ವಾಷಿಂಗ್ಟನ್ : ಅಮೆರಿಕ-ಇರಾನ್ ನಡುವಿನ ಯುದ್ಧದ ಅನಿಶ್ಚಿತತೆ ಮುಂದುವರಿದಿರುವಂತೆಯೇ, ಇರಾನ್ ಸಲ್ಲಿಸಿರುವ ಹೊಸ ಶಾಂತಿ ಪ್ರಸ್ತಾವನೆಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಾರಾಸಗಟಾಗಿ ತಿರಸ್ಕರಿಸಿದ್ದಾರೆ. “ಹುಚ್ಚರ ಕೈಗೆ ಪರಮಾಣು ಅಸ್ತ್ರಗಳು ಸಿಗಲು ನಾವು ಬಿಡುವುದಿಲ್ಲ, ಅದಕ್ಕಾಗಿಯೇ ನಾವು ಇರಾನ್ ವಿರುದ್ಧ ಸಮರ ಸಾರಿದ್ದೇವೆ” ಎಂದು ಟ್ರಂಪ್ ಗುಡುಗಿದ್ದಾರೆ. ಇರಾನ್ನ ಪರಮಾಣು ಮಹತ್ವಾಕಾಂಕ್ಷೆಯನ್ನು ತಡೆಯುವುದು ಅಮೆರಿಕದ ಮೊದಲ ಆದ್ಯತೆಯಾಗಿದ್ದು, ಈ ವಿಷಯದಲ್ಲಿ ಯಾವುದೇ ರಾಜಿ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಪಾಕಿಸ್ತಾನದ ಮಧ್ಯಸ್ಥಿಕೆಯ ಮೂಲಕ ಇರಾನ್ ಸರ್ಕಾರವು ಅಮೆರಿಕಕ್ಕೆ ಹೊಸ ಸಂಧಾನದ ಪ್ರಸ್ತಾವನೆಯನ್ನು ರವಾನಿಸಿತ್ತು. ಆದರೆ ಫ್ಲೋರಿಡಾದಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಟ್ರಂಪ್, “ಅವರು ಒಪ್ಪಂದ ಮಾಡಿಕೊಳ್ಳಲು ಉತ್ಸುಕರಾಗಿದ್ದಾರೆ, ಆದರೆ ಅವರ ಪ್ರಸ್ತಾವನೆ ನನಗೆ ತೃಪ್ತಿ ನೀಡಿಲ್ಲ” ಎಂದು ಹೇಳಿದ್ದಾರೆ. ಇರಾನ್ ಕೆಲವು ಅಸಮರ್ಥನೀಯ ರಿಯಾಯಿತಿಗಳನ್ನು ಕೋರುತ್ತಿದೆ ಮತ್ತು ಅಲ್ಲಿನ ನಾಯಕತ್ವವು ಗೊಂದಲದ ಗೂಡಾಗಿದೆ ಎಂದು ಅವರು ಲೇವಡಿ ಮಾಡಿದ್ದಾರೆ. ಕಳೆದ ಮೂರು ವಾರಗಳಿಂದ ಕದನ ವಿರಾಮ ಜಾರಿಯಲ್ಲಿದ್ದರೂ, ಯುದ್ಧದ ಭೀತಿ ಮಾತ್ರ ಇನ್ನೂ ದೂರವಾಗಿಲ್ಲ.
