ಬೆಂಗಳೂರು : ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವಿನ ಪಂದ್ಯವೆಂದರೆ ಅಲ್ಲಿ ರೋಚಕತೆ ಮತ್ತು ಕಾವೇರಿದ ವಾತಾವರಣ ಸಾಮಾನ್ಯ. ಈ ಎರಡು ಬದ್ಧ ವೈರಿಗಳ ನಡುವೆ ಐಪಿಎಲ್ 2018ರಲ್ಲಿ ನಡೆದ ಹೈ-ವೋಲ್ಟೇಜ್ ಪಂದ್ಯವೊಂದರ ರೋಚಕ ಹಾಗೂ ಮರೆಯಲಾಗದ ಘಟನೆಯೊಂದನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮಾಜಿ ವಿಕೆಟ್-ಕೀಪರ್ ಬ್ಯಾಟರ್ ಸ್ಯಾಮ್ ಬಿಲ್ಲಿಂಗ್ಸ್ ಇದೀಗ ಬಿಚ್ಚಿಟ್ಟಿದ್ದಾರೆ.
ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದಿದ್ದ ಆ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ತಮ್ಮ ವಿಕೆಟ್ ಪತನದ ಬಳಿಕ ಹೇಗೆ ಅಗ್ರೆಸ್ಸಿವ್ ಆಗಿ ಪ್ರತಿಕ್ರಿಯಿಸಿದ್ದರು ಎಂಬುದನ್ನು ಇಂಗ್ಲೆಂಡ್ನ ಆಟಗಾರ ಬಿಲ್ಲಿಂಗ್ಸ್ ಇತ್ತೀಚಿನ ಸಂದರ್ಶನವೊಂದರಲ್ಲಿ ಸ್ಮರಿಸಿಕೊಂಡಿದ್ದಾರೆ.
ಕೊಹ್ಲಿಯ ಆಕ್ರೋಶ ಮತ್ತು ಬಿಲ್ಲಿಂಗ್ಸ್ ಪ್ರತಿಕ್ರಿಯೆ
ಅದು ಏಪ್ರಿಲ್ 25, 2018ರಂದು ನಡೆದಿದ್ದ ಆರ್ಸಿಬಿ ಮತ್ತು ಸಿಎಸ್ಕೆ ನಡುವಿನ ಪಂದ್ಯ. ಈ ಪಂದ್ಯದಲ್ಲಿ ಸಿಎಸ್ಕೆ ಪರ ಕಣಕ್ಕಿಳಿದಿದ್ದ ಸ್ಯಾಮ್ ಬಿಲ್ಲಿಂಗ್ಸ್ 9 ರನ್ ಗಳಿಸಿ ಆಡುತ್ತಿದ್ದಾಗ ಯುಜ್ವೇಂದ್ರ ಚಹಾಲ್ ಬೌಲಿಂಗ್ನಲ್ಲಿ ವಿಕೆಟ್ ಕೀಪರ್ ಕ್ವಿಂಟನ್ ಡಿ ಕಾಕ್ ಅವರಿಗೆ ಕ್ಯಾಚಿತ್ತು ನಿರ್ಗಮಿಸಿದ್ದರು.
ತಮ್ಮ ವಿಕೆಟ್ ಪತನದ ನಂತರ ಪೆವಿಲಿಯನ್ಗೆ ಮರಳುತ್ತಿದ್ದಾಗ ನಡೆದ ಘಟನೆಯನ್ನು ಬಿಲ್ಲಿಂಗ್ಸ್ ನೆನಪಿಸಿಕೊಂಡಿದ್ದಾರೆ. “ವಿರಾಟ್ ನನಗೆ ಎರಡು ಬಾರಿ ಸೆಂಡ್-ಆಫ್ ಕೊಟ್ಟಿದ್ದರು. ಅವರಲ್ಲಿದ್ದ ಆ ಆಟದ ಮೇಲಿನ ಉತ್ಸಾಹ ಮತ್ತು ಆವೇಶ ಎದ್ದು ಕಾಣುತ್ತಿತ್ತು. ಚಹಾಲ್ ಬೌಲಿಂಗ್ನಲ್ಲಿ ನಾನು ವಿಕೆಟ್ ಕಳೆದುಕೊಂಡೆ. ನಾನು ಪೆವಿಲಿಯನ್ ಕಡೆಗೆ ಹೆಜ್ಜೆ ಹಾಕುತ್ತಿದ್ದೆ ಮತ್ತು ವಿರಾಟ್ ಮಿಡ್-ವಿಕೆಟ್ನಲ್ಲಿ ಫೀಲ್ಡ್ ಮಾಡುತ್ತಿದ್ದರು. ಆಗ ಅವರು ನನ್ನ ಮುಖದ ಮುಂದೆ ಬಂದು ಕಿರುಚಲು ದೊಡ್ಡ ರೌಂಡ್ ಹಾಕಿಕೊಂಡು ಬಂದರು ಎಂದು ಬಿಲ್ಲಿಂಗ್ಸ್ ನಗುತ್ತಲೇ ವಿವರಿಸಿದ್ದಾರೆ.
