ಮುಂಬೈ : ಟೀಮ್ ಇಂಡಿಯಾದ ನೂತನ ಟಿ20 ನಾಯಕನಾಗಿ ಅಧಿಕಾರ ವಹಿಸಿಕೊಂಡ ಶ್ರೇಯಸ್ ಅಯ್ಯರ್ ಅವರಿಗೆ ಆರಂಭದಲ್ಲೇ ಅತಿದೊಡ್ಡ ಆಘಾತ ಎದುರಾಗಿದೆ. ಸೂರ್ಯಕುಮಾರ್ ಯಾದವ್ ಅವರಿಂದ ನಾಯಕತ್ವದ ಚುಕ್ಕಾಣಿ ವಹಿಸಿಕೊಂಡ ನಂತರದ ತಮ್ಮ ಮೊದಲ ಅಸೈನ್ಮೆಂಟ್ನಲ್ಲೇ ಶ್ರೇಯಸ್ ಪಡೆ ಐರ್ಲೆಂಡ್ ಎದುರು ಹೀನಾಯವಾಗಿ ಸೋತು ತೀವ್ರ ಮುಖಭಂಗ ಅನುಭವಿಸಿದೆ. ಬರೋಬ್ಬರಿ 2-0 ಅಂತರದಿಂದ ಟಿ20 ಸರಣಿಯನ್ನು ಕೈಚೆಲ್ಲಿರುವ ಭಾರತ ತಂಡದ ಸಾಧನೆಯು ಇಡೀ ಕ್ರಿಕೆಟ್ ಜಗತ್ತನ್ನೇ ಅಚ್ಚರಿಗೆ ದೂಡಿದೆ. ಐರ್ಲೆಂಡ್ ವಿರುದ್ಧ ಭಾರತ ಈ ಹಿಂದೆಂದೂ ಟಿ20 ಪಂದ್ಯವನ್ನು ಸೋತಿರಲಿಲ್ಲ. ಇಂತಹ ಪರಿಸ್ಥಿತಿಯಲ್ಲಿ ಸರಣಿಯನ್ನೇ ವೈಟ್ವಾಶ್ ಮಾಡಿರುವ ಐರ್ಲೆಂಡ್ ಐತಿಹಾಸಿಕ ಸಾಧನೆ ಮಾಡಿದ್ದು, ಭಾರತೀಯ ಕ್ರಿಕೆಟ್ ತಂಡದ ಈ ಅತ್ಯಂತ ಕಳಪೆ ಪ್ರದರ್ಶನದ ಬಗ್ಗೆ ಇದೀಗ ದಿಗ್ಗಜ ಕ್ರಿಕೆಟಿಗ ಸುನಿಲ್ ಗವಾಸ್ಕರ್ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
ಈ ಕಳಪೆ ಪ್ರದರ್ಶನದ ಬಗ್ಗೆ ಸ್ಪೋರ್ಟ್ಸ್ಟಾರ್ನಲ್ಲಿನ ತಮ್ಮ ಅಂಕಣದಲ್ಲಿ ತೀಕ್ಷ್ಣವಾಗಿ ಬರೆದುಕೊಂಡಿರುವ ಮಾಜಿ ನಾಯಕ ಸುನಿಲ್ ಗವಾಸ್ಕರ್ ಅವರು, ಜೂನ್ 28ರ ಭಾನುವಾರದ ದಿನ ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿಯೇ ಅತ್ಯಂತ ಕೆಟ್ಟ ದಿನಗಳಲ್ಲಿ ಒಂದಾಗಿ ದಾಖಲಾಗಲಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಪಂದ್ಯವನ್ನು