ನವದೆಹಲಿ : ಇಲ್ಲಿ ಗುರುವಾರ ನಡೆದ ಬಹುನಿರೀಕ್ಷಿತ ‘ಸ್ನಾಪ್ಡ್ರ್ಯಾಗನ್ ಫಾರ್ ಇಂಡಿಯಾ’ (Snapdragon for India) ಕಾರ್ಯಕ್ರಮದಲ್ಲಿ ಕ್ವಾಲ್ಕಾಮ್ ಸಂಸ್ಥೆಯು ಸ್ಮಾರ್ಟ್ಫೋನ್ ಪ್ರಿಯರಿಗೆ ಭರ್ಜರಿ ಸುದ್ದಿಯೊಂದನ್ನು ನೀಡಿದೆ. ಮಧ್ಯಮ ಕ್ರಮಾಂಕದ (Mid-range) ಹಾಗೂ ಕೈಗೆಟಕುವ ದರದ (Affordable) ಸ್ಮಾರ್ಟ್ಫೋನ್ಗಳಿಗಾಗಿಯೇ ವಿನ್ಯಾಸಗೊಳಿಸಲಾದ ಎರಡು ಹೊಸ ಮೊಬೈಲ್ ಪ್ರೊಸೆಸರ್ಗಳಾದ ಸ್ನಾಪ್ಡ್ರ್ಯಾಗನ್ 6 ಜನ್ 5 (Snapdragon 6 Gen 5) ಮತ್ತು ಸ್ನಾಪ್ಡ್ರ್ಯಾಗನ್ 4 ಜನ್ 5 (Snapdragon 4 Gen 5) ಚಿಪ್ಸೆಟ್ಗಳನ್ನು ಮಾರುಕಟ್ಟೆಗೆ ಅಧಿಕೃತವಾಗಿ ಪರಿಚಯಿಸಿದೆ.
ಹೊಸ ‘ಸ್ನಾಪ್ಡ್ರ್ಯಾಗನ್ ಸ್ಮೂತ್ ಮೋಷನ್ ಯುಐ’ (Snapdragon Smooth Motion UI) ತಂತ್ರಜ್ಞಾನದೊಂದಿಗೆ ಬಿಡುಗಡೆಯಾಗಿರುವ ಈ ಎರಡೂ ಪ್ರೊಸೆಸರ್ಗಳು, ಮೊಬೈಲ್ ಬಳಕೆದಾರರಿಗೆ ಸುಗಮ ನ್ಯಾವಿಗೇಷನ್, ಅತ್ಯುತ್ತಮ ಗೇಮಿಂಗ್ ಮತ್ತು ಕ್ಯಾಮೆರಾ ಕಾರ್ಯಕ್ಷಮತೆಯನ್ನು ಒದಗಿಸುವ ಭರವಸೆ ನೀಡಿವೆ.
