ಬೆಂಗಳೂರು : ಮುಂಬರುವ ಶ್ರೀಲಂಕಾ ವಿರುದ್ಧದ ಟೆಸ್ಟ್ ಸರಣಿಯಿಂದ ಭಾರತದ ಪ್ರಮುಖ ವೇಗದ ಬೌಲರ್ ಜಸ್ಪ್ರೀತ್ ಬುಮ್ರಾ ಹೊರಬಿದ್ದಿರುವುದು ಈಗ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (ಬಿಸಿಸಿಐ) ಗಾಯದ ನಿರ್ವಹಣಾ ವ್ಯವಸ್ಥೆಯ ಮೇಲೆ ತೀವ್ರ ಸ್ವರೂಪದ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ವಿಶೇಷವಾಗಿ ಬಿಸಿಸಿಐನ ‘ಸೆಂಟರ್ ಆಫ್ ಎಕ್ಸಲೆನ್ಸ್’ (ಕೇಂದ್ರದ ಅತ್ಯುನ್ನತ ತರಬೇತಿ ಕೇಂದ್ರ) ಕ್ರೀಡಾ ವಿಜ್ಞಾನ ಮತ್ತು ವೈದ್ಯಕೀಯ ತಂಡದ ಹಾಗೂ ರಾಷ್ಟ್ರೀಯ ಆಯ್ಕೆ ಸಮಿತಿಯ ನಡುವಿನ ಸಂವಹನದ ಕೊರತೆಯು ಈ ಘಟನೆಯ ಮೂಲಕ ಜಗಜ್ಜಾಹೀರಾಗಿದೆ. ಆಗಸ್ಟ್ 15ರಿಂದ ಆರಂಭವಾಗಲಿರುವ ಶ್ರೀಲಂಕಾ ವಿರುದ್ಧದ ಟೆಸ್ಟ್ ಸರಣಿಗೆ ಜಸ್ಪ್ರೀತ್ ಬುಮ್ರಾ ಲಭ್ಯವಿರುತ್ತಾರೆ ಎಂಬುದಾಗಿ ರಾಷ್ಟ್ರೀಯ ಆಯ್ಕೆ ಸಮಿತಿಗೆ ಆರಂಭದಲ್ಲಿ ತಿಳಿಸಲಾಗಿತ್ತು.
ಅಟ್ಲೀಸ್ಟ್ ಒಂದು ಟೆಸ್ಟ್ ಪಂದ್ಯಕ್ಕಾದರೂ ಬುಮ್ರಾ ಆಡಲು ಸಿದ್ಧರಿರುತ್ತಾರೆ ಎಂಬ ಭರವಸೆಯನ್ನು ಆಯ್ಕೆದಾರರಿಗೆ ನೀಡಲಾಗಿತ್ತು. ಆದರೆ, ಆ ನಂತರವೇ ಬುಮ್ರಾ ಅವರ ಗಾಯದ ಸ್ವರೂಪ ನಿರೀಕ್ಷೆಗಿಂತ ಗಂಭೀರವಾಗಿದೆ ಎಂಬ ಸತ್ಯ ಬಹಿರಂಗವಾಗಿದೆ. ಕ್ರೀಡಾ ವಿಜ್ಞಾನ ತಂಡ ಮತ್ತು ಆಯ್ಕೆ ಸಮಿತಿಯ ನಡುವಿನ ಈ ಅಸ್ಪಷ್ಟ ಸಂವಹನವು ಇದೀಗ ಕಳವಳಕ್ಕೆ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿ ಸೆಂಟರ್ ಆಫ್ ಎಕ್ಸಲೆನ್ಸ್ನ ಉನ್ನತ ಅಧಿಕಾರಿಗಳು ಹಾಗೂ ವಿವಿಎಸ್ ಲಕ್ಷ್ಮಣ್ ಮತ್ತು ಆಯ್ಕೆ ಸಮಿತಿಯ ಮುಖ್ಯಸ್ಥ ಅಜಿತ್ ಅಗರ್ಕರ್ ಅವರ ನಡುವೆ ಕೇಂದ್ರ ಗುತ್ತಿಗೆ ಆಟಗಾರರ ಗಾಯದ ನಿರ್ವಹಣೆ ಕುರಿತು ವರ್ಚುವಲ್ ಸಭೆ ನಡೆದಿದೆ.
