ನವದೆಹಲಿ: ಜಾಗತಿಕ ಯುದ್ಧಭೂಮಿಯಲ್ಲಿ ಅಗ್ಗದ ದರದ ‘ಸುಸೈಡ್ ಡ್ರೋನ್’ಗಳು (ಆತ್ಮಹತ್ಯಾ ಡ್ರೋನ್) ಭಾರೀ ಸಂಚಲನ ಮೂಡಿಸುತ್ತಿರುವ ಬೆನ್ನಲ್ಲೇ, ಭಾರತ ಕೂಡ ರಕ್ಷಣಾ ವಲಯದಲ್ಲಿ ತನ್ನದೇ ಆದ ಬಲಿಷ್ಠ ಶಕ್ತಿಯೊಂದಿಗೆ ಸಜ್ಜಾಗುತ್ತಿದೆ.
ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷದಲ್ಲಿ ಡ್ರೋನ್ಗಳ ಪ್ರಭಾವ ಹೆಚ್ಚಾಗಿರುವ ಈ ಸಂದರ್ಭದಲ್ಲಿ, ಭಾರತವು ಸ್ವದೇಶಿ ತಂತ್ರಜ್ಞಾನದ ‘ಶೇಷನಾಗ್-150’ (Sheshnaag-150) ಎಂಬ ಡ್ರೋನ್ ಅಭಿವೃದ್ಧಿಯಲ್ಲಿ ಮಹತ್ವದ ಮೈಲಿಗಲ್ಲು ಸಾಧಿಸಿದೆ. ಬೆಂಗಳೂರು ಮೂಲದ ‘ನ್ಯೂಸ್ಪೇಸ್ ರಿಸರ್ಚ್ ಟೆಕ್ನಾಲಜೀಸ್’ (NRT) ಈ ಅತ್ಯಾಧುನಿಕ ಡ್ರೋನ್ ಅನ್ನು ಸಿದ್ಧಪಡಿಸುತ್ತಿದೆ.
ಯುದ್ಧದ ದಿಕ್ಕನ್ನೇ ಬದಲಿಸಬಲ್ಲ ‘ಶೇಷನಾಗ್’
ಶೇಷನಾಗ್-150 ಸಾಮಾನ್ಯ ಡ್ರೋನ್ ಅಲ್ಲ. ಸಾವಿರ ಕಿಲೋಮೀಟರ್ಗೂ ಅಧಿಕ ದೂರ ಸಾಗಿ ಶತ್ರು ನೆಲೆಗಳ ಮೇಲೆ ನಿಖರ ದಾಳಿ ನಡೆಸಬಲ್ಲ ಸಾಮರ್ಥ್ಯ ಇದಕ್ಕಿದೆ. ಸತತ ಐದು ಗಂಟೆಗಳ ಕಾಲ ಹಾರಾಟ ನಡೆಸಬಲ್ಲ ಇದು, 25 ರಿಂದ 40 ಕೆಜಿ ತೂಕದ ಸ್ಫೋಟಕಗಳನ್ನು ಹೊತ್ತೊಯ್ಯಬಲ್ಲದು. ವಿಶೇಷವೆಂದರೆ, ಇದು ‘ಸ್ವಾರ್ಮ್ ಅಟ್ಯಾಕ್’ (ಗುಂಪು ದಾಳಿ) ತಂತ್ರಜ್ಞಾನವನ್ನು ಹೊಂದಿದ್ದು, ಏಕಕಾಲಕ್ಕೆ ನೂರಾರು ಡ್ರೋನ್ಗಳು ಶತ್ರುಗಳ ವಾಯು ರಕ್ಷಣಾ ವ್ಯವಸ್ಥೆಯನ್ನು ದಿಕ್ಕುತಪ್ಪಿಸಿ ಗುರಿ ತಲುಪಬಲ್ಲವು. ಇರಾನ್ನ ‘ಶಾಹೆದ್-136’ ಮತ್ತು ಅಮೆರಿಕದ ‘ಲ್ಯೂಕಾಸ್’ ಡ್ರೋನ್ಗಳಿಗೆ ಪೈಪೋಟಿ ನೀಡುವಂತೆ ಇದನ್ನು ವಿನ್ಯಾಸಗೊಳಿಸಲಾಗಿದೆ.
