್ಯೆಗೈದಿರುವ ಬೆಚ್ಚಿಬೀಳಿಸುವ ಘಟನೆಯೊಂದು ಅಮೆರಿಕದ ಮೆಸ್ಯೂಚೂಸೆಟ್ಸ್ ರಾಜ್ಯದ ಉಪನಗರವೊಂದರಲ್ಲಿ ನಡೆದಿದೆ. ಆಕ್ಟನ್ ನಗರದ ನಿವಾಸಿ ಅರ್ಜುನ್ ಅರವಿಂದ್ ಎಂಬಾತನೇ ಈ ಭೀಕರ ಕೃತ್ಯ ಎಸಗಿದ ಆರೋಪಿಯಾಗಿದ್ದು, ಕೃತ್ಯದ ನಂತರ ತಲೆಮರೆಸಿಕೊಂಡಿದ್ದ ಈತನನ್ನು ಪೋಲಿಸರು ರೋಚಕ ಕಾರ್ಯಾಚರಣೆಯ ಮೂಲಕ ಬಂಧಿಸಿದ್ದಾರೆ.

ಆಕ್ಟನ್‌ನಲ್ಲಿರುವ ಮಾರ್ಥಾ ಲೇನ್ ನಿವಾಸದಲ್ಲಿ ಮಂಗಳವಾರ ಈ ಹತ್ಯಾಕಾಂಡ ನಡೆದಿದೆ. 45 ವರ್ಷದ ಸುಧಾ ವೆಂಕಟೇಶನ್ ಹಾಗೂ ಅವರ 14 ವರ್ಷದ ಕಿರಿಯ ಮಗ ಸಿದ್ಧಾರ್ಥ್ ಅರವಿಂದ್ ಕೊಲೆಯಾದವರು. ಮಂಗಳವಾರ ಸಂಜೆ ಸುಮಾರು 6.30ರ ಸುಮಾರಿಗೆ ಮನೆಗೆ ಪಾಠ ಹೇಳಿಕೊಡಲು ಬಂದ ಟ್ಯೂಟರ್ ಒಬ್ಬರು ಎಷ್ಟೇ ಬಾಗಿಲು ತಟ್ಟಿದರೂ ಯಾರೂ ತೆರೆದಿರಲಿಲ್ಲ.

ಇದರಿಂದ ಅನುಮಾನಗೊಂಡ ಅವರು ಕೂಡಲೇ ಅರ್ಜುನ್‌ನ ತಂದೆಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ತಂದೆ ಕೂಡಲೇ ಮನೆಗೆ ಕರೆ ಮಾಡಲು ಯತ್ನಿಸಿದರೂ ಯಾವುದೇ ಪ್ರತಿಕ್ರಿಯೆ ಸಿಗದಿದ್ದಾಗ, ಅವರು ಆಕ್ಟನ್ ಪೊಲೀಸ್ ಠಾಣೆಗೆ ಕರೆ ಮಾಡಿ ಹೆಂಡತಿ ಮಕ್ಕಳ ಕ್ಷೇಮ ತಪಾಸಣೆ ನಡೆಸುವಂತೆ ಮನವಿ ಮಾಡಿದ್ದಾರೆ. ಕೂಡಲೇ ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದು, ಈ ವೇಳೆ ಮನೆಯ ಬೇಸ್‌ಮೆಂಟ್‌ನಲ್ಲಿ ತಾಯಿ ಸುಧಾ ಮತ್ತು ಮೊದಲ ಮಹಡಿಯಲ್ಲಿ ಸಿದ್ಧಾರ್ಥ್ ಶವವಾಗಿ ಪತ್ತೆಯಾಗಿದ್ದಾರೆ. ಇಬ್ಬರ ದೇಹಗಳ ಮೇಲೆಯೂ ತೀವ್ರ ಸ್ವರೂಪದ ಗಾಯಗಳ ಗುರುತುಗಳಿದ್ದವು ಎಂದು ಪೊಲೀಸರು ತಿಳಿಸಿದ್ದಾರೆ.