ಸೇನಾ ಕ್ರಮದ ಎಚ್ಚರಿಕೆ
ಇರಾನ್ ವಿರುದ್ಧದ ಸಂಘರ್ಷವು ಸದ್ಯಕ್ಕೆ ಕೊನೆಗೊಂಡಿದೆ ಎಂದು ಶ್ವೇತಭವನವು ಕಾಂಗ್ರೆಸ್ಗೆ ತಿಳಿಸಿದ್ದರೂ, ಈ ಪ್ರದೇಶದಲ್ಲಿ ಅಮೆರಿಕದ ಸೈನ್ಯವು ಹದ್ದಿನ ಕಣ್ಣಿಟ್ಟಿದೆ. “ನಮಗೆ ಅವರನ್ನು ಸಂಪೂರ್ಣವಾಗಿ ನಾಶಪಡಿಸುವ ಶಕ್ತಿಯಿದೆ, ಆದರೆ ಮಾನವೀಯತೆಯ ದೃಷ್ಟಿಯಿಂದ ನಾನು ಶಾಂತಿಯುತ ಒಪ್ಪಂದಕ್ಕೆ ಆದ್ಯತೆ ನೀಡುತ್ತೇನೆ” ಎಂದು ಟ್ರಂಪ್ ಹೇಳಿದ್ದಾರೆ. ಆದರೆ, ಇರಾನ್ ತನ್ನ ಯುರೇನಿಯಂ ಪುಷ್ಟೀಕರಣದ ಹಕ್ಕನ್ನು ಪ್ರತಿಪಾದಿಸುತ್ತಿದ್ದು, ಅಮೆರಿಕ ತನ್ನ ಬೆದರಿಕೆಯ ತಂತ್ರವನ್ನು ಕೈಬಿಟ್ಟರೆ ಮಾತ್ರ ರಾಜತಾಂತ್ರಿಕ ಮಾತುಕತೆ ಸಾಧ್ಯ ಎಂದು ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ ಎಚ್ಚರಿಸಿದ್ದಾರೆ.
ಕ್ಯೂಬಾ ವಿಚಾರದಲ್ಲೂ ಟ್ರಂಪ್ ಗುಡುಗು
ಇರಾನ್ ಸಂಘರ್ಷದ ನಡುವೆಯೇ ಟ್ರಂಪ್ ಕ್ಯೂಬಾ ದೇಶದ ಬಗ್ಗೆಯೂ ಕಿಡಿಕಾರಿದ್ದಾರೆ. “ಇರಾನ್ನಿಂದ ಹಿಂದಿರುಗುವ ಹಾದಿಯಲ್ಲಿ ನಮ್ಮ ಬೃಹತ್ ವಿಮಾನವಾಹಕ ನೌಕೆ ‘ಯುಎಸ್ಎಸ್ ಅಬ್ರಹಾಂ ಲಿಂಕನ್’ ಕ್ಯೂಬಾದ ಸಮುದ್ರ ತೀರದಲ್ಲಿ ನಿಲ್ಲಲಿದೆ. ಆಗ ಅವರು ಭಯದಿಂದ ಶರಣಾಗುತ್ತಾರೆ” ಎಂದು ಟ್ರಂಪ್ ಲೇವಡಿ ಮಾಡಿದ್ದಾರೆ. ಕ್ಯೂಬಾ ಸರ್ಕಾರವು ಆಡಳಿತಾತ್ಮಕ ಸುಧಾರಣೆಗಳನ್ನು ತರಬೇಕೆಂದು ಒತ್ತಾಯಿಸುತ್ತಿರುವ ಅಮೆರಿಕ, ಅಲ್ಲಿಯೂ ಸೇನಾ ಕ್ರಮ ಕೈಗೊಳ್ಳುವ ಸೂಚನೆಯನ್ನು ನೀಡಿದೆ. ಒಟ್ಟಾರೆಯಾಗಿ, ಟ್ರಂಪ್ ಅವರ ಈ ನಡೆಗಳು ಜಾಗತಿಕ ರಾಜಕೀಯದಲ್ಲಿ ಸಂಚಲನ ಮೂಡಿಸಿವೆ.
ಇದನ್ನೂ ಓದಿ : 8ನೇ ವೇತನ ಆಯೋಗ : ಸಲಹೆ, ಸೂಚನೆ ನೀಡುವ ದಿನಾಂಕ ವಿಸ್ತರಣೆ.. ಇಲ್ಲಿದೆ ಹೊಸ ಅಪ್ಡೇಟ್!
