ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ಯುವ ಆಟಗಾರ, ಇಂಗ್ಲೆಂಡ್ನ ಭರವಸೆಯ ಪ್ರತಿಭೆ ಜೇಕಬ್ ಬೆಥೆಲ್ ಸದ್ಯ ಐಪಿಎಲ್ 2026ರ ಆವೃತ್ತಿಯಲ್ಲಿ ಆಡುವ ಬಳಗದಲ್ಲಿ ಸ್ಥಾನ ಪಡೆಯದೆ ಬೆಂಚ್ ಕಾಯುತ್ತಿದ್ದಾರೆ.
ಟಿ20 ವಿಶ್ವಕಪ್ ಸೆಮಿಫೈನಲ್ನಲ್ಲಿ ಭಾರತದ ವಿರುದ್ಧ ಅಮೋಘ ಶತಕ ಸಿಡಿಸಿ ಮಿಂಚಿದ್ದ ಈ 22 ವರ್ಷದ ಎಡಗೈ ಬ್ಯಾಟರ್, ಇದೀಗ ಐಪಿಎಲ್ನಲ್ಲಿ ಕೇವಲ ಪ್ರೇಕ್ಷಕನಂತಾಗಿರುವುದು ಇಂಗ್ಲೆಂಡ್ನ ಮಾಜಿ ನಾಯಕ ಅಲೆಸ್ಟರ್ ಕುಕ್ ಅವರ ಅಸಮಾಧಾನಕ್ಕೆ ಕಾರಣವಾಗಿದೆ. ಐಪಿಎಲ್ನಲ್ಲಿ ಆಡದೆ ಸಮಯ ವ್ಯರ್ಥ ಮಾಡುವ ಬದಲು, ತಾಯ್ನಾಡಿಗೆ ಮರಳಿ ಕೌಂಟಿ ಚಾಂಪಿಯನ್ಷಿಪ್ನಲ್ಲಿ ಭಾಗವಹಿಸುವಂತೆ ಕುಕ್ ಅವರು ಜೇಕಬ್ ಬೆಥೆಲ್ಗೆ ಮಹತ್ವದ ಸಲಹೆ ನೀಡಿದ್ದಾರೆ.
ಐಪಿಎಲ್ನಲ್ಲಿ ಅವಕಾಶ ವಂಚಿತರಾದ ಇಂಗ್ಲೆಂಡ್ ಪ್ರತಿಭೆ
ಜೇಕಬ್ ಬೆಥೆಲ್ ಪ್ರಸ್ತುತ ಇಂಗ್ಲೆಂಡ್ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಚರ್ಚೆಗೊಳಗಾಗುತ್ತಿರುವ ಉದಯೋನ್ಮುಖ ತಾರೆ. ಕ್ರಿಕೆಟ್ನ ಎಲ್ಲಾ ಮಾದರಿಗಳಲ್ಲಿ ಶತಕ ಸಿಡಿಸಿದ ಇಂಗ್ಲೆಂಡ್ನ ಅತಿ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆ ಇವರದ್ದಾಗಿದೆ. ಆ್ಯಶಸ್ ಸರಣಿ ಹಾಗೂ ಟಿ20 ವಿಶ್ವಕಪ್ನಂತಹ ಬೃಹತ್ ವೇದಿಕೆಗಳಲ್ಲಿ ಈಗಾಗಲೇ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾರೆ.
2024ರ ಹರಾಜಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಸುಮಾರು 2.60 ಕೋಟಿ ರೂಪಾಯಿ (250,000 ಪೌಂಡ್) ನೀಡಿ ಬೆಥೆಲ್ ಅವರನ್ನು ಖರೀದಿಸಿತ್ತು. 2025ರ ಐಪಿಎಲ್ ಆವೃತ್ತಿಯಲ್ಲಿ ಪಾದಾರ್ಪಣೆ ಮಾಡಿ ಎರಡು ಪಂದ್ಯಗಳನ್ನಾಡಿದ್ದ ಅವರು, ತಮ್ಮ ಮೊದಲ ಪಂದ್ಯದಲ್ಲಿಯೇ ಆಕರ್ಷಕ ಅರ್ಧಶತಕ ಸಿಡಿಸಿ ಗಮನ ಸೆಳೆದಿದ್ದರು.
