ಬೆಂಗಳೂರು : ದೇಶದ ಬೃಹತ್ ಸಾರ್ವಜನಿಕ ವಲಯದ ವಿಮಾ ಕಂಪನಿಯಾಗಿರುವ ಭಾರತೀಯ ಜೀವ ವಿಮಾ ನಿಗಮವು ಈಗ ಎರಡು ಹೊಸ ಜೀವ ವಿಮೆಗಳನ್ನು ಆರಂಭಿಸಿದೆ. ಅದರಲ್ಲೂ, ಗಂಡ-ಹೆಂಡತಿಯು ಜಂಟಿಯಾಗಿ ಜೀವ ವಿಮೆ ಮಾಡಿಸಬಹುದಾಗಿದ್ದು, ಹಲವು ಉಪಯೋಗಗಳಿವೆ. ನಿಗಮ ಆರಂಭಿಸಿರುವ ಎಲ್ಐಸಿ ನ್ಯೂ ಜೀವನ್ ಸಾಥಿ (ಸಿಂಗಲ್ ಪ್ರೀಮಿಯಂ) ಹಾಗೂ ಎಲ್ಐಸಿ ನ್ಯೂ ಜೀವನ್ ಸಾಥಿ (ಲಿಮಿಟೆಡ್ ಪ್ರೀಮಿಯಂ) ಯೋಜನೆಗಳ ಕುರಿತು ಹೆಚ್ಚಿನ ಮಾಹಿತಿ ಇಲ್ಲಿದೆ.
ನ್ಯೂ ಜೀವನ್ ಸಾಥಿ – ಸಿಂಗಲ್ ಪ್ರೀಮಿಯಂ
ಈ ಯೋಜನೆಯಲ್ಲಿ ಪದೇಪದೆ ಪ್ರೀಮಿಯಂ ಪಾವತಿಸುವ ಜಂಜಾಟವಿರುವುದಿಲ್ಲ, ಕೇವಲ ಒಂದು ಬಾರಿ ಮಾತ್ರ ಪ್ರೀಮಿಯಂ ಪಾವತಿಸಬೇಕಾಗುತ್ತದೆ. ಒಂದೇ ಪಾಲಿಸಿಯಡಿ ಪತಿ ಮತ್ತು ಪತ್ನಿ ಇಬ್ಬರಿಗೂ ಜೀವ ವಿಮಾ ರಕ್ಷಣೆ ಸಿಗುತ್ತದೆ. ಪಾಲಿಸಿ ಅವಧಿಯುದ್ದಕ್ಕೂ ಪ್ರತಿ 1,000 ರೂ. ಬೇಸಿಕ್ ಸಮ್ ಅಶ್ಯೂರ್ಡ್ ಗೆ (ಮೂಲ ವಿಮಾ ಮೊತ್ತ) 70 ರೂ. ನಂತೆ ಗ್ಯಾರಂಟಿ ಬೋನಸ್ ಸೇರುತ್ತಾ ಹೋಗುತ್ತದೆ.
ದುರದೃಷ್ಟವಶಾತ್, ಪಾಲಿಸಿದಾರರು ಮೃತಪಟ್ಟರೆ ಎರಡು ರೀತಿಯಲ್ಲಿ ಹಣ ನೀಡಲಾಗುತ್ತದೆ. ಮೊದಲನೆ ಆಯ್ಕೆಯಲ್ಲಿ, ಒಂದೇ ಬಾರಿಯ ಪ್ರೀಮಿಯಂನ 1.25 ಪಟ್ಟು ಅಥವಾ ಬೇಸಿಕ್ ಸಮ್ ಅಶ್ಯೂರ್ಡ್ ಮೊತ್ತದಲ್ಲಿ ಯಾವುದು ಹೆಚ್ಚೋ ಅದನ್ನು ನೀಡಲಾಗುತ್ತದೆ. ಇಲ್ಲವೇ, ಎರಡನೇ ಆಯ್ಕೆಯಲ್ಲಿ ಒಂದೇ ಬಾರಿಯ ಪ್ರೀಮಿಯಂನ 10 ಪಟ್ಟು ಮೊತ್ತ ನೀಡಲಾಗುತ್ತದೆ. 18 ವರ್ಷದಿಂದ 75 ವರ್ಷದೊಳಗಿನವರು ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಬಹುದು.