ಮುಖ್ಯಸ್ಥರಿಲ್ಲದ ಕ್ರೀಡಾ ವಿಜ್ಞಾನ ವಿಭಾಗ
ಆಟಗಾರರಿಗೆ ಗಾಯಗಳಾಗುವುದು ಕ್ರೀಡೆಯಲ್ಲಿ ಸಹಜ. ಆದರೆ, ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿರುವ ಸೆಂಟರ್ ಆಫ್ ಎಕ್ಸಲೆನ್ಸ್ನಲ್ಲಿನ ಕ್ರೀಡಾ ವಿಜ್ಞಾನ ತಂಡದ ಕಾರ್ಯಕ್ಷಮತೆ ನಿರೀಕ್ಷಿತ ಮಟ್ಟದಲ್ಲಿಲ್ಲ ಎಂಬ ಅಸಮಾಧಾನ ಕೇಳಿಬರುತ್ತಿದೆ. ನಿತಿನ್ ಪಟೇಲ್ ಅವರ ನಿರ್ಗಮನದ ನಂತರ ಬಿಸಿಸಿಐನ ಕ್ರೀಡಾ ವಿಜ್ಞಾನ ವಿಭಾಗಕ್ಕೆ ಅಧಿಕೃತ ಮುಖ್ಯಸ್ಥರಿಲ್ಲ. ಪ್ರಸ್ತುತ ಬೆಂಗಳೂರಿನ ಹೈ-ಪರ್ಫಾರ್ಮೆನ್ಸ್ ಸೆಂಟರ್ನಲ್ಲಿ ಹಂಗಾಮಿ ಮುಖ್ಯಸ್ಥ ಧನಂಜಯ್ ಕೌಶಿಕ್ ಅವರ ಉಸ್ತುವಾರಿಯಲ್ಲಿ ವಿಭಾಗ ಕಾರ್ಯನಿರ್ವಹಿಸುತ್ತಿದೆ. ಅವರ ಅರ್ಹತೆಯ ಬಗ್ಗೆ ಯಾವುದೇ ಅನುಮಾನಗಳಿಲ್ಲದಿದ್ದರೂ, ಆಟಗಾರರ ಪುನರ್ವಸತಿಯ ಸಮಯ ನಿಗದಿ ಮತ್ತು ‘ರಿಟರ್ನ್ ಟು ಪ್ಲೇ’ (ಮತ್ತೆ ಆಟಕ್ಕೆ ಮರಳುವ) ಪ್ರೋಟೋಕಾಲ್ಗಳು ಎಲ್ಲರ ವಿಚಾರದಲ್ಲಿಯೂ ಸಮರ್ಪಕವಾಗಿ ಪಾಲನೆಯಾಗುತ್ತಿವೆಯೇ ಎಂಬ ಪ್ರಶ್ನೆಗಳು ಉದ್ಭವಿಸಿವೆ.
ಇತರ ಆಟಗಾರರ ಫಿಟ್ನೆಸ್ ವಿಚಾರದಲ್ಲೂ ಕಳವಳ
ಬುಮ್ರಾ ಮಾತ್ರವಲ್ಲದೆ, ಇತರೆ ಆಟಗಾರರ ಗಾಯದ ನಿರ್ವಹಣೆಯ ಬಗ್ಗೆಯೂ ಸಾಕಷ್ಟು ಟೀಕೆಗಳು ವ್ಯಕ್ತವಾಗಿವೆ. ಉದಾಹರಣೆಗೆ, ಹರ್ಷಿತ್ ರಾಣಾ ಅವರು ವಿಪರೀತ ತೂಕ ಹೊಂದಿದ್ದಾಗಲೂ ಕ್ರೀಡಾ ವಿಜ್ಞಾನ ತಂಡ ಅವರನ್ನು ಫಿಟ್ ಎಂದು ಘೋಷಿಸಿದ್ದು ಹೇಗೆ ಮತ್ತು ಇದರಿಂದಾಗಿಯೇ ಅವರಿಗೆ ಮರಳಿ ಹ್ಯಾಮ್ಸ್ಟ್ರಿಂಗ್ ಗಾಯವಾಯಿತೇ ಎಂಬ ಮಾತುಗಳು ಕೇಳಿಬರುತ್ತಿವೆ. ಹಾಗೆಯೇ, ದಕ್ಷಿಣ ಭಾರತದ ಖ್ಯಾತ ಟಿ20 ಬ್ಯಾಟರ್ ಒಬ್ಬರು ಇಂಗ್ಲೆಂಡ್ ಪ್ರವಾಸಕ್ಕೆ ಮುನ್ನ ಅಧಿಕ ತೂಕ ಹೊಂದಿದ್ದರೂ ಸೆಂಟರ್ ಆಫ್ ಎಕ್ಸಲೆನ್ಸ್ ವರದಿ ಮಾಡದಿರುವುದು ಅಚ್ಚರಿಗೆ ಕಾರಣವಾಗಿದೆ. ವಾಷಿಂಗ್ಟನ್ ಸುಂದರ್ ಅವರ ಪದೇ ಪದೇ ಹ್ಯಾಮ್ಸ್ಟ್ರಿಂಗ್ ಸಮಸ್ಯೆಗಳು ಹಾಗೂ ನಿತೀಶ್ ಕುಮಾರ್ ರೆಡ್ಡಿ ತಮ್ಮ ಬೌಲಿಂಗ್ ವೇಗ ಹೆಚ್ಚಿಸಲು ಫ್ರೀಲಾನ್ಸ್ ಕೋಚ್ ಸ್ಟೆಫಾನ್ ಜೋನ್ಸ್ ಬಳಿ ತರಬೇತಿ ಪಡೆಯಲು ಅನುಮತಿ ನೀಡಿದ್ದರ ಬಗ್ಗೆಯೂ ಬಿಸಿಸಿಐನ ವೈದ್ಯಕೀಯ ತಂಡದ ನಿರ್ಧಾರಗಳು ಅನುಮಾನಾಸ್ಪದವಾಗಿವೆ.
