ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಟೂರ್ನಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮತ್ತು ಸನ್ರೈಸರ್ಸ್ ಹೈದರಾಬಾದ್ (ಎಸ್ಆರ್ಎಚ್) ನಡುವಿನ ಪಂದ್ಯವು ಭಾರೀ ಪೈಪೋಟಿಗೆ ಸಾಕ್ಷಿಯಾಗಿದೆ. ಪಾಯಿಂಟ್ಸ್ ಟೇಬಲ್ನಲ್ಲಿ ಟಾಪ್-2 ಸ್ಥಾನಕ್ಕೇರುವ ಮಹತ್ವದ ಘಟ್ಟದಲ್ಲಿ, ಮೇ 22ರ ಶುಕ್ರವಾರದಂದು ಉಪ್ಪಲ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಹಾಗೂ ಆಸ್ಟ್ರೇಲಿಯಾದ ಸ್ಟಾರ್ ಬ್ಯಾಟರ್ ಟ್ರಾವಿಸ್ ಹೆಡ್ ನಡುವಿನ ಮಾತಿನ ಚಕಮಕಿ ಮೈದಾನದ ಕಾವು ಹೆಚ್ಚಿಸಿತು. ಎರಡನೇ ಇನ್ನಿಂಗ್ಸ್ ವೇಳೆ ಉಭಯ ಆಟಗಾರರ ನಡುವೆ ತೀವ್ರ ಸ್ವರೂಪದ ವಾಕ್ಸಮರ ನಡೆಯಿತು.
ಬೌಲಿಂಗ್ ಮಾಡುವಂತೆ ಕೊಹ್ಲಿ ಸವಾಲು
ಆರ್ಸಿಬಿ ಬ್ಯಾಟಿಂಗ್ ಮಾಡುತ್ತಿದ್ದಾಗ ಶಿವಾಂಗ್ ಕುಮಾರ್ ಎಸೆದ ಓವರ್ನಲ್ಲಿ ವೆಂಕಟೇಶ್ ಅಯ್ಯರ್ ಅಬ್ಬರದ ಬ್ಯಾಟಿಂಗ್ ನಡೆಸುತ್ತಿದ್ದರು. ಮೈದಾನದ ಮೂಲೆ ಮೂಲೆಗೂ ಚೆಂಡನ್ನು ಅಟ್ಟುತ್ತಿದ್ದಾಗ, ನಾನ್-ಸ್ಟ್ರೈಕರ್ನಲ್ಲಿದ್ದ ವಿರಾಟ್ ಕೊಹ್ಲಿ ಮಿಡ್-ವಿಕೆಟ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಟ್ರಾವಿಸ್ ಹೆಡ್ ಅವರನ್ನು ಗುರಿಯಾಗಿಸಿ ಕೆಲವು ಸನ್ನೆಗಳನ್ನು ಮಾಡಿದರು. “ಬಂದು ಆಫ್-ಸ್ಪಿನ್ ಬೌಲಿಂಗ್ ಮಾಡು” ಎಂದು ಕೊಹ್ಲಿ ಸವಾಲು ಹಾಕುತ್ತಿರುವಂತೆ ಕಾಣುತ್ತಿತ್ತು ಎಂದು ವೀಕ್ಷಕ ವಿವರಣೆಗಾರರು ಅರ್ಥೈಸಿದರು.
ವೆಂಕಟೇಶ್ ಆ ಓವರ್ನಲ್ಲಿ 23 ರನ್ ಚಚ್ಚುತ್ತಿದ್ದಂತೆ, ಕೊಹ್ಲಿ ಪದೇ ಪದೇ ಹೆಡ್ ಅವರನ್ನು ಕೆಣಕುವ ಪ್ರಯತ್ನ ಮಾಡಿದರು. ಇದು ಮೇಲ್ನೋಟಕ್ಕೆ ತಮಾಷೆಯ ಸಂಭಾಷಣೆಯಂತೆ ಕಂಡರೂ, ಕೊಹ್ಲಿಯವರ ಟ್ರೇಡ್ಮಾರ್ಕ್ ಆಕ್ರಮಣಕಾರಿ ಮನೋಭಾವ ಅದರಲ್ಲಿ ಎದ್ದುಕಾಣುತ್ತಿತ್ತು. ಇದಕ್ಕೆ ಹೆಡ್ ಕೇವಲ ತಲೆಯಾಡಿಸುವ ಮೂಲಕ ಶಾಂತ ಪ್ರತಿಕ್ರಿಯೆ ನೀಡಿದ್ದು ವಿಶೇಷವಾಗಿತ್ತು.