ನ್ಯೂ ಜೀವನ್ ಸಾಥಿ – ಲಿಮಿಟೆಡ್ ಪ್ರೀಮಿಯಂ
ನಿಗದಿಪಡಿಸಿದ ಕೆಲವು ವರ್ಷಗಳವರೆಗೆ ಮಾತ್ರ ಪ್ರೀಮಿಯಂ ಪಾವತಿಸಲು ಬಯಸುವವರಿಗೆ ಇದು ಸೂಕ್ತವಾಗಿದೆ. ಪ್ರೀಮಿಯಂ ಪಾವತಿಸುವ ಅವಧಿಯಲ್ಲಿ ದಂಪತಿ ಪೈಕಿ ಯಾರಾದರೂ ಒಬ್ಬರು ಮೊದಲು ಮರಣ ಹೊಂದಿದರೆ, ಮುಂದಿನ ಎಲ್ಲಾ ಪ್ರೀಮಿಯಂಗಳನ್ನು ಮನ್ನಾ ಮಾಡಲಾಗುತ್ತದೆ. ಪಾಲಿಸಿಯು ಯಾವುದೇ ಪ್ರೀಮಿಯಂ ಇಲ್ಲದೆ ಉಳಿದ ಅವಧಿಗೆ ಮುಂದುವರಿಯುತ್ತದೆ.
ಪಾವತಿಸಿದ ಒಟ್ಟು ವಾರ್ಷಿಕ ಪ್ರೀಮಿಯಂನ 7 ಪಟ್ಟು ಹೆಚ್ಚಿನ ಮೊತ್ತವನ್ನು ಪ್ರತಿವರ್ಷ ಗ್ಯಾರಂಟಿ ರಿಟರ್ನ್ ಆಗಿ ಪಾಲಿಸಿಗೆ ಸೇರಿಸಲಾಗುತ್ತದೆ. ಮತ್ತೊಂದು ಆಯ್ಕೆಯಲ್ಲಿ ವಾರ್ಷಿಕ ಪ್ರೀಮಿಯಂನ 10 ಪಟ್ಟು ಮೊತ್ತವನ್ನು ಮರಣದ ನಂತರ ನೀಡಲಾಗುತ್ತದೆ. ಅಲ್ಲದೆ, ಮೆಚ್ಯೂರಿಟಿ ಅಥವಾ ಮರಣದ ಸಂದರ್ಭದಲ್ಲಿ ಸಿಗುವ ಹಣವನ್ನು ಒಟ್ಟಿಗೆ ಪಡೆಯುವ ಬದಲು 5, 10 ಅಥವಾ 15 ವರ್ಷಗಳ ಕಾಲ ಕಂತುಗಳ ರೂಪದಲ್ಲಿ ಪಡೆಯುವ ಆಯ್ಕೆಯೂ ಇದೆ. ತುರ್ತು ಹಣದ ಅವಶ್ಯಕತೆ ಎದುರಾದರೆ ಈ ಪಾಲಿಸಿಯ ಮೇಲೆ ಸಾಲವನ್ನು ಪಡೆಯಬಹುದು.
ಈ ಯೋಜನೆಯನ್ನು ಪ್ರಾರಂಭಿಸಲು ಕನಿಷ್ಠ 3,00,000 ರೂ. ಬೇಸಿಕ್ ಸಮ್ ಅಶ್ಯೂರ್ಡ್ ಹೊಂದಿರಬೇಕು. ಗರಿಷ್ಠ ಮೊತ್ತಕ್ಕೆ ಯಾವುದೇ ಮಿತಿಯಿರುವುದಿಲ್ಲ. ಹೆಚ್ಚುವರಿ ಪ್ರೀಮಿಯಂ ಪಾವತಿಸುವ ಮೂಲಕ ಅಪಘಾತ ವಿಮೆ ಅಥವಾ ಗಂಭೀರ ಕಾಯಿಲೆಗಳ ರೈಡರ್ ಗಳನ್ನು ಪಾಲಿಸಿಗೆ ಸೇರಿಸಿಕೊಳ್ಳಬಹುದು.
ಇದನ್ನೂ ಓದಿ : ಟಿಯಾಗೊ EV ಫೇಸ್ಲಿಫ್ಟ್ ಬಿಡುಗಡೆ : ಮಾರುಕಟ್ಟೆಗೆ ಲಗ್ಗೆ ಇಟ್ಟ ಬಹುನಿರೀಕ್ಷಿತ ಎಲೆಕ್ಟ್ರಿಕ್ ಹ್ಯಾಚ್ಬ್ಯಾಕ್!
