ಬೆಂಗಳೂರು: ಇಂಗ್ಲೆಂಡ್ನಲ್ಲಿ ನಡೆಯಲಿರುವ ಪ್ರತಿಷ್ಠಿತ ‘ದಿ ಹಂಡ್ರೆಡ್’ ಟೂರ್ನಿಯ ಹರಾಜು ಪ್ರಕ್ರಿಯೆಯಲ್ಲಿ ಸನ್ರೈಸರ್ಸ್ ಲೀಡ್ಸ್ ಫ್ರಾಂಚೈಸಿಯು ಪಾಕಿಸ್ತಾನದ ಸ್ಪಿನ್ನರ್ ಅಬ್ರಾರ್ ಅಹ್ಮದ್ ಅವರನ್ನು ಖರೀದಿಸಿರುವುದು ಕ್ರಿಕೆಟ್ ವಲಯದಲ್ಲಿ ಭಾರೀ ಸಂಚಲನ ಮೂಡಿಸಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ (ಐಪಿಎಲ್) ಪಾಲ್ಗೊಳ್ಳುವ ಫ್ರಾಂಚೈಸಿಯೊಂದು ವಿದೇಶಿ ಲೀಗ್ನಲ್ಲಿ ಪಾಕಿಸ್ತಾನಿ ಆಟಗಾರನನ್ನು ಖರೀದಿಸಿರುವ ಈ ಬೆಳವಣಿಗೆಯ ಕುರಿತು ಇದೀಗ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (ಬಿಸಿಸಿಐ) ಉಪಾಧ್ಯಕ್ಷ ರಾಜೀವ್ ಶುಕ್ಲಾ ಅವರು ಸ್ಪಷ್ಟನೆ ನೀಡಿದ್ದಾರೆ.
ದಾಖಲೆಯ ಮೊತ್ತಕ್ಕೆ ಪಾಕ್ ಸ್ಪಿನ್ನರ್ ಖರೀದಿ
ಮಾರ್ಚ್ 12ರಂದು ಲಂಡನ್ನ ಪಿಕಾಡಿಲ್ಲಿ ಲೈಟ್ಸ್ನಲ್ಲಿ ನಡೆದ ‘ದಿ ಹಂಡ್ರೆಡ್’ ಟೂರ್ನಿಯ ಹರಾಜು ಪ್ರಕ್ರಿಯೆಯಲ್ಲಿ ಸನ್ರೈಸರ್ಸ್ ಲೀಡ್ಸ್ ತಂಡವು 1,90,000 ಪೌಂಡ್ಗಳ ಬೃಹತ್ ಮೊತ್ತ ನೀಡಿ ಅಬ್ರಾರ್ ಅಹ್ಮದ್ ಅವರನ್ನು ತಮ್ಮ ತೆಕ್ಕೆಗೆ ಸೆಳೆದುಕೊಂಡಿದೆ. ಈ ಹರಾಜು ಪ್ರಕ್ರಿಯೆಯಲ್ಲಿ ಫ್ರಾಂಚೈಸಿಯ ಸಿಇಒ ಕಾವ್ಯಾ ಮಾರನ್ ಹಾಗೂ ಮುಖ್ಯ ಕೋಚ್ ಡೇನಿಯಲ್ ವೆಟ್ಟೋರಿ ಉಪಸ್ಥಿತರಿದ್ದರು. ಟ್ರೆಂಟ್ ರಾಕೆಟ್ಸ್ ತಂಡದೊಂದಿಗೆ ತೀವ್ರ ಪೈಪೋಟಿ ನಡೆಸಿ ಸನ್ರೈಸರ್ಸ್ ಈ ಆಟಗಾರನನ್ನು ಖರೀದಿಸಿದ್ದು, ಐಪಿಎಲ್ ಹಿನ್ನೆಲೆಯುಳ್ಳ ಫ್ರಾಂಚೈಸಿಯೊಂದು ಪಾಕಿಸ್ತಾನಿ ಆಟಗಾರನಿಗೆ ಮಣೆಹಾಕಿರುವುದು ಇತ್ತೀಚಿನ ವರ್ಷಗಳಲ್ಲೇ ಅತ್ಯಂತ ಅಪರೂಪದ ವಿದ್ಯಮಾನವಾಗಿದೆ.