ಆದರೆ, ಈ ಬಾರಿಯ ಐಪಿಎಲ್ನಲ್ಲಿ ಆರ್ಸಿಬಿ ತಂಡವು ಅವರ ಬದಲಿಗೆ ಮತ್ತೋರ್ವ ಇಂಗ್ಲೆಂಡ್ ಆಟಗಾರ ಫಿಲ್ ಸಾಲ್ಟ್ ಅವರನ್ನು ಆರಂಭಿಕನಾಗಿ ಕಣಕ್ಕಿಳಿಸುತ್ತಿದೆ. ವಿರಾಟ್ ಕೊಹ್ಲಿ ಹಾಗೂ ಫಿಲ್ ಸಾಲ್ಟ್ ಉತ್ತಮ ಆರಂಭ ಒದಗಿಸುತ್ತಿರುವುದರಿಂದ, ಟಿಮ್ ಡೇವಿಡ್, ರೊಮಾರಿಯೋ ಶೆಫರ್ಡ್ ಮತ್ತು ಜೋಶ್ ಹೇಝಲ್ವುಡ್ ಅವರಂತಹ ವಿದೇಶಿ ಆಟಗಾರರು ತಂಡದ ಇತರ ಸ್ಥಾನಗಳನ್ನು ಆಕ್ರಮಿಸಿಕೊಂಡಿದ್ದಾರೆ. ಪರಿಣಾಮವಾಗಿ, ಕಳೆದ ಒಂದು ತಿಂಗಳಿನಿಂದ ಬೆಥೆಲ್ ಆರ್ಸಿಬಿ ಡಗೌಟ್ನಲ್ಲಿಯೇ ಕಾಲಹರಣ ಮಾಡುವಂತಾಗಿದೆ.
ಕೌಂಟಿ ಕ್ರಿಕೆಟ್ನತ್ತ ಮುಖ ಮಾಡುವಂತೆ ಅಲೆಸ್ಟರ್ ಕುಕ್ ಸಲಹೆ
“ಸ್ಟಿಕ್ ಟು ಕ್ರಿಕೆಟ್” ಪಾಡ್ಕಾಸ್ಟ್ನಲ್ಲಿ ಮಾತನಾಡಿದ ಇಂಗ್ಲೆಂಡ್ನ ದಿಗ್ಗಜ ಆಟಗಾರ ಅಲೆಸ್ಟರ್ ಕುಕ್, ಜೇಕಬ್ ಬೆಥೆಲ್ ಅವರ ಪ್ರಸ್ತುತ ಪರಿಸ್ಥಿತಿಯ ಕುರಿತು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. “ಸಿಡ್ನಿಯಂತಹ ಮೈದಾನದಲ್ಲಿ, ಅಲ್ಲಿನ ಕಠಿಣ ಸನ್ನಿವೇಶಗಳಲ್ಲಿ ಅತ್ಯುತ್ತಮ ಬೌಲಿಂಗ್ ದಾಳಿಯನ್ನು ದಿಟ್ಟವಾಗಿ ಎದುರಿಸಿದ ಬೆಥೆಲ್ ಆಟವನ್ನು ನಾನು ನೋಡಿದ್ದೇನೆ. ಮೂರನೇ ಕ್ರಮಾಂಕದಲ್ಲಿ ಯಶಸ್ವಿಯಾಗಿ ಬ್ಯಾಟ್ ಬೀಸಬಲ್ಲ ಅವರು ಖಂಡಿತವಾಗಿಯೂ ಆರಂಭಿಕರಾಗಿಯೂ ಆಡಬಲ್ಲರು,” ಎಂದು ಕುಕ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಮುಂದುವರಿದು ಮಾತನಾಡಿದ ಅವರು, “ಐಪಿಎಲ್ನಲ್ಲಿ ಆಡುವುದು ತಪ್ಪಲ್ಲ. ಆದರೆ, ಅಲ್ಲಿ ಕೇವಲ ಬೆಂಚ್ ಕಾಯುತ್ತಾ ಕುಳಿತಿರುವುದು ಸರಿಯಾದ ನಿರ್ಧಾರವಲ್ಲ. ಸದ್ಯ ಇಂಗ್ಲೆಂಡ್ನಲ್ಲಿ ಕೌಂಟಿ ಚಾಂಪಿಯನ್ಷಿಪ್ ಆರಂಭವಾಗಿದೆ. ಅವರ ತಂಡವಾದ ವಾರ್ವಿಕ್ಶೈರ್ ಈಗಾಗಲೇ ಮೂರು ಪಂದ್ಯಗಳನ್ನಾಡಿ ಮೊದಲ ವಿಭಾಗದಲ್ಲಿ ಎರಡನೇ ಸ್ಥಾನದಲ್ಲಿದೆ. ಬೆಥೆಲ್ ತಕ್ಷಣವೇ ಇಂಗ್ಲೆಂಡ್ಗೆ ಮರಳಿ ವಾರ್ವಿಕ್ಶೈರ್ ಪರ ಆರಂಭಿಕನಾಗಿ ಕಣಕ್ಕಿಳಿದರೆ, ಅದು ಅವರ ರೆಡ್-ಬಾಲ್ ಕ್ರಿಕೆಟ್ ತಂತ್ರಗಾರಿಕೆಯನ್ನು ಸುಧಾರಿಸಲು ನೆರವಾಗುವುದರ ಜೊತೆಗೆ, ಇಂಗ್ಲೆಂಡ್ ರಾಷ್ಟ್ರೀಯ ತಂಡಕ್ಕೂ ಭವಿಷ್ಯದಲ್ಲಿ ಲಾಭದಾಯಕವಾಗಲಿದೆ,” ಎಂದು ಖಡಕ್ ಆಗಿ ನುಡಿದಿದ್ದಾರೆ.
