ಬೆಂಗಳೂರು : ಟೀಮ್ ಇಂಡಿಯಾದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಟೆಸ್ಟ್ ಕ್ರಿಕೆಟ್ಗೆ ವಿದಾಯ ಹೇಳುವ ನಿರ್ಧಾರದ ಹಿಂದೆ ಕೇವಲ ವೈಯಕ್ತಿಕ ಕಾರಣಗಳಷ್ಟೇ ಇರಲಿಲ್ಲವೇ? ಭಾರತ ತಂಡದ ಡ್ರೆಸ್ಸಿಂಗ್ ರೂಮ್ನಲ್ಲಿ ನಡೆದ ಬೆಳವಣಿಗೆಗಳು, ನಾಯಕತ್ವದ ಬದಲಾವಣೆಗಳು ಹಾಗೂ ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರ ಆಡಳಿತ ಶೈಲಿಯೂ ಈ ನಿರ್ಧಾರಕ್ಕೆ ಕಾರಣವಾಗಿರಬಹುದು ಎಂಬ ಹೊಸ ವರದಿ ಇದೀಗ ಚರ್ಚೆಗೆ ಗ್ರಾಸವಾಗಿದೆ.
ಕ್ರಿಕ್ಬ್ಲಾಗರ್ ವರದಿಯನ್ನು ಉಲ್ಲೇಖಿಸಿ ಪ್ರಕಟಿಸಿರುವ ವರದಿಯ ಪ್ರಕಾರ, ರೋಹಿತ್ ಶರ್ಮಾ ಮತ್ತು ಗೌತಮ್ ಗಂಭೀರ್ ನಡುವಿನ ಸಂಬಂಧ ಹದಗೆಟ್ಟಿದ್ದರಿಂದ ತಂಡದೊಳಗೆ ಅನಿಶ್ಚಿತತೆ ಹೆಚ್ಚಾಗಿತ್ತು. ಇದರ ಪರಿಣಾಮವಾಗಿ ಹಿರಿಯ ಆಟಗಾರರ ಭವಿಷ್ಯದ ಕುರಿತೂ ಅನುಮಾನಗಳು ಮೂಡಿದ್ದವು ಎಂದು ಹೇಳಲಾಗಿದೆ. ಆದರೆ ಈ ಎಲ್ಲ ಆರೋಪಗಳ ಬಗ್ಗೆ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಗೌತಮ್ ಗಂಭೀರ್ ಅಥವಾ ಬಿಸಿಸಿಐ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
ರೋಹಿತ್ಗೆ ನಡೆದ ವರ್ತನೆ ಕೊಹ್ಲಿಗೆ ಎಚ್ಚರಿಕೆಯಾಯಿತೇ?
ವರದಿಯ ಪ್ರಕಾರ, 2024–25ರ ಬಾರ್ಡರ್-ಗವಾಸ್ಕರ್ ಟ್ರೋಫಿ ವೇಳೆ ಆಗಿನ ಟೆಸ್ಟ್ ನಾಯಕ ರೋಹಿತ್ ಶರ್ಮಾ ಅವರನ್ನು ಸಿಡ್ನಿ ಟೆಸ್ಟ್ ಪಂದ್ಯದಿಂದ ಕೈಬಿಟ್ಟ ಬೆಳವಣಿಗೆ ವಿರಾಟ್ ಕೊಹ್ಲಿ ಮೇಲೆ ದೊಡ್ಡ ಪರಿಣಾಮ ಬೀರಿತ್ತು ಎನ್ನಲಾಗಿದೆ. ಟೆಸ್ಟ್ ತಂಡದ ನಾಯಕನಾಗಿದ್ದ ರೋಹಿತ್ ಅವರ ಸ್ಥಾನವೇ ಕ್ಷಣಾರ್ಧದಲ್ಲಿ ಅಸ್ಥಿರವಾಗಬಹುದಾದರೆ, ಹಲವು ವರ್ಷಗಳಿಂದ ದೇಶಕ್ಕಾಗಿ ಆಡಿದ ತನ್ನ ಭವಿಷ್ಯವೂ ಇದೇ ರೀತಿಯಾಗಿ ನಿರ್ಧಾರಗಳಿಗೆ ಒಳಗಾಗಬಹುದೇ ಎಂಬ ಪ್ರಶ್ನೆ ಕೊಹ್ಲಿ ಮನಸ್ಸಿನಲ್ಲಿ ಮೂಡಿತ್ತು ಎಂದು ವರದಿ ಹೇಳಿದೆ.