ಹೆಡ್ ವಿಕೆಟ್ ಪತನದ ಸಂಭ್ರಮಾಚರಣೆ
ಈ ಪಂದ್ಯದಲ್ಲಿ ಉಭಯ ಆಟಗಾರರು ಮುಖಾಮುಖಿಯಾಗಿದ್ದು ಇದೇ ಮೊದಲೇನಲ್ಲ. ಮೊದಲ ಇನ್ನಿಂಗ್ಸ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಬ್ಯಾಟರ್ಗಳು ಆರ್ಸಿಬಿ ಬೌಲರ್ಗಳನ್ನು ಮನಬಂದಂತೆ ದಂಡಿಸಿ 20 ಓವರ್ಗಳಲ್ಲಿ 256 ರನ್ಗಳ ಬೃಹತ್ ಮೊತ್ತ ಕಲೆಹಾಕಿದ್ದರು. ಈ ಬೃಹತ್ ಮೊತ್ತಕ್ಕೆ ಪ್ರಮುಖ ಕಾಣಿಕೆ ನೀಡಿದ್ದ ಟ್ರಾವಿಸ್ ಹೆಡ್ ಔಟಾದಾಗ, ವಿರಾಟ್ ಕೊಹ್ಲಿ ಮೈದಾನದಲ್ಲಿ ಭಾರೀ ಆಕ್ರಮಣಕಾರಿಯಾಗಿ ಸಂಭ್ರಮಿಸಿದ್ದರು. ಪೆವಿಲಿಯನ್ಗೆ ಮರಳುತ್ತಿದ್ದ ಹೆಡ್ ದಿಕ್ಕಿನತ್ತ ತಿರುಗಿ ಕಿರುಚುವ ಮೂಲಕ ಕೊಹ್ಲಿ ತಮ್ಮ ಆಕ್ರೋಶ ಹೊರಹಾಕಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ನಿರಾಸೆ ಮೂಡಿಸಿದ ಕೊಹ್ಲಿ ಆಟ
ಮೈದಾನದಲ್ಲಿ ಎಷ್ಟೇ ಆಕ್ರಮಣಕಾರಿ ಮನೋಭಾವ ತೋರಿದರೂ, ಬ್ಯಾಟಿಂಗ್ನಲ್ಲಿ ಅದನ್ನು ಮುಂದುವರೆಸಲು ಕೊಹ್ಲಿಗೆ ಸಾಧ್ಯವಾಗಲಿಲ್ಲ. ಬೃಹತ್ ಮೊತ್ತವನ್ನು ಬೆನ್ನಟ್ಟುವಾಗ ಲಯ ಕಂಡುಕೊಳ್ಳಲು ಪರದಾಡಿದ ಕೊಹ್ಲಿ, ಶಕೀಬ್ ಹುಸೇನ್ ಎಸೆತದಲ್ಲಿ ಕವರ್ಸ್ನಲ್ಲಿದ್ದ ಫೀಲ್ಡರ್ಗೆ ಕ್ಯಾಚಿತ್ತು ನಿರ್ಗಮಿಸಿದರು. ಕುತೂಹಲಕಾರಿ ಸಂಗತಿಯೆಂದರೆ, 18ನೇ ಓವರ್ನಲ್ಲಿ ಬೌಲಿಂಗ್ಗೆ ಇಳಿದ ಟ್ರಾವಿಸ್ ಹೆಡ್ ತಮ್ಮ ಎರಡನೇ ಎಸೆತದಲ್ಲೇ ಆರ್ಸಿಬಿ ನಾಯಕ ರಜತ್ ಪಾಟಿದಾರ್ ವಿಕೆಟ್ ಕಬಳಿಸಿ ಪಂದ್ಯಕ್ಕೆ ಮತ್ತೊಂದು ತಿರುವು ನೀಡಿದರು. ಒಟ್ಟಾರೆಯಾಗಿ ಬೃಹತ್ ಮೊತ್ತದ ಈ ಪಂದ್ಯವು ಬ್ಯಾಟಿಂಗ್ ಮನರಂಜನೆಯ ಜೊತೆಗೆ ಹೈ-ವೋಲ್ಟೇಜ್ ಆನ್-ಫೀಲ್ಡ್ ಡ್ರಾಮಾಗೂ ವೇದಿಕೆಯಾಯಿತು.
ಇದನ್ನೂ ಓದಿ ; ಕೊಹ್ಲಿ ಜೊತೆಗಿನ ಉದ್ವೇಗಕ್ಕೆ ತೆರೆ ಎಳೆದ ಹರ್ಪ್ರೀತ್ : ಪಂಜಾಬ್ ಕಿಂಗ್ಸ್ ಸ್ಪಿನ್ನರ್ ನೀಡಿದ ಅಧಿಕೃತ ಹೇಳಿಕೆಯಲ್ಲೇನಿದೆ?
