ಇಸ್ಲಾಮಾಬಾದ್: ಪಾಕಿಸ್ತಾನದಲ್ಲಿ ಬಂಡುಕೋರರ ಅಬ್ಬರ ಹೆಚ್ಚಳವಾಗಿದೆ. ತನ್ನ ವಶದಲ್ಲಿರುವ ಪಾಕಿಸ್ತಾನದ ಏಳು ಸೈನಿಕರನ್ನು ಬಿಡುಗಡೆ ಮಾಡಲು ನಿಷೇಧಿತ ಬಲೂಚ್ ಲಿಬರೇಷನ್ ಆರ್ಮಿ (BLA) ಇದೀಗ ಪಾಕ್ ಸರ್ಕಾರಕ್ಕೆ ಏಳು ದಿನಗಳ ಗಡುವು ನೀಡಿದೆ. ಈ ಅವಧಿಯೊಳಗೆ ಕೈದಿಗಳ ವಿನಿಮಯ ಪ್ರಕ್ರಿಯೆಗೆ ಒಪ್ಪದಿದ್ದರೆ ಸೈನಿಕರಿಗೆ ಮರಣದಂಡನೆ ವಿಧಿಸುವುದಾಗಿ ಎಚ್ಚರಿಸಿದೆ. ಬಿಎಲ್ಎ ಸಂಘಟನೆಯ ಮಾಧ್ಯಮ ವಿಭಾಗವಾದ ‘ಹಕ್ಕಲ್’ ಈ ಕುರಿತು ವಿಡಿಯೋ ಸಂದೇಶವೊಂದನ್ನು ಬಿಡುಗಡೆ ಮಾಡಿದ್ದು, ಗಡುವು ಮುಗಿಯಲು ಇನ್ನು ಕೇವಲ 6 ದಿನಗಳು ಮಾತ್ರ ಬಾಕಿ ಎಂದು ತಿಳಿಸಿದೆ.
ತನ್ನ ‘ಆಪರೇಷನ್ ಹೇರೋಫ್’ ಕಾರ್ಯಾಚರಣೆಯ ಎರಡನೇ ಹಂತದಲ್ಲಿ ಒಟ್ಟು 17 ಭದ್ರತಾ ಸಿಬ್ಬಂದಿಯನ್ನು ಸೆರೆಹಿಡಿದಿರುವುದಾಗಿ ಬಲೂಚ್ ಲಿಬರೇಷನ್ ಆರ್ಮಿ ಹೇಳಿದೆ. ಇವರಲ್ಲಿ 10 ಮಂದಿ ಸ್ಥಳೀಯ ಬಲೋಚ್ ಜನಾಂಗಕ್ಕೆ ಸೇರಿದವರಾಗಿದ್ದರಿಂದ ಮತ್ತು ಅವರು ಸ್ಥಳೀಯ ಪೊಲೀಸರೊಂದಿಗೆ ಗುರುತಿಸಿಕೊಂಡಿದ್ದರಿಂದ, ಎಚ್ಚರಿಕೆ ನೀಡಿ ಬಿಡುಗಡೆ ಮಾಡಲಾಗಿದೆ ಎಂದು ಸಂಘಟನೆ ಹೇಳಿಕೊಂಡಿದೆ. ಆದರೆ, ಉಳಿದ 7 ಮಂದಿ ಪಾಕಿಸ್ತಾನಿ ಸೇನೆಯ ನಿಯಮಿತ ತುಕಡಿಯ ಸದಸ್ಯರಾಗಿದ್ದು, ಅವರನ್ನು ಪ್ರಸ್ತುತ ಸಂಘಟನೆಯು ತನ್ನ ಒತ್ತೆಯಲ್ಲಿ ಇರಿಸಿಕೊಂಡಿದೆ.
ಬಂಧಿತ 7 ಸೈನಿಕರ ವಿರುದ್ಧ ಬಲೂಚ್ ಲಿಬರೇಷನ್ ಆರ್ಮಿ ತನ್ನದೇ ಆದ ‘ಬಲೂಚ್ ರಾಷ್ಟ್ರೀಯ ನ್ಯಾಯಾಲಯ’ದಲ್ಲಿ ವಿಚಾರಣೆ ನಡೆಸಿದೆ ಎಂದು ವರದಿಯಾಗಿದೆ. ಈ ಸೈನಿಕರ ಮೇಲೆ ನಾಗರಿಕರ ವಿರುದ್ಧ ಹಿಂಸಾಚಾರ ನಡೆಸಿರುವುದು, ಬಲೋಚ್ ಜನರ ನಾಪತ್ತೆ ಪ್ರಕರಣಗಳಲ್ಲಿ ಭಾಗಿಯಾಗಿರುವುದು ಮತ್ತು ಜನಾಂಗೀಯ ಹತ್ಯೆಗೆ ಸಹಕರಿಸಿದ ಗಂಭೀರ ಆರೋಪಗಳನ್ನು ಹೊರಿಸಲಾಗಿದೆ. ವಿಚಾರಣೆಯ ವೇಳೆ ಸಾಕ್ಷ್ಯಗಳನ್ನು ಮಂಡಿಸಿ, ಸೈನಿಕರಿಂದ ತಪ್ಪೊಪ್ಪಿಗೆ ಹೇಳಿಕೆಗಳನ್ನು ಪಡೆಯಲಾಗಿದೆ ಎಂದು ಬಿಎಲ್ಎ ತಿಳಿಸಿದೆ.
