ಬೆಂಗಳೂರು : ಟಿವಿಎಸ್ ಮೋಟಾರ್ ಕಂಪನಿಯು ತನ್ನ ಎಲೆಕ್ಟ್ರಿಕ್ ವಾಹನಗಳ (EV) ಸರಣಿಯಲ್ಲಿ ಅತಿ ಕಡಿಮೆ ಬೆಲೆಯ ‘ಟಿವಿಎಸ್ ಆರ್ಬಿಟರ್ ವಿ1’ (TVS Orbiter V1) ಸ್ಕೂಟರ್ ಅನ್ನು ಬಿಡುಗಡೆ ಮಾಡಿದೆ. ಮಾರುಕಟ್ಟೆಯಲ್ಲಿ ಭಾರೀ ನಿರೀಕ್ಷೆ ಹುಟ್ಟುಹಾಕಿರುವ ಈ ಹೊಸ ಇ-ಸ್ಕೂಟರ್ ಖರೀದಿಸುವ ಆಲೋಚನೆ ನಿಮ್ಮಲ್ಲಿದ್ದರೆ, ಅದಕ್ಕೂ ಮುನ್ನ ನೀವು ತಿಳಿಯಲೇಬೇಕಾದ ಪ್ರಮುಖ 5 ಅಂಶಗಳ ವಿವರ ಇಲ್ಲಿದೆ.
ಸ್ಕೂಟರ್ ಬೆಲೆ ಎಷ್ಟು? ಆಫರ್ ಏನಿದೆ?
ಟಿವಿಎಸ್ ಆರ್ಬಿಟರ್ ವಿ1 ಸ್ಕೂಟರ್ನ ಎಕ್ಸ್-ಶೋರೂಮ್ (ದೆಹಲಿ) ಬೆಲೆ ₹84,500 ಆಗಿದೆ (ಇದರಲ್ಲಿ ಪಿಎಂ ಇ-ಡ್ರೈವ್ ಸಬ್ಸಿಡಿ ಸೇರಿದೆ). ಆದರೆ, ನೀವು ‘ಬ್ಯಾಟರಿ ಆ್ಯಸ್ ಎ ಸರ್ವಿಸ್’ (BaaS – Battery as a Service) ಯೋಜನೆಯಡಿ ಈ ಸ್ಕೂಟರ್ ಖರೀದಿಸಲು ಮುಂದಾದರೆ, ಕೇವಲ ₹49,999 ಗಳಿಗೆ ನಿಮ್ಮದಾಗಿಸಿಕೊಳ್ಳಬಹುದು. ಇದು ಇದರ ಟಾಪ್ ಮಾಡೆಲ್ ಆದ ಆರ್ಬಿಟರ್ ವಿ2 (₹99,900) ಗಿಂತ ಸುಮಾರು ₹15,000 ದಷ್ಟು ಅಗ್ಗವಾಗಿದೆ.
ಬ್ಯಾಟರಿ ಸಾಮರ್ಥ್ಯ ಮತ್ತು ರೇಂಜ್ (ಮೈಲೇಜ್) ಎಷ್ಟು?
ಈ ಎಲೆಕ್ಟ್ರಿಕ್ ಸ್ಕೂಟರ್ 1.8kWh ಸಾಮರ್ಥ್ಯದ ಬ್ಯಾಟರಿ ಪ್ಯಾಕ್ ಹೊಂದಿದೆ. ಇದನ್ನು ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದರೆ 86 ಕಿ.ಮೀ ರೇಂಜ್ (IDC ಪ್ರಕಾರ) ನೀಡುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ. ಇದರ ಬ್ಯಾಟರಿ ಗಾತ್ರ ಚಿಕ್ಕದಾಗಿರುವ ಕಾರಣ, ಚಾರ್ಜಿಂಗ್ ಸಮಯ ಕೂಡ ಕಡಿಮೆಯಾಗಿದೆ. ಇದು ಸೊನ್ನೆಯಿಂದ 80% ಚಾರ್ಜ್ ಆಗಲು ಕೇವಲ 2 ಗಂಟೆ 20 ನಿಮಿಷಗಳನ್ನು ತೆಗೆದುಕೊಳ್ಳುತ್ತದೆ.
ಯಾವೆಲ್ಲಾ ಹೈಟೆಕ್ ಫೀಚರ್ಗಳಿವೆ?