ಸ್ನಾಪ್ಡ್ರ್ಯಾಗನ್ 6 ಜನ್ 5: ವೇಗ ಮತ್ತು ಗೇಮಿಂಗ್ಗೆ ಹೇಳಿಮಾಡಿಸಿದ ಪ್ರೊಸೆಸರ್
ಸ್ನಾಪ್ಡ್ರ್ಯಾಗನ್ 6-ಸರಣಿಯಲ್ಲಿ ಹಲವು ಪ್ರಥಮಗಳನ್ನು ಪರಿಚಯಿಸಿರುವ ಈ ಹೊಸ 6 ಜನ್ 5 ಚಿಪ್ಸೆಟ್ ಅನ್ನು 4-ನ್ಯಾನೋಮೀಟರ್ ತಂತ್ರಜ್ಞಾನದಡಿ ನಿರ್ಮಿಸಲಾಗಿದೆ. ಆಕ್ಟಾ-ಕೋರ್ ಕ್ವಾಲ್ಕಾಮ್ ಕ್ರಯೋ ಸಿಪಿಯುನೊಂದಿಗೆ (Octa-core Kryo CPU) ಬರುವ ಇದು, 2.6GHz ವರೆಗಿನ ಗರಿಷ್ಠ ವೇಗವನ್ನು ನೀಡಬಲ್ಲ ನಾಲ್ಕು ಪರ್ಫಾರ್ಮೆನ್ಸ್ ಕೋರ್ಗಳು ಹಾಗೂ 2.0GHz ವೇಗದ ನಾಲ್ಕು ಎಫಿಶಿಯನ್ಸಿ ಕೋರ್ಗಳನ್ನು ಹೊಂದಿದೆ. ಹೊಸ ತಂತ್ರಜ್ಞಾನದ ಅಳವಡಿಕೆಯಿಂದಾಗಿ ಅಪ್ಲಿಕೇಶನ್ಗಳು ಶೇಕಡಾ 20ರಷ್ಟು ವೇಗವಾಗಿ ತೆರೆದುಕೊಳ್ಳಲಿದ್ದು, ಸ್ಕ್ರೀನ್ ಸ್ಟಟರ್ (Screen stutter) ಪ್ರಮಾಣ ಶೇಕಡಾ 18ರಷ್ಟು ಕಡಿಮೆಯಾಗಲಿದೆ.
ಹಾಗೆಯೇ ಹಿಂದಿನ ಆವೃತ್ತಿಗಿಂತ ಶೇಕಡಾ 21ರಷ್ಟು ಸುಧಾರಿತ ಜಿಪಿಯು ಕಾರ್ಯಕ್ಷಮತೆ ಇದರಲ್ಲಿದೆ. ಗೇಮಿಂಗ್ ಪ್ರಿಯರಿಗಾಗಿ ಕ್ವಾಲ್ಕಾಮ್ ಅಡಾಪ್ಟಿವ್ ಪರ್ಫಾರ್ಮೆನ್ಸ್ ಎಂಜಿನ್ 3.0, ಗೇಮ್ ಸೂಪರ್ ರೆಸಲ್ಯೂಶನ್ ಹಾಗೂ ಎಫ್ಪಿಎಸ್ 3.0 ತಂತ್ರಜ್ಞಾನಗಳನ್ನು ಅಳವಡಿಸಲಾಗಿದ್ದು, 16GB ವರೆಗಿನ LPDDR5 RAM ಹಾಗೂ 144Hz ರಿಫ್ರೆಶ್ ರೇಟ್ ಡಿಸ್ಪ್ಲೇಯೊಂದಿಗೆ ಅತ್ಯುತ್ತಮ ಫ್ರೇಮ್ ರೇಟ್ಸ್ ಹಾಗೂ ಬ್ಯಾಟರಿ ಉಳಿತಾಯವನ್ನು ಇದು ಖಚಿತಪಡಿಸುತ್ತದೆ.