ಮುಂಬರುವ ನ್ಯೂಜಿಲೆಂಡ್ ಸರಣಿಯ ಮೇಲಿನ ಪ್ರಭಾವ
ಅಲೆಸ್ಟರ್ ಕುಕ್ ಅವರ ಈ ಕಳವಳಕ್ಕೆ ಮುಂಬರುವ ಅಂತಾರಾಷ್ಟ್ರೀಯ ಸರಣಿಗಳೂ ಪ್ರಮುಖ ಕಾರಣವಾಗಿವೆ. ಇಂಗ್ಲೆಂಡ್ ತಂಡದ ಆರಂಭಿಕ ಆಟಗಾರ ಝಾಕ್ ಕ್ರಾಲಿ ಸದ್ಯ ಲಭ್ಯವಿಲ್ಲದ ಕಾರಣ, ಟೆಸ್ಟ್ ಕ್ರಿಕೆಟ್ನಲ್ಲಿ ಹೊಸ ಆರಂಭಿಕ ಬ್ಯಾಟರ್ನ ಹುಡುಕಾಟದಲ್ಲಿದೆ ಇಂಗ್ಲೆಂಡ್ ಬೋರ್ಡ್. ಈ ಸ್ಥಾನವನ್ನು ತುಂಬಲು ಬೆಥೆಲ್ ಪ್ರಬಲ ಆಕಾಂಕ್ಷಿಯಾಗಿದ್ದಾರೆ.
ಜೂನ್ 4ರಂದು ಇಂಗ್ಲೆಂಡ್ ಹಾಗೂ ನ್ಯೂಜಿಲೆಂಡ್ ನಡುವಿನ ಸರಣಿ ಆರಂಭವಾಗಲಿದ್ದು, ಈ ಮಹತ್ವದ ಸರಣಿಗೆ ಸಿದ್ಧರಾಗಲು ಬೆಥೆಲ್ ಅವರಿಗೆ ಕೇವಲ ಎರಡು ವಾರಗಳ ಸಮಯಾವಕಾಶ ಮಾತ್ರ ಸಿಗಲಿದೆ. ಒಂದು ವೇಳೆ ಆರ್ಸಿಬಿ ತಂಡವು ಐಪಿಎಲ್ 2026ರ ಫೈನಲ್ ಪ್ರವೇಶಿಸಿದರೆ, ಈ ಸಿದ್ಧತಾ ಸಮಯ ಕೇವಲ ಒಂದು ವಾರಕ್ಕೆ ಸೀಮಿತವಾಗಲಿದೆ.
ಹೀಗಾಗಿ, ಕೇವಲ ಹಣಕ್ಕಾಗಿ ಐಪಿಎಲ್ನಲ್ಲಿ ಸಮಯ ವ್ಯರ್ಥ ಮಾಡುವ ಬದಲು, ದೀರ್ಘಾವಧಿಯ ವೃತ್ತಿಜೀವನದ ದೃಷ್ಟಿಯಿಂದ ಕೌಂಟಿ ಕ್ರಿಕೆಟ್ನಲ್ಲಿ ಆಡಿ ಫಾರ್ಮ್ ಕಂಡುಕೊಳ್ಳುವುದು ಉತ್ತಮ ಎಂಬುದು ಅಲೆಸ್ಟರ್ ಕುಕ್ ಅವರ ಸ್ಪಷ್ಟ ನಿಲುವಾಗಿದೆ. ಯುವ ಆಟಗಾರ ಬೆಥೆಲ್ ಈ ಹಿರಿಯನ ಸಲಹೆಯನ್ನು ಗಂಭೀರವಾಗಿ ಪರಿಗಣಿಸುತ್ತಾರೆಯೇ ಅಥವಾ ಆರ್ಸಿಬಿ ಪಾಳಯದಲ್ಲೇ ಮುಂದುವರಿಯುತ್ತಾರೆಯೇ ಎಂಬುದನ್ನು ಕಾದುನೋಡಬೇಕಿದೆ.
ಇದನ್ನೂ ಓದಿ : ಎರಡು ವಾಹನಗಳ ನಡುವೆ ಮುಖಾಮುಖಿ ಡಿಕ್ಕಿ – ಓರ್ವ ಸಜೀವ ದಹನ!