ಫಿಸಿಯೊ ಕಮಲೇಶ್ ಜೈನ್ ಪಾತ್ರದ ಬಗ್ಗೆಯೂ ಪರಾಮರ್ಶೆ
ಆಟಗಾರರ ಸಾಲು ಸಾಲು ಗಾಯದ ಸಮಸ್ಯೆಗಳ ಹಿನ್ನೆಲೆಯಲ್ಲಿ ಭಾರತೀಯ ತಂಡದ ಫಿಸಿಯೊ ಕಮಲೇಶ್ ಜೈನ್ ಅವರ ಕಾರ್ಯವೈಖರಿಯನ್ನು ಮರುಪರಿಶೀಲಿಸುವ ಸಾಧ್ಯತೆಯಿದೆ. ಮಾಜಿ ಬಂಗಾಳ ರಣಜಿ ತಂಡದ ಫಿಸಿಯೊ ಆಗಿದ್ದ ಜೈನ್, ಕಳೆದ ಐದು ವರ್ಷಗಳಿಂದ ಟೀಮ್ ಇಂಡಿಯಾದೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದು, ಆಟಗಾರರೊಂದಿಗೆ ಉತ್ತಮ ಬಾಂಧವ್ಯ ಹೊಂದಿದ್ದಾರೆ. ಆದರೂ, ಇತ್ತೀಚಿನ ಸತತ ಗಾಯದ ಪ್ರಹಸನಗಳ ಕಾರಣದಿಂದಾಗಿ ಅವರ ಪಾತ್ರವೂ ಇದೀಗ ಚರ್ಚೆಯಲ್ಲಿದೆ.
ನಡೆಯಲಿದೆಯೇ ಮಹತ್ವದ ಪರಾಮರ್ಶೆ ಸಭೆ?
ಇಂಗ್ಲೆಂಡ್ ಪ್ರವಾಸದಲ್ಲಾದ ಹಿನ್ನಡೆಯ ನಂತರ ಬಿಸಿಸಿಐನ ಮಹತ್ವದ ಪರಾಮರ್ಶೆ ಸಭೆಯೊಂದು ಆಯೋಜನೆಯಾಗುವ ನಿರೀಕ್ಷೆಯಿದೆ. ಈ ಸಭೆಯಲ್ಲಿ ಮುಖ್ಯ ತರಬೇತುದಾರ ಗೌತಮ್ ಗಂಭೀರ್, ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್ ಅಗರ್ಕರ್, ಸೆಂಟರ್ ಆಫ್ ಎಕ್ಸಲೆನ್ಸ್ನ ಕ್ರಿಕೆಟ್ ಮುಖ್ಯಸ್ಥ ವಿವಿಎಸ್ ಲಕ್ಷ್ಮಣ್ ಹಾಗೂ ಸಂಚಾಲಕರಾಗಿ ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ ಭಾಗವಹಿಸುವ ಸಾಧ್ಯತೆಯಿದೆ. ಆದರೆ, ಮುಂದಿನ ಮೂರು ವಾರಗಳ ಕಾಲ ಗಂಭೀರ್ ಶ್ರೀಲಂಕಾದಲ್ಲಿರುವ ಕಾರಣ, ಈ ಸಭೆಯು ಖುದ್ದಾಗಿ ನಡೆಯಲಿದೆಯೇ ಅಥವಾ ವರ್ಚುವಲ್ ಆಗಿ ನಡೆಯಲಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಜುಲೈನಲ್ಲಿಯೇ ಈ ಇಬ್ಬರೂ ಅಧಿಕಾರಿಗಳು ಭಾರತದಲ್ಲಿದ್ದಾಗ ಈ ಸಭೆಯನ್ನು ಏಕೆ ನಡೆಸಲಿಲ್ಲ ಎಂಬ ಪ್ರಶ್ನೆಗಳು ಕೂಡ ಕ್ರಿಕೆಟ್ ವಲಯದಲ್ಲಿ ಚರ್ಚೆಯಾಗುತ್ತಿವೆ. ಒಟ್ಟಾರೆಯಾಗಿ ಭಾರತೀಯ ಕ್ರಿಕೆಟಿಗರ ಫಿಟ್ನೆಸ್ ಭವಿಷ್ಯವನ್ನು ಕಾಪಾಡುವ ನಿಟ್ಟಿನಲ್ಲಿ ಬಿಸಿಸಿಐ ಪ್ರಬಲ ಹೆಜ್ಜೆಗಳನ್ನು ಇಡಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ.
ಇದನ್ನೂ ಓದಿ : ಮದ್ರಾಸ್ ಇಂಟರ್ನ್ಯಾಷನಲ್ ಸರ್ಕೀಟ್ನಲ್ಲಿ ಮೊಳಗಿದ ಧೋನಿ ಸೂಪರ್ಬೈಕ್ ಸದ್ದು!
