ಬೆಂಗಳೂರು: ಮ್ಯೂಚುವಲ್ ಫಂಡ್, ಮ್ಯೂಚುವಲ್ ಫಂಡ್ ಎಸ್ಐಪಿ ಹೂಡಿಕೆಯು ಶ್ರೀಮಂತರಿಗೆ, ಲಕ್ಷಾಂತರ ರೂಪಾಯಿ ಸಂಬಳ ಇರುವವರಿಗೆ ಎಂದು ತುಂಬ ಜನ ಭಾವಿಸಿದ್ದಾರೆ. ಆದರೆ, ತಿಂಗಳಿಗೆ 10-15 ಸಾವಿರ ರೂಪಾಯಿ ದುಡಿಯುವವರು ಕೂಡ ಈಗ ಮ್ಯೂಚುವಲ್ ಫಂಡ್ ಎಸ್ಐಪಿಗಳಲ್ಲಿ ಹೂಡಿಕೆ ಮಾಡಬಹುದಾಗಿದೆ. ಅದರಲ್ಲೂ, ಭಾರತೀಯ ಸ್ಟೇಟ್ ಬ್ಯಾಂಕ್ ಈಗ ಜನ್ ನಿವೇಶ್ (JanNivesh SIP) ಎಂಬ ಎಸ್ಐಪಿ ಯೋಜನೆಯನ್ನು ಪರಿಚಯಿಸಿದ್ದು, ಇದರಲ್ಲಿ ಜನ ಮಾಸಿಕ ಕೇವಲ 250 ರೂಪಾಯಿಯನ್ನು ಹೂಡಿಕೆ ಮಾಡಿ ಕೂಡ ಲಕ್ಷಾಂತರ ರೂ. ಗಳಿಸಬಹುದಾಗಿದೆ.
ಹೌದು, ಜನ್ ನಿವೇಶ್ ಯೋಜನೆಯಲ್ಲಿ ನೀವು ತಿಂಗಳಿಗೆ ಕೇವಲ 250 ರೂಪಾಯಿಯಿಂದ ಹೂಡಿಕೆಯನ್ನು ಪ್ರಾರಂಭಿಸಬಹುದು. ಇದು ಹೊಸಬರಿಗೆ ಮತ್ತು ಸಣ್ಣ ಉಳಿತಾಯಗಾರರಿಗೆ ತುಂಬಾ ಸೂಕ್ತವಾಗಿದೆ. ‘ಜನ್ ನಿವೇಶ್’ ಎಸ್ಐಪಿ ಅಡಿಯಲ್ಲಿ ನಿಮ್ಮ ಹಣವು ಎಸ್ಬಿಐನ ‘ಬ್ಯಾಲೆನ್ಸ್ಡ್ ಅಡ್ವಾಂಟೇಜ್ ಫಂಡ್’ನಲ್ಲಿ ಹೂಡಿಕೆಯಾಗುತ್ತದೆ. ಇದು ಮಾರುಕಟ್ಟೆಯ ಏರಿಳಿತಕ್ಕೆ ತಕ್ಕಂತೆ ಈಕ್ವಿಟಿ (ಷೇರುಪೇಟೆ) ಮತ್ತು ಡೆಟ್ ಫಂಡ್ ಗಳ ನಡುವೆ ಹೂಡಿಕೆಯನ್ನು ಬದಲಾಯಿಸುತ್ತಾ, ಅಪಾಯವನ್ನು ಕಡಿಮೆ ಮಾಡಲು ಪ್ರಯತ್ನಿಸುತ್ತದೆ.
ವರದಿಗಳ ಪ್ರಕಾರ, ನೀವು ತಿಂಗಳಿಗೆ 250 ರೂಪಾಯಿಯಂತೆ 30 ವರ್ಷ ಹೂಡಿಕೆ ಮಾಡಿದರೆ, ಮಾರುಕಟ್ಟೆಯ ಅಂದಾಜು 15% ರಿಟರ್ನ್ಸ್ ಆಧಾರದ ಮೇಲೆ ಸುಮಾರು 17 ಲಕ್ಷ ರೂಪಾಯಿವರೆಗೆ ನಿಧಿಯನ್ನು ಕ್ರೋಢೀಕರಿಸಲು ಸಾಧ್ಯವಿದೆ ಎಂದು ಅಂದಾಜಿಸಲಾಗಿದೆ. ಎಸ್ ಬಿಐ ಯೋನೋ (SBI YONO) ಆ್ಯಪ್ ಅಥವಾ ಇತರ ಆನ್ ಲೈನ್ ಹೂಡಿಕೆ ಪ್ಲಾಟ್ ಫಾರ್ಮ್ ಗಳ ಮೂಲಕ ಸುಲಭವಾಗಿ ಹೂಡಿಕೆ ಮಾಡಬಹುದು.
ನೀವು ನಿತ್ಯ, ಸಾಪ್ತಾಹಿಕ ಅಥವಾ ಮಾಸಿಕ ಎಸ್ ಐಪಿ ಆಯ್ಕೆಗಳನ್ನು ಆರಿಸಿಕೊಳ್ಳಬಹುದು. ಸಣ್ಣ ಮೊತ್ತದ ಹೂಡಿಕೆದಾರರಿಗೆ ಅನುಕೂಲವಾಗುವಂತೆ ಹೆಚ್ಚುವರಿ ಶುಲ್ಕಗಳನ್ನು ಕಡಿಮೆ ಮಾಡಲಾಗಿದೆ. ಮಕ್ಕಳ ಮದುವೆ, ಉನ್ನತ ಶಿಕ್ಷಣ ಸೇರಿ ಯಾವುದೇ ಉದ್ದೇಶಗಳಿಗೆ ಸಣ್ಣ ಮೊತ್ತದಿಂದ ಹೂಡಿಕೆ ಮಾಡಬಹುದು. ನೀವು ಹೂಡಿಕೆಯ ಹಣವನ್ನು ಯಾವುದೇ ಸಮಯದಲ್ಲಿ ಬೇಕಾದರೂ ಹಿಂಪಡೆಯಬಹುದು.
ಡಿಸ್ ಕ್ಲೇಮರ್
ಎಸ್ ಬಿಐ ಜನ್ ನಿವೇಶ್ ಮ್ಯೂಚುವಲ್ ಫಂಡ್ ಹೂಡಿಕೆಯ ಬಗ್ಗೆ ಮಾಹಿತಿ ನೀಡುವ ದೃಷ್ಟಿಯಿಂದ ಮಾತ್ರ ಲೇಖನವನ್ನು ಪ್ರಕಟಿಸಲಾಗಿದೆ. ಇದು ಹೂಡಿಕೆಗೆ ನಾವು ಮಾಡುವ ಶಿಫಾರಸು ಅಲ್ಲ. ಮ್ಯೂಚುವಲ್ ಫಂಡ್ ಎಸ್ಐಪಿಗಳು ಮಾರುಕಟ್ಟೆ ಏರಿಳಿತದ ಮೇಲೆ ಲಾಭಾಂಶ ನೀಡುತ್ತವೆ. ಇದು ಹೂಡಿಕೆಯ ರಿಸ್ಕ್ ಹೊಂದಿರುತ್ತದೆ. ಯಾವುದೇ ಮಾದರಿಯ ಹೂಡಿಕೆಗೆ ತಜ್ಞರ ಸಲಹೆಗಳನ್ನು ಪಡೆಯುವುದು ಮರೆಯದಿರಿ.
