ಡೆಲ್ಲಿ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026 ರ ರೋಚಕ ಘಟ್ಟದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ (DC) ತಂಡದ ಸತತ ಕಳಪೆ ಫಾರ್ಮ್ ಮುಂದುವರಿದಿದೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ವಿರುದ್ಧದ ಪಂದ್ಯದಲ್ಲಿ ತವರಿನಲ್ಲೇ ಅಕ್ಷರ್ ಪಟೇಲ್ ಪಡೆ ಮಕಾಡೆ ಮಲಗಿದೆ. ಈ ಸತತ ಸೋಲುಗಳಿಂದ ಕಂಗೆಟ್ಟಿರುವ ನಾಯಕ ಅಕ್ಷರ್ ಪಟೇಲ್, “ತಂಡದಲ್ಲಿ ದಿಢೀರ್ ಆಗಿ ಏನಾಗುತ್ತಿದೆ ಎಂಬುದೇ ನನಗೆ ಅರ್ಥವಾಗುತ್ತಿಲ್ಲ” ಎಂದು ತೀವ್ರ ನಿರಾಸೆ ವ್ಯಕ್ತಪಡಿಸಿದ್ದಾರೆ.
ನವದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಬ್ಯಾಟರ್ಗಳು ಆರ್ ಸಿ ಬಿ ಬೌಲಿಂಗ್ ದಾಳಿಗೆ ಸಂಪೂರ್ಣ ಶರಣಾದರು. ಜೋಶ್ ಹೇಜಲ್ವುಡ್ ಮತ್ತು ಭುವನೇಶ್ವರ್ ಕುಮಾರ್ ಅವರ ಅಸಾಧಾರಣ ಬೌಲಿಂಗ್ ಸ್ಪೆಲ್ಗೆ ನಲುಗಿದ ಡೆಲ್ಲಿ ಕೇವಲ 75 ರನ್ಗಳಿಗೆ ಸರ್ವಪತನ ಕಂಡಿತು. ಈ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಆರ್ ಸಿ ಬಿ, ಕೇವಲ 6.3 ಓವರ್ಗಳಲ್ಲಿ ಮಕ್ಕಳಾಟದಂತೆ ಗುರಿ ತಲುಪಿ ಭರ್ಜರಿ ಜಯ ಸಾಧಿಸಿತು. ಈ ಆಘಾತಕಾರಿ ಸೋಲು ಡೆಲ್ಲಿ ತಂಡದ ಬ್ಯಾಟಿಂಗ್ ವೈಫಲ್ಯವನ್ನು ಎತ್ತಿ ತೋರಿಸಿದೆ.
ನನಗೇನು ಅರ್ಥವಾಗುತ್ತಿಲ್ಲ ಎಂದ ನಾಯಕ ಅಕ್ಷರ್ ಪಟೇಲ್:
ಪಂದ್ಯದ ನಂತರದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ನಾಯಕ ಅಕ್ಷರ್ ಪಟೇಲ್, ತಂಡದ ಈ ದಿಢೀರ್ ಕುಸಿತದ ಬಗ್ಗೆ ಅಚ್ಚರಿ ಹಾಗೂ ಅಸಹಾಯಕತೆ ವ್ಯಕ್ತಪಡಿಸಿದರು. “ನಿಜ ಹೇಳಬೇಕೆಂದರೆ ಏನಾಯಿತು ಎಂದು ನನಗೇ ತಿಳಿದಿಲ್ಲ. ಕ್ರಿಕೆಟ್ನಲ್ಲಿ ನಾವು ಯಾವಾಗಲೂ ಎಚ್ಚರದಿಂದಿರಬೇಕು ಹಾಗೂ ಲಯ ಕಂಡುಕೊಳ್ಳಬೇಕು. ಈ ಸೋಲುಗಳನ್ನು ಮರೆತು ನಾವು ಮುಂದಿನ ಪಂದ್ಯಗಳತ್ತ ಗಮನ ಹರಿಸಬೇಕಿದೆ” ಎಂದು ಹೇಳಿದ್ದಾರೆ.
