ಬೆಂಗಳೂರು: ಐಪಿಎಲ್ 2026ರ ಉದ್ಘಾಟನಾ ಪಂದ್ಯವು ಕೇವಲ ರನ್ ಮಳೆ ಮತ್ತು ವಿಕೆಟ್ ಪತನಕ್ಕೆ ಮಾತ್ರವಲ್ಲದೆ, ಒಂದು ದೊಡ್ಡ ವಿವಾದಕ್ಕೂ ಸಾಕ್ಷಿಯಾಗಿದೆ. ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಆರ್ಸಿಬಿ ಮತ್ತು ಎಸ್ಆರ್ಎಚ್ ನಡುವಿನ ರೋಚಕ ಪಂದ್ಯದಲ್ಲಿ ಹೈದರಾಬಾದ್ ತಂಡದ ಸ್ಫೋಟಕ ಬ್ಯಾಟರ್ ಹೆನ್ರಿಚ್ ಕ್ಲಾಸೆನ್ ಅವರ ಔಟ್ ಆದ ರೀತಿ ಈಗ ಕ್ರಿಕೆಟ್ ವಲಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಫಿಲ್ ಸಾಲ್ಟ್ ಹಿಡಿದ ಕ್ಯಾಚ್ ನ್ಯಾಯಸಮ್ಮತವೇ ಎಂಬ ಪ್ರಶ್ನೆ ಅಭಿಮಾನಿಗಳನ್ನು ಚರ್ಚಗೆ ದೂಡಿದೆ.
ಜೇಕಬ್ ಡಫಿ ಅವರ ಮಾರಕ ದಾಳಿಗೆ ಸಿಲುಕಿ ಆರಂಭಿಕರನ್ನು ಕಳೆದುಕೊಂಡಿದ್ದ ಸನ್ ರೈಸರ್ಸ್ ತಂಡಕ್ಕೆ ಹೆನ್ರಿಚ್ ಕ್ಲಾಸೆನ್ ಮತ್ತು ಇಶಾನ್ ಕಿಶನ್ ಆಸರೆಯಾಗಿದ್ದರು. ಈ ಜೋಡಿ 4ನೇ ವಿಕೆಟ್ಗೆ 97 ರನ್ಗಳ ಭರ್ಜರಿ ಜೊತೆಯಾಟವಾಡಿ ತಂಡವನ್ನು ಸುಸ್ಥಿತಿಗೆ ತಂದಿತ್ತು. ಆದರೆ 14ನೇ ಓವರ್ನಲ್ಲಿ ರೊಮ್ಯಾರಿಯೊ ಶೆಫರ್ಡ್ ಎಸೆತದಲ್ಲಿ ಕ್ಲಾಸೆನ್ ಸಿಕ್ಸರ್ ಬಾರಿಸಲು ಯತ್ನಿಸಿದರು. ಮಿಡ್ ವಿಕೆಟ್ ಬೌಂಡರಿ ಬಳಿ ಫೀಲ್ಡಿಂಗ್ ಮಾಡುತ್ತಿದ್ದ ಫಿಲ್ ಸಾಲ್ಟ್ ಅದ್ಭುತವಾಗಿ ಜಿಗಿದು ಕ್ಯಾಚ್ ಪಡೆದರು. ಆದರೆ, ಕ್ಯಾಚ್ ಪಡೆದು ಕೆಳಗೆ ಬೀಳುವಾಗ ಸಾಲ್ಟ್ ಅವರ ಕಾಲು ಬೌಂಡರಿ ಲೈನ್ಗೆ ತಗುಲಿದೆಯೇ ಎಂಬ ಅನುಮಾನ ಮೂಡಿತು.