‘ಆಪರೇಷನ್ ಸಿಂದೂರ’ ಕಲಿಸಿದ ಪಾಠ
ಇತ್ತೀಚೆಗೆ ನಡೆದ ‘ಆಪರೇಷನ್ ಸಿಂದೂರ’ ಕಾರ್ಯಾಚರಣೆಯ ವೇಳೆ ಪಾಕಿಸ್ತಾನವು ಭಾರತದ ವಾಯು ರಕ್ಷಣಾ ವ್ಯವಸ್ಥೆಯನ್ನು ಪರೀಕ್ಷಿಸಲು ನೂರಾರು ಅಗ್ಗದ ಡ್ರೋನ್ಗಳನ್ನು ಬಳಸುವ ಮೂಲಕ ಯುದ್ಧದ ಹೊಸ ಆಯಾಮವನ್ನು ತೋರಿಸಿಕೊಟ್ಟಿತ್ತು. ಇದಕ್ಕೆ ಪ್ರತಿಯಾಗಿ ಭಾರತವು ಅತ್ಯಾಧುನಿಕ ದಾಳಿ ಡ್ರೋನ್ಗಳನ್ನು ಬಳಸಿ ಪಾಕಿಸ್ತಾನದ ರೇಡಾರ್ ಮತ್ತು ರಕ್ಷಣಾ ಘಟಕಗಳನ್ನು ಯಶಸ್ವಿಯಾಗಿ ಧ್ವಂಸಗೊಳಿಸಿತ್ತು. ಈ ಅನುಭವದ ಆಧಾರದ ಮೇಲೆ, ಭಾರತೀಯ ಸೇನೆಯು ಈಗ ಸುಸೈಡ್ ಡ್ರೋನ್ಗಳ ಅಭಿವೃದ್ಧಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿದೆ.
ವೈಶಿಷ್ಟ್ವವೇನು?
ಶೇಷನಾಗ್-150 ಡ್ರೋನ್ನ ವಿಶೇಷತೆಯೆಂದರೆ ಅದರ ಒಳಗಿರುವ ‘ಅಲ್ಗಾರಿದಮ್’ ಅಥವಾ ಸಾಫ್ಟ್ವೇರ್. ಇದು ಜಿಪಿಎಸ್ ಅಥವಾ ಸ್ಯಾಟಲೈಟ್ ಸಿಗ್ನಲ್ಗಳು ಇಲ್ಲದ ಪರಿಸರದಲ್ಲೂ ಕಣ್ಣಿಗೆ ಕಂಡ ದೃಶ್ಯಗಳ ಆಧಾರದ ಮೇಲೆ (Visual Navigation) ಸ್ವತಂತ್ರವಾಗಿ ದಾರಿ ಹುಡುಕಿಕೊಂಡು ಹೋಗಿ ದಾಳಿ ಮಾಡುವ ಸಾಮರ್ಥ್ಯ ಹೊಂದಿದೆ. ಇದು ಶತ್ರುಗಳ ಜ್ಯಾಮಿಂಗ್ ತಂತ್ರಜ್ಞಾನವನ್ನೂ ಮೀರಿ ಕೆಲಸ ಮಾಡಬಲ್ಲದು. ಕಡಿಮೆ ವೆಚ್ಚದಲ್ಲಿ ಅತಿ ಹೆಚ್ಚು ಹಾನಿ ಮಾಡುವ ಈ ಡ್ರೋನ್ಗಳು ಭವಿಷ್ಯದ ಯುದ್ಧಗಳಲ್ಲಿ ಭಾರತದ ಅತ್ಯಂತ ಶಕ್ತಿಶಾಲಿ ಅಸ್ತ್ರಗಳಾಗಲಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ : ದುಬೈ ಅಮೆರಿಕ ರಾಯಭಾರ ಕಚೇರಿ ಬಳಿ ಭೀಕರ ಡ್ರೋನ್ ದಾಳಿ : ಗಲ್ಫ್ ರಾಷ್ಟ್ರಗಳಲ್ಲಿ ಹೆಚ್ಚಿದ ಆತಂಕ
