ಮುಂಬೈ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಗೆ ವೇದಿಕೆ ಸಜ್ಜಾಗುತ್ತಿದ್ದು, ಮಾರ್ಚ್ 28 ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮತ್ತು ಸನ್ರೈಸರ್ಸ್ ಹೈದರಾಬಾದ್ ನಡುವಿನ ಹಣಾಹಣಿಯೊಂದಿಗೆ ಟೂರ್ನಿಗೆ ಅದ್ಧೂರಿ ಚಾಲನೆ ಸಿಗಲಿದೆ. ಈ ಬಾರಿಯ ಟೂರ್ನಿಯಲ್ಲಿ ಆಟಗಾರರು ಮತ್ತು ಫ್ರಾಂಚೈಸಿಗಳು ಹಳೆಯ ಮೈಂಡ್ಸೆಟ್ನಲ್ಲಿ ಆಡುವಂತಿಲ್ಲ. ಏಕೆಂದರೆ, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಟೂರ್ನಿಯ ನಿರ್ವಹಣಾ ಮಾರ್ಗಸೂಚಿಗಳಲ್ಲಿ ಕಠಿಣ ಬದಲಾವಣೆಗಳನ್ನು ತಂದಿದ್ದು, ಅದರಲ್ಲಿ ಬಹುಮುಖ್ಯವಾಗಿ ಪಂದ್ಯದ ದಿನದಂದು ಆಟಗಾರರು ಮೈದಾನದಲ್ಲಿ ಅಭ್ಯಾಸ ನಡೆಸುವುದನ್ನು ಸಂಪೂರ್ಣವಾಗಿ ನಿಷೇಧಿಸಿದೆ.
ಪಂದ್ಯದ ದಿನದ ಅಭ್ಯಾಸಕ್ಕೆ ಕಂಪ್ಲೀಟ್ ಬ್ರೇಕ್
ಬಿಸಿಸಿಐ ಬಿಡುಗಡೆ ಮಾಡಿರುವ ಹೊಸ ಮಾರ್ಗಸೂಚಿಗಳ ಪ್ರಕಾರ, ಪಂದ್ಯ ನಡೆಯುವ ದಿನದಂದು ಆಟಗಾರರು ಮೈದಾನದಲ್ಲಿ ಯಾವುದೇ ರೀತಿಯ ಅಭ್ಯಾಸ (ಪ್ರಾಕ್ಟೀಸ್ ಸೆಷನ್) ನಡೆಸುವಂತಿಲ್ಲ. ಇದು ಕಟ್ಟುನಿಟ್ಟಾದ ನಿಯಮವಾಗಿದ್ದು, ಯಾವುದೇ ಕಾರಣಕ್ಕೂ ಇದಕ್ಕೆ ವಿನಾಯಿತಿ ಇರುವುದಿಲ್ಲ. ಇದಲ್ಲದೆ, ಪಂದ್ಯದ ದಿನದಂದು ಮೈದಾನದಲ್ಲಿ ಫಿಟ್ನೆಸ್ ಪರೀಕ್ಷೆಗಳನ್ನು ಅಥವಾ ಕಠಿಣ ಡ್ರಿಲ್ಗಳನ್ನು ನಡೆಸುವುದಕ್ಕೂ ಬ್ರೇಕ್ ಹಾಕಲಾಗಿದೆ. ಎಲ್ಲಾ ಅಭ್ಯಾಸಗಳು ಕೇವಲ ನಿಗದಿಪಡಿಸಿದ ನೆಟ್ಸ್ಗಳಲ್ಲಿ ಮಾತ್ರ ನಡೆಯಬೇಕು; ಓಪನ್ ಪ್ರಾಕ್ಟೀಸ್ ಸೆಷನ್ಗಳಿಗೆ ಅವಕಾಶವಿಲ್ಲ. ಅಲ್ಲದೆ, ಒಂದು ತಂಡಕ್ಕೆ ನಿಗದಿಪಡಿಸಿದ ಪಿಚ್ಗಳನ್ನು, ಅವು ಖಾಲಿ ಇದ್ದರೂ ಸಹ, ಮತ್ತೊಂದು ತಂಡ ಬಳಸುವಂತಿಲ್ಲ.
