ವಾಷಿಂಗ್ಟನ್: ಮೇಜರ್ ಲೀಗ್ ಕ್ರಿಕೆಟ್ (ಎಂಎಲ್ಸಿ) 2026ರಲ್ಲಿ ಮುಂಬೈ ಇಂಡಿಯನ್ಸ್ ನ್ಯೂಯಾರ್ಕ್ ತಂಡದ ಅನುಭವಿ ಆಲ್ರೌಂಡರ್ ಕೀರನ್ ಪೊಲಾರ್ಡ್ ವಿಕೆಟ್ ಸಂಭ್ರಮದ ವೇಳೆ ಗಾಯಗೊಂಡು ಎಲ್ಲರನ್ನು ಆತಂಕಕ್ಕೀಡು ಮಾಡಿದ ಘಟನೆ ನಡೆದಿದೆ. ಸಿಯಾಟಲ್ ಓರ್ಕಾಸ್ ವಿರುದ್ಧದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾದ ಬ್ಯಾಟರ್ ಮ್ಯಾಥ್ಯೂ ಬ್ರೀಟ್ಜ್ಕೆ ಅವರ ವಿಕೆಟ್ ಪಡೆದ ಬಳಿಕ ಸಂಭ್ರಮಾಚರಣೆ ನಡೆಸುತ್ತಿದ್ದ ವೇಳೆ ಪೊಲಾರ್ಡ್ ಅವರ ಭುಜಕ್ಕೆ ಗಾಯವಾದಂತಾಗಿ ಕೆಲಕಾಲ ಮೈದಾನದಿಂದ ಹೊರನಡೆದರು. ಈ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಡಲ್ಲಾಸ್ನ ಗ್ರ್ಯಾಂಡ್ ಪ್ರೈರಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಸಿಯಾಟಲ್ ಓರ್ಕಾಸ್ ತಂಡದ ಮ್ಯಾಥ್ಯೂ ಬ್ರೀಟ್ಜ್ಕೆ ಉತ್ತಮ ಲಯದಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದರು. 15ನೇ ಓವರ್ನಲ್ಲಿ ಬೌಲಿಂಗ್ಗೆ ಬಂದ ಪೊಲಾರ್ಡ್, ಬ್ಯಾಟರ್ನ ಚಲನವಲನವನ್ನು ಗಮನಿಸಿ ಚಾಣಾಕ್ಷವಾಗಿ ಎಸೆದ ಚೆಂಡಿಗೆ ಬ್ರೀಟ್ಜ್ಕೆ ನೀಡಿ ಬೌಲ್ಡ್ ಆದರು. 31 ಎಸೆತಗಳಲ್ಲಿ 44 ರನ್ ಗಳಿಸಿದ್ದ ಅವರ ಇನ್ನಿಂಗ್ಸ್ಗೆ ತೆರೆ ಬಿದ್ದಿದ್ದು, ಮುಂಬೈ ಇಂಡಿಯನ್ಸ್ ನ್ಯೂಯಾರ್ಕ್ಗೆ ಇದು ನಿರ್ಣಾಯಕ ವಿಕೆಟ್ ಆಗಿ ಪರಿಣಮಿಸಿತು.
ಸಂಭ್ರಮದ ವೇಳೆ ಭುಜಕ್ಕೆ ಪೆಟ್ಟು
ವಿಕೆಟ್ ಪಡೆದ ಖುಷಿಯಲ್ಲಿ ಪೊಲಾರ್ಡ್ ಜೋರಾಗಿ ಓಡುತ್ತಾ ಸಂಭ್ರಮಿಸಿದರು. ಇದೇ ವೇಳೆ ತಮ್ಮ ತಲೆಯತ್ತ ಕೈ ತೋರಿಸಿ, ಯೋಜಿತ ಬೌಲಿಂಗ್ನಿಂದ ವಿಕೆಟ್ ಪಡೆದಿದ್ದಾಗಿ ಸಂಭ್ರಮ ವ್ಯಕ್ತಪಡಿಸಿದರು. ಆದರೆ ಈ ಸಂಭ್ರಮದ ಮಧ್ಯೆಯೇ ಅವರ ಭುಜಕ್ಕೆ ಎಳೆದಂತಾಗಿ ನೋವು ಕಾಣಿಸಿಕೊಂಡಿತು. ಅಸ್ವಸ್ಥತೆಯಿಂದ ಅವರು ಕೆಲಕಾಲ ಮೈದಾನ ತೊರೆದು ಹೊರಹೋಗಿದ್ದು, ಮುಂಬೈ ಇಂಡಿಯನ್ಸ್ ನ್ಯೂಯಾರ್ಕ್ ಶಿಬಿರದಲ್ಲಿ ಆತಂಕ ಮೂಡಿಸಿತು.