ಕಡಿಮೆ ಬೆಲೆಯದ್ದಾಗಿದ್ದರೂ ಫೀಚರ್ಗಳ ವಿಚಾರದಲ್ಲಿ ಕಂಪನಿ ಯಾವುದೇ ರಾಜಿ ಮಾಡಿಕೊಂಡಿಲ್ಲ. ವಿ2 ಮಾಡೆಲ್ನಲ್ಲಿರುವ ಬಹುತೇಕ ಎಲ್ಲಾ ಫೀಚರ್ಗಳು ಇದರಲ್ಲೂ ಲಭ್ಯವಿವೆ. ಅವುಗಳಲ್ಲಿ ಪ್ರಮುಖವಾದವು. ಬಣ್ಣದ ಎಲ್ಸಿಡಿ (LCD) ಕ್ಲಸ್ಟರ್. ಮೊಬೈಲ್ ಆ್ಯಪ್ ಸಂಪರ್ಕ ಹಾಗೂ ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್. ಕಳ್ಳತನ ತಡೆಗಟ್ಟುವ (Anti-theft) ಅಲರ್ಟ್, ಕ್ರ್ಯಾಶ್ ಅಲರ್ಟ್ ಮತ್ತು ಜಿಯೋ-ಫೆನ್ಸಿಂಗ್. ಓವರ್-ದಿ-ಏರ್ (OTA) ಸಾಫ್ಟ್ ವೇರ್ ಅಪ್ಡೇಟ್ಗಳು ಇಕೋ ಮತ್ತು ಪವರ್ ಎಂಬ ಎರಡು ರೈಡಿಂಗ್ ಮೋಡ್ಗಳು. ಹಿಲ್-ಹೋಲ್ಡ್ ಅಸಿಸ್ಟ್ ಬೆಟ್ಟ ಹತ್ತುವಾಗ ವಾಹನ ಹಿಂದಕ್ಕೆ ಹೋಗದಂತೆ ತಡೆಯುವ ವ್ಯವಸ್ಥೆ. ಪಾರ್ಕಿಂಗ್ ಅಸಿಸ್ಟ್ (ರಿವರ್ಸ್ ಗೇರ್ ಸೌಲಭ್ಯ) ಮತ್ತು ಕ್ರೂಸ್ ಕಂಟ್ರೋಲ್.
ಸ್ಟೋರೇಜ್ ಮತ್ತು ಸೀಟ್ ವ್ಯವಸ್ಥೆ ಹೇಗಿದೆ?
ದೈನಂದಿನ ಬಳಕೆಗೆ ಅನುಕೂಲವಾಗುವಂತೆ ಆರ್ಬಿಟರ್ ವಿ1 ಸ್ಕೂಟರ್ನಲ್ಲಿ 34 ಲೀಟರ್ಗಳ ಬೃಹತ್ ಅಂಡರ್ಸೀಟ್ ಸ್ಟೋರೇಜ್ (ಡಿಕ್ಕಿ) ನೀಡಲಾಗಿದೆ. ಇದರಲ್ಲಿ ಎರಡು ಹಾಫ್-ಫೇಸ್ ಹೆಲ್ಮೆಟ್ಗಳನ್ನು ಸುಲಭವಾಗಿ ಇಡಬಹುದು. ಅಲ್ಲದೆ, 845 ಎಂಎಂ ಉದ್ದದ ಫ್ಲಾಟ್ ಸೀಟ್ ಹೊಂದಿದ್ದು, ಇಬ್ಬರು ಆರಾಮದಾಯಕವಾಗಿ ಪ್ರಯಾಣಿಸಬಹುದು. ಡ್ಯಾಶ್ಬೋರ್ಡ್ ಕೆಳಗೆ ಸಣ್ಣ ವಸ್ತುಗಳನ್ನು ಇಡಲು ಜಾಗವಿದ್ದು, ಮೊಬೈಲ್ ಚಾರ್ಜಿಂಗ್ಗಾಗಿ USB ಪೋರ್ಟ್ ಅನ್ನು ಕೂಡ ಒದಗಿಸಲಾಗಿದೆ.
ಆರ್ಬಿಟರ್ ವಿ1 ಮತ್ತು ವಿ2 ನಡುವಿನ ಪ್ರಮುಖ ವ್ಯತ್ಯಾಸಗಳೇನು?
ಈ ಎರಡು ವೇರಿಯಂಟ್ಗಳ ನಡುವಿನ ಪ್ರಮುಖ ವ್ಯತ್ಯಾಸವೆಂದರೆ ಬ್ಯಾಟರಿ ಮತ್ತು ರೇಂಜ್. ವಿ1 ಮಾಡೆಲ್ 1.8kWh ಬ್ಯಾಟರಿ (86km ರೇಂಜ್) ಹೊಂದಿದ್ದರೆ, ವಿ2 ಮಾಡೆಲ್ ದೊಡ್ಡದಾದ 3.1kWh ಬ್ಯಾಟರಿ (158km ರೇಂಜ್) ಹೊಂದಿದೆ. ವಿ1 ಬ್ಯಾಟರಿ ಚಾರ್ಜ್ ಆಗಲು 2 ಗಂಟೆ 20 ನಿಮಿಷ ಬೇಕಾದರೆ, ವಿ2 ಮಾಡೆಲ್ಗೆ 4 ಗಂಟೆ 10 ನಿಮಿಷ ಬೇಕಾಗುತ್ತದೆ. ಇವೆರಡನ್ನು ಹೊರತುಪಡಿಸಿದರೆ, ಉಳಿದೆಲ್ಲಾ ಫೀಚರ್ಗಳು, ವಿನ್ಯಾಸ, 14-ಇಂಚಿನ ಮುಂಭಾಗದ ಚಕ್ರ ಮತ್ತು 12-ಇಂಚಿನ ಹಿಂಭಾಗದ ಚಕ್ರ ಸೇರಿದಂತೆ ಎಲ್ಲವೂ ಎರಡು ಸ್ಕೂಟರ್ಗಳಲ್ಲಿ ಸಂಪೂರ್ಣವಾಗಿ ಒಂದೇ ಆಗಿವೆ.
ಇದನ್ನೂ ಓದಿ : ಅಮೆರಿಕ-ಇಸ್ರೇಲ್ ದಾಳಿಯಲ್ಲಿ ಇರಾನ್ನ ಐಆರ್ಜಿಸಿ ವಕ್ತಾರ ಅಲಿ ನೈನಿ ಹತ್ಯೆ!
