ಬೆಂಗಳೂರು : ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್ ಬ್ಯಾಂಕಿಂಗ್ ಸೌಲಭ್ಯಗಳು ಹೆಚ್ಚಾದಂತೆ, ಆನ್ ಲೈನ್ ವಂಚನೆಗಳ ಪ್ರಕರಣಗಳೂ ಹೆಚ್ಚುತ್ತಿವೆ. ಸೈಬರ್ ವಂಚಕರು ಗ್ರಾಹಕರ ಹಣ ಮತ್ತು ವೈಯಕ್ತಿಕ ಮಾಹಿತಿಯನ್ನು ಕದಿಯುತ್ತಿರುವ ಪ್ರಕರಣಗಳು ದಿನೇದಿನೆ ವರದಿಯಾಗುತ್ತಲೇ ಇವೆ. ಅದರಲ್ಲೂ, ಸಾರ್ವಜನಿಕರು ಆನ್ ಲೈನ್ ಬ್ಯಾಂಕಿಂಗ್ ಮೂಲಕ ವಹಿವಾಟು ನಡೆಸುವಾಗ ಹೆಚ್ಚಿನ ಜಾಗರೂಕರಾಗಿ ಇರಬೇಕಾಗಿರುವುದು ಅತ್ಯವಶ್ಯಕವಾಗಿದೆ. ಹಾಗಾದರೆ, ಆನ್ ಲೈನ್ ಬ್ಯಾಂಕಿಂಗ್ ವೇಳೆ ಯಾವೆಲ್ಲ ವಿಷಯಗಳನ್ನು ಗಮನದಲ್ಲಿ ಇಟ್ಟುಕೊಳ್ಳಬೇಕು? ಇಲ್ಲಿದೆ ಮಾಹಿತಿ.
ಶಂಕಿತ ಲಿಂಕ್ ಮೇಲೆ ಕ್ಲಿಕ್ ಮಾಡಬೇಡಿ: ಬ್ಯಾಂಕ್ ನಿಂದ ಬಂದಂತೆ ತೋರುವ ಎಸ್ಎಂಎಸ್ (SMS), ವಾಟ್ಸ್ ಆ್ಯಪ್ ಅಥವಾ ಇ-ಮೇಲ್ ಗಳಲ್ಲಿರುವ ಲಿಂಕ್ ಗಳ ಮೇಲೆ ಕ್ಲಿಕ್ ಮಾಡಬೇಡಿ. ಆಫರ್ ಗಳು ಅಥವಾ ಕೆವೈಸಿ (KYC) ಅಪ್ ಡೇಟ್ ಹೆಸರಿನಲ್ಲಿ ಬರುವ ಇಂತಹ ಸಂದೇಶಗಳು ವಂಚನೆಯಾಗಿರಬಹುದು.
ವೈಯಕ್ತಿಕ ಮಾಹಿತಿಯನ್ನು ಹಂಚಿಕೊಳ್ಳಬೇಡಿ: ಯಾವುದೇ ಕಾರಣಕ್ಕೂ ಬ್ಯಾಂಕ್ ಅಧಿಕಾರಿಗಳೆಂದು ಹೇಳಿಕೊಳ್ಳುವವರಿಗೆ ನಿಮ್ಮ ಒಟಿಪಿ (OTP), ಪಿನ್ (PIN), ಪಾಸ್ ವರ್ಡ್ ಅಥವಾ ಡೆಬಿಟ್ ಕಾರ್ಡ್ ವಿವರಗಳನ್ನು ಹಂಚಿಕೊಳ್ಳಬೇಡಿ. ಬ್ಯಾಂಕ್ ಗಳು ಎಂದಿಗೂ ಫೋನ್ ಮೂಲಕ ಇಂತಹ ಸೂಕ್ಷ್ಮ ಮಾಹಿತಿಯನ್ನು ಕೇಳುವುದಿಲ್ಲ.
ಅಧಿಕೃತ ಆ್ಯಪ್ ಗಳನ್ನು ಮಾತ್ರ ಬಳಸಿ: ಬ್ಯಾಂಕಿಂಗ್ ವ್ಯವಹಾರಕ್ಕಾಗಿ ಅಧಿಕೃತ ಬ್ಯಾಂಕ್ ಆ್ಯಪ್ ಗಳನ್ನು ಮಾತ್ರ ಗೂಗಲ್ ಪ್ಲೇ ಸ್ಟೋರ್ ಅಥವಾ ಆ್ಯಪಲ್ ಆ್ಯಪ್ ಸ್ಟೋರ್ ನಿಂದ ಡೌನ್ ಲೋಡ್ ಮಾಡಿ. ಅಪರಿಚಿತರು ಕಳುಹಿಸುವ ಯಾವುದೇ ಆ್ಯಪ್ ಅಥವಾ ಸ್ಕ್ರೀನ್ ಶೇರಿಂಗ್ ಸಾಫ್ಟ್ವೇರ್ ಅನ್ನು ಇನ್ ಸ್ಟಾಲ್ ಮಾಡಬೇಡಿ.
ಸ್ಟ್ರಾಂಗ್ ಪಾಸ್ ವರ್ಡ್ ಬಳಸಿ: ನಿಮ್ಮ ಬ್ಯಾಂಕ್ ಖಾತೆಗೆ ಬಳಸುವ ಪಾಸ್ ವರ್ಡ್ ಸುಲಭವಾಗಿ ಊಹಿಸಲಾಗದಂತಿರಲಿ (ಅಕ್ಷರಗಳು, ಸಂಖ್ಯೆಗಳು ಮತ್ತು ವಿಶೇಷ ಚಿಹ್ನೆಗಳ ಮಿಶ್ರಣ). ಅಲ್ಲದೆ, ಸಾಧ್ಯವಾದಷ್ಟು ‘ಟೂ-ಫ್ಯಾಕ್ಟರ್ ಅಥೆಂಟಿಕೇಶನ್’ (2FA) ಸಕ್ರಿಯಗೊಳಿಸಿ.
ಎಚ್ಚರ ವಹಿಸಿ: ನಿಮ್ಮ ಬ್ಯಾಂಕ್ ಖಾತೆಯ ವಹಿವಾಟುಗಳನ್ನು ಆಗಾಗ್ಗೆ ಪರಿಶೀಲಿಸಿ. ಯಾವುದೇ ಅನುಮಾನಾಸ್ಪದ ಚಟುವಟಿಕೆ ಕಂಡುಬಂದರೆ ತಕ್ಷಣವೇ ನಿಮ್ಮ ಬ್ಯಾಂಕ್ ಗೆ ಮಾಹಿತಿ ನೀಡಿ ಮತ್ತು ಸಂಬಂಧಪಟ್ಟ ಸೈಬರ್ ಕ್ರೈಮ್ ವಿಭಾಗಕ್ಕೆ ದೂರು ದಾಖಲಿಸಿ.
ಇದನ್ನೂ ಓದಿ : ‘ಜಾಗೃತರಾಗದಿದ್ದರೆ ದೆವ್ವವಾಗಿ ಮರಳಿ ಬರುತ್ತೇನೆ’ : 20 ದಿನದಿಂದ ಉಪವಾಸವಿರುವ ಸೋನಮ್ ವಾಂಗ್ಚುಕ್ ಷರತ್ತು