ಸೋಲುವುದು ಕ್ರೀಡೆಯಲ್ಲಿ ಸಹಜ. ಆದರೆ ಯಾರ ವಿರುದ್ಧ ನಾವು ಸರಣಿಯನ್ನು ಸೋಲುತ್ತಿದ್ದೇವೆ ಎಂಬುದು ಬಹಳ ಮುಖ್ಯವಾಗುತ್ತದೆ ಎಂದಿರುವ ಗವಾಸ್ಕರ್, ಭಾರತ ತಂಡವು ಸುಲಭವಾಗಿ ಗೆಲ್ಲಬೇಕಾಗಿದ್ದ ಸರಣಿಯಲ್ಲಿ ಈ ಪರಿಯ ನಾಚಿಕೆಗೇಡಿನ ಸೋಲು ಅನುಭವಿಸಿರುವುದು ಕ್ರೀಡಾಭಿಮಾನಿಗಳಿಗೆ ತೀವ್ರ ನೋವುಂಟು ಮಾಡಿದೆ ಎಂದು ಹೇಳಿದ್ದಾರೆ. ಭಾರತೀಯ ಕ್ರಿಕೆಟ್ನಲ್ಲಿ ಈ ಹಿಂದೆ ಹಲವು ಕಳಪೆ ಪ್ರದರ್ಶನಗಳು ಮೂಡಿಬಂದಿದ್ದು ತಾವೂ ಅದರ ಭಾಗವಾಗಿದ್ದರೂ, ಐರ್ಲೆಂಡ್ ವಿರುದ್ಧದ ಈ ಸೋಲು ಮಾತ್ರ ಇತಿಹಾಸದ ಅತ್ಯಂತ ಕೆಳಮಟ್ಟದ ಕ್ಷಣಗಳಲ್ಲಿ ಒಂದು ಎಂದು ಅವರು ಬಣ್ಣಿಸಿದ್ದಾರೆ.
ಅತಿ ಆತ್ಮವಿಶ್ವಾಸವೇ ಮುಳು
ಗವಾಸ್ಕರ್ ಅವರ ಪ್ರಕಾರ, ಭಾರತದ ಈ ಸೋಲಿಗೆ ಐರ್ಲೆಂಡ್ ಆಟಗಾರರು ಊಹೆಗೂ ಮೀರಿದ ಶ್ರೇಷ್ಠ ಪ್ರದರ್ಶನ ನೀಡಿದ್ದು ಕಾರಣವಲ್ಲ, ಬದಲಾಗಿ ಭಾರತೀಯ ಬ್ಯಾಟರ್ಗಳ ಅತಿಯಾದ ಆತ್ಮವಿಶ್ವಾಸ ಹಾಗೂ ಪಂದ್ಯದ ಬಗೆಗಿನ ನಿರ್ಲಕ್ಷ್ಯವೇ ಕಾರಣ. ಮೈದಾನಕ್ಕಿಳಿದ ಬಹುತೇಕ ಭಾರತೀಯ ಬ್ಯಾಟರ್ಗಳು ಎದುರಾಳಿಯನ್ನು ಅತ್ಯಂತ ಹಗುರವಾಗಿ ಪರಿಗಣಿಸಿ, ಪಂದ್ಯದ ಪರಿಸ್ಥಿತಿಯನ್ನು ಅರಿಯದೆ ಬೇಜವಾಬ್ದಾರಿಯುತ ಶಾಟ್ಗಳನ್ನು ಆಡಿ ವಿಕೆಟ್ ಒಪ್ಪಿಸಿದ್ದಾರೆ ಎಂದು ಗವಾಸ್ಕರ್ ಕಿಡಿಕಾರಿದ್ದಾರೆ. ಈ ನಿರ್ಲಕ್ಷ್ಯದ ಧೋರಣೆಯೇ ಭಾರತ ತಂಡದ ಈ ಪತನಕ್ಕೆ ಪ್ರಮುಖ ಕಾರಣ ಎಂದು ಅವರು ವ್ಯಾಖ್ಯಾನಿಸಿದ್ದಾರೆ.
