ಬೆಂಗಳೂರು : ನಾವೊಂದು ಬ್ಯಾಂಕ್ ಖಾತೆ ತೆರೆದಿರುತ್ತೇವೆ. ಅದಕ್ಕೆ ಪ್ರತಿ ತಿಂಗಳು ಸಂಬಳ ಜಮೆಯಾಗುತ್ತಿರುತ್ತದೆ. ಖಾತೆಯಲ್ಲಿರುವ ಹಣಕ್ಕೆ ಬಡ್ಡಿಯೂ ಜಮೆಯಾಗುತ್ತಿರುತ್ತದೆ. ಅಲ್ಲಿಗೆ ನಮ್ಮ ಕೆಲಸ ಮುಗಿಯಿತು ಎಂದು ನಾವು ಸುಮ್ಮನೆ ಇರುತ್ತೇವೆ. ಆದರೆ, ನಾವು ಸ್ವಲ್ಪ ನಿರ್ಲಕ್ಷ್ಯ ವಹಿಸಿದರೂ ನಮ್ಮ ಬ್ಯಾಂಕ್ ಖಾತೆಯೇ ಸ್ಥಗಿತ ಅಥವಾ ಫ್ರೀಝ್ ಆಗುವ ಸಾಧ್ಯತೆ ಇರುತ್ತದೆ. ಹಾಗಾಗಿ, ಬ್ಯಾಂಕ್ ಖಾತೆ ಹೊಂದಿರುವವರು ಕೆಲ ಪರಿಶೀಲನೆ ಮಾಡುವ ಮೂಲಕ ತಮ್ಮ ಬ್ಯಾಂಕ್ ಖಾತೆಯನ್ನು ಸುರಕ್ಷಿತವಾಗಿ ಇಟ್ಟುಕೊಳ್ಳಬಹುದಾಗಿದೆ.
ಯಾವ ತಪ್ಪುಗಳಿದ್ದರೆ ಖಾತೆ ಸ್ಥಗಿತ?
- ನಿಮ್ಮ ಬ್ಯಾಂಕ್ ಪಾಸ್ ಬುಕ್ ನಲ್ಲಿರುವ ಹೆಸರು/ಜನ್ಮ ದಿನಾಂಕ ಮತ್ತು ಆಧಾರ್ ಕಾರ್ಡ್ ನಲ್ಲಿರುವ ಹೆಸರು/ಜನ್ಮ ದಿನಾಂಕ ಪರಸ್ಪರ ಹೊಂದಾಣಿಕೆಯಾಗದಿದ್ದರೆ ಬ್ಯಾಂಕ್ ಅದನ್ನು ತಿರಸ್ಕರಿಸಬಹುದು.
- ಹಲವು ವರ್ಷಗಳ ಹಿಂದೆ ಆಧಾರ್ ಕಾರ್ಡ್ ಮಾಡಿಸಿದಾಗ ಇದ್ದ ಫೋಟೋ ಮತ್ತು ಈಗಿನ ಮುಖಲಕ್ಷಣಗಳಲ್ಲಿ ಭಾರಿ ವ್ಯತ್ಯಾಸವಿದ್ದರೆ (ವಿಶೇಷವಾಗಿ ವಯಸ್ಸಾದಂತೆ ಅಥವಾ ಚಿಕ್ಕ ವಯಸ್ಸಿನಲ್ಲಿ ಆಧಾರ್ ಮಾಡಿಸಿದ್ದರೆ) ಬ್ಯಾಂಕ್ನ ಇ-ಕೆವೈಸಿ (e-KYC) ಪ್ರಕ್ರಿಯೆಯಲ್ಲಿ ಫೋಟೋ ಮ್ಯಾಚ್ ಆಗುವುದಿಲ್ಲ.
- ನೀವು ವಾಸವಿರುವ ಪ್ರಸ್ತುತ ವಿಳಾಸ ಮತ್ತು ಆಧಾರ್ ಕಾರ್ಡ್ ನಲ್ಲಿರುವ ಕಾಯಂ ವಿಳಾಸದ ನಡುವೆ ಭಾರಿ ವ್ಯತ್ಯಾಸವಿದ್ದು, ಬ್ಯಾಂಕ್ ಕಳುಹಿಸುವ ಯಾವುದೇ ಅಧಿಕೃತ ಪತ್ರಗಳು ಅಥವಾ ನೋಟೀಸ್ ಗಳು ನಿಮಗೆ ತಲುಪದೆ ವಾಪಸ್ ಹೋದರೆ, ಬ್ಯಾಂಕ್ ಭದ್ರತಾ ದೃಷ್ಟಿಯಿಂದ ಖಾತೆಯನ್ನು ತಾತ್ಕಾಲಿಕವಾಗಿ ಫ್ರೀಜ್ ಮಾಡಬಹುದು.
