ನವದೆಹಲಿ : ಶ್ರೀಲಂಕಾ ವಿರುದ್ಧದ ಟೆಸ್ಟ್ ಸರಣಿಗೆ ಸಜ್ಜಾಗುತ್ತಿರುವ ಭಾರತದ ಸ್ಟಾರ್ ವಿಕೆಟ್ಕೀಪರ್-ಬ್ಯಾಟರ್ ರಿಷಬ್ ಪಂತ್ ಅವರ ಬ್ಯಾಟಿಂಗ್ ಶೈಲಿಯ ಬಗ್ಗೆ ಚರ್ಚೆಗಳು ಮತ್ತೆ ಮುನ್ನೆಲೆಗೆ ಬಂದಿವೆ. ಟೆಸ್ಟ್ ಕ್ರಿಕೆಟ್ನಲ್ಲಿಯೂ ಏಕದಿನ ಹಾಗೂ ಟಿ20 ಶೈಲಿಯಲ್ಲಿ ಅತಿ ವೇಗದ ಬ್ಯಾಟಿಂಗ್ ಮಾಡುವ ಪಂತ್ ಅವರ ಕ್ರಮವನ್ನು ಅನೇಕರು ಟೀಕಿಸುತ್ತಿರುತ್ತಾರೆ. ಆದರೆ, ಭಾರತ ತಂಡದ ಮಾಜಿ ವಿಕೆಟ್ಕೀಪರ್ ದೀಪ್ ದಾಸ್ಗುಪ್ತಾ ಅವರು ರಿಷಬ್ ಪಂತ್ ಅವರ ನೈಸರ್ಗಿಕ ಆಟಕ್ಕೆ ಬೆಂಬಲ ವ್ಯಕ್ತಪಡಿಸಿದ್ದು, ಅವರಿಗೆ ತಮ್ಮದೇ ಶೈಲಿಯಲ್ಲಿ ಆಡಲು ಸಂಪೂರ್ಣ ಸ್ವಾತಂತ್ರ್ಯ ನೀಡಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಈ ಬಗ್ಗೆ ವಿಸ್ತೃತವಾಗಿ ಮಾತನಾಡಿರುವ ದೀಪ್ ದಾಸ್ಗುಪ್ತಾ, ರಿಷಬ್ ಪಂತ್ ಅವರ ಮೇಲೆ ವಿನಾಕಾರಣ ಒತ್ತಡ ಹೇರುವ ಬದಲು ಅವರ ಮೂಲ ಆಟವನ್ನು ಆಡಲು ಬಿಡಬೇಕು ಎಂದಿದ್ದಾರೆ. ಕೆಲವು ಪಂದ್ಯಗಳ ಹಿಂದೆ ಪಂತ್ ಅತಿಯಾದ ರಕ್ಷಣಾತ್ಮಕ ಆಟ (ಡಿಫೆನ್ಸ್) ಆಡಲು ಹೋಗಿ ಪರದಾಡಿದ್ದನ್ನು ಸ್ಮರಿಸಿರುವ ಅವರು, ಬಲವಂತವಾಗಿ ಡಿಫೆನ್ಸ್ ಮಾಡಿ ಔಟ್ ಆಗುವುದಕ್ಕಿಂತ, ಸಿಕ್ಸರ್ ಬಾರಿಸಲು ಹೋಗಿ ಔಟ್ ಆದರೂ ಪರವಾಗಿಲ್ಲ ಎಂದು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ. ಶ್ರೀಲಂಕಾ ತಂಡದಲ್ಲಿ ಹೆಚ್ಚಾಗಿ ಎಡಗೈ ಸ್ಪಿನ್ನರ್ಗಳೇ ಇರುವುದರಿಂದ, ಪಂತ್ ಅವರ ಫಾರ್ಮ್ ಮತ್ತು ಆಕ್ರಮಣಕಾರಿ ಮನಸ್ಥಿತಿ ಭಾರತ ತಂಡಕ್ಕೆ ಅತ್ಯಂತ ನಿರ್ಣಾಯಕವಾಗಲಿದೆ ಎಂದು ಅವರು ವಿಶ್ಲೇಷಿಸಿದ್ದಾರೆ.
ಹೊಸ ಕೋಚ್ ಗೌತಮ್ ಗಂಭೀರ್ ಸಲಹೆ ಮತ್ತು ಪಂತ್ ಗೊಂದಲ
ರಿಷಬ್ ಪಂತ್ ಅವರ ಆಕ್ರಮಣಕಾರಿ ಶೈಲಿಗೆ ಕೋಚ್ ಗೌತಮ್ ಗಂಭೀರ್ ಬೆಂಬಲ ವ್ಯಕ್ತಪಡಿಸಿದ್ದರೂ, ಪಂದ್ಯದ ಪರಿಸ್ಥಿತಿಗೆ ತಕ್ಕಂತೆ ಬ್ಯಾಟ್ ಮಾಡುವ ಅವಶ್ಯಕತೆ ಇದೆ ಎಂದು ಇತ್ತೀಚೆಗಷ್ಟೇ ಕಿವಿಮಾತು ಹೇಳಿದ್ದರು. ಈ ಸಲಹೆಯ ಬಳಿಕ ಎಸ್ಎಲ್ಸಿ ಇಲೆವೆನ್ ವಿರುದ್ಧದ ಅಭ್ಯಾಸ ಪಂದ್ಯದಲ್ಲಿ ಪಂತ್ ಕೊಂಚ ಗೊಂದಲದಲ್ಲಿದ್ದಂತೆ ಕಂಡಿದ್ದರು. ಮೊದಲ ಇನಿಂಗ್ಸ್ನಲ್ಲಿ ಬಿರುಸಿನ ಶಾಟ್ ಆಡಲು ಹೋಗಿ ವಿಕೆಟ್ ಒಪ್ಪಿಸಿದ್ದ ಪಂತ್, ಎರಡನೇ ಇನಿಂಗ್ಸ್ನಲ್ಲಿ ಅತಿಯಾದ ಡಿಫೆನ್ಸ್ ಮಾಡಿ, ಆನಂತರ ದೊಡ್ಡ ಶಾಟ್ ಬಾರಿಸುವ ಯತ್ನದಲ್ಲಿ ಔಟ್ ಆಗಿದ್ದರು. ಈ ಹಿನ್ನೆಲೆಯಲ್ಲಿ ದಾಸ್ಗುಪ್ತಾ ಅವರ ಹೇಳಿಕೆ ತೀವ್ರ ಮಹತ್ವ ಪಡೆದುಕೊಂಡಿದೆ.