ಕೊಹ್ಲಿಯ ಆ ಅಗ್ರೆಸ್ಸಿವ್ ಪ್ರತಿಕ್ರಿಯೆಯನ್ನು ನೋಡಿ ತಮಗೆ ಏನನ್ನಿಸಿತು ಎಂಬುದನ್ನು ಹೇಳಿಕೊಂಡ ಬಿಲ್ಲಿಂಗ್ಸ್, “ಅವರು ನನ್ನ ಮುಖದ ಮೇಲೆ ಕಿರುಚಲು ಅಷ್ಟು ದೂರದಿಂದ ಓಡಿ ಬಂದಾಗ, ನನಗೆ ‘ಅರೇ, ನನ್ನಂತವನ ಮೇಲೆ ನೀನ್ಯಾಕೆ ನಿನ್ನ ಸಮಯ ವ್ಯರ್ಥ ಮಾಡ್ತಿದ್ದೀಯಾ?’ ಅನ್ನಿಸಿತ್ತು. ಆದರೆ, ನಾವು ಆಡಿದ ಎಲ್ಲಾ ಶ್ರೇಷ್ಠ ಆಟಗಾರರಲ್ಲಿ ಏನಾದರೊಂದು ವಿಶೇಷತೆ ಇರುತ್ತದೆ. ಅದನ್ನು ನಾವು ನಿಖರವಾಗಿ ವಿವರಿಸಲಾಗುವುದಿಲ್ಲ. ಅವರಲ್ಲಿ ಆ ಒಂದು ‘ಔರಾ’ ಇರುತ್ತದೆ” ಎಂದು ಕೊಹ್ಲಿಯ ಆಟದ ಮೇಲಿನ ಬದ್ಧತೆಯನ್ನು ಶ್ಲಾಘಿಸಿದ್ದಾರೆ.
ಆ ರೋಚಕ ಪಂದ್ಯದಲ್ಲಿ ಏನಾಗಿತ್ತು?
ತವರಿನ ಕ್ರೀಡಾಂಗಣದಲ್ಲಿ ಮೊದಲು ಬ್ಯಾಟ್ ಮಾಡಿದ ವಿರಾಟ್ ಕೊಹ್ಲಿ ನೇತೃತ್ವದ ಆರ್ಸಿಬಿ, ಕ್ವಿಂಟನ್ ಡಿ ಕಾಕ್ ಮತ್ತು ಎಬಿ ಡಿವಿಲಿಯರ್ಸ್ ಅವರ ಭರ್ಜರಿ ಅರ್ಧಶತಕಗಳ ನೆರವಿನಿಂದ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 205 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತ್ತು. 206 ರನ್ಗಳ ಕಠಿಣ ಗುರಿ ಬೆನ್ನತ್ತಿದ ಸಿಎಸ್ಕೆ ತಂಡಕ್ಕೆ ಅಂಬಾಟಿ ರಾಯುಡು ಮತ್ತು ನಾಯಕ ಎಂಎಸ್ ಧೋನಿ ಆಸರೆಯಾದರು. ರಾಯುಡು ಕೇವಲ 53 ಎಸೆತಗಳಲ್ಲಿ 82 ರನ್ ಸಿಡಿಸಿ ರನೌಟ್ ಆದರೆ, ‘ಕ್ಯಾಪ್ಟನ್ ಕೂಲ್’ ಎಂಎಸ್ ಧೋನಿ ತಮ್ಮ ಎಂದಿನ ಶೈಲಿಯಲ್ಲಿ ಪಂದ್ಯವನ್ನು ಫಿನಿಶ್ ಮಾಡಿದರು. ಕೇವಲ 34 ಎಸೆತಗಳನ್ನು ಎದುರಿಸಿದ ಧೋನಿ, 1 ಬೌಂಡರಿ ಹಾಗೂ ಬರೋಬ್ಬರಿ 7 ಭರ್ಜರಿ ಸಿಕ್ಸರ್ಗಳ ನೆರವಿನಿಂದ 70 ರನ್ ಬಾರಿಸಿ ಅಜೇಯರಾಗುಳಿದರು. ಕೊನೆಯಲ್ಲಿ ಡ್ವೇನ್ ಬ್ರಾವೊ ಕೇವಲ 7 ಎಸೆತಗಳಲ್ಲಿ ಅಜೇಯ 14 ರನ್ ಸಿಡಿಸಿ ಸಾಥ್ ನೀಡಿದರು. ಅಂತಿಮವಾಗಿ ಚೆನ್ನೈ ಸೂಪರ್ ಕಿಂಗ್ಸ್ ಇನ್ನು 2 ಎಸೆತಗಳು ಬಾಕಿ ಇರುವಂತೆಯೇ 5 ವಿಕೆಟ್ಗಳ ರೋಚಕ ಜಯ ಸಾಧಿಸಿತ್ತು.ಬಿಲ್ಲಿಂಗ್ಸ್ ಅವರ ಈ ಹೇಳಿಕೆಯು ಐಪಿಎಲ್ ಇತಿಹಾಸದ ರೋಚಕ ಪಂದ್ಯವೊಂದರ ನೆನಪುಗಳನ್ನು ಮರುಕಳಿಸುವಂತೆ ಮಾಡಿದ್ದು, ಕೊಹ್ಲಿಯ ಆನ್-ಫೀಲ್ಡ್ ಅಗ್ರೆಶನ್ ಬಗ್ಗೆ ಮತ್ತೊಮ್ಮೆ ಚರ್ಚೆಗೆ ಗ್ರಾಸವಾಗಿದೆ.
ಇದನ್ನೂ ಓದಿ : TVS ಆರ್ಬಿಟರ್ ವಿ1 ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸುವ ಮುನ್ನ ತಿಳಿಯಲೇಬೇಕಾದ 5 ಪ್ರಮುಖ ಅಂಶಗಳು!
