ನವದೆಹಲಿ : ದೇಶದಲ್ಲಿ ಸರ್ಕಾರಿ ನೌಕರರಿರಲಿ, ಖಾಸಗಿ ಕಂಪನಿಗಳ ನೌಕರರಿರಲಿ, ತಿಂಗಳಿಗೆ ಒಮ್ಮೆ ಸ್ಯಾಲರಿ ಕ್ರೆಡಿಟ್ ಆಗುತ್ತದೆ. ತಿಂಗಳಿಡೀ ಕಷ್ಟಪಟ್ಟು ನೌಕರರಿಗೆ ಸಿಗುವ ಸಂಬಳವೇ ಜೀವನ ಸಾಗಿಸಲು ಇಂಧನವಾಗಿದೆ. ಆದರೆ, ನೇಪಾಳ ಸರ್ಕಾರವು ಕ್ರಾಂತಿಕಾರಕ ಹೆಜ್ಜೆ ಇರಿಸಿದೆ. ನೇಪಾಳದ ಸರ್ಕಾರಿ ನೌಕರರಿಗೆ ತಿಂಗಳಲ್ಲಿ ಎರಡು ಬಾರಿ ಸಂಬಳ ನೀಡುವುದಾಗಿ ಘೋಷಣೆ ಮಾಡಿದೆ. ಇದು ಈಗ ಭಾರಿ ಅಚ್ಚರಿಗೂ ಕಾರಣವಾಗಿದೆ.
ಹೌದು.. ನೇಪಾಳದ ಸರ್ಕಾರಿ ನೌಕರರಿಗೆ ತಿಂಗಳಲ್ಲಿ ಎರಡು ಬಾರಿ ಸ್ಯಾಲರಿ ನೀಡಲು ಘೋಷಿಸಲಾಗಿದೆ. ಹಾಗಂತ, ತಿಂಗಳ ಸಂಬಳವನ್ನೇ 15 ದಿನಕ್ಕೊಮ್ಮೆಯಂತೆ ಎರಡು ಬಾರಿ ನೀಡುವುದಿಲ್ಲ. ಒಬ್ಬ ನೌಕರನ ಸಂಬಳದಲ್ಲಿ 15 ದಿನಕ್ಕೆ ಅರ್ಧ, ಮತ್ತೆ 15 ದಿನಕ್ಕೆ ಉಳಿದರ್ಧ ಸಂಬಳವನ್ನು ನೀಡಲಾಗುತ್ತದೆ. ಆದರೆ, ಸಂಬಳಕ್ಕಾಗಿ ತಿಂಗಳು ಪೂರ್ತಿ ಕಾಯುವ ಅವಶ್ಯಕತೆ ಇರುವುದಿಲ್ಲ ಅಷ್ಟೆ.
ಯಾಕಿಂಥಾ ತೀರ್ಮಾನ?
ನೇಪಾಳದ ಆರ್ಥಿಕತೆ ಏಳಿಗೆ ದೃಷ್ಟಿಯಿಂದ ಇಂತಹ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ವರದಿಯಾಗಿದೆ. ಉದ್ಯೋಗಿಗಳ ಕೈಯಲ್ಲಿ ತಿಂಗಳು ಪೂರ್ತಿ ಹಣದ ಓಡಾಟವಿರಲಿ ಮತ್ತು ಮಾರುಕಟ್ಟೆಯಲ್ಲಿ ಆರ್ಥಿಕ ಚಟುವಟಿಕೆಗಳು ಚುರುಕಾಗಿರಲಿ ಎಂಬುದು ಇದರ ಮುಖ್ಯ ಉದ್ದೇಶವಾಗಿದೆ ಎನ್ನಲಾಗಿದೆ. ಅಂದರೆ, ಉದ್ಯೋಗಿಗಳ ಕೈಗೆ ಸಂಬಳ ಬರುತ್ತಲೇ ಅವರು ಆ ಹಣವನ್ನು ಖರ್ಚು ಮಾಡುತ್ತಾರೆ. ಅದರಲ್ಲೂ, ಎರಡು ಬಾರಿ ಸಂಬಳ ಸಿಕ್ಕರೆ, ಪ್ರತಿ ಬಾರಿ ಸಂಬಳವಾದಾಗಲೂ ಹಣವನ್ನು ಖರ್ಚು ಮಾಡುತ್ತಾರೆ.
ಮಾರುಕಟ್ಟೆಯಲ್ಲಿ ಹೆಚ್ಚೆಚ್ಚು ಹಣದ ಹರಿವು ಇದ್ದಷ್ಟು ಅದು ಆರ್ಥಿಕತೆಗೆ ಅನುಕೂಲವಾಗುತ್ತದೆ. ಗ್ರಾಹಕ ಬಳಕೆ ಹೆಚ್ಚಾಗಿ ಆರ್ಥಿಕತೆ ಬಲಿಷ್ಠವಾಗುತ್ತದೆ ಎಂಬ ಲೆಕ್ಕಾಚಾರದಿಂದ ಹೊಸ ನಿಯಮ ಜಾರಿಗೆ ತರಲಾಗುತ್ತಿದೆ ಎಂದು ತಿಳಿದುಬಂದಿದೆ. ನೇಪಾಳದ ಎಲ್ಲ ಖಾಸಗಿ ಕಂಪನಿಗಳಲ್ಲಿ ಇದು ಇನ್ನೂ ಕಡ್ಡಾಯವಾಗಿಲ್ಲ. ಹೆಚ್ಚಿನ ಖಾಸಗಿ ಸಂಸ್ಥೆಗಳು ಇಂದಿಗೂ ತಿಂಗಳಿಗೊಮ್ಮೆ ಸಂಬಳ ನೀಡುವ ಹಳೆಯ ಪದ್ಧತಿಯನ್ನೇ ಅನುಸರಿಸುತ್ತಿವೆ. ಆದರೆ, ಸರ್ಕಾರಿ ವಲಯದಲ್ಲಿ ಈ ಬದಲಾವಣೆಯು ಒಂದು ಕ್ರಾಂತಿಕಾರಿ ಹೆಜ್ಜೆಯೆಂದು ಪರಿಗಣಿಸಲಾಗಿದೆ.
ಇದನ್ನೂ ಓದಿ : ಒಣಹುಲ್ಲು ಸಾಗಿಸುತ್ತಿದ್ದ ಬೊಲೆರೊಗೆ ವಿದ್ಯುತ್ ತಂತಿ ತಗುಲಿ ಬೆಂಕಿ ; ನಡುರಸ್ತೆಯಲ್ಲಿ ಧಗಧಗ!
