ಎಪ್ಸ್ಟೀನ್ ಸಾವಿಗೂ ಒಂದು ದಿನ ಮುನ್ನವೇ ಸಿದ್ಧವಾಗಿತ್ತೇ ಅಧಿಕೃತ ಹೇಳಿಕೆ? ಅಮೆರಿಕದ ಗುಪ್ತ ಕಡತಗಳಲ್ಲಿದೆ ಸ್ಫೋಟಕ ಮಾಹಿತಿ

ನ್ಯೂಯಾರ್ಕ್: ಜಗತ್ತನ್ನೇ ಬೆಚ್ಚಿಬೀಳಿಸಿದ್ದ ಹೈ-ಪ್ರೊಫೈಲ್ ಲೈಂಗಿಕ ಅಪರಾಧಿ ಜೆಫ್ರಿ ಎಪ್ಸ್ಟೀನ್ ಜೈಲಿನಲ್ಲಿ ನಿಗೂಢವಾಗಿ ಮೃತಪಟ್ಟ ಘಟನೆಗೆ ಸಂಬಂಧಿಸಿದಂತೆ ಈಗ ಅಚ್ಚರಿಯ ಮಾಹಿತಿಯೊಂದು ಹೊರಬಿದ್ದಿದೆ. ಎಪ್ಸ್ಟೀನ್ ಸಾವನ್ನಪ್ಪುವ ಒಂದು ದಿನ ಮೊದಲೇ ಆತನ ಸಾವಿನ ಕುರಿತಾದ ಅಧಿಕೃತ ಪತ್ರಿಕಾ ಪ್ರಕಟಣೆಯ ಕರಡು ಪ್ರತಿ ಸಿದ್ಧವಾಗಿತ್ತು ಎಂಬ ಅಂಶ ಅಮೆರಿಕದ ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿರುವ ಹೊಸ ಕಡತಗಳಿಂದ ಬೆಳಕಿಗೆ ಬಂದಿದೆ. ಇದು ಎಪ್ಸ್ಟೀನ್ ಸಾವಿನ ಸುತ್ತಲಿನ ನಿಗೂಢತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಸಾವಿನ ಮುನ್ನವೇ ಸಿದ್ಧಗೊಂಡಿತ್ತು ಪ್ರಕಟಣೆ

ಬಿಡುಗಡೆಯಾಗಿರುವ ದಾಖಲೆಗಳ ಪ್ರಕಾರ, ಆಗಸ್ಟ್ 10, 2019 ರಂದು ಎಪ್ಸ್ಟೀನ್ ಮ್ಯಾನ್‌ಹ್ಯಾಟನ್‌ನ ಜೈಲು ಕೋಣೆಯಲ್ಲಿ ಶವವಾಗಿ ಪತ್ತೆಯಾಗಿದ್ದ. ಆದರೆ, ಆತನ ಸಾವಿನ ಬಗ್ಗೆ ಅಂದಿನ ಯುಎಸ್ ಅಟಾರ್ನಿ ಜೆಫ್ರಿ ಬರ್ಮನ್ ಅವರ ಹೆಸರಿನಲ್ಲಿ ನೀಡಲಾದ ಅಧಿಕೃತ ಹೇಳಿಕೆಯ ಕರಡು ಪ್ರತಿಯು ಆಗಸ್ಟ್ 9, 2019ರ ದಿನಾಂಕವನ್ನು ಹೊಂದಿದೆ. ಅಂದರೆ, ಎಪ್ಸ್ಟೀನ್ ಸಾಯುವ ಕನಿಷ್ಠ 24 ಗಂಟೆಗಳ ಮೊದಲೇ ಆತ ಜೈಲಿನಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾನೆ ಎಂಬ ಒಕ್ಕಣೆಯಿದ್ದ ಪತ್ರ ಸಿದ್ಧವಾಗಿತ್ತು ಎಂಬುದು ಈಗ ತೀವ್ರ ಚರ್ಚೆಗೆ ಕಾರಣವಾಗಿದೆ.

ಕಿತ್ತಳೆ ಬಣ್ಣದ ಉಡುಗೆಯ ನಿಗೂಢ ವ್ಯಕ್ತಿ ಯಾರು?