ಆಟಗಾರರ ಓಡಾಟ ಮತ್ತು ಭದ್ರತೆಗೆ ಹೊಸ ನಿಯಮ
ಕ್ರೀಡಾಂಗಣದ ಒಳಗೆ ಮತ್ತು ಹೊರಗೆ ಆಟಗಾರರು ಹಾಗೂ ಸಿಬ್ಬಂದಿಗಳ ಓಡಾಟಕ್ಕೂ ನಿಯಂತ್ರಣ ಹೇರಲಾಗಿದೆ. ಅಭ್ಯಾಸದ ಅವಧಿಗೆ ಆಟಗಾರರು ಕೇವಲ ತಂಡದ ಬಸ್ನಲ್ಲಿಯೇ ಪ್ರಯಾಣಿಸಬೇಕು. ಮುಖ್ಯವಾಗಿ, ಆಟಗಾರರ ಕುಟುಂಬ ಸದಸ್ಯರು ಅವರೊಂದಿಗೆ ಬಸ್ನಲ್ಲಿ ಪ್ರಯಾಣಿಸುವಂತಿಲ್ಲ. ಅಭ್ಯಾಸದ ಸ್ಥಳಗಳಿಗೆ ಆಟಗಾರರು ಮತ್ತು ಅಧಿಕೃತ ಮಾನ್ಯತೆ ಪಡೆದ ಸಿಬ್ಬಂದಿಗಳಿಗೆ ಮಾತ್ರ ಪ್ರವೇಶವಿರುತ್ತದೆ; ಕುಟುಂಬದ ಸದಸ್ಯರು ನಿಗದಿಪಡಿಸಿದ ಹಾಸ್ಪಿಟಾಲಿಟಿ ವಿಭಾಗದಲ್ಲಿಯೇ ಉಳಿಯಬೇಕು. ಇನ್ನು, ನೆಟ್ ಬೌಲರ್ಗಳು ಮತ್ತು ಥ್ರೋಡೌನ್ ತಜ್ಞರ ಪಟ್ಟಿಯನ್ನು ಫ್ರಾಂಚೈಸಿಗಳು ಬಿಸಿಸಿಐಗೆ ಸಲ್ಲಿಸಿ ಮುಂಚಿತವಾಗಿ ಅನುಮೋದನೆ ಪಡೆಯುವುದು ಕಡ್ಡಾಯವಾಗಿದೆ.
ಪಂದ್ಯದ ದಿನದ ಶಿಸ್ತು ಮತ್ತು ಮೈದಾನದ ನಿಯಮಗಳು
ಮೈದಾನದಲ್ಲಿ ಶಿಸ್ತು ಕಾಪಾಡುವ ಉದ್ದೇಶದಿಂದ ಸಹಾಯಕ ಸಿಬ್ಬಂದಿಗಳು (ಸಪೋರ್ಟ್ ಸ್ಟಾಫ್) ಕಡ್ಡಾಯವಾಗಿ ಮಾನ್ಯತಾ ಕಾರ್ಡ್ಗಳನ್ನು (ಅಕ್ರೆಡಿಟೇಶನ್ ಕಾರ್ಡ್) ಧರಿಸಿರಬೇಕು. ಮೊದಲ ಬಾರಿಗೆ ನಿಯಮ ಉಲ್ಲಂಘಿಸಿದರೆ ಎಚ್ಚರಿಕೆ ನೀಡಲಾಗುತ್ತದೆ, ಮರುಕಳಿಸಿದರೆ ದಂಡ ವಿಧಿಸಲಾಗುತ್ತದೆ. ನೆಟ್ಸ್ನಲ್ಲಿ ಅಭ್ಯಾಸ ಮಾಡುವಾಗ ಆಟಗಾರರು ಎಲ್ಇಡಿ ಜಾಹೀರಾತು ಬೋರ್ಡ್ಗಳಿಗೆ ಚೆಂಡು ಬಡಿಯದಂತೆ ಎಚ್ಚರವಹಿಸಬೇಕು ಮತ್ತು ಆ ಬೋರ್ಡ್ಗಳ ಮುಂದೆ ಕುಳಿತುಕೊಳ್ಳುವುದನ್ನು ನಿಷೇಧಿಸಲಾಗಿದೆ. ಬದಲಿ ಆಟಗಾರರು ತಮಗೆ ನಿಗದಿಪಡಿಸಿದ ಜಾಗದಲ್ಲಿಯೇ ಕೂರಬೇಕು. ಐಪಿಎಲ್ 2025ರ ನಿಯಮಗಳಂತೆಯೇ ಈ ಬಾರಿಯೂ ತಂಡದ ವೈದ್ಯರು ಸೇರಿದಂತೆ ಕೇವಲ 12 ಸಹಾಯಕ ಸಿಬ್ಬಂದಿಗಳಿಗೆ ಮಾತ್ರ ಪಂದ್ಯದ ದಿನ ನಿಗದಿತ ಪ್ರದೇಶದೊಳಗೆ ಪ್ರವೇಶವಿರುತ್ತದೆ.