ಭುಗಿಲೆದ್ದ ಆಕ್ರೋಶ, ಎಕ್ಸ್ ಖಾತೆ ಅಮಾನತು
ಪಾಕಿಸ್ತಾನಿ ಆಟಗಾರನನ್ನು ಖರೀದಿಸಿದ ಸನ್ರೈಸರ್ಸ್ ಲೀಡ್ಸ್ ನಡೆಯು ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಇದರ ವಿರುದ್ಧ ವ್ಯಾಪಕ ವಿರೋಧ ವ್ಯಕ್ತವಾಗಿದ್ದು, ಐಪಿಎಲ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ತಂಡವನ್ನು ಬಹಿಷ್ಕರಿಸುವಂತೆಯೂ ಕೆಲವರು ಆಗ್ರಹಿಸಿದ್ದಾರೆ. ಈ ವಿವಾದ ಭುಗಿಲೇಳುತ್ತಿದ್ದಂತೆಯೇ, ‘ಎಕ್ಸ್’ (ಟ್ವಿಟರ್) ಸಾಮಾಜಿಕ ಜಾಲತಾಣದಲ್ಲಿ ಸನ್ರೈಸರ್ಸ್ ಲೀಡ್ಸ್ ತಂಡದ ಅಧಿಕೃತ ಖಾತೆಯು ಅಮಾನತುಗೊಂಡಿದ್ದು, ಸದ್ಯ ಬಳಕೆಗೆ ಲಭ್ಯವಿಲ್ಲ.
ವಿದೇಶಿ ಲೀಗ್ಗಳಲ್ಲಿ ನಮ್ಮ ಹಸ್ತಕ್ಷೇಪವಿಲ್ಲ ಎಂದ ಬಿಸಿಸಿಐ
ಈ ವಿವಾದದ ಕುರಿತು ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿರುವ ಬಿಸಿಸಿಐ ಉಪಾಧ್ಯಕ್ಷ ರಾಜೀವ್ ಶುಕ್ಲಾ, ವಿದೇಶಿ ಲೀಗ್ಗಳಲ್ಲಿ ಫ್ರಾಂಚೈಸಿಗಳ ನಿರ್ಧಾರದಲ್ಲಿ ಬಿಸಿಸಿಐ ಯಾವುದೇ ಪಾತ್ರ ವಹಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ನಮ್ಮ ವ್ಯಾಪ್ತಿಯು ಕೇವಲ ಐಪಿಎಲ್ಗೆ ಮಾತ್ರ ಸೀಮಿತವಾಗಿದೆ, ಐಪಿಎಲ್ ಹೊರತುಪಡಿಸಿ ಬೇರೆ ದೇಶದ ಲೀಗ್ಗಳಲ್ಲಿ ಫ್ರಾಂಚೈಸಿಗಳು ಏನು ಮಾಡುತ್ತವೆ ಎಂಬುದಕ್ಕೂ ನಮಗೂ ಯಾವುದೇ ಸಂಬಂಧವಿಲ್ಲ ಎಂದು ಅವರು ಹೇಳಿದ್ದಾರೆ. ವಿದೇಶಿ ಲೀಗ್ಗಳಲ್ಲಿ ಅವರು ಯಾವ ಆಟಗಾರನನ್ನು ಸೇರಿಸಿಕೊಳ್ಳುತ್ತಾರೆ ಎಂಬುದು ಸಂಪೂರ್ಣವಾಗಿ ಫ್ರಾಂಚೈಸಿಗೆ ಬಿಟ್ಟ ವಿಚಾರ, ಅದರಲ್ಲಿ ನಾವು ಹಸ್ತಕ್ಷೇಪ ಮಾಡಲು ಸಾಧ್ಯವಿಲ್ಲ ಎಂದು ಅವರು ತಿಳಿಸಿದ್ದಾರೆ. ಐಪಿಎಲ್ನಲ್ಲಿ ಪಾಕಿಸ್ತಾನದ ಆಟಗಾರರಿಲ್ಲ, ಹೀಗಾಗಿ ಅವರು ಬೇರೆ ಲೀಗ್ಗಳಲ್ಲಿ ಪಾಕ್ ಆಟಗಾರರನ್ನು ಖರೀದಿಸಿದರೆ ನಮಗೆ ಯಾವುದೇ ಕಳವಳವಿಲ್ಲ ಎಂದು ಶುಕ್ಲಾ ವಿವರಿಸಿದ್ದಾರೆ.