ಎಪ್ಸ್ಟೀನ್ ಸಾವಿನ ಹಿಂದಿನ ರಾತ್ರಿ ಜೈಲಿನ ಕಣ್ಗಾವಲು ಕ್ಯಾಮೆರಾಗಳಲ್ಲಿ ಸೆರೆಯಾದ ದೃಶ್ಯಗಳು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿವೆ. ಆಗಸ್ಟ್ 9 ರ ರಾತ್ರಿ ಸುಮಾರು 10:39ರ ಸುಮಾರಿಗೆ ಕಿತ್ತಳೆ ಬಣ್ಣದ ಉಡುಪು ಧರಿಸಿದ ವ್ಯಕ್ತಿಯೊಬ್ಬ ಎಪ್ಸ್ಟೀನ್ ಇದ್ದ ಸೆಲ್‌ನತ್ತ ಚಲಿಸುತ್ತಿರುವುದು ಕಂಡುಬಂದಿದೆ. ನ್ಯಾಯಾಂಗ ಇಲಾಖೆಯು ಆತ ಕಿತ್ತಳೆ ಬಣ್ಣದ ಬಟ್ಟೆ ಹಿಡಿದಿದ್ದ ಜೈಲು ಸಿಬ್ಬಂದಿ ಎಂದು ಹೇಳುತ್ತಿದ್ದರೆ, ಸ್ವತಂತ್ರ ವಿಶ್ಲೇಷಕರು ಆತ ಕೈದಿಯಂತೆ ಕಾಣುತ್ತಿದ್ದಾನೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಅಂತಹ ಅಕಾಲಿಕ ಸಮಯದಲ್ಲಿ ಕೈದಿಯೊಬ್ಬ ಅತ್ತ ಸಾಗುವುದು ಅಸಹಜ ಎಂದು ಜೈಲು ಸಿಬ್ಬಂದಿಯೇ ಒಪ್ಪಿಕೊಂಡಿರುವುದು ಸಂಶಯಕ್ಕೆ ಎಡೆಮಾಡಿಕೊಟ್ಟಿದೆ.

ಮರಣೋತ್ತರ ಪರೀಕ್ಷೆ ವರದಿ

ಎಫ್‌ಬಿಐ ಬಿಡುಗಡೆ ಮಾಡಿರುವ ವರ್ಗೀಕೃತವಲ್ಲದ ವರದಿಯಲ್ಲಿ ಈ ಹಿಂದೆಂದೂ ನೋಡಿರದ ಕೆಲವು ಫೋಟೋಗಳನ್ನು ಸೇರಿಸಲಾಗಿದೆ. ಇವುಗಳಲ್ಲಿ ವೈದ್ಯಕೀಯ ಸಿಬ್ಬಂದಿ ಎಪ್ಸ್ಟೀನ್‌ನನ್ನು ಬದುಕಿಸಲು ಪ್ರಯತ್ನಿಸುತ್ತಿರುವ ದೃಶ್ಯಗಳಿವೆ. ವಿಶೇಷವೆಂದರೆ, ಆಸ್ಪತ್ರೆಯ ಕೆಲವು ದಾಖಲೆಗಳಲ್ಲಿ ಜೆಫ್ರಿ (Jeffrey) ಎಂಬ ಹೆಸರನ್ನು ‘ಜೆಫರಿ’ (Jeffery) ಎಂದು ತಪ್ಪಾಗಿ ಬರೆಯಲಾಗಿದೆ. ಮರಣೋತ್ತರ ಪರೀಕ್ಷೆಯ ವರದಿಯು ಆತನ ಕುತ್ತಿಗೆಯ ಭಾಗದ ಕಾರ್ಟಿಲೆಜ್ ಮೂಳೆಗಳು ಮುರಿದಿರುವುದನ್ನು ದೃಢಪಡಿಸಿದ್ದು, ಇದು ಆತ್ಮಹತ್ಯೆಯೋ ಅಥವಾ ಕೊಲೆಯೋ ಎಂಬ ವಾದಕ್ಕೆ ಈ ಹೊಸ ಕಡತಗಳು ಮರುಜೀವ ನೀಡಿವೆ.

ಎಪ್ಸ್ಟೀನ್ ಸಾವು ಅತ್ಯಂತ “ಗೊಂದಲಕಾರಿ” ಎಂದು ಬಣ್ಣಿಸಿರುವ ಅಂದಿನ ತನಿಖಾಧಿಕಾರಿಗಳು, ಆತನ ಸಾವಿನಿಂದಾಗಿ ಸಂತ್ರಸ್ತರಿಗೆ ನ್ಯಾಯ ಸಿಗುವ ಹಾದಿ ಕಠಿಣವಾಯಿತು ಎಂದು ಅಭಿಪ್ರಾಯಪಟ್ಟಿದ್ದರು. ಅಪ್ರಾಪ್ತರ ಲೈಂಗಿಕ ಸಾಗಣೆ ಮತ್ತು ಸಂಚಿನ ಕುರಿತಾದ ಈ ಬೃಹತ್ ತನಿಖೆಯು ಎಪ್ಸ್ಟೀನ್ ಸಾವಿನಿಂದಾಗಿ ದೊಡ್ಡ ಹಿನ್ನಡೆ ಅನುಭವಿಸಿತ್ತು ಎನ್ನುವುದು ಗಮನಾರ್ಹ.

ಇದನ್ನೂ ಓದಿ : ಕಾನ್ಪುರದಲ್ಲಿ ತಂಬಾಕು ಉದ್ಯಮಿ ಪುತ್ರನ ಲಂಬೋರ್ಗಿನಿ ಅಬ್ಬರ | ಬೈಕ್ ಸವಾರನ ಮೇಲೆ ಹರಿದ ಐಷಾರಾಮಿ ಕಾರು!