ಚಾಂಪಿಯನ್ಸ್ ಟ್ರೋಫಿ ಗೆದ್ದ ಬಳಿಕವೂ ಟೆಸ್ಟ್ ತಂಡದಲ್ಲಿ ತನ್ನ ಸ್ಥಾನ ಎಷ್ಟು ಸುರಕ್ಷಿತ ಎಂಬ ಆತಂಕ ಕೊಹ್ಲಿಯನ್ನು ಕಾಡುತ್ತಿತ್ತು. ಹಲವು ವರ್ಷಗಳ ಸೇವೆಯ ಬಳಿಕವೂ ಒಂದು ದಿನದ ಆಯ್ಕೆ ಸಮಿತಿಯ ನಿರ್ಧಾರವೇ ತಮ್ಮ ಭವಿಷ್ಯವನ್ನು ನಿರ್ಧರಿಸುವ ಸ್ಥಿತಿಯಲ್ಲಿ ಇರಲು ವಿರಾಟ್ ಇಷ್ಟಪಡಲಿಲ್ಲ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಗಂಭೀರ್ ನಾಯಕತ್ವದಲ್ಲಿ ಆಟಗಾರರಲ್ಲಿ ಹೆಚ್ಚಿದ ಅನಿಶ್ಚಿತತೆ
ವರದಿಯಲ್ಲಿ ಭಾರತೀಯ ತಂಡದ ಡ್ರೆಸ್ಸಿಂಗ್ ರೂಮ್ನ ವಾತಾವರಣದ ಬಗ್ಗೆಯೂ ಹಲವು ಗಂಭೀರ ಅಂಶಗಳನ್ನು ಉಲ್ಲೇಖಿಸಲಾಗಿದೆ.
ಪ್ರಸ್ತುತ ತಂಡದಲ್ಲಿ ಹರ್ಷಿತ್ ರಾಣಾ, ವಾಷಿಂಗ್ಟನ್ ಸುಂದರ್ ಮತ್ತು ರವಿ ಬಿಷ್ಣೋಯಿ ಹೊರತುಪಡಿಸಿ ಉಳಿದ ಬಹುತೇಕ ಆಟಗಾರರು ತಮ್ಮ ಸ್ಥಾನ ಸುರಕ್ಷಿತವಾಗಿದೆ ಎಂಬ ವಿಶ್ವಾಸದಲ್ಲಿಲ್ಲ ಎಂದು ಮೂಲಗಳನ್ನು ಉಲ್ಲೇಖಿಸಿ ಹೇಳಲಾಗಿದೆ. ಹಿರಿಯ ಆಟಗಾರರ ಆಯ್ಕೆಗೆ ಸಂಬಂಧಿಸಿದ ಕೆಲವು ವಿವಾದಾತ್ಮಕ ನಿರ್ಧಾರಗಳ ನಂತರ ಗೌತಮ್ ಗಂಭೀರ್ ಅವರ ವಿಶ್ವಾಸಾರ್ಹತೆ ಕುಂದಿದೆ ಎನ್ನಲಾಗಿದೆ. ಆಯ್ಕೆ ನೀತಿ ಆಗಾಗ ಬದಲಾಗುತ್ತಿರುವುದರಿಂದ ಆಟಗಾರರು ತಮ್ಮ ಪಾತ್ರವೇನು, ತಂಡದಲ್ಲಿ ಭವಿಷ್ಯ ಹೇಗಿರಲಿದೆ ಎಂಬ ಗೊಂದಲದಲ್ಲಿದ್ದಾರೆ ಎಂದು ವರದಿ ವಿವರಿಸಿದೆ.
ಗಂಭೀರ್ ಕೈಗೆ ಸಂಪೂರ್ಣ ನಿಯಂತ್ರಣ ಹೇಗೆ ಬಂತು?
