ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ವೇದಿಕೆಯಲ್ಲಿ ವಿಶ್ವದ ಅತ್ಯುತ್ತಮ ಬೌಲರ್ ಹಾಗೂ ಬ್ಯಾಟರ್ಗಳ ನಡುವಿನ ಕಾದಾಟವು ಸದಾ ಕುತೂಹಲ ಕೆರಳಿಸುತ್ತದೆ. ಐಪಿಎಲ್ 2026ರ ಋತುವಿನಲ್ಲಿ ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್) ತಂಡವನ್ನು ಪ್ರತಿನಿಧಿಸುತ್ತಿರುವ ದಕ್ಷಿಣ ಆಫ್ರಿಕಾದ ಸ್ಟಾರ್ ವೇಗದ ಬೌಲಿಂಗ್ ಆಲ್ರೌಂಡರ್ ಮಾರ್ಕೊ ಜಾನ್ಸೆನ್, ಇದೀಗ ಟಿ20 ಸ್ವರೂಪದಲ್ಲಿ ತಮಗೆ ಬೌಲ್ ಮಾಡಲು ಅತ್ಯಂತ ಕಠಿಣ ಎನಿಸಿದ ಬ್ಯಾಟರ್ಗಳ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ.
ಅಚ್ಚರಿಯ ವಿಚಾರವೆಂದರೆ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ದಿಗ್ಗಜ ಹಾಗೂ ರನ್ ಮಷಿನ್ ವಿರಾಟ್ ಕೊಹ್ಲಿ ಅವರ ಹೆಸರನ್ನು ಕೈಬಿಟ್ಟಿರುವ ಜಾನ್ಸೆನ್, ಸನ್ ರೈಸರ್ಸ್ ಹೈದರಾಬಾದ್ನ ಇಬ್ಬರು ಸ್ಫೋಟಕ ಓಪನರ್ಗಳೇ ಬೌಲರ್ಗಳ ಪಾಲಿನ ಸಿಂಹಸ್ವಪ್ನ ಎಂದು ಬಣ್ಣಿಸಿದ್ದಾರೆ.
ಜಾನ್ಸೆನ್ ಪಾಲಿಗೆ ಅತಿ ಕಠಿಣ ಬ್ಯಾಟರ್ಗಳು ಯಾರು?
ಚುಟುಕು ಕ್ರಿಕೆಟ್ನಲ್ಲಿ ಯಾವ ಬ್ಯಾಟರ್ಗೆ ಬೌಲ್ ಮಾಡುವುದು ಅತ್ಯಂತ ಸವಾಲಿನ ಕೆಲಸ ಎಂಬ ಪ್ರಶ್ನೆಗೆ ಮಾರ್ಕೊ ಜಾನ್ಸೆನ್ ಅನಿರೀಕ್ಷಿತ ಉತ್ತರ ನೀಡಿದ್ದಾರೆ. ಸನ್ರೈಸರ್ಸ್ ಹೈದರಾಬಾದ್ ತಂಡದ ಆರಂಭಿಕ ಜೋಡಿಯಾದ ಭಾರತದ ಯುವ ಸ್ಪೋಟಕ ಆಟಗಾರ ಅಭಿಷೇಕ್ ಶರ್ಮಾ ಹಾಗೂ ಆಸ್ಟ್ರೇಲಿಯಾದ ಸ್ಟಾರ್ ಬ್ಯಾಟರ್ ಟ್ರಾವಿಸ್ ಹೆಡ್ ಅವರೇ ಅತ್ಯಂತ ಕಠಿಣ ಬ್ಯಾಟರ್ಗಳು ಎಂದು ಜಾನ್ಸೆನ್ ಹೇಳಿದ್ದಾರೆ. ಈ ಕುರಿತು ಮಾತನಾಡಿದ ಅವರು, “ನನಗೆ ಬೌಲ್ ಮಾಡಲು ಅತಿ ಕಷ್ಟಕರವಾದ ಬ್ಯಾಟರ್ಗಳೆಂದರೆ ಬಹುಶಃ ಅಭಿಷೇಕ್ ಶರ್ಮಾ ಮತ್ತು ಟ್ರಾವಿಸ್ ಹೆಡ್. ಪವರ್ಪ್ಲೇ ಓವರ್ಗಳಲ್ಲಿ ಅವರಿಬ್ಬರ ವಿರುದ್ಧ ಬೌಲಿಂಗ್ ಮಾಡುವುದು ತುಂಬಾ, ತುಂಬಾ ಕಷ್ಟ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಟಿ20 ಕ್ರಿಕೆಟ್ನಲ್ಲಿ ಯಾವುದೇ ಬ್ಯಾಟರ್ಗೆ ಬೌಲಿಂಗ್ ಮಾಡಲು ನಾನು ಎದುರುನೋಡುವುದಿಲ್ಲ” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ವಿರಾಟ್ ಕೊಹ್ಲಿ ಎದುರು ಆಡಲು ಇಷ್ಟಪಡುವ ಜಾನ್ಸೆನ್
ಅತ್ಯಂತ ಕಠಿಣ ಬ್ಯಾಟರ್ಗಳ ಪಟ್ಟಿಯಲ್ಲಿ ವಿರಾಟ್ ಕೊಹ್ಲಿ ಅವರ ಹೆಸರನ್ನು ಉಲ್ಲೇಖಿಸದಿದ್ದರೂ, ಆಧುನಿಕ ಕ್ರಿಕೆಟ್ನ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರಾಗಿರುವ ಕೊಹ್ಲಿ ವಿರುದ್ಧ ಬೌಲಿಂಗ್ ಮಾಡಲು ತಾವು ಇಷ್ಟಪಡುವುದಾಗಿ ಜಾನ್ಸೆನ್ ತಿಳಿಸಿದ್ದಾರೆ. “ನಾನು ಎದುರಿಸಲು ತುಂಬಾ ಆನಂದಿಸುವ ಆಟಗಾರನೆಂದರೆ ಅದು ಬಹುಶಃ ವಿರಾಟ್ ಕೊಹ್ಲಿ. ಅವರು ಈ ಟೂರ್ನಿಯ ಬಹುದೊಡ್ಡ ಆಟಗಾರರಲ್ಲಿ ಒಬ್ಬರು” ಎಂದು ಮಾರ್ಕೊ ಹೇಳುವ ಮೂಲಕ ಕೊಹ್ಲಿ ಮೇಲಿನ ತಮ್ಮ ಗೌರವವನ್ನು ವ್ಯಕ್ತಪಡಿಸಿದ್ದಾರೆ.
