ಬೆಂಗಳೂರು : ಖಾಸಗಿ ಕಂಪನಿಗಳ ಉದ್ಯೋಗಿಗಳಿಗೆ ಪಿಎಫ್ ನಿಧಿಯು ಹಲವು ರೀತಿಯಲ್ಲಿ ಅನುಕೂಲಕರವಾಗಿದೆ. ನಿವೃತ್ತಿ ನಿಧಿ ರೂಪಿಸುವುದು, ಪಿಎಫ್ ಮೊತ್ತಕ್ಕೆ ಕೇಂದ್ರ ಸರ್ಕಾರದಿಂದ ವರ್ಷಕ್ಕೆ ಶೇ.8.25ರಷ್ಟು ಬಡ್ಡಿದರ, ನಿವೃತ್ತಿ ಬಳಿಕ ಪಿಂಚಣಿ ಸೇರಿ ಹಲವು ಉಪಯೋಗಗಳಿವೆ. ಇಂತಹ ಪಿಎಫ್ ನಿಧಿಯಿಂದ ತುರ್ತು ಸಂದರ್ಭದಲ್ಲಿ ಹಣವನ್ನು ವಿತ್ ಡ್ರಾ ಮಾಡಬಹುದಾಗಿದೆ. ಆದರೆ, ಪ್ರತಿ ಬಾರಿಯೂ ಎಲ್ಲ ಮೊತ್ತವನ್ನು ವಿತ್ ಡ್ರಾ ಮಾಡಲು ಆಗುವುದಿಲ್ಲ ಎಂಬುದೇ ಗಮನಾರ್ಹವಾಗಿದೆ.
ಯಾವಾಗ ಎಲ್ಲ ಹಣ ವಿತ್ ಡ್ರಾ ಮಾಡಬಹುದು?
ಕೆಲ ವಿಶೇಷ ಸಂದರ್ಭಗಳಲ್ಲಿ ಮಾತ್ರ ಪಿಎಫ್ ಖಾತೆಯಲ್ಲಿರುವ ಎಲ್ಲ ಹಣವನ್ನು ವಿತ್ ಡ್ರಾ ಮಾಡಬಹುದಾಗಿದೆ. 58ನೇ ವರ್ಷಕ್ಕೆ ಉದ್ಯೋಗಿಯು ನಿವೃತ್ತರಾದಾಗ, ಕಾಯಂ ಆಗಿ ವಿದೇಶದಲ್ಲಿಯೇ ನೆಲೆಸಿದಾಗ, ಸತತ ಎರಡು ತಿಂಗಳವರೆಗೆ ನಿರುದ್ಯೋಗಿಯಾದಾಗ ಮಾತ್ರ ಪಿಎಫ್ ಖಾತೆಯಿಂದ ಸಂಪೂರ್ಣ ಹಣವನ್ನು ವಿತ್ ಡ್ರಾ ಮಾಡಬಹುದು ಎಂದು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (ಇಪಿಎಫ್ಒ) ತಿಳಿಸಿದೆ.
ಭಾಗಶಃ ಹಣ ವಿತ್ ಡ್ರಾ ಮಾಡಬಹುದು
ಉದ್ಯೋಗಿಗೆ 54 ವರ್ಷ ಆದಾಗ ಅವರು ಪಿಎಫ್ ಖಾತೆಯಲ್ಲಿರುವ ಶೇ.90ರಷ್ಟು ಹಣವನ್ನು ವಿತ್ ಡ್ರಾ ಮಾಡಬಹುದು. ಇದೇ ರೀತಿ, ಹೊಸ ಮನೆ ಕಟ್ಟುವಾಗ ಅಥವಾ ಖರೀದಿ ಮಾಡುವಾಗ ಉದ್ಯೋಗಿಯು ಶೇ.90ರಷ್ಟು ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡಬಹುದಾಗಿದೆ. ಇನ್ನು ಮದುವೆ ಅಥವಾ ಉನ್ನತ ಶಿಕ್ಷಣಕ್ಕಾಗಿ ಹಣ ಬೇಕು ಎಂದಾದಾಗ, ಪಿಎಫ್ ಖಾತೆಯಲ್ಲಿರುವ ಶೇ.50ರಷ್ಟು ಹಣವನ್ನು ವಿತ್ ಡ್ರಾ ಮಾಡಬಹುದು.
ಇಪಿಎಫ್ಒ ಇತ್ತೀಚೆಗೆ ಕೆಲ ನಿಯಮಗಳಲ್ಲಿ ಬದಲಾವಣೆ ಜಾರಿಗೆ ತಂದಿದೆ. ಇದುವರೆಗೆ ಇದ್ದ ಆಟೋ ಸೆಟಲ್ ಮೆಂಟ್ ವಿತ್ ಡ್ರಾ ಮಿತಿಯನ್ನು 1 ಲಕ್ಷ ರೂಪಾಯಿಯಿಂದ 5 ಲಕ್ಷ ರೂಪಾಯಿಗೆ ಏರಿಕೆ ಮಾಡಿದೆ. ಅಂದರೆ, ಯಾವುದೇ ಅಧಿಕಾರಿಗಳ ಮಧ್ಯಸ್ಥಿಕೆ, ದಾಖಲೆ ಸಲ್ಲಿಕೆ ಇಲ್ಲದೆಯೇ, ಆನ್ ಲೈನ್ ಮೂಲಕವೇ ಇಪಿಎಫ್ಒ ಸದಸ್ಯರು ತುರ್ತು ಸಂದರ್ಭಗಳಲ್ಲಿ ಪಿಎಫ್ ಮೊತ್ತದಲ್ಲಿ 5 ಲಕ್ಷ ರೂಪಾಯಿವರೆಗೆ ವಿತ್ ಡ್ರಾ ಮಾಡಬಹುದಾಗಿದೆ.
ಇದನ್ನೂ ಓದಿ : ವಿದೇಶಾಂಗ ಸಚಿವಾಲಯದಲ್ಲಿ ನೇಮಕಾತಿ : ಹೀಗೆ ಅರ್ಜಿ ಸಲ್ಲಿಸಿ