- ಸರ್ಕಾರದ ನಿಯಮದ ಪ್ರಕಾರ, ಪ್ಯಾನ್ ಕಾರ್ಡ್ ಮತ್ತು ಆಧಾರ್ ಕಾರ್ಡ್ ಲಿಂಕ್ ಆಗಿರಬೇಕು. ಆಧಾರ್ ನಲ್ಲಿರುವ ತಪ್ಪು ಮಾಹಿತಿಯಿಂದಾಗಿ (ಹೆಸರು ಅಥವಾ ಜನ್ಮ ದಿನಾಂಕ ತಪ್ಪಾಗಿದ್ದರೆ) ನಿಮ್ಮ ಪ್ಯಾನ್ ಕಾರ್ಡ್ ನೊಂದಿಗೆ ಅದು ಲಿಂಕ್ ಆಗದಿದ್ದರೆ, ನಿಮ್ಮ ಪ್ಯಾನ್ ಕಾರ್ಡ್ ನಿಷ್ಕ್ರಿಯ (Inoperative) ಆಗುತ್ತದೆ. ಪಾನ್ ಕಾರ್ಡ್ ಅಮಾನ್ಯವಾದರೆ ಬ್ಯಾಂಕ್ ಖಾತೆಯ ವಹಿವಾಟನ್ನು ಸ್ಥಗಿತಗೊಳಿಸುತ್ತದೆ.
ಖಾತೆ ಫ್ರೀಜ್ ಆಗದಂತೆ ತಡೆಯಲು ಏನು ಮಾಡಬೇಕು?
- ನಿಮ್ಮ ಬ್ಯಾಂಕ್ ಖಾತೆಯಲ್ಲಿರುವ ಹೆಸರು, ಜನ್ಮ ದಿನಾಂಕದ ಸ್ಪೆಲ್ಲಿಂಗ್ ಗಳು ಆಧಾರ್ ಮತ್ತು ಪ್ಯಾನ್ ಕಾರ್ಡ್ ನಲ್ಲಿ ಇರುವಂತೆಯೇ ಇವೆಯೇ ಎಂದು ಖಚಿತಪಡಿಸಿಕೊಳ್ಳಿ.
- ಆಧಾರ್ ನಲ್ಲಿ ಫೋಟೋ ಹಳೆಯದಾಗಿದ್ದರೆ ಅಥವಾ ಹೆಸರು/ವಿಳಾಸ ಬದಲಾಗಿದ್ದರೆ ತಕ್ಷಣ ಹತ್ತಿರದ ಆಧಾರ್ ಕೇಂದ್ರಕ್ಕೆ (Aadhaar Seva Kendra) ಭೇಟಿ ನೀಡಿ ನವೀಕರಿಸಿ.
- ಬ್ಯಾಂಕಿನಿಂದ ಕೆವೈಸಿ ಅಪ್ಡೇಟ್ ಮಾಡಲು ಎಸ್ಎಂಎಸ್ ಅಥವಾ ಇ-ಮೇಲ್ ಬಂದರೆ ನಿರ್ಲಕ್ಷಿಸಬೇಡಿ. ಬ್ಯಾಂಕ್ ಆ್ಯಪ್ ಮೂಲಕ ಅಥವಾ ನೇರವಾಗಿ ಶಾಖೆಗೆ ಹೋಗಿ ಹೊಸ ಆಧಾರ್ ಪ್ರತಿ ನೀಡಿ ಕೆವೈಸಿ ಪೂರ್ಣಗೊಳಿಸಿ.
- ಒಂದು ವೇಳೆ ನಿಮ್ಮ ಖಾತೆ ಈಗಾಗಲೇ ಫ್ರೀಜ್ ಆಗಿದ್ದರೆ, ಗಾಬರಿಯಾಗುವ ಅಗತ್ಯವಿಲ್ಲ. ಸರಿಯಾದ ವಿವರಗಳಿರುವ ಆಧಾರ್ ಕಾರ್ಡ್ ಮತ್ತು ಕೆವೈಸಿ ಫಾರ್ಮ್ ಅನ್ನು ನಿಮ್ಮ ಬ್ಯಾಂಕ್ ಶಾಖೆಗೆ ಸಲ್ಲಿಸಿದರೆ 24 ರಿಂದ 48 ಗಂಟೆಗಳ ಒಳಗಾಗಿ ಖಾತೆ ಮತ್ತೆ ಸಕ್ರಿಯಗೊಳ್ಳುತ್ತದೆ.
ಇದನ್ನೂ ಓದಿ : ಟಾಟಾ ಟಿಯಾಗೊ, ಟಿಯಾಗೊ ಇವಿ ಫೇಸ್ಲಿಫ್ಟ್ ಅನಾವರಣ : ಹೊಸ ಫೀಚರ್ಸ್ನೊಂದಿಗೆ ಮಾರುಕಟ್ಟೆಗೆ ಲಗ್ಗೆ!