ಹದಿನೇಳರ ಹರೆಯದಲ್ಲೇ ನೆಟ್ಸ್ನಲ್ಲಿ ವಿರಾಟ್ ಕೊಹ್ಲಿಗೆ ಬೌಲಿಂಗ್ ಮಾಡಿ ಅಚ್ಚರಿ ಮೂಡಿಸಿದ್ದ ಜಾನ್ಸೆನ್, ಐಪಿಎಲ್ನಲ್ಲಿ ಕೊಹ್ಲಿ ವಿರುದ್ಧ ಸಾಧಾರಣ ದಾಖಲೆ ಹೊಂದಿದ್ದಾರೆ. ಐಪಿಎಲ್ ಮುಖಾಮುಖಿಗಳಲ್ಲಿ ಕೊಹ್ಲಿಯನ್ನು ಒಮ್ಮೆ ಔಟ್ ಮಾಡಿರುವ ಜಾನ್ಸೆನ್, ಅವರ ಸ್ಟ್ರೈಕ್ ರೇಟ್ ಅನ್ನು 137.50ಕ್ಕೆ ನಿಯಂತ್ರಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಒಟ್ಟಾರೆ ಟಿ20 ಮಾದರಿಯಲ್ಲಿ ಜಾನ್ಸೆನ್ ಎಸೆದ 19 ಎಸೆತಗಳನ್ನು ಎದುರಿಸಿರುವ ವಿರಾಟ್, 136.8ರ ಸ್ಟ್ರೈಕ್ ರೇಟ್ನಲ್ಲಿ ಕೇವಲ 26 ರನ್ ಗಳಿಸಿ ಒಂದು ಬಾರಿ ವಿಕೆಟ್ ಒಪ್ಪಿಸಿದ್ದಾರೆ.
ಆರ್ಸಿಬಿ ಮತ್ತು ಪಿಬಿಕೆಎಸ್ ನಡುವಿನ ಕಾದಾಟದ ನಿರೀಕ್ಷೆ
ಐಪಿಎಲ್ 2026ರ ಋತುವಿನಲ್ಲಿ ಶ್ರೇಯಸ್ ಅಯ್ಯರ್ ನಾಯಕತ್ವದ ಪಂಜಾಬ್ ಕಿಂಗ್ಸ್ ತಂಡವು ಈವರೆಗೆ ಅಜೇಯವಾಗಿ ಉಳಿದಿದ್ದು, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಮತ್ತೊಂದೆಡೆ, ರಜತ್ ಪಾಟಿದಾರ್ ಸಾರಥ್ಯದ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಪಾಯಿಂಟ್ಸ್ ಟೇಬಲ್ನಲ್ಲಿ ಎರಡನೇ ಸ್ಥಾನದಲ್ಲಿದ್ದು, ಮತ್ತೊಮ್ಮೆ ಪ್ಲೇ-ಆಫ್ಗೆ ಲಗ್ಗೆಯಿಡುವ ವಿಶ್ವಾಸದಲ್ಲಿದೆ. ಮೇ 17ರಂದು ಧರ್ಮಶಾಲಾದ ಎಚ್ಪಿಸಿಎ ಕ್ರೀಡಾಂಗಣದಲ್ಲಿ ನಡೆಯಲಿರುವ 61ನೇ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ಮತ್ತು ಆರ್ ಸಿಬಿ ತಂಡಗಳು ಮುಖಾಮುಖಿಯಾಗಲಿವೆ. ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಮಾರ್ಕೊ ಜಾನ್ಸೆನ್ ಮತ್ತು ವಿರಾಟ್ ಕೊಹ್ಲಿ ನಡುವಿನ ಕದನವನ್ನು ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.
ಇದನ್ನೂ ಓದಿ : ಮೊಬೈಲ್ ಕೊಡದಿದ್ದಕ್ಕೆ ಬಾಲಕ ಆತ್ಮಹತ್ಯೆ!