ಅಬ್ರಾರ್ ಅಹ್ಮದ್ ಆಯ್ಕೆಗೆ ವೆಟ್ಟೋರಿ ನೀಡಿದ ಕಾರಣವೇನು?
ಪಾಕಿಸ್ತಾನದ ಸ್ಪಿನ್ನರ್ ಖರೀದಿಯ ಬಗ್ಗೆ ಎದ್ದಿರುವ ಟೀಕೆಗಳ ನಡುವೆಯೇ, ಸನ್ರೈಸರ್ಸ್ ಲೀಡ್ಸ್ ತಂಡದ ಮುಖ್ಯ ಕೋಚ್ ಡೇನಿಯಲ್ ವೆಟ್ಟೋರಿ ತಮ್ಮ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ. ಹರಾಜಿನಲ್ಲಿ ತಮ್ಮ ಮೊದಲ ಆಯ್ಕೆಯಾಗಿದ್ದ ಇಂಗ್ಲೆಂಡ್ ಸ್ಪಿನ್ನರ್ ಆದಿಲ್ ರಶೀದ್ ಅವರನ್ನು ಖರೀದಿಸಲು ಸಾಧ್ಯವಾಗದ ಕಾರಣ ಅಬ್ರಾರ್ ಅಹ್ಮದ್ ಮೊರೆ ಹೋಗಬೇಕಾಯಿತು ಎಂದು ಅವರು ವಿವರಿಸಿದ್ದಾರೆ. ಆದಿಲ್ ರಶೀದ್ ಅವರನ್ನು ಸದರ್ನ್ ಬ್ರೇವ್ ತಂಡ ಖರೀದಿಸಿದಾಗ, ತಂಡ ವಿದೇಶಿ ಸ್ಪಿನ್ನರ್ಗಳತ್ತ ಗಮನಹರಿಸಿತು. ಆ ಪಟ್ಟಿಯಲ್ಲಿ ನಾಲ್ಕೈದು ಆಟಗಾರರಿದ್ದರು, ಅದರಲ್ಲಿ ಅಬ್ರಾರ್ ಕೂಡ ಒಬ್ಬರಾಗಿದ್ದರು. ಅಂತಿಮವಾಗಿ ಅವರನ್ನು ಖರೀದಿಸಲು ಸಾಧ್ಯವಾಗಿದ್ದು ತಂಡಕ್ಕೆ ಖುಷಿ ತಂದಿದೆ ಎಂದು ವೆಟ್ಟೋರಿ ಸ್ಪಷ್ಟಪಡಿಸಿದ್ದಾರೆ.
ಇದನ್ನೂ ಓದಿ : ಎಂ.ಎಸ್. ಧೋನಿ ಇಲ್ಲದೆ ಸಿಎಸ್ಕೆ ಅಪೂರ್ಣ : ಐಪಿಎಲ್ 2026 ‘ಕ್ಯಾಪ್ಟನ್ ಕೂಲ್’ ಪಾಲಿಗೆ ಕೊನೆಯ ಟೂರ್ನಿ