ಅತ್ಯಾಧುನಿಕ ಕ್ಯಾಮೆರಾ ಹಾಗೂ ಕನೆಕ್ಟಿವಿಟಿ ಸೌಲಭ್ಯ
ಸ್ನಾಪ್ಡ್ರ್ಯಾಗನ್ 6 ಜನ್ 5 ಪ್ರೊಸೆಸರ್ ಕ್ಯಾಮೆರಾ ಹಾಗೂ ಕನೆಕ್ಟಿವಿಟಿ ವಿಭಾಗದಲ್ಲೂ ಭಾರಿ ಸುಧಾರಣೆಗಳನ್ನು ಕಂಡಿದೆ. ಇದು ಬರೋಬ್ಬರಿ 200 ಮೆಗಾಪಿಕ್ಸೆಲ್ ರೆಸಲ್ಯೂಶನ್ನ ಕ್ಯಾಮೆರಾ ಸೆನ್ಸರ್ಗಳನ್ನು ಬೆಂಬಲಿಸಲಿದ್ದು, 30fps ದರದಲ್ಲಿ 4K HDR ವಿಡಿಯೋ ಚಿತ್ರೀಕರಣ ಮಾಡಲು ಅನುವು ಮಾಡಿಕೊಡುತ್ತದೆ. ರಾತ್ರಿ ವೇಳೆ ಅತ್ಯುತ್ತಮ ಫೋಟೋಗಳನ್ನು ಸೆರೆಹಿಡಿಯಲು ಎಐ ಆಧಾರಿತ ನೈಟ್ ವಿಷನ್ (Night Vision) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಇದರ ಜೊತೆಗೆ ವೈ-ಫೈ 7, ಬ್ಲೂಟೂತ್ 6.0 ಹಾಗೂ ಗರಿಷ್ಠ 2.8Gbps ಡೌನ್ಲೋಡ್ ವೇಗವನ್ನು ನೀಡಬಲ್ಲ ರಿಲೀಸ್ 17 5G ಕನೆಕ್ಟಿವಿಟಿಯನ್ನು ಇದು ಬೆಂಬಲಿಸುತ್ತದೆ. ಮುಂಬರುವ ದಿನಗಳಲ್ಲಿ ರೆಡ್ಮಿ ಮತ್ತು ಹಾನರ್ನಂತಹ ಬ್ರ್ಯಾಂಡ್ಗಳು ಈ ಪ್ರೊಸೆಸರ್ ಅನ್ನು ತಮ್ಮ ಮುಂಬರುವ ಫೋನ್ಗಳಲ್ಲಿ ಬಳಸಲಿವೆ ಎಂದು ಕ್ವಾಲ್ಕಾಮ್ ಸ್ಪಷ್ಟಪಡಿಸಿದೆ.
ಸ್ನಾಪ್ಡ್ರ್ಯಾಗನ್ 4 ಜನ್ 5: ಬಜೆಟ್ ಫೋನ್ಗಳಿಗೆ ಕ್ರಾಂತಿಕಾರಿ ಬದಲಾವಣೆ
ಕಡಿಮೆ ಬೆಲೆಯ ಸ್ಮಾರ್ಟ್ಫೋನ್ಗಳ ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಬಿಡುಗಡೆಯಾಗಿರುವ ಸ್ನಾಪ್ಡ್ರ್ಯಾಗನ್ 4 ಜನ್ 5 ಚಿಪ್ಸೆಟ್ ಕೂಡ 4nm ಪ್ರಕ್ರಿಯೆಯಲ್ಲಿಯೇ ತಯಾರಾಗಿದೆ. ಇದರಲ್ಲಿ 2.4GHz ವೇಗದ ಎರಡು ಪರ್ಫಾರ್ಮೆನ್ಸ್ ಕೋರ್ಗಳು ಮತ್ತು 2.0GHz ವೇಗದ ಆರು ಎಫಿಶಿಯನ್ಸಿ ಕೋರ್ಗಳಿವೆ. ಹಿಂದಿನ ತಲೆಮಾರಿನ ಪ್ರೊಸೆಸರ್ಗೆ ಹೋಲಿಸಿದರೆ ಇದರಲ್ಲಿ ಶೇಕಡಾ 43ರಷ್ಟು ವೇಗದ ಆ್ಯಪ್ ಲಾಂಚ್, ಶೇಕಡಾ 25ರಷ್ಟು ಕಡಿಮೆ ಸ್ಕ್ರೀನ್ ಸ್ಟಟರ್ ಹಾಗೂ ಭರ್ಜರಿ 77ರಷ್ಟು ಸುಧಾರಿತ ಜಿಪಿಯು ಕಾರ್ಯಕ್ಷಮತೆಯನ್ನು ಕಾಣಬಹುದು ಎಂದು ಕಂಪನಿ ಹೇಳಿಕೊಂಡಿದೆ. ಈ ಸರಣಿಯಲ್ಲಿ ಇದೇ ಮೊದಲ ಬಾರಿಗೆ 90fps ಗೇಮಿಂಗ್ ಹಾಗೂ 144Hz ರಿಫ್ರೆಶ್ ರೇಟ್ ಹೊಂದಿರುವ FHD+ ಡಿಸ್ಪ್ಲೇಗಳಿಗೆ ಬೆಂಬಲವನ್ನು ನೀಡುವ ಮೂಲಕ ಬಜೆಟ್ ಫೋನ್ಗಳಲ್ಲಿ ಕ್ರಾಂತಿಕಾರಿ ಬದಲಾವಣೆಗೆ ನಾಂದಿ ಹಾಡಿದೆ.
