ಬೆಂಗಳೂರು : ನಗರದ ವಿವಿಧ ಪ್ರಸಿದ್ದ ಹೋಟೆಲ್ಗಳ ಮೇಲೆ ಆಹಾರ ಸುರಕ್ಷತಾ ಅಧಿಕಾರಿಗಳು ದಾಳಿ ನಡೆಸಿ ತಪಾಸಣೆ ನಡೆಸಿದ್ದಾರೆ. ಈ ವೇಳೆ ಬಳಕೆಗೆ ಯೋಗ್ಯವಲ್ಲದ ಹಾಗೂ ಕೊಳೆತ ಆಹಾರ ಪದಾರ್ಥಗಳು ಪತ್ತೆಯಾಗಿದ್ದು, ಒಟ್ಟು 132 ಕೆಜಿ ಆಹಾರ ಪದಾರ್ಥಗಳನ್ನು ವಶಕ್ಕೆ ಪಡೆದು ನಾಶಪಡಿಸಲಾಗಿದೆ. ಜೊತೆಗೆ 15 ಲೀಟರ್ ಬಳಸಿದ ಅಡುಗೆ ಎಣ್ಣೆಯನ್ನೂ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
UB Cityಯ 16ನೇ ಮಹಡಿಯಲ್ಲಿರುವ Skyee Lounge ಮೇಲೆ ನಡೆಸಿದ ತಪಾಸಣೆ ವೇಳೆ ಕಿಚನ್ ಅತ್ಯಂತ ಅಸ್ವಚ್ಛವಾಗಿ ನಿರ್ವಹಿಸುತ್ತಿರುವುದು ಪತ್ತೆಯಾಗಿದೆ. ಕಿಚನ್ನಲ್ಲಿ ಸಂಗ್ರಹಿಸಿದ್ದ ಮಾಂಸ ಹಾಗೂ ಬೀಫ್ ಕೊಳೆತು ಫಂಗಸ್ ಹಿಡಿದಿರುವುದು ಅಧಿಕಾರಿಗಳ ಗಮನಕ್ಕೆ ಬಂದಿದೆ. ಬಳಕೆಗೆ ಯೋಗ್ಯವಲ್ಲದ ಮಾಂಸವನ್ನು ವಶಕ್ಕೆ ಪಡೆದು ನಾಶಪಡಿಸಲಾಗಿದ್ದು, ಆಹಾರ ಸುರಕ್ಷತಾ ನಿಯಮ ಉಲ್ಲಂಘನೆ ಹಿನ್ನೆಲೆಯಲ್ಲಿ ಕಿಚನ್ನ್ನು ತಾತ್ಕಾಲಿಕವಾಗಿ ಮುಚ್ಚಿಸಿ ಅಧಿಕಾರಿಗಳು ಕ್ರಮ ಕೈಗೊಂಡಿದ್ದಾರೆ. ಅಲ್ಲದೆ 10 ದಿನಗಳ ಹಿಂದೆಯೇ ಅವಧಿ ಮುಗಿದಿದ್ದ ಹಾಲು ಮತ್ತು ಮೊಸರು ಕೂಡ ಪತ್ತೆಯಾಗಿದೆ.
Hotel Sky, UB Cityಯಲ್ಲಿ 45 ಕೆಜಿ ಕೊಳೆತ ಚಿಕನ್ ಮತ್ತು ಬೀಫ್, 6 ಕೆಜಿ ವೆಜಿಟೆಬಲ್ ಕಟ್ಲೆಟ್ ಹಾಗೂ 15 ಲೀಟರ್ ಬಳಸಿದ ಅಡುಗೆ ಎಣ್ಣೆ ಪತ್ತೆಯಾಗಿದ್ದು, ಒಟ್ಟು 51 ಕೆಜಿ ಬಳಕೆಗೆ ಯೋಗ್ಯವಲ್ಲದ ಆಹಾರವನ್ನು ನಾಶಪಡಿಸಲಾಗಿದೆ. Royal Chain Hotelನಲ್ಲಿ 50 ಕೆಜಿ ಬಾತುಕೋಳಿ ಮಾಂಸ ಹಾಗೂ 5 ಕೆಜಿ ಮೀನು ವಶಕ್ಕೆ ಪಡೆಯಲಾಗಿದೆ. Madras Kitchenನಲ್ಲಿ 5 ಕೆಜಿ ಗ್ರೀನ್ ಪೀಸ್, Tescon Hotelನಲ್ಲಿ 5 ಕೆಜಿ ಮಶ್ರೂಮ್ ಮತ್ತು Senchez Hotelನಲ್ಲಿ 3 ಕೆಜಿ ಮೀನು ಪತ್ತೆಯಾಗಿದ್ದು, 7 ಕೆಜಿ ಕೇಕ್, ಆಲೂಗಡ್ಡೆ ಹಾಗೂ ಟಾಕೋಸ್ಗಳನ್ನು ಕೂಡ ತ್ಯಜಿಸಲಾಗಿದೆ.
ಒಟ್ಟಾರೆ ನಗರದ ವಿವಿಧ ಹೋಟೆಲ್ಗಳ ಮೇಲೆ ನಡೆದ ಕಾರ್ಯಾಚರಣೆಯಲ್ಲಿ 132 ಕೆಜಿ ಆಹಾರ ಪದಾರ್ಥಗಳ ಮೇಲೆ ಕ್ರಮ ಕೈಗೊಳ್ಳಲಾಗಿದೆ. ಆಹಾರ ಸುರಕ್ಷತಾ ನಿಯಮಗಳನ್ನು ಉಲ್ಲಂಘಿಸುವ ಹೋಟೆಲ್ಗಳು ಮತ್ತು ಆಹಾರ ಮಳಿಗೆಗಳ ವಿರುದ್ಧ ಮುಂದಿನ ದಿನಗಳಲ್ಲೂ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ.
ಇದನ್ನೂ ಓದಿ : 6, 6, 6.. ಕೊನೆಯ ಓವರ್ನಲ್ಲಿ ಸಿರಾಜ್ ಸಿಕ್ಸರ್ಗಳ ಅಬ್ಬರ ; ಲಂಕಾ ವಿರುದ್ಧ ಭಾರತಕ್ಕೆ ರೋಚಕ ಗೆಲುವು