ಜವಾಬ್ದಾರಿಯುತ ಆಟದ ಬಗ್ಗೆ ಪ್ರೇಕ್ಷಕರ ಮನಸ್ಥಿತಿಗೆ ತರಾಟೆ
ಆಟಗಾರರ ಔಟ್ ಆಗುವ ರೀತಿಯ ಬಗ್ಗೆ ಪ್ರೇಕ್ಷಕರ ಮತ್ತು ವಿಮರ್ಶಕರ ದ್ವಂದ್ವ ನಿಲುವನ್ನು ದೀಪ್ ದಾಸ್ಗುಪ್ತಾ ತೀವ್ರವಾಗಿ ಟೀಕಿಸಿದ್ದಾರೆ. ಬ್ಯಾಟರ್ ಒಬ್ಬ ಡಿಫೆನ್ಸ್ ಮಾಡಲು ಹೋಗಿ ಔಟ್ ಆದರೆ ಅದನ್ನು ಯಾರೂ ಬೇಜವಾಬ್ದಾರಿಯುತ ಆಟ ಎಂದು ಕರೆಯುವುದಿಲ್ಲ. ಆದರೆ, ಅದೇ ಆಟಗಾರ ಬಿರುಸಿನ ಶಾಟ್ ಆಡಿ ಔಟ್ ಆದರೆ ಮಾತ್ರ ಆತನನ್ನು ಬೇಜವಾಬ್ದಾರಿ ಎಂದು ಹಣೆಪಟ್ಟಿ ಕಟ್ಟಲಾಗುತ್ತದೆ ಎನ್ನುವುದು ದಾಸ್ಗುಪ್ತಾ ಅವರ ವಾದ.
ಪ್ರತಿಯೊಬ್ಬ ಆಟಗಾರನ ಸಾಮರ್ಥ್ಯವೂ ಭಿನ್ನವಾಗಿರುತ್ತದೆ; ಕೆಲವರಿಗೆ ರಕ್ಷಣಾತ್ಮಕ ಆಟ ಶಕ್ತಿಯಾಗಿದ್ದರೆ, ಪಂತ್ ಅವರಂತಹ ಆಟಗಾರರಿಗೆ ಆಕ್ರಮಣಕಾರಿ ಆಟವೇ ಬಲವಾಗಿರುತ್ತದೆ. ಹೀಗಾಗಿ ಆಕ್ರಮಣಕಾರಿ ಆಟಗಾರನೊಬ್ಬ ಹತ್ತರಲ್ಲಿ ಎಂಟು ಬಾರಿ ಬಿರುಸಿನ ಶಾಟ್ ಆಡಿಯೇ ಔಟ್ ಆಗುತ್ತಾನೆ ಎಂಬುದನ್ನು ಪ್ರೇಕ್ಷಕರು ಅರ್ಥಮಾಡಿಕೊಳ್ಳಬೇಕು ಎಂದು ಅವರು ಕಿವಿಮಾತು ಹೇಳಿದ್ದಾರೆ. ಕೇವಲ ಶಾಟ್ ಆಡಿದ್ದಕ್ಕಾಗಿ ಟೀಕಿಸುವ ಬದಲು, ಆ ಹೊಡೆತದ ಟೈಮಿಂಗ್ ಮತ್ತು ಯಾವ ಬೌಲರ್ ವಿರುದ್ಧ ಆಡಿದರು ಎನ್ನುವುದನ್ನು ಮಾತ್ರ ವಿಶ್ಲೇಷಿಸಬೇಕು ಎಂದು ಅವರು ಸಲಹೆ ನೀಡಿದ್ದಾರೆ. ಗಮನಾರ್ಹ ಅಂಶವೆಂದರೆ, ರಿಷಬ್ ಪಂತ್ ತಮ್ಮ ವೃತ್ತಿಜೀವನದಲ್ಲಿ ಇದೇ ಮೊದಲ ಬಾರಿಗೆ ಶ್ರೀಲಂಕಾದ ನೆಲದಲ್ಲಿ ಟೆಸ್ಟ್ ಪಂದ್ಯವನ್ನು ಆಡಲು ಸಜ್ಜಾಗಿದ್ದಾರೆ.
ಇದನ್ನೂ ಓದಿ : ILT20 ಸೀಸನ್ 5 | ಮಿಲ್ಲರ್, ಕ್ಲಾಸೆನ್, ಫಿನ್ ಅಲೆನ್ ಅಖಾಡಕ್ಕೆ.. ಅ.1ರಂದು ದುಬೈನಲ್ಲಿ ಮೆಗಾ ಹರಾಜು!