ಗೌತಮ್ ಗಂಭೀರ್ ಮುಖ್ಯ ಕೋಚ್ ಆದ ಆರಂಭಿಕ ದಿನಗಳಲ್ಲಿ ರೋಹಿತ್ ಶರ್ಮಾ ಅವರಿಗೆ ಸಾಕಷ್ಟು ಸ್ವಾತಂತ್ರ್ಯ ನೀಡಿದ್ದರು ಎಂದು ವರದಿ ಹೇಳುತ್ತದೆ. ಆದರೆ ತಂಡದ ಫಲಿತಾಂಶಗಳು ಕುಸಿಯತೊಡಗಿದ ಬಳಿಕ ಪರಿಸ್ಥಿತಿ ಬದಲಾಗಿದೆ. ವಿಶೇಷವಾಗಿ ನ್ಯೂಜಿಲೆಂಡ್ ವಿರುದ್ಧದ ಎರಡು ಟೆಸ್ಟ್ ಸೋಲುಗಳ ಬಳಿಕ ಗಂಭೀರ್ ತಂಡದ ಕ್ರಿಕೆಟ್ ಸಂಬಂಧಿತ ನಿರ್ಧಾರಗಳಲ್ಲಿ ಹೆಚ್ಚು ಸಕ್ರಿಯರಾಗಲು ಆರಂಭಿಸಿದರು ಎನ್ನಲಾಗಿದೆ. ಆ ಸರಣಿಯ ಮೂರನೇ ಟೆಸ್ಟ್ಗೆ ಮುನ್ನವೇ ತಂಡದ ಬಹುತೇಕ ನಿರ್ಧಾರಗಳ ಮೇಲೆ ಗಂಭೀರ್ ಸಂಪೂರ್ಣ ಹಿಡಿತ ಸಾಧಿಸಿದ್ದರು ಎಂದು ವರದಿ ಹೇಳಿದೆ. ಬಳಿಕ ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಜಸ್ಪ್ರೀತ್ ಬುಮ್ರಾ ನಾಯಕತ್ವದ ಚರ್ಚೆ, ಸಿಡ್ನಿ ಟೆಸ್ಟ್ನಲ್ಲಿ ರೋಹಿತ್ ಅವರನ್ನು ಕೈಬಿಟ್ಟ ನಿರ್ಧಾರ ಸೇರಿದಂತೆ ಹಲವು ಮಹತ್ವದ ಬೆಳವಣಿಗೆಗಳಲ್ಲಿ ಗಂಭೀರ್ ಪ್ರಮುಖ ಪಾತ್ರವಹಿಸಿದ್ದರು ಎಂದು ವರದಿ ಆರೋಪಿಸಿದೆ.
ರೋಹಿತ್-ಗಂಭೀರ್ ಭಿನ್ನಾಭಿಪ್ರಾಯ ತಂಡದ ಮೇಲೂ ಪರಿಣಾಮ?
ವರದಿಯ ಪ್ರಕಾರ, ರೋಹಿತ್ ಶರ್ಮಾ ಮತ್ತು ಗೌತಮ್ ಗಂಭೀರ್ ನಡುವಿನ ಭಿನ್ನಾಭಿಪ್ರಾಯ ಕೇವಲ ಇಬ್ಬರ ನಡುವಿನ ಸಮಸ್ಯೆಯಾಗಿರಲಿಲ್ಲ. ಅದು ಇಡೀ ಡ್ರೆಸ್ಸಿಂಗ್ ರೂಮ್ ವಾತಾವರಣದ ಮೇಲೂ ಪರಿಣಾಮ ಬೀರಿತ್ತು. ನಾಯಕ ಮತ್ತು ಕೋಚ್ ನಡುವಿನ ಸಂಬಂಧ ಹದಗೆಟ್ಟ ನಂತರ ತಂಡದೊಳಗೆ ಅಸ್ಥಿರತೆ ಉಂಟಾಯಿತು. ಆಯ್ಕೆ ಪ್ರಕ್ರಿಯೆ ಯಾವ ಮಾನದಂಡದಲ್ಲಿ ನಡೆಯುತ್ತಿದೆ ಎಂಬ ಗೊಂದಲ ಆಟಗಾರರಲ್ಲಿ ಮೂಡಿತು. ಈ ವಾತಾವರಣವನ್ನು ಕೆಲವು ಮೂಲಗಳು “ವಿಷಕಾರಿ” ಎಂದು ಬಣ್ಣಿಸಿವೆ ಎಂದು ವರದಿ ಹೇಳಿದೆ.