ರಾತ್ರೋರಾತ್ರಿ ನಡೆದ ಬೃಹತ್ ಶೋಧ ಕಾರ್ಯ

ಘಟನೆಯ ನಂತರ ತಾಯಿಯ ಹೋಂಡಾ ಆಕಾರ್ಡ್ ಕಾರಿನೊಂದಿಗೆ ಅರ್ಜುನ್ ಪರಾರಿಯಾಗಿದ್ದ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತಕ್ಷಣವೇ ರಾಜ್ಯಾದ್ಯಂತ ಹೈ ಅಲರ್ಟ್ ಘೋಷಿಸಿ ಆತನ ಪತ್ತೆಗೆ ಜಾಲ ಬೀಸಿದರು. ಬುಧವಾರ ಮುಂಜಾನೆ ವೇಳೆ ವೇಲ್ಯಾಂಡ್ ಎಂಬ ಪ್ರದೇಶದ ಪಾರ್ಕಿಂಗ್ ಸ್ಥಳವೊಂದರಲ್ಲಿ ಅನುಮಾನಾಸ್ಪದವಾಗಿ ನಿಂತಿದ್ದ ಕಾರನ್ನು ಪರಿಶೀಲಿಸಿದಾಗ ಅರ್ಜುನ್ ಅರವಿಂದ್ ಸಿಕ್ಕಿಬಿದ್ದಿದ್ದಾನೆ. ಯಾವುದೇ ಪ್ರತಿರೋಧ ಒಡ್ಡದ ಆತನನ್ನು ಪೊಲೀಸರು ತಕ್ಷಣವೇ ವಶಕ್ಕೆ ಪಡೆದರು.

ಚಾಟ್‌ಜಿಪಿಟಿಯಲ್ಲಿ ಹತ್ಯೆಯ ಹುಡುಕಾಟ!

ಪ್ರಕರಣದ ತನಿಖೆ ನಡೆಸುತ್ತಿರುವ ಮಿಡಲ್‌ಸೆಕ್ಸ್ ಕೌಂಟಿ ಜಿಲ್ಲಾ ಅಟಾರ್ನಿ ಕಚೇರಿ ನೀಡಿದ ಮಾಹಿತಿ ದೇಶವನ್ನೇ ಬೆಚ್ಚಿಬೀಳಿಸಿದೆ. ಅರ್ಜುನ್ ಇತ್ತೀಚಿನ ದಿನಗಳಲ್ಲಿ ಅತ್ಯಂತ ವಿಚಿತ್ರವಾಗಿ ವರ್ತಿಸುತ್ತಿದ್ದ. ಆತ ಎಐ ತಂತ್ರಜ್ಞಾನವಾದ ಚಾಟ್‌ಜಿಪಿಟಿ ಬಳಸಿ “ತನ್ನ ಕುಟುಂಬವನ್ನು ಹತ್ಯೆ ಮಾಡುವ ಸಾಹಿತ್ಯಿಕ ಅಥವಾ ಕಾಲ್ಪನಿಕ ಉಪಾಯಗಳ” ಬಗ್ಗೆ ನಿರಂತರವಾಗಿ ಹುಡುಕಾಟ ನಡೆಸಿದ್ದ. ಗ್ಯಾಥಿಕ್ ಮಾದರಿಯ ಕಾದಂಬರಿಗಳ ಶೈಲಿಯಲ್ಲಿ ಕಥೆಗಳು ಮತ್ತು ಪಾತ್ರಗಳನ್ನು ಸೃಷ್ಟಿಸಲು ಆತ ಎಐ ಜೊತೆ ಚರ್ಚಿಸುತ್ತಿದ್ದ ಎಂಬುದು ತನಿಖೆಯಿಂದ ತಿಳಿದುಬಂದಿದೆ.

ಆಕ್ಟನ್-ಬಾಕ್ಸ್‌ಬರೋ ರೀಜನಲ್ ಹೈಸ್ಕೂಲ್ ವಿದ್ಯಾರ್ಥಿಯಾಗಿರುವ ಅರ್ಜುನ್ ವಿರುದ್ಧ ಈಗ ಎರಡು ಕೊಲೆ ಪ್ರಕರಣಗಳು, ಕುಟುಂಬ ಸದಸ್ಯರ ಮೇಲೆ ತೀವ್ರ ಹಲ್ಲೆ ಹಾಗೂ ವಾಹನ ಕಳವು ಸೇರಿದಂತೆ ಹಲವು ಗಂಭೀರ ಪ್ರಕರಣಗಳನ್ನು ದಾಖಲಿಸಲಾಗಿದೆ. ಅಪ್ರಾಪ್ತನಾಗಿದ್ದರೂ ಕೊಲೆ ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿ ಆತನನ್ನು ವಯಸ್ಕರ ನ್ಯಾಯಾಲಯದಲ್ಲಿಯೇ ವಿಚಾರಣೆಗೆ ಒಳಪಡಿಸಲು ಕಾನೂನು ಕ್ರಮ ಜರುಗಿಸಲಾಗುತ್ತಿದೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ : ಪ್ರಜ್ವಲ್ ಸೆಲ್​​​​ನಲ್ಲಿ ಸಿಕ್ಕ ಮೊಬೈಲ್‌ನಲ್ಲಿ 90ಕ್ಕೂ ಹೆಚ್ಚು ಅಶ್ಲೀಲ ವಿಡಿಯೋ ಪತ್ತೆ.. ಪೊಲೀಸರೇ ಶಾಕ್‌!