ಕೈದಿಗಳ ವಿನಿಮಯಕ್ಕೆ ಬಿಎಲ್ಎ ಪ್ರಸ್ತಾಪ
ಪಾಕಿಸ್ತಾನ ಸರ್ಕಾರವು ಒಂದೋ ತನ್ನ ಸೈನಿಕರ ಜೀವ ಉಳಿಸಿಕೊಳ್ಳುವ ಬಗ್ಗೆ ಯೋಚಿಸಬೇಕು ಅಥವಾ ಎಂದಿನಂತೆ ಮೌನ ವಹಿಸುವ ಮೂಲಕ ತನ್ನ ಯೋಧರ ಸಾವಿಗೆ ಕಾರಣವಾಗಬೇಕು ಎಂದು ಬಂಡುಕೋರರು ಹೇಳಿದ್ದಾರೆ. ಒಂದು ವೇಳೆ ಪಾಕಿಸ್ತಾನ ಸರ್ಕಾರವು 7 ದಿನಗಳ ಒಳಗೆ ಅಧಿಕೃತವಾಗಿ ಕೈದಿಗಳ ವಿನಿಮಯಕ್ಕೆ ಒಪ್ಪಿಕೊಂಡರೆ, ಪಾಕಿಸ್ತಾನದ ಸೆರೆಮನೆಯಲ್ಲಿರುವ ಬಲೂಚ್ ಕೈದಿಗಳ ಬದಲಾಗಿ ಈ ಸೈನಿಕರನ್ನು ಬಿಡುಗಡೆ ಮಾಡುವುದಾಗಿ ಬಿಎಲ್ಎ ತಿಳಿಸಿದೆ. ಈ ಹಿಂದೆ ಕೂಡ ಇಂತಹ ಪ್ರಸ್ತಾಪಗಳನ್ನು ಮಾಡಲಾಗಿತ್ತು, ಆದರೆ ಇಸ್ಲಾಮಾಬಾದ್ ಸರ್ಕಾರ ಅದನ್ನು ನಿರ್ಲಕ್ಷಿಸಿತ್ತು ಎಂದು ಸಂಘಟನೆ ಆರೋಪಿಸಿದೆ.
ಬಲೂಚಿಸ್ತಾನದಲ್ಲಿ ತನ್ನ ಉಪಸ್ಥಿತಿಯನ್ನು ಪಾಕಿಸ್ತಾನವು ಸದಾ ಸಮರ್ಥಿಸಿಕೊಳ್ಳುತ್ತಾ ಬಂದಿದೆ ಮತ್ತು ಬಿಎಲ್ಎ ಸಂಘಟನೆಯನ್ನು ಭಯೋತ್ಪಾದಕ ಸಂಘಟನೆ ಎಂದು ಘೋಷಿಸಿದೆ. ಅಮೆರಿಕ ಮತ್ತು ಬ್ರಿಟನ್ ಸೇರಿದಂತೆ ಹಲವು ದೇಶಗಳು ಈಗಾಗಲೇ ಬಿಎಲ್ಎ ಅನ್ನು ನಿಷೇಧಿಸಿವೆ. ಆದರೆ, ಸೈನಿಕರನ್ನು ಒತ್ತೆಯಾಳಾಗಿ ಇರಿಸಿಕೊಂಡಿರುವ ಈ ಘಟನೆಯು ಪಾಕಿಸ್ತಾನದ ಸೇನೆ ಮತ್ತು ಗುಪ್ತಚರ ವಿಭಾಗಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಸದ್ಯ ಈ ವಿಚಾರವಾಗಿ ಪಾಕಿಸ್ತಾನ ಸರ್ಕಾರವಾಗಲಿ ಅಥವಾ ಸೇನೆಯಾಗಲಿ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
ಇದನ್ನೂ ಓದಿ : ಅಲೆಕ್ಸಿ ನವಾಲ್ನಿ ಸಾವಿಗೆ ಕಾರಣವಾಯ್ತಾ ‘ಕಪ್ಪೆ ವಿಷ’? ರಷ್ಯಾ ವಿರುದ್ಧ ಐರೋಪ್ಯ ರಾಷ್ಟ್ರಗಳ ಗಂಭೀರ ಆರೋಪ!