ಮೂರನೇ ಅಂಪೈರ್ ನಿರ್ಧಾರ ಮತ್ತು ಕ್ಲಾಸೆನ್ ಆಕ್ರೋಶ
ಮೈದಾನದಲ್ಲಿದ್ದ ಅಂಪೈರ್ಗಳು ಗೊಂದಲಕ್ಕೀಡಾಗಿ ತೀರ್ಪನ್ನು ಮೂರನೇ ಅಂಪೈರ್ಗೆ ವರ್ಗಾಯಿಸಿದರು. ವಿಡಿಯೊ ರೀಪ್ಲೇಗಳನ್ನು ಹಲವಾರು ಬಾರಿ ಪರಿಶೀಲಿಸಿದ ಅಂಪೈರ್, ಅಂತಿಮವಾಗಿ ಅದು ‘ಔಟ್’ ಎಂದು ಘೋಷಿಸಿದರು. ಈ ನಿರ್ಧಾರದಿಂದ ಆಘಾತಕ್ಕೊಳಗಾದ ಕ್ಲಾಸೆನ್ ಮೈದಾನದಲ್ಲೇ ಅಸಮಾಧಾನ ವ್ಯಕ್ತಪಡಿಸಿದರು. ಅಷ್ಟೇ ಅಲ್ಲದೆ, ಪೆವಿಲಿಯನ್ಗೆ ಮರಳುವ ಹಾದಿಯಲ್ಲಿ ನಾಲ್ಕನೇ ಅಂಪೈರ್ ಬಳಿ ತೆರಳಿ, ಕ್ಯಾಚ್ ಅನ್ನು ಸರಿಯಾದ ಕೋನಗಳಿಂದ ಪರಿಶೀಲಿಸಿಲ್ಲ ಎಂದು ವಾದಿಸಿ ತಮ್ಮ ಆಕ್ರೋಶ ಹೊರಹಾಕಿದರು.
ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧ ಚರ್ಚೆ
ಅಂಪೈರ್ ತೀರ್ಪು ಹೊರಬೀಳುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಈ ಬಗ್ಗೆ ಪರ-ವಿರೋಧದ ಅಲೆ ಎದ್ದಿದೆ. ಕೆಲವು ಅಭಿಮಾನಿಗಳು ಸಾಲ್ಟ್ ಅವರ ಕಾಲು ಬೌಂಡರಿ ಲೈನ್ಗೆ ಸ್ಪಷ್ಟವಾಗಿ ತಗುಲಿದೆ, ಇದು ಅನ್ಯಾಯ ಎಂದು ವಾದಿಸುತ್ತಿದ್ದರೆ, ಇನ್ನು ಕೆಲವು ಅಭಿಮಾನಿಗಳು ಸಾಲ್ಟ್ ಅವರ ಕಾಲು ಬೌಂಡರಿ ಗೆರೆಗೆ ತಾಗಿಲ್ಲ, ಅದು ಕೇವಲ ನೆರಳು ಅಷ್ಟೇ ಎಂದು ಸಮರ್ಥಿಸಿಕೊಳ್ಳುತ್ತಿದ್ದಾರೆ. ಈ ವಿವಾದಾತ್ಮಕ ವಿಕೆಟ್ ಪಂದ್ಯದ ಫಲಿತಾಂಶದ ಮೇಲೆ ದೊಡ್ಡ ಪರಿಣಾಮ ಬೀರಿದೆ ಎಂಬುದು ಹೈದರಾಬಾದ್ ಅಭಿಮಾನಿಗಳ ಆತಂಕವಾಗಿದೆ.
ತಂಡಕ್ಕೆ ಹೊಡೆತ ನೀಡಿದ ವಿಕೆಟ್
31 ರನ್ ಗಳಿಸಿ ಅಪಾಯಕಾರಿಯಾಗಿ ಮುನ್ನುಗ್ಗುತ್ತಿದ್ದ ಕ್ಲಾಸೆನ್ ವಿಕೆಟ್ ಪತನವಾಗುತ್ತಿದ್ದಂತೆ ಹೈದರಾಬಾದ್ ತಂಡದ ರನ್ ವೇಗಕ್ಕೆ ಬ್ರೇಕ್ ಬಿತ್ತು. ಸುಲಭವಾಗಿ ದೊಡ್ಡ ಮೊತ್ತದತ್ತ ಸಾಗುತ್ತಿದ್ದ ತಂಡಕ್ಕೆ ಈ ವಿವಾದಾತ್ಮಕ ತೀರ್ಪು ಹಿನ್ನಡೆಯಾಗಿ ಪರಿಣಮಿಸಿತು. ಆರ್ಸಿಬಿ ಪಾಲಿಗೆ ಇದು ಪಂದ್ಯದ ಟರ್ನಿಂಗ್ ಪಾಯಿಂಟ್ ಎನಿಸಿಕೊಂಡರೆ, ಎಸ್ಆರ್ಎಚ್ ಪಾಲಿಗೆ ಇದು ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಇದನ್ನೂ ಓದಿ : ಫಿಲ್ ಸಾಲ್ಟ್ ಔಟ್ ಆದ ರೀತಿ ಕಂಡು ಅನುಷ್ಕಾ ಶರ್ಮಾ ದಿಗ್ಭ್ರಮೆ, ಕ್ಲಾಸೆನ್ ಆಕ್ರೋಶ!