ಕ್ಯಾಪ್, ಡ್ರೆಸ್ ಕೋಡ್ ಹಾಗೂ ಜರ್ಸಿ ನಿಯಮ
ಟೂರ್ನಿಯಲ್ಲಿ ಅತಿ ಹೆಚ್ಚು ರನ್ ಮತ್ತು ವಿಕೆಟ್ ಪಡೆದ ಆಟಗಾರರಿಗೆ ನೀಡಲಾಗುವ ಆರೆಂಜ್ ಮತ್ತು ಪರ್ಪಲ್ ಕ್ಯಾಪ್ಗಳನ್ನು ಪಂದ್ಯದ ದಿನದಂದು ಆಯಾ ಆಟಗಾರರು ಕಡ್ಡಾಯವಾಗಿ ಧರಿಸಬೇಕು. ಒಂದು ವೇಳೆ ಧರಿಸದಿದ್ದಲ್ಲಿ, ಬ್ರಾಡ್ಕಾಸ್ಟರ್ಗಳ ಕ್ಯಾಮೆರಾ ಕಣ್ಣಿಗೆ ಬೀಳುವವರೆಗೆ, ಅಂದರೆ ಕನಿಷ್ಠ ಮೊದಲ ಎರಡು ಓವರ್ಗಳವರೆಗಾದರೂ ಅದನ್ನು ಧರಿಸುವುದು ಕಡ್ಡಾಯ. ಇನ್ನು, ಪಂದ್ಯಾವಳಿಯ ನಂತರದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಆಟಗಾರರು ಸೂಕ್ತವಾದ ಡ್ರೆಸ್ ಕೋಡ್ ಪಾಲಿಸಬೇಕು. ಸ್ಲೀವ್ಲೆಸ್ ಜರ್ಸಿ ಮತ್ತು ಫ್ಲಾಪಿ ಹ್ಯಾಟ್ಗಳನ್ನು ಧರಿಸಿ ಬರುವಂತಿಲ್ಲ; ಇದನ್ನು ಉಲ್ಲಂಘಿಸಿದರೆ ದಂಡದ ಬಿಸಿ ಎದುರಿಸಬೇಕಾಗುತ್ತದೆ. ಜೊತೆಗೆ, ಯಾವುದೇ ತಂಡವು ತನ್ನ ಆಟಗಾರನ ಜರ್ಸಿ ಸಂಖ್ಯೆಯನ್ನು ಬದಲಾಯಿಸಲು ಬಯಸಿದರೆ ಕನಿಷ್ಠ 24 ಗಂಟೆಗಳ ಮುಂಚಿತವಾಗಿ ಬಿಸಿಸಿಐಗೆ ಮಾಹಿತಿ ನೀಡಬೇಕು. ಮಾರ್ಚ್ 12 ರಂದು ಹೊರಡಿಸಲಾದ ಮಾರ್ಗಸೂಚಿಗಳ ಜೊತೆಗೆ ಈಗ ಸೇರ್ಪಡೆಯಾಗಿರುವ ಈ ಕಠಿಣ ನಿಯಮಗಳು, ಮುಂಬರುವ ಐಪಿಎಲ್ ಟೂರ್ನಿಯನ್ನು ಮತ್ತಷ್ಟು ಶಿಸ್ತುಬದ್ಧ ಹಾಗೂ ವ್ಯವಸ್ಥಿತವಾಗಿ ನಡೆಸುವ ಬಿಸಿಸಿಐನ ಉದ್ದೇಶವನ್ನು ಸ್ಪಷ್ಟಪಡಿಸಿವೆ.
ಇದನ್ನೂ ಓದಿ : ವಿಧಾನಸೌಧಕ್ಕೆ ಶಾಸಕರ ಭೇಟಿಗೆ ಬಂದಿದ್ದ ವ್ಯಕ್ತಿ ಬ್ಯಾಗ್ನಲ್ಲಿ 6 ಲಕ್ಷ ರೂ. ಪತ್ತೆ.. ದುಡ್ಡು ತಂದಿದ್ಯಾಕೆ?