ರೋಹಿತ್ ಭವಿಷ್ಯವೂ ಚರ್ಚೆಯ ಕೇಂದ್ರಬಿಂದು
ಇದೇ ವರದಿಯಲ್ಲಿ ರೋಹಿತ್ ಶರ್ಮಾ ಅವರ ಏಕದಿನ ಭವಿಷ್ಯದ ಬಗ್ಗೆಯೂ ಉಲ್ಲೇಖಿಸಲಾಗಿದೆ. ಒಂದು ವೇಳೆ ಅವರನ್ನು ಏಕದಿನ ತಂಡದಿಂದಲೂ ಕೈಬಿಟ್ಟರೆ ಅವರು ಮೌನವಾಗಿರುವ ಸಾಧ್ಯತೆ ಕಡಿಮೆ. ತಮ್ಮ ನಿರ್ಗಮನದ ಬಗ್ಗೆ ಸಾರ್ವಜನಿಕವಾಗಿ ಮಾತನಾಡುವ ಸಾಧ್ಯತೆಯಿದೆ. ಹಾಗಾದರೆ ಗೌತಮ್ ಗಂಭೀರ್ ಅವರ ಕೋಚಿಂಗ್ ಅವಧಿಯ ಮೇಲೂ ಮತ್ತಷ್ಟು ಪ್ರಶ್ನೆಗಳು ಉದ್ಭವಿಸಬಹುದು ಎಂದು ವರದಿ ವಿಶ್ಲೇಷಿಸಿದೆ.
ಇನ್ನೊಂದೆಡೆ ವದಂತಿಗಳಿಗೆ ತಂಡದ ಸ್ಪಷ್ಟನೆ
ಈ ಎಲ್ಲ ವರದಿಗಳು ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಊಹಾಪೋಹಗಳ ನಡುವೆಯೇ ಭಾರತ ತಂಡದ ಬ್ಯಾಟಿಂಗ್ ಕೋಚ್ ಸಿತಾಂಶು ಕೋಟಕ್ ಇತ್ತೀಚೆಗೆ ಪ್ರತಿಕ್ರಿಯೆ ನೀಡಿದ್ದಾರೆ. ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ನಡುವೆ ಯಾವುದೇ ಭಿನ್ನಾಭಿಪ್ರಾಯ ಇಲ್ಲ, ಇಬ್ಬರೂ ಸಾಮಾನ್ಯವಾಗಿ ಮಾತುಕತೆ ನಡೆಸುತ್ತಾರೆ ಮತ್ತು ಅವರ ನಡುವೆ “ಸೇತುವೆ ಕಟ್ಟುವ” ಅಗತ್ಯವೇ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಹೀಗಾಗಿ ಡ್ರೆಸ್ಸಿಂಗ್ ರೂಮ್ ವಿವಾದಕ್ಕೆ ಸಂಬಂಧಿಸಿದ ಈ ವರದಿಗಳ ಬಗ್ಗೆ ಯಾವುದೇ ಅಧಿಕೃತ ದೃಢೀಕರಣ ಸಿಕ್ಕಿಲ್ಲ ಎಂಬುದನ್ನು ಗಮನಿಸಬೇಕಾಗಿದೆ.
ಇದನ್ನೂ ಓದಿ : ಕೊಹ್ಲಿ ಐತಿಹಾಸಿಕ ಸಾಧನೆ ; ಸೇನಾ ರಾಷ್ಟ್ರಗಳಲ್ಲಿ 100 ಏಕದಿನ ಪಂದ್ಯ ಆಡಿದ 3ನೇ ಭಾರತೀಯ!