4 ಜನ್ 5 ಕ್ಯಾಮೆರಾ ಸಾಮರ್ಥ್ಯ ಮತ್ತು ಲಭ್ಯತೆ
ಕ್ಯಾಮೆರಾ ವಿಭಾಗದಲ್ಲಿ ಸ್ನಾಪ್ಡ್ರ್ಯಾಗನ್ 4 ಜನ್ 5 ಪ್ರೊಸೆಸರ್ ಗರಿಷ್ಠ 108 ಮೆಗಾಪಿಕ್ಸೆಲ್ ಸೆನ್ಸಾರ್ ಹಾಗೂ ಶೂನ್ಯ ಶಟರ್ ಲ್ಯಾಗ್ನೊಂದಿಗೆ (Zero shutter lag) 16 ಮೆಗಾಪಿಕ್ಸೆಲ್ನ ಡ್ಯುಯಲ್ ಕ್ಯಾಮೆರಾ ಸೆಟಪ್ ಅನ್ನು ಬೆಂಬಲಿಸುತ್ತದೆ. ಇಂಟೆಲಿಜೆಂಟ್ ಫೇಸ್ ಡಿಟೆಕ್ಷನ್, ಆಟೋಫೋಕಸ್ ಮತ್ತು ಎಲೆಕ್ಟ್ರಾನಿಕ್ ಇಮೇಜ್ ಸ್ಟೆಬಿಲೈಸೇಶನ್ (EIS) ನಂತಹ ಅತ್ಯಾಧುನಿಕ ಫೀಚರ್ಗಳನ್ನು ಇದು ಒಳಗೊಂಡಿದೆ. ಕನೆಕ್ಟಿವಿಟಿ ವಿಚಾರದಲ್ಲಿ ಇದು ಡ್ಯುಯಲ್ ಸಿಮ್ ಡ್ಯುಯಲ್ ಆಕ್ಟಿವ್ (DSDA) 5G ಬೆಂಬಲ, ವೈ-ಫೈ 5 ಮತ್ತು ಬ್ಲೂಟೂತ್ 5.1 ತಂತ್ರಜ್ಞಾನಗಳನ್ನು ಹೊಂದಿದೆ. ಶೀಘ್ರದಲ್ಲೇ ಒಪ್ಪೋ (Oppo), ರಿಯಲ್ಮಿ (Realme) ಮತ್ತು ರೆಡ್ಮಿ (Redmi) ಬ್ರ್ಯಾಂಡ್ಗಳ ಬಜೆಟ್ ಸ್ಮಾರ್ಟ್ಫೋನ್ಗಳು ಈ ಹೊಸ ಪ್ರೊಸೆಸರ್ನೊಂದಿಗೆ ಮಾರುಕಟ್ಟೆಗೆ ಲಗ್ಗೆಯಿಡಲಿವೆ.
ಇದನ್ನೂ ಓದಿ ; ಯಡಿಯೂರಪ್ಪ ಅಭಿಮಾನೋತ್ಸವಕ್ಕೆ ಕಮಲ ಪಡೆಯಲ್ಲೇ ಭಾರಿ ವಿರೋಧ!