ಇದೇ ಸಂದರ್ಭದಲ್ಲಿ ಭಾರತದ ಬ್ಯಾಟರ್ಗಳ ಈ ಬೇಜವಾಬ್ದಾರಿತನವನ್ನು 1983ರ ಏಕದಿನ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಪ್ರಬಲ ವೆಸ್ಟ್ ಇಂಡೀಸ್ ತಂಡ ತೋರಿದ ಅತಿಯಾದ ಆತ್ಮವಿಶ್ವಾಸಕ್ಕೆ ಗವಾಸ್ಕರ್ ಹೋಲಿಸಿದ್ದಾರೆ. ಆ ಐತಿಹಾಸಿಕ ಫೈನಲ್ ಪಂದ್ಯದಲ್ಲಿ ಭಾರತ ಒಡ್ಡಿದ್ದ ಸಾಧಾರಣ ಗುರಿಯನ್ನು ಬೆನ್ನಟ್ಟುವಾಗ ವೆಸ್ಟ್ ಇಂಡೀಸ್ ತಂಡವು ಹೇಗೆ ಅತಿಯಾದ ಆತ್ಮವಿಶ್ವಾಸದಿಂದ ವಿಕೆಟ್ಗಳನ್ನು ಕಳೆದುಕೊಂಡು ಸೋಲೊಪ್ಪಿಕೊಂಡಿತ್ತೋ, ಅದೇ ರೀತಿಯ ತಪ್ಪುಗಳನ್ನು ಭಾರತೀಯ ಬ್ಯಾಟರ್ಗಳು ಐರ್ಲೆಂಡ್ ವಿರುದ್ಧ ಮಾಡಿದ್ದಾರೆ ಎಂದು ಅವರು ವಿಶ್ಲೇಷಿಸಿದ್ದಾರೆ. ಐರ್ಲೆಂಡ್ ಪಿಚ್ಗಳಲ್ಲಿ ವೇಗದ ಬೌಲರ್ಗಳಿಗೆ ಇದ್ದ ಹೆಚ್ಚುವರಿ ಬೌನ್ಸ್ ಹಾಗೂ ಮೂವ್ಮೆಂಟ್ ಅನ್ನು ಅರಿಯುವಲ್ಲಿ ಬ್ಯಾಟರ್ಗಳು ಸಂಪೂರ್ಣ ವಿಫಲರಾದರು. ಪರಿಸ್ಥಿತಿಗೆ ತಕ್ಕಂತೆ ಹೊಂದಿಕೊಳ್ಳದೆ ಆರಂಭದಲ್ಲೇ ದೊಡ್ಡ ಹೊಡೆತಗಳಿಗೆ ಕೈಹಾಕಿ ಸುಲಭವಾಗಿ ಕ್ಯಾಚ್ ಇತ್ತು ಪೆವಿಲಿಯನ್ ಸೇರಿದರು ಎಂದು ಗವಾಸ್ಕರ್ ಆರೋಪಿಸಿದ್ದಾರೆ. ತಾಂತ್ರಿಕ ಹೊಂದಾಣಿಕೆಯ ಕೊರತೆ ಮತ್ತು ಎದುರಾಳಿಯ ಬಗೆಗಿನ ಹಗುರ ಭಾವನೆಯೇ ಭಾರತಕ್ಕೆ ಇಂತಹ ಐತಿಹಾಸಿಕ ಮುಖಭಂಗ ತಂದೊಡ್ಡಿದೆ ಎನ್ನುವುದು ಗವಾಸ್ಕರ್ ಅವರ ಖಚಿತವಾದ ಅಭಿಪ್ರಾಯವಾಗಿದೆ.
ಇದನ್ನೂ ಓದಿ : ಇಂಗ್ಲೆಂಡ್ ಕ್ರಿಕೆಟ್ ತರಬೇತಿ : ಟೀಕೆಗಳ ನಡುವೆಯೂ ಭವಿಷ್ಯದ ಬಗ್ಗೆ ಸ್ಪಷ್ಟನೆ ನೀಡಿದ ಮೆಕಲಮ್