ಮತ್ತೆ ಮರಳಿ ಅಂತಿಮ ಹೊಡೆತ
ಆದರೆ ಪೊಲಾರ್ಡ್ ಅವರ ಗಾಯ ಗಂಭೀರವಾಗಿರಲಿಲ್ಲ. ಪಂದ್ಯದ ಕೊನೆಯ ಓವರ್ನಲ್ಲಿ ಅವರು ಮತ್ತೆ ಬೌಲಿಂಗ್ಗೆ ಮರಳಿದರು. ಅಂತಿಮ ಓವರ್ನ ಐದನೇ ಎಸೆತದಲ್ಲಿ ಅಲಿ ಶೇಖ್ ಅವರನ್ನು ಔಟ್ ಮಾಡಿ ಸಿಯಾಟಲ್ ಓರ್ಕಾಸ್ ತಂಡದ ಗೆಲುವಿನ ಆಸೆಗೆ ತೆರೆ ಎಳೆದರು. ಇದರೊಂದಿಗೆ ಮುಂಬೈ ಇಂಡಿಯನ್ಸ್ ನ್ಯೂಯಾರ್ಕ್ 17 ರನ್ಗಳ ರೋಚಕ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿತು.
ಪೊಲಾರ್ಡ್ ಬಗ್ಗೆ ನಾಯಕ ನಿಕೋಲಸ್ ಪೂರನ್ ಮಾತು
ಪಂದ್ಯದ ಬಳಿಕ ಮಾತನಾಡಿದ ನಾಯಕ ನಿಕೋಲಸ್ ಪೂರನ್, “ಪೊಲಾರ್ಡ್ಗೆ ಸಣ್ಣ ಮಟ್ಟಿನ ತೊಂದರೆ ಆಗಿತ್ತು. ಅವರು ಅದರ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಟಿ20 ಕ್ರಿಕೆಟ್ನಲ್ಲಿ ಸುಮಾರು 15 ಸಾವಿರಕ್ಕೂ ಹೆಚ್ಚು ರನ್ ಗಳಿಸಿರುವ ಅವರು, ಐದನೇ ಮತ್ತು ಆರನೇ ಕ್ರಮಾಂಕದಲ್ಲಿ ಆಡಿದ ಶ್ರೇಷ್ಠ ಬ್ಯಾಟರ್ಗಳಲ್ಲಿ ಒಬ್ಬರು. ಒತ್ತಡದ ಕ್ಷಣದಲ್ಲಿ ಅವರ ಅನುಭವವೇ ನಮ್ಮ ಗೆಲುವಿಗೆ ಕಾರಣವಾಯಿತು” ಎಂದು ಪ್ರಶಂಸಿಸಿದರು.
ಅಭಿಮಾನಿಗಳಿಗೆ ನಿರಾಳ ಸುದ್ದಿ
ಸಂಭ್ರಮಾಚರಣೆಯ ವೇಳೆ ಗಾಯಗೊಂಡಿರುವ ದೃಶ್ಯ ಮೊದಲಿಗೆ ಅಭಿಮಾನಿಗಳಲ್ಲಿ ಆತಂಕ ಹುಟ್ಟಿಸಿದರೂ, ನಂತರವೇ ಪೊಲಾರ್ಡ್ ಮತ್ತೆ ಮೈದಾನಕ್ಕಿಳಿದು ಬೌಲಿಂಗ್ ಮಾಡಿ ತಂಡಕ್ಕೆ ಗೆಲುವು ತಂದುಕೊಟ್ಟರು. ಹೀಗಾಗಿ ಅವರ ಗಾಯ ಗಂಭೀರವಾಗಿಲ್ಲ ಎಂಬುದು ಸ್ಪಷ್ಟವಾಗಿದ್ದು, ಮುಂದಿನ ಪಂದ್ಯಗಳಿಗೂ ಅವರು ಲಭ್ಯರಾಗುವ ಸಾಧ್ಯತೆ ಇದೆ. ಎಂಎಲ್ಸಿ 2026ರಲ್ಲಿ ಮತ್ತೊಮ್ಮೆ ತಮ್ಮ ಅನುಭವ ಮತ್ತು ಪಂದ್ಯ ಗೆಲ್ಲಿಸುವ ಸಾಮರ್ಥ್ಯವನ್ನು ಪೊಲಾರ್ಡ್ ಸಾಬೀತುಪಡಿಸಿದ್ದಾರೆ.
