ಬೆಂಗಳೂರು : ಕೇಂದ್ರದ ನರೇಂದ್ರ ಮೋದಿ ಸರ್ಕಾರವೇ ಲಾಟರಿ ಯೋಜನೆ ಆರಂಭಿಸಿದೆ. ಸಾರ್ವಜನಿಕರು ಲಾಟರಿ ಖರೀದಿಸುವ ಮೂಲಕ ಕೋಟ್ಯಂತರ ರೂಪಾಯಿ ಹಣ ಗಳಿಸಬಹುದು. ಭಾರತೀಯ ರಿಸರ್ವ್ ಬ್ಯಾಂಕ್ ನೇತೃತ್ವದಲ್ಲಿ ಲಾಟರಿ ಟಿಕೆಟ್ಗಳನ್ನು ಮಾರಾಟ ಮಾಡಲಾಗುತ್ತಿದೆ. ನೀವು ಕೂಡ ಲಾಟರಿ ಟಿಕೆಟ್ ಖರೀದಿಸಬಹುದು. ಇದಕ್ಕೆ ನೀವು ಇಷ್ಟು ಹಣವನ್ನು ಆನ್ಲೈನ್ ಮೂಲಕವೇ ಪೇ ಮಾಡಬೇಕು ಎಂಬ ಅಂಶಗಳಿರುವ ಇ-ಮೇಲ್ ನಿಮಗೆ ಬಂದಿದೆಯಾ? ಸಾಮಾಜಿಕ ಜಾಲತಾಣಗಳಲ್ಲಿ ಇಂತಹ ಸಂದೇಶವನ್ನು ನೋಡಿದ್ದೀರಾ? ನೋಡಿರದಿದ್ದರೂ, ನೀವೀಗ ಎಚ್ಚರದಿಂದ ಇರಬೇಕು.
ಹೌದು, ಭಾರತೀಯ ರಿಸರ್ವ್ ಬ್ಯಾಂಕ್ ಲಾಟರಿ ಆರಂಭಿಸಿದೆ ಎಂಬ ವದಂತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿವೆ. ಕೇಂದ್ರ ಸರ್ಕಾರ ದೇಣಿಗೆ ನಿಧಿ ಆರಂಭಿಸಿದ್ದು, ಇದಕ್ಕೂ ಸ್ವಲ್ಪ ಹಣವನ್ನು ದೇಣಿಗೆ ನೀಡಿ ಎಂಬಂತಹ ಪೋಸ್ಟ್ ಗಳು ಕಾಣಿಸಿವೆ. ಇದೇ ಕಾರಣಕ್ಕಾಗಿ, ಕೇಂದ್ರ ಸರ್ಕಾರದ ಪ್ರೆಸ್ ಬ್ಯೂರೋ ಆಫ್ ಇನ್ಫಾರ್ಮೇಷನ್ (ಪಿಐಬಿ) ಈಗ ಇಂತಹ ಪೋಸ್ಟ್ಗಳ ಫ್ಯಾಕ್ಟ್ ಚೆಕ್ ಮಾಡುವ ಮೂಲಕ ಜನರಲ್ಲಿ ಜಾಗೃತಿ ಮೂಡಿಸಿದೆ.
“ಭಾರತೀಯ ರಿಸರ್ವ್ ಬ್ಯಾಂಕ್ ಯಾವುದೇ ಲಾಟರಿ ಯೋಜನೆಗಳನ್ನು ಆರಂಭಿಸಿಲ್ಲ. ಪರಿಹಾರ, ದೇಣಿಗೆ ನಿಧಿಗಳನ್ನು ಕೂಡ ಸ್ಥಾಪನೆ ಮಾಡಿಲ್ಲ. ಹಾಗಾಗಿ, ಸಾರ್ವಜನಿಕರು ಯಾವುದೇ ಮೇಲ್, ಮೆಸೇಜ್, ಪೋಸ್ಟ್ ಗಳನ್ನು ನಂಬಿ ಹಣ ಕಳೆದುಕೊಳ್ಳಬಾರದು. ಇವೆಲ್ಲ ನಕಲಿ ಹಾಗೂ ದುರುದ್ದೇಶದಿಂದ ಕೂಡಿದ ವದಂತಿಗಳು” ಎಂಬುದಾಗಿ ಪಿಐಬಿಯು ಜಾಲತಾಣದಲ್ಲಿ ಸ್ಪಷ್ಟನೆ ನೀಡಿದೆ. ಹಾಗಾಗಿ, ಇಂತಹ ಸಂದೇಶಗಳ ಬಗ್ಗೆ ಜನ ಎಚ್ಚರದಿಂದ ಇರುವುದು ಒಳಿತು.
ಹಾಗೆಯೇ, ಇಂತಹ ವದಂತಿ, ತಪ್ಪು ಮಾಹಿತಿ ಹರಡಿಸುತ್ತಿದ್ದರೆ ಸಾರ್ವಜನಿಕರೇ 8799711259 ವಾಟ್ಸ್ ಆ್ಯಪ್ ಸಂಖ್ಯೆಗೆ ಮಾಹಿತಿ ನೀಡಬಹುದಾಗಿದೆ. ಯಾವುದಾದರೂ ಗೊಂದಲಕಾರಿ ಮಾಹಿತಿ ಇದ್ದರೆ, ಅದನ್ನು ರಿಪೋರ್ಟ್ ಮಾಡುವ ಮೂಲಕ ಬಗೆಹರಿಸಿಕೊಳ್ಳಬಹುದಾಗಿದೆ. ಇಂತಹ ಸಂಗತಿಗಳನ್ನು factcheck@pib.gov.in ಗೆ ಮೇಲ್ ಮಾಡುವ ಮೂಲಕವೂ ಫ್ಯಾಕ್ಟ್ ಚೆಕ್ ಗಮನಕ್ಕೆ ತರಬಹುದಾಗಿದೆ.
ಇದನ್ನೂ ಓದಿ : ಲಲಿತಕಲಾ ಅಕಾಡೆಮಿಯಿಂದ ವಿದ್ಯಾರ್ಥಿಗಳಿಗೆ ಸ್ಕಾಲರ್ ಶಿಪ್ : ಕೂಡಲೇ ಅರ್ಜಿ ಸಲ್ಲಿಸಿ