“ನಾವು ಹಳೆಯ ಪಂದ್ಯಗಳ ಬಗ್ಗೆ ‘ಹೀಗಾಗಿದ್ದರೆ, ಹಾಗಾಗಿದ್ದರೆ’ ಎಂದು ಯೋಚಿಸುತ್ತಾ ಕೂರಬಹುದು. ಪಂಜಾಬ್ ವಿರುದ್ಧದ ಪಂದ್ಯದಲ್ಲಿ ಒಂದು ಕ್ಯಾಚ್ ಹಿಡಿದಿದ್ದರೆ ಅಥವಾ ಗುಜರಾತ್ ಟೈಟನ್ಸ್ (GT) ವಿರುದ್ಧದ ಪಂದ್ಯದಲ್ಲಿ ಇನ್ನೊಂದು ರನ್ ಹೆಚ್ಚು ಗಳಿಸಿದ್ದರೆ ನಮ್ಮ ಗೆಲುವಿನ ಓಟ ಮುಂದುವರಿಯುತ್ತಿತ್ತೇನೋ.
ಆದರೆ ವಾಸ್ತವವೆಂದರೆ ನೀವು ಐಪಿಎಲ್ನಂತಹ ಕಠಿಣ ಟೂರ್ನಿಯಲ್ಲಿ ಯಾವುದನ್ನೂ ಸುಲಭವಾಗಿ ತೆಗೆದುಕೊಳ್ಳುವಂತಿಲ್ಲ. ಇಲ್ಲಿ ಸ್ಥಿರವಾದ ಪ್ರದರ್ಶನ ಅತ್ಯಗತ್ಯ. ಹಿಂದಿನದ್ದನ್ನೇ ಯೋಚಿಸುತ್ತಾ ಭವಿಷ್ಯವನ್ನು ಹಾಳು ಮಾಡಿಕೊಳ್ಳಲು ಸಾಧ್ಯವಿಲ್ಲ” ಎಂದು ಅವರು ತಂಡದ ತಪ್ಪುಗಳನ್ನು ಪರೋಕ್ಷವಾಗಿ ಒಪ್ಪಿಕೊಂಡರು.
ಬೃಹತ್ ಮೊತ್ತದ ಸೋಲಿನ ಬಳಿಕ ಕುಗ್ಗಿದ ಆತ್ಮವಿಶ್ವಾಸ:
ಆರ್ ಸಿ ಬಿ ವಿರುದ್ಧದ ಈ ಪಂದ್ಯಕ್ಕೂ ಮೊದಲು ಪಂಜಾಬ್ ಕಿಂಗ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಡೆಲ್ಲಿ ತಂಡ ಐಪಿಎಲ್ ಇತಿಹಾಸದ ಬೃಹತ್ ಮೊತ್ತಗಳಲ್ಲಿ ಒಂದಾದ 264 ರನ್ ಗಳಿಸಿತ್ತು. ಆದರೆ, ಡೆಲ್ಲಿಯ ಬೌಲಿಂಗ್ ವೈಫಲ್ಯದಿಂದಾಗಿ ಪಂಜಾಬ್ ಕಿಂಗ್ಸ್ ಬ್ಯಾಟರ್ಗಳು ಆ ಬೃಹತ್ ಗುರಿಯನ್ನು ಕೇವಲ 18.5 ಓವರ್ಗಳಲ್ಲಿ ಬೆನ್ನಟ್ಟಿ ಗೆಲುವು ಸಾಧಿಸಿದ್ದರು. ಅಂತಹ ಬೃಹತ್ ಮೊತ್ತವನ್ನು ರಕ್ಷಿಸಿಕೊಳ್ಳಲಾಗದ ಹತಾಶೆ ಹಾಗೂ ಈಗ ಆರ್ ಸಿ ಬಿ ವಿರುದ್ಧದ ಅಲ್ಪ ಮೊತ್ತದ ಹೀನಾಯ ಸೋಲು ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪ್ಲೇಆಫ್ ಹಾದಿಯನ್ನು ಕಠಿಣಗೊಳಿಸಿವೆ. ಟೂರ್ನಿಯ ಮಧ್ಯಭಾಗದಲ್ಲಿ ಸಂಪೂರ್ಣವಾಗಿ ಲಯ ಕಳೆದುಕೊಂಡಿರುವ ಡೆಲ್ಲಿ ಕ್ಯಾಪಿಟಲ್ಸ್, ಈ ಆಘಾತದಿಂದ ಹೇಗೆ ಪುಟಿದೇಳಲಿದೆ ಕಾದು ನೋಡಬೇಕಿದೆ.
ಇದನ್ನೂ ಓದಿ : ಡೆಲ್ಲಿ-ಪಂಜಾಬ್ ಪಂದ್ಯದಲ್ಲಿ ಕಳಪೆ ಫೀಲ್ಡಿಂಗ್, ಕೈಚೆಲ್ಲಿದ ಕ್ಯಾಚ್ಗಳು ; ಆಟಗಾರರನ್ನು ಕಾಡುತ್ತಿದೆಯೇ ಆಯಾಸ?
