ಬೆಂಗಳೂರು : ದೇಶದಲ್ಲಿ ಏಕೀಕೃತ ಪಾವತಿ ವ್ಯವಸ್ಥೆ (ಯುಪಿಐ) ಜಾರಿಗೆ ಬಂದ ಬಳಿಕ ಡಿಜಿಟಲ್ ವಹಿವಾಟು ಗಣನೀಯವಾಗಿ ಜಾಸ್ತಿಯಾಗಿದೆ. ಸಣ್ಣದೊಂದು ಟೀ ಅಂಗಡಿಯಿಂದ ಹಿಡಿದು ದೊಡ್ಡ ದೊಡ್ಡ ಮಾಲ್ಗಳಲ್ಲಿ ಈಗ ಯುಪಿಐ ಮೂಲಕವೇ ಪಾವತಿಸಲಾಗುತ್ತದೆ. ಹಾಗೆಯೇ, ಯುಪಿಐನಿಂದ ಬೇರೆಯವರಿಗೆ ಹಣ ವರ್ಗಾವಣೆ ಮಾಡುವುದು ಕೂಡ ತುಂಬ ಸುಲಭವಾಗಿದೆ. ಆದರೆ, ಹಣ ವರ್ಗಾವಣೆ ಮಾಡುವಾಗ ತಪ್ಪಾಗಿ ಬೇರೆಯವರ ಖಾತೆಗೆ ಹಣ ಕಳುಹಿಸಿದರೆ ಆಗ ಎದುರಾಗುವ ಸಮಸ್ಯೆ ಒಂದೆರಡಲ್ಲ.
ಹೀಗೆ, ಮೊಬೈಲ್ ನಂಬರ್ ತಪ್ಪಾಗಿಯೋ, ಅಕೌಂಟ್ ನಂಬರ್ (ಅಕೌಂಟ್ ನಂಬರ್ಗೆ ಹಣ ಕಳುಹಿಸುವವರು) ತಪ್ಪಾಗಿಯೋ, ಬೇರೆಯವರ ಖಾತೆಗೆ ಹಣ ವರ್ಗಾಯಿಸಿದಾಗ ಏನು ಮಾಡಬೇಕು ಎಂಬುದೇ ತುಂಬ ಜನರಿಗೆ ಗೊತ್ತಿರುವುದಿಲ್ಲ. ಅದರಲ್ಲೂ, ಆಕಸ್ಮಿಕವಾಗಿ ಖಾತೆಗೆ ಹಣ ಜಮೆಯಾದ ಬಳಿಕ ಆ ವ್ಯಕ್ತಿಯು ಹಣ ವಾಪಸ್ ಕೊಡಲು ನಿರಾಕರಿಸಿದರೆ ಏನು ಮಾಡಬೇಕು ಎಂಬ ಪ್ರಶ್ನೆಯೂ ಎದುರಾಗುತ್ತದೆ.
ನಿಯಮಗಳ ಪ್ರಕಾರ, ಯಾವುದಾದರೂ ಒಬ್ಬ ವ್ಯಕ್ತಿಯ ಬ್ಯಾಂಕ್ ಖಾತೆಗೆ ತಪ್ಪಾಗಿ ಹಣ ಜಮೆಯಾಗಿದ್ದರೆ, ಅದನ್ನು ಬ್ಯಾಂಕ್ಗಳು ಮೊದಲು ಹಣ ಕಳುಹಿಸಿದ ವ್ಯಕ್ತಿಗೆ ನೀಡಲು ಆಗುವುದಿಲ್ಲ. ಹಾಗೊಂದು ವೇಳೆ, ಹಣ ಪಡೆದ ವ್ಯಕ್ತಿಯು ವಾಪಸ್ ನೀಡಲು ನಿರಾಕರಿಸಿದರೆ ಅದು ವಂಚನೆ ಅಥವಾ ಸ್ಕ್ಯಾಮ್ ಎಂದು ಪರಿಗಣಿಸಲು ಆಗುವುದಿಲ್ಲ. ಸಣ್ಣ ಮೊತ್ತದ ವಹಿವಾಟುಗಳಲ್ಲಿ ಹಣ ಪಡೆದ ವ್ಯಕ್ತಿಯು ವಾಪಸ್ ನೀಡಲು ನಿರಾಕರಿಸಿದರೆ ಕಳುಹಿಸಿದವರಿಗೆ ತೊಂದರೆಯಾಗುತ್ತದೆ.
ಇನ್ನು, ತಪ್ಪಾಗಿ ಬೇರೆಯವರ ಖಾತೆಗೆ ಹಣ ವರ್ಗಾಯಿಸಿರುವುದು ಗೊತ್ತಾದ ಬಳಿಕ ಕೆಲವೊಂದಿಷ್ಟು ಪ್ರಕ್ರಿಯೆಗಳನ್ನು ಅನುಸರಿಸಬೇಕು. ತಪ್ಪಾಗಿ ಹಣ ಕಳುಹಿಸಿದ ಕೂಡಲೇ ನಿಮ್ಮ ಬ್ಯಾಂಕ್ಗೆ ಮಾಹಿತಿ ನೀಡಬೇಕು. ಆನ್ಲೈನ್ ಮೂಲಕವೂ ದೂರು ನೀಡಬಹುದು. ಇನ್ನು, ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (ಎನ್ಪಿಸಿಐ) ವೆಬ್ ಪೋರ್ಟಲ್ ಮೂಲಕವೂ ದೂರು ನೀಡಬಹುದು. ಭೀಮ್ ಆ್ಯಪ್, ಪೋರ್ಟಲ್, ಆರ್ಬಿಐ ಒಂಬುಡ್ಸ್ ಮನ್ ಗೂ (ಬ್ಯಾಂಕ್ಗಳು ಸ್ಪಂದಿಸದಿದ್ದರೆ) ದೂರು ನೀಡಬಹುದು. ಹೀಗೆ ಮಾಡಿದಾಗ ನಿಮ್ಮ ಹಣ ವಾಪಸ್ ಸಿಗುವ ಸಾಧ್ಯತೆ ಇರುತ್ತದೆ.
ಇದನ್ನೂ ಓದಿ : ವ್ಯಕ್ತಿಯ ಮೇಲೆ ಸಾಕು ನಾಯಿ ಡೆಡ್ಲಿ ಅಟ್ಯಾಕ್.. ವಿಡಿಯೋ ವೈರಲ್!
